Il-prudenza
u s-sens komun
Is-sens komun jiggwidak, il-prudenza ssalvak.
Tiegħu kulħadd irid jagħmlu.
Il-bluha taż-żgħożija kulħadd irid jgħaddi minnha.
Tibdil bla bżonn iġib warajh sebgħa ħżiena.
La xi ħaġa tkun qiegħda taħdem sew tippruvax tibdilha għalxejn, għax tagħmel ħafna iżjed ħsara milli ġid.
Tħobb ħaġa u tobgħod oħra.
Fid-dinja ma jistax ikun kollox: daqqa tiġina tajba u daqqa tiġina ħażina. Bl-istess mod, ma tistax tikkuntenta lil kulħadd f’daqqa.
Tħallix għal għada dak li tista’ tagħmel illum.
Eħles dak kollu li tista’ teħles illum, għax għada ma tafx xi jkun.
Tgħoddx il-flieles qabel ma jfaqqsu.
Titwebbilx li se jkollok xi ħaġa qabel ma tassew tiksibha.
Tgħidx tiegħek il-ħlewwa qabel ma tkun ġewwa.
Titwebbilx li se jkollok xi ħaġa qabel ma tassew tiksibha, bħal meta l-bidwi m’għandu garanzija ta’ xejn qabel ma jaħsad l-uċuħ tar-raba’ minħabba maltemp, vendikazzjonijiet, eċċ.
Tgħidx minn dan l-ilma ma nixrobx.
Titkaża b’ħadd għax għada tkun int li tagħmel dak li qed titkaża bih illum. Bl‑istess mod, tiksirha minn ma’ ħadd għax ma tafx min għad tiġi bżonn.
Tgħallem spejjeż tiegħek.
Titgħallem l-aktar mill-esperjenzi li tgħaddi minnhom, biex ma terġax tagħmel l-istess żbalji.
Tgħallem dejjem spejjeż ta’ ħaddieħor.
Osserva l-iżbalji li jagħmel ħaddieħor u tgħallem minnhom, ħalli ma tbatix inti.
Tfittex qatt bormot ġarek, fittex darek.
L‑affarijiet ta’ ħaddieħor dejjem se jidhru aħjar minn tiegħek, tgħallem apprezzahom.
Terħix ħwejġek f’idejn min ma beżax għal tiegħu.
Min mhux kapaċi jibża’ għall‑affarijiet tiegħu, ma jibżax għall‑affarijiet tal‑oħrajn; għalhekk m’għandekx tafdah.
Temminx kulma tisma’, tgħidx kulma taħseb u turix kulma taf.
Uża moħħok u asal waħdek għall‑konklużjonijiet tiegħek, tħallix lil min jinfluwenzak u tippruvax timpressjona.
Temminx kulma tisma’, tarax kulma juruk.
Uża moħħok u asal waħdek għall-konklużjonijiet tiegħek, tħallix lil min jinfluwenzak.
Tal-ġara jfuħ aktar.
L‑affarijiet ta’ ħaddieħor dejjem se jidhru aħjar minn tiegħek.
Taħseb ħasba u toħroġ għażba.
Minkejja li tkun għamilt minn kollox biex l-affarijiet imorru kif tixtieq, mhux dejjem l-affarijiet jirnexxu. Ħasba tfisser pjan u għażba tfisser imdejjaq.
Tagħmilx zalza qabel ma taqbad il-ħut.
Titwebbilx li se jkollok xi ħaġa qabel ma tassew tiksibha.
Tagħmilx il-ħaġa tiegħek qabel ma tkun f’idek.
Titwebbilx li se jkollok xi ħaġa qabel ma tassew tiksibha.
Tafdax lilek innifsek aħseb u ara lin-nies.
M’għandekx tafda lilek innifsek, u wisq inqas m’għandek tafda lill-oħrajn.
Tafdax biex ma tħallilx.
Tafdax iżżejjed biex lil dak li jkun ma ttihx l-opportunità jisirqek.
Taf x’qal Ġanpatista? “Kulħadd jagħmel dak li jista’.”
Kulħadd jagħmel sa fejn jista’ jew jiflaħ fil-ħajja.
Ta’ bla ħsieb jirnexxi.
