Evita lil min jipprova jissendika biex ma jsibx xi jgħid fuqek man-nies.
kategorija
il-karattru
Nies ta’ bla fehma ħajrhom saħta u reħma.
Min irid kollox kif irid hu, jew tgħaddi tiegħu jew jeħodha kontra l-oħrajn u joqgħod jitħassar lilu nnifsu. Reħma tfisser mogħdrija.
Nieqes f’tulu, żejjed f’qandulu.
Din il-persuna tassew arroganti, minkejja li qasira.
Miżbla qatt ma fieħet.
Tistenniex ġid mingħand persuna ħażina jew mimlija vizzji.
Mitt bniedem mitt fehma.
Kulħadd għandu l-opinjoni tiegħu.
Miskin, fqir u għakkar, u jrid iniggeż il-ħmar.
Qiegħed f'sitwazzjoni ħażina u xorta waħda jdejjaq lil ħaddieħor.
Min xammha għammha.
Dak li joqgħod iġib ħafna skużi biex ma jerfax ir-responsabbiltà tiegħu, huwa ħati. Għammha tfisser zijuha.
Min titrabba miegħu tkun taf l-għada tiegħu.
Meta titrabba ma' xi ħadd, il-karattru tiegħu tkun tafu sew. Għada tfisser drawwa.
Min tħobbu u tamah, dak li jagħmel ma tarahx.
Lil min tħobbu, ma tarax id-difetti tiegħu u l-ħażin li jagħmel. Tamah tfisser tħobbu.
Min kull miżbla għandu qoffa.
Kulħadd għandu l-preferenzi tiegħu.
Minn ħanut wieħed la tixtrix; minn triq waħda la tgħaddix.
Tiħux id-drawwa li tagħmel dejjem l-istess affarijiet bl-istess mod, biex min irid jissindikak u jqasqas fuqek ma tpaxxihx.
Minn ġild il-bagħal mejjet tbiegħed u aktar u aktar jekk hu ħaj.
In-nies pezzakustjoni qis li taħrabhom.
Minn bassa jogħxa u minn fiswa miet.
Bniedem ta' karattru dgħajjef jibża' minn kollox u ma jagħmilx kuraġġ.
Min ma joħroġx mill-bieb joħroġ mit-tieqa.
Min jilħaqlu moħħu jirnexxilu joħroġ minn sitwazzjoni skomda jew jasal fejn irid.
Min ma jirranġax it-toqba ż-żgħira jkollu jirranġa l-kbira.
Għandek tegħleb il-vizzji tiegħek u tirranġa d-dgħufijiet tal-karattru tiegħek mill-aktar fis possibbli, għax wara ssibha ħafna iżjed diffiċli.
Min ma jiflaħx ratal ma jiflaħx wiċna.
Min ma jiflaħx għal ftit żgur li mhux kapaċi jiflaħ għal ħafna. Wiċna tirreferi għall-ħsad tal-uċuħ tar-raba'.
Min ma jbossx jifsa.
Hemm min jagħmel xi ħaġa ħażina u jaraha kulħadd, u hemm min jagħmel ħafna agħar minn taħt bla ma jarah ħadd.
Min joqgħod moxxu jaqa’ taħt dwiefer l-oħrajn.
Min joqgħod għal kollox u ma jiddefendix ruħu, jagħmlu li jridu bih l-oħrajn.
Min jogħla żżejjed jieħu sabta kbira.
Aktar ma persuna tilħaq u jkollha awtorità, aktar hemm riskju li titlef kollox u terġa’ lura għal li kienet b’sens ta’ umiljazzjoni, speċjalment jekk titkabbar.
Min jixrob bewlu jieħu lewnu.
Min jagħmilha ma' kumpanija ħażina, jieħu l-influwenzi ħżiena kollha.
Min jitwieled taħt stilla tal-Lvant, ħajtu tkun kollha hena u kant.
Superstizzjoni li dawk li jitwieldu meta l-istilel ikunu fil-Lvant, ix-xorti tidħqilhom u jgħixu ħajja sabiħa.
Min jitwieled tond ma jmutx kwadru.
Il-karattru tal-bniedem ma jinbidel qatt.
Min jittama fil-ħaj, jew bla sens jew bla raj.
Min jittama f'ħaddieħor u jserraħ fuqu jiżbalja; tiddependi fuq ħadd. Bla raj tfisser bla volontà.
Min jitkaża jaqa’ fil-każa.
Min jitkaża bl-iżbalji ta' ħaddieħor, jispiċċa jagħmel l-istess żball huwa stess.
Min jitħallat man-nuħħala t-tiġieġa tgerfxu.
Min jagħmilha ma' nies ta' karattru ħażin jitħawwad.
Min jitgħammed bis-snien jerġa’ għal fejn kien.
Diffiċli ħafna wieħed jinbidel għall-aħjar iktar tard fil-ħajja, bħal min jitgħammed kbir.
Min jiskonġra jrid ikun pur.
Ara li jekk ser tikkritika lil ħaddieħor fuq xi difett ma jkollokx inti stess l-istess difett. Tiskonġra tfisser teżorċizza.
Min jimxi max-xenguli wara erbgħin pass jixxengel bħalu.
Min jagħmilha ma' nies ta' karattru ħażin, jieħu l-influwenza ħażina u jsir bħalhom.
Min jigdeb u jobgħod, jagħmel deni lilu nnifsu u lil min jemmnu.
Min jigdeb u jaqla' l-qlajjiet jagħmel ħsara kbira lilu nnifsu u lil ta' madwaru.
Min jiftaħar jaqa’ l-baħar.
Min jiftaħar jaqa' għaċ-ċajt.
Min jiftaħar b’rixu ma jtirx.
Min jiftaħar ma jfissirx li dak li qed jiftaħar bih huwa veru.
Min jibża’ mill-għarnuq ma jiżrax ful.
Min ma jridx li n-nies jgħidu bih, m'għandux jgħid fuq in-nies.
Min jibża’ ma jagħmilx flus.
Min jibża' ma jasal imkien għax mhu kapaċi għal xejn.
Min jibża’, jidħol taħt is-sodda.
Min jibża' ma jasal imkien għax mhu kapaċi għal xejn.
Min jersaq ħada l-ġmied jiġġemmed.
Min jagħmilha ma' nies ta' karattru ħażin, jieħu l-influwenza ħażina u jsir bħalhom. Ħada tfisser ħdejn.
Min jerfa’ għalik, jerfa’ għal ħaddieħor.
Min jagħti fastidju sesswali (= jerfa') lilek, ibqa' ċert li jagħtih lil ħaddieħor ukoll.
Min jeqleq żejjed fl-aħħar isibha xortih.
Min qatt ma jikkuntenta b'xejn sa fl-aħħar tasal xi ħaġa li togħġbu. Jeqleq tfisser jilmenta.
