Min kapaċi jitrażżan għandu karattru sod ħafna u ta' min jammirah.
Min jehreż bil-mehrież tan-nisa u tal-logħob bil-liega f’idu jibqa’.
Min jgħix ħajja promiskwa u jkollu l-vizzju tal-logħob tal-azzard (= logħob bil-liega) għad jispiċċa f'ħafna inkwiet.
Isqini u wara staqsini.
Min jixrob jispiċċa jikxef dak li ma jixtieqx.
Inbid ġewwa, irqad barra.
Meta tixrob u tisker, aħjar tiġi f'sensik qabel ma tmur lura d-dar.
L-għira tan-nies iġġib mibegħda bla qies.
L-għira hija sors ta' mibegħda bejn in-nies.
Fejn jidħlu l-interessi m’hemmx permessi.
Kulħadd fih innifsu jaħseb.
Inbid fl-ilma jitlef kilma, inbid pur jitlef l-unur. Titfgħu f’żaqqek jitla’ f’rasek, tratti tagħmel ta’ miġnun.
Tixrobx iżżejjed għax ix-xorb iġiegħlek iġġib ruħek ta' miġnun. Jitlef kilma tfisser jitlef togħmtu.
Il-faħħar ir-rix barra jarmih.
Ma jagħmillekx ġieħ toqgħod tiftaħar.
Billi tagħli ma ġġib xejn.
Billi toqgħod tirrabja ma tasal imkien.
Lil min tafu tistaqsix għalih.
Jekk taf li xi ħadd għandu tip ta' karattru, qisu ta' li hu.
Kulħadd gostih.
Il-gosti jvarjaw skont il-persuna.
Meta jidħol l-inbid joħroġ l-għaqal.
Meta tisker, ma tibqax f'sensik.
Il-bniedem trid tmurlu għal xejrtu.
Biex tieħu xi ħaġa mingħand xi ħadd, trid tkun taf x'għandek tagħmel biex togħġbu.
Bniedem bla ħila ma jiswiex tebaq fwiedu.
Bniedem jintgħażel mill-oħrajn skont il-ħiliet u l-kuraġġ tiegħu.
Ħadd ma jara xturu.
Ħadd ma jħares lejn id-difetti tiegħu.
Faħħru u itfgħu fin-nar.
Min jieħu wisq pjaċir b'min ifaħħru faċilment timmanipulah.
L-għabra tgħajjar liż-żagħruna.
Xi nies jgħajru lil ħaddieħor bid-difetti tagħhom stess. Għabra tfisser trab u ż-żagħruna hija tip ta' pjanta (Crataegus monogyna).
Kull ħmar jidhirlu li għandu joqgħod maż-żwiemel tar-re.
Kulħadd jaħseb li ħaqqu l-aħjar.
L-ikrah jagħmel x’jagħmel ma jsirx sabiħ.
Min hu ikrah dejjem jiġi ttrattat iżjed ħażin minn min hu sabiħ, anke jekk bla tort.
Mutu mutu qrunu f’butu.
Tafdax lil min taħsbu kwiet, għax jaf jittradik.
Dara jerda’ miż-żejża; ħalli naraw meta tmur Trejża.
Bniedem li jiddependi l-ħin kollu fuq ħaddieħor isibha diffiċli xħin ikollu jagħmel xi ħaġa waħdu.
Jekk int ċawla tippruvax tagħmilha ta’ ajkla.
Tippruvax mingħalik timpressjona u tkun aħjar milli verament int.