L-affarijiet għandhom ħabta jirnexxu iżjed meta ma tkunx ippjanajthom minn qabel.
Skont il-piż is-sies.
Kollox għandu jkun ibbilanċjat u proporzjonat.
Skont il-bini s-sies.
Kollox għandu jkun ibbilanċjat u proporzjonat.
Skont id-daqqa ż-żifna.
Adatta u ddeċiedi skont is-sitwazzjoni li tkun fiha dak il-ħin.
Sewa ta’ xemgħa biex qala’ xebgħa.
Ipprova jsolvi kunflitt u minflok spiċċa qalagħha hu.
Saqsi lill-imġarrab mhux lit-tabib.
Oqgħod fuq min għadda tassew mill-esperjenza, mhux fuq min jaf teoretikament dwarha biss.
Riħ imb riħ jirbaħ il-master.
Meta għandek lagħaba bl-istess ħila (riħ imb riħ), ma jirbaħ ħadd. Il-master tfisser il-logħba, jiġifieri l-l-logħba tkun rebħet fuq il-lagħaba.
Qis mitt darba u aqta’ darba.
Aħsibha u omgħodha sew qabel tieħu deċiżjoni għax darba għandek ċans.
Qis b’xibrek u mhux b’xiber l-oħrajn.
Agħmel l-affarijiet skont kif jaqbel lilek, mhux toqgħod tagħti kas ta’ dak li qed jagħmlu l-oħrajn.
Qawwi ssibha ħobla u tredda’ jekk ma tkunx fenka.
Diffiċli tagħmel ħafna affarijiet f’daqqa li ma jistgħux isiru flimkien. Qawwi tfisser rari.
Qatt tqiegħed il-bajd kollu f’bixkilla waħda.
Ir-riskji li tieħu (finanzjarji, eċċ.) jew l-isforzi li tagħmel m’għandhomx imorru fuq ħaġa waħda. Dan biex jekk ħaġa waħda partikolari tmur ħażin, l-affarijiet l-oħra ma jkun ġralhom xejn.
Qatt tkakki fejn ixxommu.
Tagħmilx affarijiet ħżiena fejn taf li se tinqabad jew jarak min jafek, għax tbati l-konsegwenzi fit-tul.
Qatt timxi wara l-għama.
Toqgħodx fuq il-kelma ta’ min ma jifhimx fis-suġġett.
Qatt tibda xejn qabel ma tara kif tispiċċah.
Biex jirnexxu, jeħtieġ li l-affarijiet tippjanahom sew mill-bidu sal-aħħar qabel tibda.
Qatt tħalli f’idejn ħaddieħor dak li tista’ tagħmel int stess.
Jekk trid li biċċa xogħol issir sew, agħmilha int u tħallix f’idejn ħaddieħor.
Qatt tgħid tiegħek il-ħlewwa qabel ma tkun ġewwa.
Titwebbilx li se jkollok xi ħaġa qabel ma tassew tiksibha, bħal meta l-bidwi m’għandu garanzija ta’ xejn qabel ma jaħsad l-uċuħ tar-raba’ minħabba maltemp, vendikazzjonijiet, eċċ.
Qatt tgħajjat rebħa qabel il-ħaġa tkun lesta.
Titwebbilx li se jkollok xi ħaġa qabel ma tassew tiksibha.
Qatt tagħmel ħaġa tiegħek qabel ma tkun.
Titwebbilx li se jkollok xi ħaġa qabel ma tassew tiksibha.
Qatt iddoqq bit-trumbetta ta’ ħaddieħor.
Ftaħar b’dak li hu tiegħek, mhux b’dak li hu ta’ ħaddieħor.
Qabel ma timxi ara fejn tmidd sieqek.
Oqgħod attent f’dak li tagħmel biex ma tkorrix.
Qabel taqta’ qis u erġa’ qis.
Qis il-konsegwenzi sew – u aktar minn darba – qabel ma tieħu xi deċiżjoni jew riskju.
Qabel ma tidħol aħseb mnejn toħroġ.
Qabel ma tintriga b’xi biċċa xogħol, ara li tkun kapaċi toħroġ minnha jekk jinqala’ xi ħaġa.
Poġġi rasek fejn issibha.