Min jehreż bil-mehrież tan-nisa u tal-logħob bil-liega f’idu jibqa’.
Min jgħix ħajja promiskwa u jkollu l-vizzju tal-logħob tal-azzard (= logħob bil-liega) għad jispiċċa f'ħafna inkwiet.
Min jerfa’ qofftu mhux pastaż.
Min jagħmel xogħlu u jieħu ħsieb l-affarijiet tiegħu m'għandux għalfejn iħossu skomdu jew jistħi. Fl-imgħoddi, il-pastaż kien reffiegħ li jdur mat-toroq jiffitta lin-nies biex għal ftit soldi jġorrilhom sad-dar il-qfief u tagħbijiet oħra. Il-pastaż kien bla manjieri,...
Min jerfa’ sorrtu mhux pastaż.
Min jagħmel xogħlu u jieħu ħsieb l-affarijiet tiegħu m'għandux għalfejn iħossu skomdu jew jistħi. Fl-imgħoddi, il-pastaż kien reffiegħ li jdur mat-toroq jiffitta lin-nies biex għal ftit soldi jġorrilhom sad-dar il-qfief u tagħbijiet oħra. Il-pastaż kien bla manjieri,...
Min jaħlef wisq ftit hu mwennes.
Min għandu vizzju jaħlef huwa mistmerr.
Min jagħmilhielek darba, jagħmilhielek mitt darba.
Min jagħmillek azzjoni ħażina darba, jerġa' jagħmilhielek darb'oħra; mela warrbu u tafdahx.
Min jagħmilha maz-zopp, għeluq is-sena jsir zopp bħalu.
Min jagħmilha ma' nies ta' karattru ħażin, jieħu l-influwenza ħażina u jsir bħalhom.
Min jagħmilha man-nuħħala t-tiġieġa tgerfxu.
Min jagħmilha ma' nies ta' karattru ħażin jitħawwad.
Min irid iqarraq bik ħaġa b’oħra jurik żgur.
In-nies li jridu jqarrqu bik minn kollox jagħmlu biex jaslu fejn iridu.
Min iraqqad miegħu l-klieb, lill-briegħed jiftħilhom il-bieb.
It-tip ta' kumpanija li tagħmilha magħha tinfluwenzak ħafna.
Min iqalleb jitqalleb.
Min il-ħin kollu jdawwar fehmtu għax ma jkollux l-ideat ċari, jispiċċa joħloq l-inkwiet.
Min imiss iż-żift jiċċappas.
Min jagħmilha ma' nies ta' karattru ħażin, jieħu l-influwenza ħażina u jsir bħalhom.
Min iħobbok jista’ jkollok fommok jinten.
Min tassew iħobbok, jibqa' jħobbok minkejja d-difetti tiegħek.
Min iħobb it-tibkir raġel isir.
Min ibakkar (= iqum kmieni) għax-xogħol isir bniedem iddixxiplinat.
Min iħobbha nejja u min iħobbha misjura.
Kulħadd bil-gosti tiegħu.
Min iħammel id-demel jitħammeġ bih.
Min jagħmilha ma' nies ta' karattru ħażin, jieħu l-influwenza ħażina u jsir bħalhom.
Min iħalli leħitu f’idejn it-tfal inittfuhielu.
Min ikun wisq twajjeb ma' wliedu, jagħmlu li jridu bih.
Min iħalli leħitu f’idejn in-nies inittfuhielu.
Min ikun wisq twajjeb man-nies, kulħadd jagħmel li jrid bih.
Min jgħid li ma jarrax, jarra dak il-ħin.
Min mingħalih perfett u ma jiħux żbalji (= ma jarrax), il-ħajja malajr tqiegħdu f'postu u turih li mhux veru.
Min jgħammar qalb il-ħadid jiċċappas bis-sadid.
Min jagħmilha ma' nies ta' karattru ħażin, jieħu l-influwenza ħażina u jsir bħalhom.
Min idarri jħarri.
Jekk ma tgħinx lil ħaddieħor jegħleb il-vizzji tiegħu, tkun qed tkun kompliċi mad-deni li jagħmel lilu nnifsu. Iħarri tfisser iħassar.
Min hu tajjeb minn qaddisu jibkih sal-ġebel ta’ pajjiżu.
Bniedem qalbu tajba jkun maħbub ħafna minn kulħadd.
Min hu mgħammed bis-snien trid tibża’ minnu.
Diffiċli ħafna wieħed jinbidel għall-aħjar iktar tard fil-ħajja, bħal min jitgħammed kbir.
Min għandu wiċċu għandu lil żewġu.
Min ma jistħix u jagħmel wiċċu jieħu li jrid.
Min għandu sebgħu dritt minn xejn ma jibża’.
Min hu onest u ġust m'għandu għalfejn jibża' minn ħadd u minn xejn.
Min għandu l-uġigħ ibati bl-irjieħ.
Min ikun marid ikun ibati iżjed bil-burdati (= l-irjieħ).
Min għandu l-għali jbigħu.
Min jgħir ma jkunx jiflaħ jara lil ħaddieħor aħjar minnu; problema tiegħu mhux tiegħek.
Min għandu l-għali jkompli jżidu.
Min jgħir ma jkunx jiflaħ jara lil ħaddieħor aħjar minnu; problema tiegħu mhux tiegħek.
Mill-għira taħbel il-ħanżira.
L-għira tant hi qawwija li ġġegħelna naħsbu u naraw affarijiet li ma jkunux veri.
Mill-flus u mill-qdusija trid taqta’ ħamsin fil-mija.
Min jiftaħar bi flusu jew jilgħabha tal-qaddis temmnux, għax l-apparenza tqarraq bik.
Mhux min jiftaħar għandu l-flus.
Min għandu tassew il-flus, ma jippruvax jimpressjona bil-ftaħir għax m'għandux għalfejn.
Mhux l-imġienen kollha jinsabu ta’ Frankuni.
Hawn ħafna nies imġienen madwarna u lanqas biss nafu. Frankuni tfisser Villa Franconi, bini residenzjali li ntuża bħala sptar mentali mill-1835 sal-1861.
Mhux l-ilbies jagħmel in-nies.
Mhux kif tidher minn barra b'dak li tilbes li jgħodd, iżda l-karattru.
Mhux kull min jaħsel wiċċu jsir sabiħ.
Bniedem li għandu karattru diffiċli jew ħażin ma jitranġa qatt.
Mhux kulħadd xorta.
Kulħadd għandu l-karattru u l-gosti tiegħu.
Mhux iblah daqskemm hu ikrah.
Xi nies taħsibhom boloh minn kif jidhru, iżda ma jkunx il-każ.
Mhux dik li tikxef id-dublett biss tissejjaħ qaħba.
In-nies diżonesti kullimkien issibhom, anke min mingħalik mhux t'hekk.
