Tiħux deċiżjonijiet mgħaġġla meta tkun irrabjat, stenna sakemm tikkalma.
La tħammiġx fejn ixommuh in-nies.
Tikxifx id-difetti tiegħek u l-ħażin li tagħmel.
Kategoriji: il-karattru | il-vizzju
L-għira ddur mad-dwejra.
Min jgħir għalik il-ħin kollu għassa tiegħek ħalli jara x'inti tagħmel.
Biex tiskonġra trid tkun pur.
Ara li jekk ser tikkritika lil ħaddieħor fuq xi difett ma jkollokx inti stess l-istess difett. Tiskonġra tfisser teżorċizza.
Is-supperv mibgħud minn kulħadd.
Ħadd ma jrid ikollu x'jaqsam man-nies suppervi.
Islifni wiċċek ħa naħmi bih.
Qed titlobni ħafna, tkunx wiċċek tost.
Jien bin ommi, ta’ żaqqi f’fommi.
Hemm nies li ma jomogħduhiex, li jħossu jgħidu.
Iż-żaqq aktar ma tagħtiha aktar trid.
Aktar ma tiekol, aktar jagħtik aptit li tkompli tiekol, għalhekk importanti l-moderazzjoni.
L-akbar trux min ma jridx jisma’.
Min ma jridx jisma' jkollu jbati l-konsegwenzi tar-ras iebsa tiegħu.
Il-ġebla s-samma ma tintaġarx.
Min għandu karattru diffiċli ma jinbidel qatt. Samma tfisser qawwija.
Kulħadd gostih.
Il-gosti jvarjaw skont il-persuna.
Il-bniedem azzjonitu għandu.
Mill-azzjonijiet tiegħu tkun taf x'inhu bniedem.
Inbid fl-ilma jitlef kilma, inbid pur jitlef l-unur. Titfgħu f’żaqqek jitla’ f’rasek, tratti tagħmel ta’ miġnun.
Tixrobx iżżejjed għax ix-xorb iġiegħlek iġġib ruħek ta' miġnun. Jitlef kilma tfisser jitlef togħmtu.
Għal kull ħatba hawn mannara.
Toqgħodx taħseb li inti aħjar minn ħaddieħor, għax malajr issib lil xi ħadd eżatt bħalek.
Dak tiegħu tiegħu u tan-nies tiegħu wkoll.
Il-bniedem egoist irid kollox, anke ta' ħaddieħor.
Kull wild hu għaġbu.
Kulħadd għandu l-karattru tiegħu, kemm fuq livell individwali kif ukoll fuq livell ta' familja.
Inbid inbidejn minn raġel jagħmel tnejn.
Meta jieħdok ix-xorb, l-affarijiet ma tibqax tarahom sew. Inbidejn tfisser żewġ tazzi nbid (u aktar).
L-għada li titwieled biha l-kefen biss ineħħiha.
Id-drawwiet tiegħek - tajbin u ħżiena - sa mewtek tibqa' bihom. Għada tfisser drawwa u l-kefen huwa t-tebut.
Kajman u kutu iżda qrunu dejjem f’butu.
Tafdax lil min taħsbu kwiet, għax jaf jittradik.
Billi tagħli ma ġġib xejn.
Billi toqgħod tirrabja ma tasal imkien.
Il-kelb il-mutu ibża’ minnu.
Oqgħod attent minn min jidher kwiet, iżda jkollu intenzjonijiet ħżiena.
Lanqas il-bajtar m’għadu jagħmel irġiel.
Daż-żmien m'għadekx issib raġel fuq l-irġiel u mara fuq in-nisa.