Qis li jkollok imġiba tajba u ma tagħmilx ħmerijiet.
Ħalli rasek fejn issibha.
Qis li jkollok imġiba tajba u ma tagħmilx ħmerijiet.
Pjaċir qatt mhu mitluf.
Meta tagħmel pjaċir jew jagħmluhulek, xi darba għad jitpatta.
Pjaċir jitpatta b’ieħor.
Meta xi ħadd jagħmel pjaċir lil xi ħaddieħor, dan b’xi mod ser ikollu jingħata lura ħin jew ieħor.
Pjaċir ħudu u mhux tagħtih.
Gawdi inti mill-pjaċiri li jagħmillek ħaddieħor, u mhux il-kontra.
Pjaċir bla mitlub mhux magħruf.
Meta tagħmel pjaċir lil xi ħadd mingħajr ma jkun talabhulek, ma japprezzahx.
Pjaċir mhux mitlub nofsu mitluf.
Meta tagħmel pjaċir lil xi ħadd mingħajr ma jkun talabhulek, ma japprezzahx.
Pass wara l-ieħor naslu.
Jekk l-affarijiet nagħmluhom b’mod ordnat u bil-galbu, naslu fejn irridu.
Parir ħudu mqar mingħand ħmar.
Tkunx supperv u parir ħudu mingħand kulħadd.
Orbot tajjeb ħalli ssib xi tħoll.
Ftehim serju għandu jsir bil-miktub u għandu jkun jorbot legalment mingħajr lakuni.
Oqtol il-brimba jekk trid teqred l-għanqbuta.
Jekk trid li xi ħaġa tinbidel, ara x’qed joħloqha u eqirdu.
Oqgħod qgħadek, ara darek, ħares saħħtek u agħmel fagħlek.
Kun fejn għandek tkun, ħu ħsieb darek, ħu ħsieb saħħtek u agħmel xogħlok (fagħlek).
Nofs għomrok ikun għadda meta tagħraf id-dinja xi ssarraf.
F’nofs ħajjitna nkunu tgħallimna mhux ħażin dwar il-ħajja, bis-saħħa tal-esperjenzi li nkunu għaddejna minnhom.
Nies twal qatt ma ħattew swar.
It-tul ma juri xejn mill-ħiliet ta’ persuna.
Nagħġa li ma taqtax bi snienha ma tagħtix ħalib.
Min ma jaħdimx u ma jistinkax imkien ma jasal.
Nagħġa li ma ddurx ma tirgħax.
Min fid-dinja ma joħroġx u ma jimraħx, ma jsibx opportunitajiet u ma jiftaħx moħħu.
Mitt xejn qatlu ħmar.
Ħafna affarijiet żgħar u ħżiena jagħmlu iżjed ħsara minn ħaġa waħda kbira u ħażina.
Miskin dak l-għama li fiż-żmien jittama.
L-isfortunat qatt m’għandu jittama li l-affarijiet ser jitranġaw biż-żmien.
Min twiegħdu tagħmlu jsilek.
Oqgħod attent għax dak li twiegħed jorbtok. Isilek tfisser ikun il-kreditur tiegħek.
Minn tifla joħorġu żewġt iħtien.
Ilqatt żewġ affarijiet f’daqqa. Ħtien huwa l-plural ta’ ħaten (ħu martek).
Min kull miżbla għandu qoffa.
Kulħadd għandu l-preferenzi tiegħu.
Min ma jistax jagħmel li jrid, jagħmel li jista’.
Kulħadd għandu jagħmel sa fejn għandu ħila.
Min ma jistadx ma jaqbadx ħut.
Min ma jridx jaħdem u jistinka ma jagħmilx suċċess fil-ħajja.
Min ma jibkix ma jerdax.
Min ma jiftaħx ħalqu u joqgħod għal kollox xejn ma jieħu.
Min ma jgħixx bil-ftit, ma jgħixx bil-wisq.
Min mhux kapaċi japprezza l-affarijiet iż-żgħar, mhux kapaċi japprezza l-affarijiet il-kbar.
Min ma jbakkarx ma jaqbadx ħut.
Min ma jridx jaħdem u jistinka ma jagħmilx suċċess fil-ħajja.