Mhux il-libsa li tagħmel ir-raħeb.
L-apparenza tqarraq bik. Raħeb tfisser patri jew eremita.
M’hawnx ikreh mill-fqir supperv.
Is-suppervja ta' min m'għandux għalfejn ma tissaportihiex.
Mgħallem ħażin igerger mill-għodda.
Min ma jinqalax f'xogħlu jara fiex ser iwaħħal biex ma jidhirx ikrah.
Mgħallem f’idejh bħan-nies taż-żmien, jew kien hu miktub max-xwieni jew jinsab baħri mal-iġfien.
In-nies ta' klassi baxxa tikbrilhom rashom meta jkunu xortihom tajba. Mgħallem f'idejh tfisser li jkollu t-tpinġija fuq idejh (dari kienet titqies tan-nies ta' klassi baxxa), u dawn jixbhu lin-nies tal-antik (=in-nies taż-żmien) tal-istess kwalità, jiġifieri...
Meta s-sultan iħoss il-far, jiftaħ in-nar.
Kulħadd jiddefendi lilu nnifsu meta jħossu attakkat. Il-far tfisser l-għadu.
Meta l-volpi ma kienx jilħaq l-għeneb, qal li kien qares.
Min ma jkunx jista' jikseb xi ħaġa jmaqdarha.
Ma’ min rajtek xebbahtek.
Il-karattru tal-kumpanija li tagħmilha magħha jirrifletti l-karattru tiegħek stess.
Ma tistax togħġob lil kulħadd.
Agħmel dak li inti taħseb hu tajjeb u ħallik minn x'jaħseb ħaddieħor.
M’hemmx għama aktar minn dak li ma jridx jara, u trux aktar minn dak li ma jridx jisma’.
Min ma jridx jisma' jkollu jbati l-konsegwenzi tar-ras iebsa tiegħu.
M’għaddiex mill-bieb, daħal mit-tieqa.
Min ikun determinat jagħmel minn kollox biex jasal fejn irid.
Il-qaħba milli jkollha ttik.
Jekk taf li xi ħadd għandu tip ta' karattru, qisu ta' li hu u tistenniex imġiba differenti.
L-ispiżjar milli jkollu jtik.
Jekk taf li xi ħadd għandu tip ta' karattru, qisu ta' li hu u tistenniex imġiba differenti.
L-iskarpan dejjem b’żarbun imqatta’.
Tant tkun moħħok biex taqdi jew tikkuntenta lill-oħrajn li tispiċċa tinsa lilek innifsek.
L-imżużi ma fih ebda ħajr.
Tippruvax tikkuntenta lil minn qatt ma jkun kuntent. Imżużi tfisser fonqla.
L-imżattat sa mix-xitan mibgħud.
In-nies prużuntużi lil kulħadd idejqu.
L-imgħajjar jgħajjar.
Jgħajjar lil ħaddieħor bid-difetti tiegħu stess.
Lil min tħobbu u tamah, dak li jagħmel ma tarahx.
Ġeneralment ma narawx id-difetti ta' min inkunu nħobbu. Tamah huwa sinonimu ta' tħobbu.
Lil min tafu tistaqsix għalih.
Jekk taf li xi ħadd għandu tip ta' karattru, qisu ta' li hu.
L-ilħiħ jegħleb lix-xħiħ.
In-nies wiċċhom tost idejquk iżjed min-nies rgħiba.
L-ilbies qatt ma għamel nies.
L-ilbies sabiħ ma jgħattix id-difetti u l-karattri ħżiena.
L-ikrah jagħmel x’jagħmel ma jsirx sabiħ.
Min hu ikrah dejjem jiġi ttrattat iżjed ħażin minn min hu sabiħ, anke jekk bla tort.
L-ikrah għandu mankament wieħed iżda s-sabiħ għandu ħafna.
Id-difetti fuq min hu ikrah jidhru ħafna iżjed minn dawk fuq min hu sabiħ; min hu sabiħ imbagħad ikollu ħafna iżjed difetti x'jaħbi.
L-għajnejn huma t-twieqi tal-qalb.
L-għajnejn espressivi u juru x'hemm f'qalb persuna.
L-ewwel tidrobni, imbagħad iddewwini.
Min hu wiċċ b'ieħor l-ewwel jagħmillek il-ħsara, imbagħad jipprova jintgħoġob.
L-ewwel karità ma’ lħitek, jgħid San Pawl.
Aħseb f'ħaddieħor, mhux fik innifsek biss. (I)lħitek tirreferi għal geddumek.
L-ewwel jien u Alla sidek.
Il-bniedem egoist.
L-essenza fil-fliexken iż-żgħar.
In-nies ta' statura żgħira ipattulu b'modi oħra: il-karattru, l-intelliġenza, il-ħiliet, l-ambizzjoni, eċċ.
La taħrax fejn ixommuh in-nies.
Tikxifx id-difetti tiegħek u l-ħażin li tagħmel.
La tħammiġx fejn ixommuh in-nies.
Tikxifx id-difetti tiegħek u l-ħażin li tagħmel.
La tgħidx kulma taħseb u la turix kulma taf.
Tippruvax turi kemm inti għaref għax malajr toħroġ ta' prużuntuż jew iqabbduk tagħmel xi biċċa xogħol li ma kontx qed tistenna.
Lanqas il-bajtar m’għadu jagħmel irġiel.
Daż-żmien m'għadekx issib raġel fuq l-irġiel u mara fuq in-nisa.
La kull tina, tina. La kull qargħa, qargħa.
Kulħadd differenti fid-dinja.
L-akbar trux min ma jridx jisma’.
Min ma jridx jisma' jkollu jbati l-konsegwenzi tar-ras iebsa tiegħu.
L-akbar raġel dak li jegħleb demmu.
Min kapaċi jitrażżan għandu karattru sod ħafna u ta' min jammirah.
L-aħjar ħut jgħum f’qiegħ il-baħar.
Min jagħmel xogħlu sew u bil-għaqal ma jkunx iħobb jidher.
Kull wild hu għaġbu.
Kulħadd għandu l-karattru tiegħu, kemm fuq livell individwali kif ukoll fuq livell ta' familja.
Kull tajra tifraħ b’rixa.
Kulħadd jiftaħar b'dak li għandu.
Kull qoffa ssib il-miżbla tagħha.
Kulħadd għandu l-preferenzi tiegħu.
Kull qoffa għandha miżblitha.
Kulħadd għandu l-preferenzi tiegħu.
Kull qabil għal qabilu.
Kulħadd ifittex lil min ikun jixbhu: fil-karattru, fl-età, fil-klassi soċjali, eċċ. Qabil tfisser speċi (species).
Kull par għal paru.
Kulħadd ifittex lil min ikun jixbhu: fil-karattru, fl-età, fil-klassi soċjali, eċċ.
