Min jibża' jispiċċa qatt ma jagħmel xejn fid-dinja. Tifriegħ tfisser titbattal.
Il-qaħba milli jkollha ttik.
Jekk taf li xi ħadd għandu tip ta' karattru, qisu ta' li hu u tistenniex imġiba differenti.
Kategoriji: il-karattru
Ħadd ma jara xturu.
Ħadd ma jħares lejn id-difetti tiegħu.
Forn li biebu ma jingħalaqx, ħobżu ma jissajjarx.
Min hu ħalqu kbir jaqbad ipatpat mingħajr ma jaħseb fil-konsegwenzi.
Din ħażin, ħażin jibqa’.
Il-bniedem diffiċli jeħles mill-vizzji, wisq probabbli bihom jibqa'.
Ibża’ minn dak li għandu għonqu mgħawweġ.
Oqgħod attent minn min ikollu xi tip ta' żvantaġġ, għax jaf ikun webbes qalbu.
Kellu l-borqom, xejn ma jinfdu.
Dari kienu jemmnu li min kien jitwieled bil-borqom (= amniotic sac) intatt, ħadd ma jkun jista' għalih.
Hemm min hu tqil biex jgħid kelma u ħafif biex jaqla’ bħalha.
Ġieli jkunu dawk li taħseb huma kwieti li jaqilgħu l-qlajjiet.
M’hemmx għama aktar minn dak li ma jridx jara, u trux aktar minn dak li ma jridx jisma’.
Min ma jridx jisma' jkollu jbati l-konsegwenzi tar-ras iebsa tiegħu.
Il-ħanżir jistaħam f’kull għadira.
Min m’għandux prinċipji jieħu vantaġġ minn kull opportunità li jinzerta. Jistaħam tfisser iċaflas jew jgħaffeġ.
Inbid ġewwa, irqad barra.
Meta tixrob u tisker, aħjar tiġi f'sensik qabel ma tmur lura d-dar.
Billi tagħli ma ġġib xejn.
Billi toqgħod tirrabja ma tasal imkien.
Min hu tajjeb minn qaddisu jibkih sal-ġebel ta’ pajjiżu.
Bniedem qalbu tajba jkun maħbub ħafna minn kulħadd.
Il-midjun u d-dejjien ftit jaqblu flimkien.
In-nies li għandhom interessi opposti ftit li xejn jistgħu jaqblu.
Il-ħarir u l-imsielaħ iħaxwxu.
Min jilbes biex mingħalih jimpressjona jiġbed l-istess attenzjoni ta' xkupa (= imselħa, pl. imsielaħ) tħaxwex.
Iż-żaqq aktar ma tagħtiha aktar trid.
Aktar ma tiekol, aktar jagħtik aptit li tkompli tiekol, għalhekk importanti l-moderazzjoni.
La tħammiġx fejn ixommuh in-nies.
Tikxifx id-difetti tiegħek u l-ħażin li tagħmel.
Mhux l-imġienen kollha jinsabu ta’ Frankuni.
Hawn ħafna nies imġienen madwarna u lanqas biss nafu. Frankuni tfisser Villa Franconi, bini residenzjali li ntuża bħala sptar mentali mill-1835 sal-1861.
In-nies ma tixxibahx u kulħadd fehmtu.
Kulħadd bil-fehmiet u l-gosti tiegħu.
Kull għuda għandha susitha.
Kulħadd għandu xi difett. Għuda tfisser injama, u susitha tfisser is-susa tagħha.
Il-qamar bil-pipa f’ħalqu u kulħadd kif Alla ħalqu.
Il-karattru tal-bniedem diffiċli jinbidel, għax hekk maħluq.
Hemm il-wieħed u hemm l-ieħor.
Kulħadd għandu karattru differenti.