Min ma jaħsibx x’jiġi wara, la hu raġel u lanqas mara.
Min jagħmel xi ħaġa mingħajr ma jqis il-konsegwenzi tagħha juri li mhux responsabbli.
Min ma jaħsibx, ifittex u ma jsibx.
Biex l-affarijiet imorru tajjeb fi kwalunkwe sitwazzjoni, jeħtieġ li taħseb u tqis.
Min ma jaħseb ma jikseb.
Biex l-affarijiet imorru tajjeb fi kwalunkwe sitwazzjoni, jeħtieġ li taħseb u tqis.
Min ma jafx jaħseb, ma jafx jgħix.
Biex l-affarijiet imorru tajjeb fi kwalunkwe sitwazzjoni, jeħtieġ li taħseb u tqis.
Min jorqod ma jaqbadx ħut.
Min ma jridx jaħdem u jistinka ma jagħmilx suċċess fil-ħajja.
Min jorqod bil-ġuħ joħlom bil-ftajjar.
Iktar ma jkollok xi ħaġa nieqsa li tkun tixtieq, iktar thewden u tiffissa fuqha.
Min joqgħod pass lura qatt ma jagħli.
Min iqis l-affarijiet qabel ma jgħid jew jagħmel xi ħaġa, jew sempliċement iżomm is-skiet, qatt ma jiddispjaċih.
Min joqgħod jagħżel u jiħtar, fl-aħħar jaqa’ fil-pantar.
Min mhux kapaċi jieħu deċiżjoni jispiċċa jbati. Jiħtar tfisser ikun irid jagħżel l-aqwa, u pantar tfisser tajn.
Min jiżloq fin-niexef jikxef għawaru.
Min jieħu żball meta ma jkollux għalfejn, jaqa’ għaċ-ċajt. Għawaru tfisser is-sigrieti tiegħu.
Min jixrob l-ilma ma jilgħabx.
Min jevita x-xorb alkoħoliku, wara ma jiddispjaċihx ta’ xi azzjoni li jkun għamel jew kelma li jkun qal meta kien fis-sakra.
Min jixrob l-ilma ma jagħlix.
Min jevita x-xorb alkoħoliku, wara ma jiddispjaċihx ta’ xi azzjoni li jkun għamel jew kelma li jkun qal meta kien fis-sakra.
Min jittiekel għal ħwejjeġ niesu, b’rasu jdur.
Min jittama f’ħaddieħor u jserraħ fuqu jiżbalja; tiddependi fuq ħadd.
Min jittiekel għal ħwejjeġ il-ħaj, il-ħela għalih ġej.
Min jittama f’ħaddieħor u jserraħ fuqu jiżbalja; tiddependi fuq ħadd.
Min jittama għal ħwejjeġ il-ħaj, il-ħela għalih ikun ġej.
Min jittama f’ħaddieħor u jserraħ fuqu jiżbalja; tiddependi fuq ħadd.
Min jittama fil-ħaj, la jkollu serva u lanqas raj.
Min jittama f’ħaddieħor u jserraħ fuqu jiżbalja; tiddependi fuq ħadd. Serva tfisser sens komun u raj tfisser volontà.
Min jittama fil-ħaj, jew bla sens jew bla raj.
Min jittama f’ħaddieħor u jserraħ fuqu jiżbalja; tiddependi fuq ħadd. Bla raj tfisser bla volontà.
Min jitma fit-tama, it-tama tqarraq bih; jagħmel ir-riħ fil-bomblu u jaħseb li se jsiefer bih.
Min jittama u jgħix fil-fantażija bla ma jieħu azzjoni għad jiddispjaċih maż-żmien.
Min jistedinha joqgħod għaliha.
Min jidħol għal xi ħaġa, ikollu ma jilmentax u jagħmilha bit-tajjeb u l-ħażin kollha tagħha.
Min jislef jitlef.
Meta tislef oġġett jew il-flus lil xi ħadd, tistenniex li se jroddhomlok lura malajr jew fl-istess stat tajjeb li tkun slifthulhom int.
Min jimxi bil-qajla jasal kmieni.
Min jagħmel xogħlu bil-mod u bir-reqqa, jagħmlu aħjar minn min jipprova jgħaġġel biex jeħles.