Kull min jiekol il-ħobż għad mhux qaddis.
Anke l-iżjed nies twajba xi darba jagħmlu żball.
Kull min jerfa’ abtu jsib xi jxomm.
Kulħadd għandu xi difett x'jaħbi.
Kull kalanka port.
Xorta għalija, mhix ser tagħmilli differenza. Kalanka tirreferi għal daħla dejqa fuq il-baħar.
Kull ħmar jidhirlu li għandu joqgħod maż-żwiemel tar-re.
Kulħadd jaħseb li ħaqqu l-aħjar.
Kull ħmar iħobb jisma’ lilu nnifsu jinħaq.
Min jaħseb li hu xi ħaġa, ikun mingħalih li dejjem għandu raġun u ma jagħti kas ta' ħadd.
Kull għuda għandha susitha.
Kulħadd għandu xi difett. Għuda tfisser injama, u susitha tfisser is-susa tagħha.
Kull għuda għandha duħħanha.
Kulħadd għandu xi difett. Għuda tfisser injama.
Kull għasfur jiftaħar b’rixu.
Kulħadd jiftaħar b'dak li għandu.
Kulħadd żommu ta’ li hu.
Qis lil kulħadd skont il-karattru tiegħu u kif iġib ruħu.
Kulħadd tajjeb iżda ibża’ minn kulħadd.
Kulħadd għandu t-tajjeb tiegħu, iżda xorta waħda tafdax.
Kulħadd milli għandu jagħti.
Tistenniex affarijiet mingħand min taf li ma jistax jagħtihomlok.
Kulħadd kif inhu magħġun.
Kulħadd bil-karattru tiegħu, bit-tajjeb u l-ħażin b'kollox.
Kulħadd jixħet it-tebqa tal-ħorġ wara dahru.
Id-difetti tiegħu ħadd ma jarahom.
Kulħadd jara bin-nuċċali tiegħu.
Kulħadd jara l-affarijiet mill-perspettiva tiegħu.
Kulħadd iressaq in-nar lejn xawwatu.
Kulħadd lejn l-interessi tiegħu jħares. Xawwatu jfisser dak li dak li jkun qed ixawwat/isajjar.
Kulħadd ikollu xi imma.
Kulħadd lejn l-interessi tiegħu jħares.
Kulħadd ikollu xi gwaj.
Kulħadd lejn l-interessi tiegħu jħares.
Kulħadd iħokk fejn jieklu.
Kulħadd lejn l-interessi tiegħu jħares.
Kulħadd ifittex isammar musmaru.
Kulħadd lejn l-interessi tiegħu jħares.
Kulħadd ibegħlek milli għandu.
Ħadd ma jista' jtik milli m'għandux, bl-istess mod li kulħadd iġib ruħu skont il-karattru tiegħu.
Kulħadd għandu xi jekk.
Kollha kemm aħna għandna xi difett.
Kulħadd għandu xi mela.
Kollha kemm aħna għandna xi difett.
Kulħadd għandu minn tal-ħmar.
Kulħadd jagħmel xi waħda minn tiegħu.
Kulħadd gostih.
Il-gosti jvarjaw skont il-persuna.
Kulħadd b’xi lula, sal-qamar ta’ belula.
Kollha kemm aħna għandna xi difett (= lula), mill-iżjed bniedem intelliġenti sal-aktar wieħed baħnan (= il-qamar ta' belula).
Kif trabbi fiċ-ċkunija, issibu fix-xjuħija.
Dak li tkun drajt bih minn ċkunitek jibqa' miegħek ħajtek kollha.
Kif iżżomm ruħek, in-nies iżżommok.
Il-mod ta' kif tittratta lilek innifsek huwa riflessjoni ta' kif jittrattak ħaddieħor.
Kif iddoqqli niżfinlek.
Kif iġġib ruħek miegħi inti, inġib ruħi miegħek jiena.
Kieku l-forn jara ħotobtu, ma kienx jaħmi ħobżu.
Tidħaqx bid-difetti ta’ ħaddieħor għax id-difetti tiegħek huma ferm akbar.
Kellu l-borqom, xejn ma jinfdu.
Dari kienu jemmnu li min kien jitwieled bil-borqom (= amniotic sac) intatt, ħadd ma jkun jista' għalih.
Kelb li jinbaħ ma jigdimx.
Hemm min taqbiżlu u jaqbad jgħajjat, iżjed ma jdumx ma jgħaddilu.
Kelb ħiemed ibża’ minnu.
Tafdax lil min taħsbu kwiet, għax jaf jittradik. Ħiemed tfisser kwiet.
Mutu mutu qrunu f’butu.
Tafdax lil min taħsbu kwiet, għax jaf jittradik.
Kutu kutu qrunu f’butu.
Tafdax lil min taħsbu kwiet, għax jaf jittradik.
Kajman u kutu iżda qrunu dejjem f’butu.
Tafdax lil min taħsbu kwiet, għax jaf jittradik.
Jien bin ommi, ta’ żaqqi f’fommi.
Hemm nies li ma jomogħduhiex, li jħossu jgħidu.
Jien bħas-sellum taż-żina, la ma teħtiġux tarmih fil-kantina.
Hemm nies li jkellmuk biss meta jkollhom bżonn xi ħaġa mingħandek jew biex jinqdew bik. Iż-żina f'dan il-każ tfisser il-festa.
Jien bħal San Tumas; irrid nara b’għajnejja u mmiss b’idejja.
Ċerti nies ma jemmnux kulma jisimgħu, iridu l-provi.
Jew jilgħab jew ikeskes.
Bniedem manipulattiv, jew jimmanipula hu jew jipprova jdawwar lil ħaddieħor għall-iskopijiet ta' moħħu.
Jekk tiġi ċatta pala, jekk tiġi tonda seffud.
Imur l-aħjar min jieħu l-ħajja kif tiġi.
Jekk mill-ħġieġ magħmula darek, titfax ħaġar lil ta’ ġarek.
Tgħajjarx lil ħaddieħor bid-difetti tiegħu, għax inti wkoll għandek id-difetti tiegħek.
Jekk ma tħattarx, ma tinħatarx.
Jekk ma tagħmilx wiċċek, qatt ma tieħu xejn. Tħattar tfisser tagħmel sforz u tinħatar tfisser tintgħażel.
Jekk int ċawla tippruvax tagħmilha ta’ seqer.
Tippruvax mingħalik timpressjona u tkun aħjar milli verament int.
Jekk int ċawla tippruvax tagħmilha ta’ ajkla.
Tippruvax mingħalik timpressjona u tkun aħjar milli verament int.
Jagħmilha ta’ ħmar biex ma jħallasx dwana.
Hemm min jilgħabha tal-iblah biex jipprova jaħrab mir-responsabbiltajiet tiegħu.
“Jaħraq dinha l-għaġla,” qalet il-fekruna xħin telgħet tarġa u waqgħet tnejn.
