L-integrità tal-bniedem ma tinxtarax.
Il-ħalliel jgħajrek qabel ma tgħajru int.
Biex ma jinqabadx, il-ħalliel iwaħħal fik qabel twaħħal inti fih.
Il-kburija titkeċċa bl-umiltà.
Min jaħseb li hu xi ħaġa jeħtieġ li jitgħallem japprezza l-valur tal-umiltà.
Fuq ġebla waħda jibni sur.
Qed jgħid affarijiet wisq esaġerati biex jitwemmnu.
Ġebbed għonqu biex qassar saqajh.
Min hu bla moħħ tistenniex li jagħmel affarijiet intelliġenti.
L-għira ddur mad-dwejra.
Min jgħir għalik il-ħin kollu għassa tiegħek ħalli jara x'inti tagħmel.
Forn li biebu ma jingħalaqx, ħobżu ma jissajjarx.
Min hu ħalqu kbir jaqbad ipatpat mingħajr ma jaħseb fil-konsegwenzi.
Il-fartas tmisslux il-barjola.
Jekk bniedem għandu difett tgħajrux bih. Barjola hija beritta żgħira.
Il-lagħab dejjem tellief.
Min ikollu l-vizzju tal-logħob jispiċċa jitlef ħafna flus, anke meta jirbaħ, għax jerġa' jilgħabhom.
Il-ħarir u l-imsielaħ iħaxwxu.
Min jilbes biex mingħalih jimpressjona jiġbed l-istess attenzjoni ta' xkupa (= imselħa, pl. imsielaħ) tħaxwex.
L-għażżien dejjem għarwien.
L-għażżien ma jaħdem għal xejn u allura qatt m'għandu xejn.
Il-ħmar iwaħħal f’denbu.
Qed jgħajjar lil ħaddieħor bid-difetti tiegħu stess.
Il-qtates għomja u l-ġrieden imeximxu.
Hemm min japprofitta ruħu mis-sitwazzjoni meta tiġih l-okkażjoni, bħall-ħaddiema li jillaxkaw malli jwarrab ta' fuqhom.
Il-korla ta’ filgħaxija ħalliha għal filgħodu.
Tiħux deċiżjonijiet mgħaġġla meta tkun irrabjat, stenna sakemm tikkalma.
Ħalli ‘l ħaddieħor ifaħħrek.
Kun umli u tiftaħarx, ħalli lil ħaddieħor ifaħħrek minn jeddu.
Ibża’ minn dak li għandu għonqu mgħawweġ.
Oqgħod attent minn min ikollu xi tip ta' żvantaġġ, għax jaf ikun webbes qalbu.
Dak li jwiegħed wisq ma jagħti xejn.
Min jagħmillek ħafna wegħdiet ibża' minnu għax kollha fil-vojt.
L-għajjur bil-weġgħa jmut.
In-nies għajjurin bla sodisfazzjon jibqgħu.
Ħadd ma jara xturu.
Ħadd ma jħares lejn id-difetti tiegħu.
Ħadd ma jara n-nuqqasijiet tiegħu.
Ħadd ma jħares lejn id-difetti tiegħu.
Ħamiema bla ħjiena s-seqer itemmha.
Min hu wisq twajjeb u jafda żżejjed jispiċċa mmanipulat minn ħaddieħor. Ħjiena tfisser ħażen.