Min jimxi bil-mod jasal kmieni.
Min jagħmel xogħlu bil-mod u bir-reqqa, jagħmlu aħjar minn min jipprova jgħaġġel biex jeħles.
Min jikriha joqgħod għaliha.
Min jidħol għal xi ħaġa, ikollu ma jilmentax u jagħmilha bit-tajjeb u l-ħażin kollha tagħha.
Min jidħol għall-piż jeħtieġ joqgħod għalih.
Min jintriga b’xi ħaġa minn jeddu, jeħtieġ li jagħmilha sal-aħħar.
Min jidħol bejn il-basla u qoxritha jibqa’ b’riħitha.
Tindaħalx fejn ma jesgħekx għax inti tmur minn taħt.
Min jiddawwar ma jilħaqx.
Min jasal tard ikollu joqgħod għal dik li jsib, m’għandux għażla.
Min jerfa’ jsib.
Faddal il-flus u tarmix bl-addoċċ għax ma tafx x’għad tiġi bżonn.
Min jaqta’ bla ma jqis, minn pezza drapp ma joħroġx qmis.
Mingħajr ma tippjana sew biċċa xogħol, l-affarijiet ma jirnexxux.
Min jaħseb ħażin fi ħwejġu mhux dnub.
Min jieħu ħsieb l-affarijiet tiegħu ma jkunx qed jagħmel ħażin.
Min jagħmel il-ħarrieġa bil-ħsieb, xi darba jagħmel xi ħaġa fuqha.
Kulħadd jagħmel li jagħmel bi skop f’moħħu. Ħarrieġa hija xkaffa tal-ġebel.
Min jagħmel għal żaqqu jbigħ xaqqu.
Min jipprostitwixxi ruħu jitlef ġieħu (= xaqqu) kollu.
Min jagħmel b’bixkilla jagħmel b’qartalla.
Min kapaċi jagħmel xi ħaġa żgħira, kapaċi jagħmel xi ħaġa ikbar. Bixkilla hija qoffa, u qartalla hija qoffa kbira.
Min iwiegħed u ma jagħti, imur l-infern u jbati.
Min ma jżommx il-wegħdiet li jagħmel, imur l-infern.
Min iwiegħed fid-dejn jitqiegħed.
Meta twiegħed xi ħaġa lil xi ħadd, ikollok iżżomm dik il-wegħda u tintrabat biha (= tkun fid-dejn).
Min itenni jġibha aħjar.
Min jipprattika (= itenni) jitgħallem aktar.
Min isemmnek joqtlok.
Min joqgħod ifaħħrek u jżiegħel bik ikun jew qed jistenna xi ħaġa mingħandek, jew jispiċċa jittradik wara li jużak.
Min irid jinqeda jmur hu.
Min irid xi ħaġa jeħtieġ li jfittixha jew jagħmilha hu stess.
Min irid in-nar ifittxu.
Min irid xi ħaġa jeħtieġ li jfittixha hu stess.
Min imur bil-mod jasal kmieni.
Min jagħmel l-affarijiet bil-galbu u bil-qies ma jdumx ma jasal fejn jixtieq; min jipprova jgħaġġel, jieħu l-iżbalji u jaħli iżjed ħin.
Min jimxi bil-mod jasal kmieni.
Min jagħmel l-affarijiet bil-galbu u bil-qies ma jdumx ma jasal fejn jixtieq; min jipprova jgħaġġel, jieħu l-iżbalji u jaħli iżjed ħin.
Min imidd fit-tul wisq, jinfetaq.
Min jipprova jagħmel wisq f’daqqa u bla pjan jispiċċa jbati ħafna.
Min ikun bil-ġuħ jiekol kollox.
Min m’għandux għażla jkollu joqgħod għal kollox.
Min iħalli mil-lum għal għada ma jasal qatt.
Min jaħli l-ħin u jipprokrastina, ma jagħmel qatt xejn u ma jasal imkien.
Min jgħix bit-tama jmut bil-piena.
Min jittama mingħajr ma jieħu azzjoni ma jasal imkien.
Min ifittex isib.
Min irid xi ħaġa jeħtieġ li jfittixha hu stess.
Min ifaħħar irid jieħu.