Il-fekruna tagħmel li għandha tagħmel minkejja kollox, u bl-istess mod il-bniedem għandu jaħdem u ma jitgħażżinx.
Ix-xitan li jdoqq it-trumbetta jaqbad miegħek lambranzetta.
Ħabib wiċċ b’ieħor ixandrek ma’ kulħadd u wara jiġi jilgħabha ta’ ħabibek.
Ix-xemx minn filgħodu turik x’ġej.
Minn filgħodu tinduna x'tip ta' ġurnata se tkun. Bl-istess mod, it-tfal minn ċkunithom juruk x'karattru għandhom.
Ix-xellejjin mibgħuda ħajjin u mejtin.
Min imur jgħid kulma jisma' kulħadd ikun jobogħdu.
Ixbah l-arloġġ tar-raħal fil-ħin imma le fil-qniepen.
Asal fil-ħin meta tiftiehem, iżda toqgħodx tiftaħar.
It-twal tajbin għall-ħatab.
Nies twal u mibnija ġieli jkollhom karattru fjakk, u għalhekk ma jservu għal xejn.
It-twajjeb miskin.
Min ikun twajjeb wisq ibati għax kulħadd jagħmel li jrid bih.
It-tebqat tal-ħorġa jintefgħu wara d-dahar.
Faċli ħafna tara d-difetti ta' ħaddieħor minflok tiegħek.
It-tbajja’ li nitwieldu bihom ma jmorru qatt.
Il-vizzji li nitwieldu bihom diffiċli ħafna neħilsu minnhom għalkollox.
It-talb iġib il-barka u d-dagħa jġib is-saħta.
It-talb iqarribna lejn Alla, mentri d-dagħa jbegħedna minnu u jqanqal stmerrija.
Is-swaba’ tal-id mhumiex kollha ndaqs.
Kulħadd għandu karattru u status soċjali differenti.
Is-supperv qatt ma rrenja.
Min hu supperv ma jkampax, għax x'aktarx ma jkollux raġun.
Is-supperv mibgħud minn kulħadd.
Ħadd ma jrid ikollu x'jaqsam man-nies suppervi.
Is-supperv lanqas ix-xitan ma jaħmlu.
In-nies suppervi tant jimbuttawk li saħansitra anke lix-xitan idejqu.
Is-supperv injorant.
Min hu supperv ma jkunx lest jitgħallem, u jibqa' injorant.
Is-sawt u ż-żmien ibiżżlu l-għażżien.
Min hu għażżien jeħtieġ li tiddixxplinah fuq medda ta' żmien twil biex jitgħallem imidd idejh.
Is-sawt ħareġ mill-ġenna u min iduqu jithenna.
Dari s-swat kien jitqies metodu ta' dixxiplina li jsaħħaħ il-karattru tat-tfal. Sawt huwa kastig.
Is-sabiħ maħbub bla ma jaf, l-ikrah mibgħud bla ma jaħti.
Wiċċ sabiħ jattirak inkonxjament, mentri wiċċ ikrah jimbuttak anke jekk forsi l-persuna jkollha karattru sabiħ.
Islifni wiċċek ħa naħmi bih.
Qed titlobni ħafna, tkunx wiċċek tost.
Ir-ross jittiekel biċ-ċappa mhux bil-labra.
Uża moħħok u tħallix min jidħaq bik.
Inkejt inkejja daret b’widnejja, inkejt ‘l ommi qlajt għajnejja.
Tkunx inkejjuż għax f'wiċċek jibqa'.
In-nies ta’ daż-żmien huma nies tal-isem.
Ħadd m'għadu jġib ruħu ta' nies daż-żmien, ma tista' tafda lil ħadd.
In-nies ma tixxibahx u kulħadd fehmtu.
Kulħadd bil-fehmiet u l-gosti tiegħu.
Il-wiċċ mera tar-ruħ.
Wiċċ il-bniedem juri dak li hemm f'qalbu.
Il-wiċċ iqarraq.
Wiċċ il-bniedem mhux biżżejjed biex nagħrfu x'tip ta' karattru għandu.
Ilwi d-dielja meta għadha żarġuna.
Il-karattru jissawwar fit-tfulija, bħal meta fergħa żgħira (żarġuna) tad-dielja tkun għadha tista’ tiltewa.
Il-qtates għomja u l-ġrieden imeximxu.
Hemm min japprofitta ruħu mis-sitwazzjoni meta tiġih l-okkażjoni, bħall-ħaddiema li jillaxkaw malli jwarrab ta' fuqhom.
Il-qattus aħrax isib il-qattus dgħajjef.
Hemm min jagħmel l-arja ma' min hu aktar dgħajjef minnu.
Il-qassis temmnux ħlief fil-quddiesa.
Bħalma qassis jista' jġib ruħu mod ieħor minn dak li jippritkalek waqt il-quddiesa, hekk ukoll in-nies l-oħra.
Il-qardiniet f’għajnejn sidu jidhru ġawhriet.
Xi nies jonfħu dak li hu tagħhom biex jippruvaw juru li huma aħjar minn ħaddieħor. Qardiniet huwa l-plural ta' qardiena, li hija kollox barra ġawhra.
Il-qanfud, qanfud ieħor missieru.
Nirtu l-karattru tagħna mill-ġenituri tagħna, m'hemmx mod ieħor.
Il-qamar bil-pipa f’ħalqu u kulħadd kif Alla ħalqu.
Il-karattru tal-bniedem diffiċli jinbidel, għax hekk maħluq.
Il-qalb ħanina tmut miskina.
Min ikun wisq qalbu tajba jbati, għax in-nies jagħmlu bih li jridu.
Il-qaħba tgħajjar lil ħaddieħor qaħba.
Xi nies jgħajru lil ħaddieħor bid-difetti tagħhom stess.
Il-prużuntuż għandu nofs flusu fil-kus.
Min jagħtih wiċċu jagħmel iżjed flus minn min joqgħod jistħi. Kus tfisser karus.
Il-paraguni dejjem odjużi.
Toqgħodx tqabbel lilek innifsek ma' ħaddieħor għax tgħix indannat.
Il-miżbla qatt ma tkun tfuħ.
Mingħand xi ħadd ta' intern ħażin tistenniex it-tajjeb.
Il-midneb wara li jiekol jibred.
Min jibda mix-xejn u jagħmel suċċess, hemm ċans li jitlagħlu għal rasu u jitkabbar. Jibred hawn tfisser li ma jibqa' jimpurtah minn xejn.
Il-midjun u d-dejjien ftit jaqblu flimkien.
In-nies li għandhom interessi opposti ftit li xejn jistgħu jaqblu.
Il-Malti tikrilux b’żewġ sulari għax minn hemm fuq jaf jobżoqlok.
