Tħallix lil min jipprova jħammiġlek ismek.
L-imgħajjar jgħajjar.
Jgħajjar lil ħaddieħor bid-difetti tiegħu stess.
Kategoriji: il-karattru | il-vizzju
Jekk int ċawla tippruvax tagħmilha ta’ seqer.
Tippruvax mingħalik timpressjona u tkun aħjar milli verament int.
Fis-suq kollox jinbiegħ barra minn fomm sieket u l-ġieħ.
L-integrità tal-bniedem ma tinxtarax.
Dak li jistenna li l-bajtar jaqa’ f’ħalqu, jibqa’ bil-ġuħ.
Irid ikollok sens ta' inizjattiva, inkella qatt ma jsir xejn.
Jagħmilha ta’ ħmar biex ma jħallasx dwana.
Hemm min jilgħabha tal-iblah biex jipprova jaħrab mir-responsabbiltajiet tiegħu.
Bin is-sengħa għandu nofsha.
L-ulied jirtu ħafna aspetti tal-karattru mill-ġenituri tagħhom.
L-għażż missier il-vizzji.
L-għażż iwaqqgħek iżjed fit-tentazzjoni tal-vizzju.
Ma tistax togħġob lil kulħadd.
Agħmel dak li inti taħseb hu tajjeb u ħallik minn x'jaħseb ħaddieħor.
Dak tiegħu tiegħu u tan-nies tiegħu wkoll.
Il-bniedem egoist irid kollox, anke ta' ħaddieħor.
Il-fartas tmisslux il-barjola.
Jekk bniedem għandu difett tgħajrux bih. Barjola hija beritta żgħira.
L-akbar raġel dak li jegħleb demmu.
Min kapaċi jitrażżan għandu karattru sod ħafna u ta' min jammirah.
Bniedem dagħaj ftit idum ħaj.
Bniedem li għandu l-vizzju tad-dagħa jġib is-saħta fuqu nnifsu u jgħix ftit.
Għal kull għadma hawn il-marlozz.
Toqgħodx taħseb li inti aħjar minn ħaddieħor, għax malajr issib lil xi ħadd eżatt bħalek. Il-marlozz (= merluzz) huwa tip ta' ħuta.
Kulħadd iħokk fejn jieklu.
Kulħadd lejn l-interessi tiegħu jħares.
Il-bniedem azzjonitu għandu.
Mill-azzjonijiet tiegħu tkun taf x'inhu bniedem.
L-essenza fil-fliexken iż-żgħar.
In-nies ta' statura żgħira ipattulu b'modi oħra: il-karattru, l-intelliġenza, il-ħiliet, l-ambizzjoni, eċċ.
Ħatab wisq għan-nar tajjeb.
Min ikun twil iżda jibża' minn kollox, xorta mhu tajjeb għal xejn.
Ħalli ‘l kulħadd jerfa’ salibu.
Tindaħalx fl-affarijiet ta' ħaddieħor.
L-għabra tgħajjar liż-żagħruna.
Xi nies jgħajru lil ħaddieħor bid-difetti tagħhom stess. Għabra tfisser trab u ż-żagħruna hija tip ta' pjanta (Crataegus monogyna).
Il-qassis temmnux ħlief fil-quddiesa.
Bħalma qassis jista' jġib ruħu mod ieħor minn dak li jippritkalek waqt il-quddiesa, hekk ukoll in-nies l-oħra.
Arani u la tmissnix.
L-apparenza ta' persuna jaf tkun sabiħa, iżda l-karattru ma jkunx sabiħ għax tkun imkabbra biha nfisha.