Uri l-ħiliet tiegħek biex ħaddieħor ikun jaf x'inti kapaċi tagħmel.
Inkejt inkejja daret b’widnejja, inkejt ‘l ommi qlajt għajnejja.
Tkunx inkejjuż għax f'wiċċek jibqa'.
Kellu l-borqom, xejn ma jinfdu.
Dari kienu jemmnu li min kien jitwieled bil-borqom (= amniotic sac) intatt, ħadd ma jkun jista' għalih.
Kulħadd ikollu xi imma.
Kulħadd lejn l-interessi tiegħu jħares.
Il-bniedem trid tmurlu għal xejrtu.
Biex tieħu xi ħaġa mingħand xi ħadd, trid tkun taf x'għandek tagħmel biex togħġbu.
Ibża’ minn min għandu ħuġbejh kbar.
Oqgħod attent minn min ikollu xi tip ta' żvantaġġ, għax jaf ikun webbes qalbu.
Ħalli ‘l ħaddieħor ifaħħrek.
Kun umli u tiftaħarx, ħalli lil ħaddieħor ifaħħrek minn jeddu.
Il-fartas tmisslux il-barjola.
Jekk bniedem għandu difett tgħajrux bih. Barjola hija beritta żgħira.
L-imgħajjar jgħajjar.
Jgħajjar lil ħaddieħor bid-difetti tiegħu stess.
Għal kull għadma hawn il-marlozz.
Toqgħodx taħseb li inti aħjar minn ħaddieħor, għax malajr issib lil xi ħadd eżatt bħalek. Il-marlozz (= merluzz) huwa tip ta' ħuta.
Il-ġahri għalxejn tgħidlu jħares sewwa għax ħażin jibqa’ jħares.
Il-karattru ta' xi ħadd diffiċli ħafna tbiddlu. Ġahri tfisser werċ.
Il-ħalliel jgħajrek qabel ma tgħajru int.
Biex ma jinqabadx, il-ħalliel iwaħħal fik qabel twaħħal inti fih.
Ibża’ mill-immankat.
Oqgħod attent minn min ikollu xi tip ta' żvantaġġ, għax jaf ikun webbes qalbu.
Bis-saħħa tal-għarusa tiżfen il-qattusa.
Hemm min japprofitta ruħu mis-sitwazzjoni meta tiġih l-okkażjoni.
Kulħadd b’xi lula, sal-qamar ta’ belula.
Kollha kemm aħna għandna xi difett (= lula), mill-iżjed bniedem intelliġenti sal-aktar wieħed baħnan (= il-qamar ta' belula).
Kulħadd milli għandu jagħti.
Tistenniex affarijiet mingħand min taf li ma jistax jagħtihomlok.
In-nies ta’ daż-żmien huma nies tal-isem.
Ħadd m'għadu jġib ruħu ta' nies daż-żmien, ma tista' tafda lil ħadd.
Jagħmilha ta’ ħmar biex ma jħallasx dwana.
Hemm min jilgħabha tal-iblah biex jipprova jaħrab mir-responsabbiltajiet tiegħu.
Kulħadd ifittex isammar musmaru.
Kulħadd lejn l-interessi tiegħu jħares.
Il-fartas tmisslux il-barjola.
Jekk bniedem għandu difett tgħajrux bih. Barjola hija beritta żgħira.
Ix-xellejjin mibgħuda ħajjin u mejtin.
Min imur jgħid kulma jisma' kulħadd ikun jobogħdu.