Il-Malti ma jurix apprezzament għal li tagħmel miegħu.
Il-lupu jbiddel sufu u mhux għemilu.
Bniedem ħażin jipprova jagħtik x'tifhem li nbidel, iżda fil-fond ta' qalbu ħażin jibqa'.
Illum ma baqax ħmir.
Daż-żmien in-nies saru jafu minn fejn għandhom jgħaddu biex jiksbu li jridu.
Illum baram lil wieħed, għada jiftel lill-ieħor.
Qatt m'għandek tafda bniedem ħażin. Jiftel hawn tfisser iqarraq.
Il-logħob tal-idejn u t-teptip tal-għajnejn jinsabu f’ulied il-fsied u l-hejm.
Il-fsied ma jagħmilx ġid għall-iżvilupp tal-karattru tat-tfal.
Il-lħiħ jegħleb ix-xħiħ.
Aħjar ikollok x'taqsam ma' bniedem xħiħ milli ma' bniedem fitt. Lħiħ tfisser fitt.
Il-leħħa tegħleb ix-xeħħa.
Aħjar ikollok x'taqsam ma' bniedem xħiħ milli ma' bniedem fitt. Leħħa tfisser fittaġni.
Il-kuruna fl-idejn tgħodd u mhux fil-but.
In-nies wiċċ b’ieħor li jilagħbuha tal-qaddisin warrbilhom. Kuruna tfisser kuruna tar-rużarju.
Il-korla ta’ filgħaxija ħalliha għal filgħodu.
Tiħux deċiżjonijiet mgħaġġla meta tkun irrabjat, stenna sakemm tikkalma.
Il-kliem la ġġerrih ħalli n-nies ma tgħidx bih.
Tkunx dik il-persuna li taqla' l-qlajjiet fuq in-nies.
Il-kelb tal-basal la jiekol u la jħalli min jiekol.
La ma nistax ingawdi xi ħaġa, mhux se nħalli lil ħaddieħor igawdiha lanqas.
Il-kelb in-nebbieħ ma jigdimx.
Jitlagħlu malajr u jagħmel ħafna storbju, iżda ma jagħmillekx ħsara.
Il-kelb il-mutu ibża’ minnu.
Oqgħod attent minn min jidher kwiet, iżda jkollu intenzjonijiet ħżiena.
Il-kburija titkeċċa bl-umiltà.
Min jaħseb li hu xi ħaġa jeħtieġ li jitgħallem japprezza l-valur tal-umiltà.
Il-kavallier irejjex fuq is-swar u l-qaħba minn ġol-loġġ tixgħel in-nar.
Il-kavallieri xorta kienu jgħixu ħajja ta' promiskwità, minkejja l-vot ta' kastità li kienu jieħdu. Irejjex tfisser jistad, li f'dan il-każ tfisser imur ifittex il-pjaċiri sesswali.
Il-katuba, li tagħmel ħafna ħoss, m’hemm xejn fiha ħlief arja.
Jitlagħlu malajr iżda jgħaddilu malajr ukoll.
Il-karità qatt ma faqqret nies.
Att ta' karità ġid biss jista' jagħmel.
Il-kappell tiegħu ma jiġinix.
Il-karattru ta' dak il-bniedem idejjaqni u ma rridx affari miegħu.
Il-ħażin ilgħablu l-ħajna.
Man-nies makakki ara li tuża l-istess livell ta' makakkerija. Il-ħajna tfisser makakkerija.
Il-ħarir u l-imsielaħ iħaxwxu.
Min jilbes biex mingħalih jimpressjona jiġbed l-istess attenzjoni ta' xkupa (= imselħa, pl. imsielaħ) tħaxwex.
Il-ħanżir jistaħam f’kull għadira.
Min m’għandux prinċipji jieħu vantaġġ minn kull opportunità li jinzerta. Jistaħam tfisser iċaflas jew jgħaffeġ.
Il-ħalf iġib is-seħta.
Min jaħlef fil-vojt iġib ħafna inkwiet.
L-għira tan-nies iġġib mibegħda bla qies.
L-għira hija sors ta' mibegħda bejn in-nies.
L-għira ddur mad-dwejra.
Min jgħir għalik il-ħin kollu għassa tiegħek ħalli jara x'inti tagħmel.
L-għajjur bil-ġuħ imut.
In-nies għajjurin bla sodisfazzjon jibqgħu.
L-għajjur bil-weġgħa jmut.
In-nies għajjurin bla sodisfazzjon jibqgħu.
L-għajb jgħajjeb u l-għar jgħajjar.
Xi nies jgħajru lil ħaddieħor bid-difetti tagħhom stess. Għajb u għar it-tnejn ifissru diżunur.
L-għabra tgħajjar liż-żagħruna.
Xi nies jgħajru lil ħaddieħor bid-difetti tagħhom stess. Għabra tfisser trab u ż-żagħruna hija tip ta' pjanta (Crataegus monogyna).
Il-gost tal-pipa fiċ-ċekċika.
Ħu gost bil-kapriċċi li tagħmel.
Il-ġurnata minn filgħodu turik.
Minn filgħodu tinduna x'tip ta' ġurnata se tkun. Bl-istess mod, it-tfal minn ċkunithom juruk x'karattru għandhom.
Il-ġebla s-samma ma tintaġarx.
Min għandu karattru diffiċli ma jinbidel qatt. Samma tfisser qawwija.
Il-ġahri għalxejn tgħidlu jħares sewwa għax ħażin jibqa’ jħares.
Il-karattru ta' xi ħadd diffiċli ħafna tbiddlu. Ġahri tfisser werċ.
Il-ftaħir qatt ma għamel nies.
Imbilli tiftaħar ma jfissirx li inti rispettabbli.
Il-fsied iħassar l-ulied.
Il-fsied ma jagħmilx ġid għall-iżvilupp tal-karattru tat-tfal.
Il-forn li jara ħotobtu ma jsajjarx ħobżu.
Tidħaqx bid-difetti ta’ ħaddieħor għax id-difetti tiegħek huma ferm akbar.
Il-fomm jiftar il-qalb.
Minn kliemu l-bniedem tinduna x'hemm f'qalbu. Jiftar hawn tfisser jikxef.
Il-far fejn ma jilħaqx bi lsienu jilħaq b’denbu.
Min iħaddem rasu jkun jaf minn fejn għandu jgħaddi biex jikseb li jrid.
Il-faħħar ir-rix barra jarmih.
Ma jagħmillekx ġieħ toqgħod tiftaħar.
Il-borża tal-beżżiegħ la timtela u lanqas tifriegħ.
Min jibża' jispiċċa qatt ma jagħmel xejn fid-dinja. Tifriegħ tfisser titbattal.
Il-borma taqlibha għal fommha, il-bint tixbah lil ommha.
L-omm għandha influwenza kbira fuq il-iżvilupp tal-karattru ta' bintha.
