Jitlagħlu malajr iżda jgħaddilu malajr ukoll.
In-nies ta’ daż-żmien huma nies tal-isem.
Ħadd m'għadu jġib ruħu ta' nies daż-żmien, ma tista' tafda lil ħadd.
Kategoriji: il-karattru | is-soċjetà
Il-logħob jilagħbek hu.
Min ikollu l-vizzju tal-logħob jispiċċa jitqarraq u jitlef ħafna flus.
Islifni wiċċek ħa naħmi bih.
Qed titlobni ħafna, tkunx wiċċek tost.
It-talb iġib il-barka u d-dagħa jġib is-saħta.
It-talb iqarribna lejn Alla, mentri d-dagħa jbegħedna minnu u jqanqal stmerrija.
L-għira ddur mad-dwejra.
Min jgħir għalik il-ħin kollu għassa tiegħek ħalli jara x'inti tagħmel.
Ħafna ftaħir imbagħad tfittex u ma ssib xejn.
Min ikun irid jimpressjona ma jkollux tassew biex.
Bniedem dagħaj ftit idum ħaj.
Bniedem li għandu l-vizzju tad-dagħa jġib is-saħta fuqu nnifsu u jgħix ftit.
Ebda saba’ ma jixbah lill-ieħor.
Kulħadd għandu karattru u opinjonijiet differenti.
Għalhekk il-baqra tinbiegħ kollha, għax min irid rasha u min irid denbha.
Kulħadd bil-fehmiet u l-gosti tiegħu, dak li hu bla valur għal xi ħadd jista' jkun ta' preġju f'għajnejn xi ħaddieħor.
Il-kavallier irejjex fuq is-swar u l-qaħba minn ġol-loġġ tixgħel in-nar.
Il-kavallieri xorta kienu jgħixu ħajja ta' promiskwità, minkejja l-vot ta' kastità li kienu jieħdu. Irejjex tfisser jistad, li f'dan il-każ tfisser imur ifittex il-pjaċiri sesswali.
Il-faħħar ir-rix barra jarmih.
Ma jagħmillekx ġieħ toqgħod tiftaħar.
Il-korla ta’ filgħaxija ħalliha għal filgħodu.
Tiħux deċiżjonijiet mgħaġġla meta tkun irrabjat, stenna sakemm tikkalma.
Ħanżir dak li jistaħam f’kull għadira.
Min m'għandux prinċipji jieħu vantaġġ minn kull opportunità li jinzerta. Jistaħam tfisser iċaflas jew jgħaffeġ.
Il-pipa rġulija, il-magħda ħniżrija u t-tabakk qżiżija.
Dari min kien ipejjep il-pipa kien jitqies ta' klassi, mhux bħal min kien ipejjep is-sigaretti jew jomgħod il-magħda (= chewing tobacco).
Il-lupu jbiddel sufu u mhux għemilu.
Bniedem ħażin jipprova jagħtik x'tifhem li nbidel, iżda fil-fond ta' qalbu ħażin jibqa'.
Il-gost tal-pipa fiċ-ċekċika.
Ħu gost bil-kapriċċi li tagħmel.
Il-kappell tiegħu ma jiġinix.
Il-karattru ta' dak il-bniedem idejjaqni u ma rridx affari miegħu.
Il-far fejn ma jilħaqx bi lsienu jilħaq b’denbu.
Min iħaddem rasu jkun jaf minn fejn għandu jgħaddi biex jikseb li jrid.
Il-ħmar iwaħħal f’denbu.
Qed jgħajjar lil ħaddieħor bid-difetti tiegħu stess.
Bi ħwejjeġ ħaddieħor kulħadd galantom.
Kulħadd jaf jiffanfra bl-affarijiet ta' ħaddieħor.
Illum baram lil wieħed, għada jiftel lill-ieħor.
Qatt m'għandek tafda bniedem ħażin. Jiftel hawn tfisser iqarraq.