Min joqgħod ifaħħrek ikun qed jistenna xi ħaġa mingħandek.
Min idum jagħżel u jiħtar ikollu jaqa’ għall-agħar.
Min jittratieni u jdum ma jieħu deċiżjoni jkollu jbati l-konsegwenzi.
Min għandu l-qamħ m’għandux xkejjer u min għandu l-ixkejjer m’għandux qamħ.
Fid-dinja dejjem jonqsok xi ħaġa.
Min bdielu xejn ma swielu.
Min qagħad joqgħod jittratieni m’għamel xejn.
Mietet b’uliedha u lanqas ma ħalliet ġliedha.
Meta tislef oġġett jew il-flus lil xi ħadd, tistenniex li se jroddhomlok lura malajr jew fl-istess stat tajjeb li tkun slifthulhom int. Ġliedha tfisser il-ġilda tagħha.
Mhux kull min jiġri jiġi l-ewwel.
Bħal f’xi kompetizzjoni, fil-ħajja tista’ tipprova iżda mhux dejjem tirnexxi.
Mhux kull min iġerri jieħu l-ewwel.
Bħal f’xi kompetizzjoni, fil-ħajja tista’ tipprova iżda mhux dejjem tirnexxi.
Meta tkun fix-xalata jeħtieġ tiżfen.
Jeħtieġ li tadatta għal kull ċirkostanza fil-ħajja.
Meta tiġik ħudha.
Ħu l-opportunità li ġietek, qabel ikun tard wisq.
Meta tagħti lili u nagħti lilek, la taħraq nar u lanqas seffud.
Meta nagħtu rigal lil xulxin, niġu qisna ma tajna xejn. Seffud huwa virga tal-metall li tintuża fit-tisjir il-forn jew fuq in-nar.
Meta r-ras iż-żgħira tkun fil-glorja, ir-ras il-kbira titlef il-memorja.
Il-ġibda sesswali fil-bniedem tant hi qawwija li ma jibqax jirraġuna meta tiġi l-okkażjoni li jkollu x’jaqsam. Ir-ras iż-żgħira tirreferi għall-parti sesswali tar-raġel.
Meta l-ħsieb ikun f’rasek ma jkunx f’saqajk.
Meta tkun mitluf fil-ħsibijiet ma tkunx kapaċi tagħmel affarijiet oħra.
Meta jtir l-għasfur, imbagħad kollox għalxejn.
Ħu l-opportunità li ġietek, qabel ikun tard wisq.
Meta jmissek likkem.
Aħtaf kull okkażjoni tajba li tiġik. Likkem jiġifieri iġbed.
Meta jaqbel qabbel.
Aħtaf kull okkażjoni tajba li tiġik biex tmur minn fuq.
Mal-ħaġra t-tajn.
Taħlix ħin u eħles dak kollu li tista’ teħles f’daqqa.
Ma tistax toħroġ id-demm mill-blat.
Dak li mhux possibbli taħsibx fih.
Ma tagħmilx li trid, tagħmel li tista’.
Agħmel l-almu tiegħek imbagħad jiġri li jrid.
Ma beżax għal tiegħu, aħseb u ara kemm jibża’ għal tal-oħrajn.
Min mhux kapaċi jibża’ għall-affarijiet tiegħu, ma jibżax għall-affarijiet tal-oħrajn.
Li ma joqtolx isemmen.
Kollox sew sakemm dak li tiekol ma jagħmillekx ħsara.
L-iltim m’għandux bżonn min jgħallmu jibki.
Lil min bata iżjed minnek fil-ħajja tippretendix li ser tgħallmu x’inhi t-tbatija. Iltim jiġifieri orfni.
Lil min tisilfu titilfu, lil min tagħtih iddarrih.
Meta tislef jew tagħti xi ħaġa lil xi ħadd, tistenniex li se jroddhielek lura.
Lil min jiġbidlek likkimlu.
Aħtaf kull okkażjoni tajba li tiġik. Likkimlu jiġifieri iġbidlu.
Lil min iddarrih irabbi l-ġust.
Jekk xi ħadd jidra jagħmel jew jirċievi xi ħaġa, jibda jaħseb li għandu dritt għaliha.
La tpoġġix il-karettun qabel iż-żiemel.