Il-bniedem trid tmurlu għal xejrtu.
Biex tieħu xi ħaġa mingħand xi ħadd, trid tkun taf x'għandek tagħmel biex togħġbu.
Il-bniedem tagħrfu minn wegħditu.
Bniedem afdah skont kemm iżomm kelmtu.
Il-bniedem ma tafux qabel ma tkun kilt modd melħ miegħu.
Issir taf lil xi ħadd tassew meta tagħmilha miegħu. Modd huwa kejl.
Il-bniedem ma tafux qabel iġġarrbu.
Issir taf lil xi ħadd tassew meta tagħmilha miegħu.
Il-bniedem azzjonitu għandu.
Mill-azzjonijiet tiegħu tkun taf x'inhu bniedem.
Il-bass jiġi wara r-rass.
Jekk tkun bniedem aħrax u opprimenti, xi darba se jduru kontrik.
Il-baqra tneħħi l-madmad minn għonqha għax ma tridx taħrat.
Ċerti nies ma tikkontrollahom b'xejn.
Il-baqra kollha tinbiegħ.
Kulħadd għandu l-preferenzi tiegħu.
Iddur kemm iddur in-naħla lejn l-għasel tmur.
Kulħadd l-interessi tiegħu jara.
Id-dielja tiltewa meta tkun żarġuna.
Il-karattru jissawwar fit-tfulija, bħal meta fergħa żgħira (żarġuna) tad-dielja tkun għadha tista' tiltewa.
Id-dawran ta’ billejl qatt ma jġib ġid.
Min joħroġ jiġġerra billejl mhux tal-affari tiegħu.
Ibża’ minn min għandu ħuġbejh kbar.
Oqgħod attent minn min ikollu xi tip ta' żvantaġġ, għax jaf ikun webbes qalbu.
Ibża’ minn dak li għandu għonqu mgħawweġ.
Oqgħod attent minn min ikollu xi tip ta' żvantaġġ, għax jaf ikun webbes qalbu.
Ibża’ mill-immankat.
Oqgħod attent minn min ikollu xi tip ta' żvantaġġ, għax jaf ikun webbes qalbu.
Ħuġġieġa tat-tiben fis-siegħa u l-ħin tintefa.
Bniedem li taqbiżlu malajr jagħmel ħafna kjass, iżda ma jdumx ma jgħaddilu.
Ħu l-inbid biex isir ħall u mhux il-ħall biex isir inbid.
Jekk tiżżewweġ lil xi ħadd b'karattru sabiħ, hemm ir-riskju li fil-futur ma jibqax sabiħ; jekk tiżżewweġ lil xi ħadd b'karattru ikrah, dan żgur qatt mhu ser isir sabiħ.
Ħu l-fama u mur orqod.
Ħu ħsieb tar-reputazzjoni tiegħek għax darba titlifha.
Ħsieb il-buttar fejn se jqiegħed iċ-ċirku.
Kulħadd l-interessi tiegħu jara.
Ħelu tittiekel, morr tinbeżaq.
Mingħand in-nies taqlagħha dejjem fuq rasek, tagħmel x'tagħmel.
Ħelu fil-fomm u qares fis-sorm.
Hemm min għandu ħafna kliem sabiħ, iżda minn ġewwa jkun ikrah ħafna.
Ħatab wisq għan-nar tajjeb.
Min ikun twil iżda jibża' minn kollox, xorta mhu tajjeb għal xejn.
Ħanżir dak li jistaħam f’kull għadira.
Min m'għandux prinċipji jieħu vantaġġ minn kull opportunità li jinzerta. Jistaħam tfisser iċaflas jew jgħaffeġ.
Ħamiema bla ħjiena s-seqer itemmha.
Min hu wisq twajjeb u jafda żżejjed jispiċċa mmanipulat minn ħaddieħor. Ħjiena tfisser ħażen.
Ħalli ‘l kulħadd jerfa’ salibu.
Tindaħalx fl-affarijiet ta' ħaddieħor.
Ħalli ‘l ħaddieħor ifaħħrek.
Kun umli u tiftaħarx, ħalli lil ħaddieħor ifaħħrek minn jeddu.
Ħaġa wieħed ikun jaf biha meta juriha.
Uri l-ħiliet tiegħek biex ħaddieħor ikun jaf x'inti kapaċi tagħmel.
Ħafna ftaħir imbagħad tfittex u ma ssib xejn.
Min ikun irid jimpressjona ma jkollux tassew biex.
Ħadd ma jara n-nuqqasijiet tiegħu.
Ħadd ma jħares lejn id-difetti tiegħu.
Ħadd ma jara xturu.
Ħadd ma jħares lejn id-difetti tiegħu.
Ħadd ma jara ħotobtu għax jaqa’ u jmut zoptu.
Tidħaqx bid-difetti ta' ħaddieħor għax id-difetti tiegħek huma ferm akbar.
Ħadd mhu bħal ħaddieħor.
Kulħadd għandu karattru differenti.
Ħadd m’għandu suf f’qiegħ idu.
L-integrità u l-onestà saru tassew rari llum il-ġurnata.
Hemm min hu tqil biex jgħid kelma u ħafif biex jaqla’ bħalha.
Ġieli jkunu dawk li taħseb huma kwieti li jaqilgħu l-qlajjiet.
Hemm min jitkellem u hemm min iqarar.
Kulħadd għandu karattru differenti.
Hemm il-wieħed u hemm l-ieħor.
Kulħadd għandu karattru differenti.
Għidli ma’ min tagħmilha u ngħidlek min int.
Il-karattru tiegħek jissawwar skont il-kumpanija li tagħmilha magħha.
Għalija kull imdawwar qagħaq.
Xorta għalija, mhix ser tagħmilli differenza.
Għalija ċinkwina ħames ħabbiet.
Xorta għalija, mhix ser tagħmilli differenza.
Għalhekk il-baqra tinbiegħ kollha, għax min irid rasha u min irid denbha.
Kulħadd bil-fehmiet u l-gosti tiegħu, dak li hu bla valur għal xi ħadd jista' jkun ta' preġju f'għajnejn xi ħaddieħor.
Għal kull nittiena hemm żmienha.
Bniedem ħażin xi darba jeħodha wkoll il-lezzjoni.
Għal kull ħuta hawn il-lixka tagħha.
Toqgħodx taħseb li inti aħjar minn ħaddieħor, għax malajr issib lil xi ħadd eżatt bħalek.
Għal kull ħatba hawn mannara.
Toqgħodx taħseb li inti aħjar minn ħaddieħor, għax malajr issib lil xi ħadd eżatt bħalek.
Għal kull għadma hawn il-marlozz.
Toqgħodx taħseb li inti aħjar minn ħaddieħor, għax malajr issib lil xi ħadd eżatt bħalek. Il-marlozz (= merluzz) huwa tip ta' ħuta.
Għajnejn morda ma jridux dawl.
Xi ħadd konxju mid-difetti tiegħu toqgħodx issemmihomlu.
Giddieb darba, giddieb dejjem.
Min jinqabad fil-gideb imqar darba jieħu l-fama ta' giddieb u ħadd ma jemmnu iżjed.
Ġurdien qluqi qatt ma jsir far.
Hemm min m’għandux kwiet, il-ħin kollu jibdel u jbiddel. Ma ssibx stabbiltà u trankwillità hekk. Qluqi tfisser imferfex.
Ġebla titgerbeb ma trabbix ħaxix.
Hemm min m'għandux kwiet, il-ħin kollu jibdel u jbiddel. Ma ssibx stabbiltà u trankwillità hekk.
Ġebla samma ma tintaġarx.
Bniedem li għandu karattru diffiċli jew ħażin ma jitranġa qatt. Samma tfisser iebsa u ma tintaġarx tfisser ma titranġax.
Ġebbed għonqu biex qassar saqajh.
Min hu bla moħħ tistenniex li jagħmel affarijiet intelliġenti.
Fuq ġebla waħda jibni sur.
Qed jgħid affarijiet wisq esaġerati biex jitwemmnu.
Ful ta’ Ġirba u ful tal-miżwed kollu wieħed.
Għalih jgħaddi kollox.
Friex, żibel u ġieħ fittex wittih.
Tħallix lil min jipprova jħammiġlek ismek.
Fost l-aħwa min bil-palju u min ikarkar ix-xatba.
L-aħwa kollha għandhom karattru differenti u kollha jsibu triq differenti.
Forn li biebu ma jingħalaqx, ħobżu ma jissajjarx.
Min hu ħalqu kbir jaqbad ipatpat mingħajr ma jaħseb fil-konsegwenzi.
Fis-suq kollox jinbiegħ barra minn fomm sieket u l-ġieħ.
L-integrità tal-bniedem ma tinxtarax.
Fil-baħar bnazzi kulħadd baħri / kaptan.
Meta jinqala' l-inkwiet tinduna min verament huwa kapaċi jsolvi l-problemi.
Fejn ma jersaqx id-dubbien, ma jbejtux il-firien.
Fejn hemm il-ġid kulħadd irid biċċa.
Fejn jidħlu l-interessi m’hemmx permessi.
Kulħadd fih innifsu jaħseb.
Faħħru u itfgħu fin-nar.
Min jieħu wisq pjaċir b'min ifaħħru faċilment timmanipulah.
Ebda saba’ ma jixbah lill-ieħor.
Kulħadd għandu karattru u opinjonijiet differenti.
Din ħażin, ħażin jibqa’.
Il-bniedem diffiċli jeħles mill-vizzji, wisq probabbli bihom jibqa'.
Dara jerda’ miż-żejża; ħalli naraw meta tmur Trejża.
Bniedem li jiddependi l-ħin kollu fuq ħaddieħor isibha diffiċli xħin ikollu jagħmel xi ħaġa waħdu.
Daqqa fuq iċ-ċirku u oħra fuq il-bettija.
Bniedem li jġib ruħu ħażin u bis-salvaġiżmu wara jpattilu bil-ħlewwa u l-ġentilezza.
Daqqa b’qasba tagħmel ħoss imma le tweġġa’.
Il-paroli fil-vojt u l-ftaħir m'għandhomx valur.
Dak tiegħu tiegħu u tan-nies tiegħu wkoll.
Il-bniedem egoist irid kollox, anke ta' ħaddieħor.
Dak li ma qattax bi snienu qattgħu bi lsienu.
Minflok ħadem, qagħad jgħid fuq in-nies minn wara daharhom.
Dak li ma jidħolx fi mnieħrek ħa jidħol fi mnieħer nannuk.
Ħu ħsieb tal-affarijiet tiegħek u tilħaqx salib ħaddieħor.
Dak li jwiegħed wisq ma jagħti xejn.
Min jagħmillek ħafna wegħdiet ibża' minnu għax kollha fil-vojt.
Dak li jistenna li l-bajtar jaqa’ f’ħalqu, jibqa’ bil-ġuħ.
Irid ikollok sens ta' inizjattiva, inkella qatt ma jsir xejn.
Bniedem għaqli ma jdurx ma kull riħ.
M'għandekx tafda lil min moħħu biex iħawwad u jdawwar.
Bniedem bla ħila ma jiswiex tebaq fwiedu.
Bniedem jintgħażel mill-oħrajn skont il-ħiliet u l-kuraġġ tiegħu.
Bnazzi fix-xitwa, trott ta’ bagħla u kappell ta’ miġnun, qatt iżżomm magħhom.
Il-bnazzi fix-xitwa, it-trott ta' bagħla u n-nies imġienen qatt m'għandek tafdahom.
Bis-saħħa tal-għarusa tiżfen il-qattusa.
Hemm min japprofitta ruħu mis-sitwazzjoni meta tiġih l-okkażjoni.
Bin is-sengħa għandu nofsha.
L-ulied jirtu ħafna aspetti tal-karattru mill-ġenituri tagħhom.
Billi tagħli ma ġġib xejn.
Billi toqgħod tirrabja ma tasal imkien.
Biġġel għax iż-żmien ibiddel.
Jekk tittratta lil ta' madwarek ħażin, għad jiġi żmien fejn huma jittrattawk ħażin. Biġġel tfisser irrispetta.
Biex tiskonġra trid tkun pur.
Ara li jekk ser tikkritika lil ħaddieħor fuq xi difett ma jkollokx inti stess l-istess difett. Tiskonġra tfisser teżorċizza.
Bi ħwejjeġ ħaddieħor kulħadd galantom.
Kulħadd jaf jiffanfra bl-affarijiet ta' ħaddieħor.
Aħjar qalb tajba minn wiċċ sabiħ.
Aħjar tkun twajjeb milli sabiħ fiżikament.
Arani u la tmissnix.
L-apparenza ta' persuna jaf tkun sabiħa, iżda l-karattru ma jkunx sabiħ għax tkun imkabbra biha nfisha.
Aqqal sirt minn blis, kulma trid tridu fis.
Hemm min irid kollox fil-pront.
Anġlu man-nies, xitan id-dar.
Quddiem in-nies iġib ruħu sew imma d-dar iġib ruħu ħażin.
Alla jħarsek minn min għandu ħuġbejn kbar.
Alla jħarsek min-nies aggressivi.
Alla qabel ilaqqa’, ixebbah.
Qabel ma jlaqqa’ lin-nies, Alla jara li jkollhom karattru jixxiebah.
Alla lill-bniedem iħallsu skont qalbu.
Alla jippremja jew jikkastiga skont l-imġiba tal-bniedem.
Il-qwiel kollha, f’post wieħed.