L-affarijiet agħmilhom bil-galbu waħda wara l-oħra, b’mod ordnat.
La toqgħodx fuq l-għatba u lanqas fuq is-senduq għax minn hemm bla ħsieb iqajmuk.
Jeħtieġ tibża’ għall-affarijiet ta’ ħaddieħor ukoll.
La tkun fiż-żifna jkollok tiżfen.
Jeħtieġ li tadatta għal kull ċirkostanza fil-ħajja.
La tħallix is-sħiħ għar-riħ.
Toqgħodx moħħok fl-irqaqat għax tispiċċa tinsa l-essenzjali.
La tħallix il-qattus għassa mal-ħut.
Tafdax lil min taf li ma tistax toqgħod fuqu.
La tidħolx bejn il-basla u qoxritha għax tibqa’ b’riħitha.
Tindaħalx fejn ma jesgħekx għax inti tmur minn taħt.
La tiddinx qabel ma tarah jisbaħ.
Qabel ma tħalli l-ħsibijiet tiegħek jiġru bik, qis il-fatti kollha u stenna sal-aħħar.
La tgħoddx qabel ma jkun fl-ixkora.
Qabel ma tħalli l-ħsibijiet tiegħek jiġru bik, qis il-fatti kollha u stenna sal-aħħar.
La tgħoddx il-flieles qabel ifaqqsu.
Qabel ma tħalli l-ħsibijiet tiegħek jiġru bik, qis il-fatti kollha u stenna sal-aħħar.
La tgħid qatt minn dan l-ilma ma nixrobx.
Titkaża b’ħadd għax għada tkun int li tagħmel dak li qed titkaża bih illum. Bl-istess mod, tiksirha minn ma’ ħadd għax ma tafx min għad tiġi bżonn.
L-ajru għandu għajnu u l-ħajt għandu widintu u li jisma’ jgħidu ‘l ibnu.
Trid toqgħod attent ħafna minn dak kollu li tgħid u tagħmel, għax malajr jgħidu bik u l-kelma tiġri.
L-aħjar triq tan-nofs.
M’hemmx isbaħ mill-moderazzjoni.
L-aħjar toqtol żewġ għasafar bi skartoċċ wieħed.
Aħjar teħles żewġ affarijiet f’daqqa kif tkun fiż-żifna.
La ħablet jeħtiġilha tiled.
Kulma tagħmel għandu l-konsegwenzi tiegħu.
Kulma tagħti n-natura ma jistax jitreġġa’ lura.
In-natura tiddetta kollox hi minn kull aspett – kemm ikollna enerġija u saħħa, inkunux f’saħħitna jew morda, il-kulur tal-għajnejn u x-xagħar, eċċ.
Kull żmien żmienu.
Jeħtieġ li tadatta għal kull sitwazzjoni u ċirkostanza.
Kull waqt waqtu.
Jeħtieġ li tadatta għal kull sitwazzjoni u ċirkostanza.
Kull soddieda ssib il-flixkun tagħha.
Għal kollox hemm is-soluzzjoni adatta. Soddieda hija tapp; oġġett li jsodd.
Kull reħma għajnuna.
Anke l-iżgħar affarijiet jgħinu biex jimxi x-xogħol jew issir xi ħaġa ikbar. Reħma tfisser mogħdrija.
Kull regola għandha l-eċċezzjoni tagħha.
Qatt ma hemm xejn assolut.
Kull qoffa ssib il-miżbla tagħha.
Kulħadd għandu l-preferenzi tiegħu.
Kull qoffa għandha miżblitha.
Kulħadd għandu l-preferenzi tiegħu.
Kull laqxa tirfed l-imramma.
Anke l-iżgħar affarijiet jgħinu biex jimxi x-xogħol jew issir xi ħaġa ikbar. L-imramma tfisser ħajt wiesa’.
Kull ilma jaqta’ l-għatx.
F’sitwazzjoni fejn m’għandekx għażla, kollox jgħin.
Kull ħin hu ħinu.
Kollox għandu jsir fil-mument opportun.
Kull ħaġa għandha l-ħtieġa tagħha.
Kollox għandu l-użu tiegħu fil-mument it-tajjeb.
Kull ħaġa f’waqtha.
Kollox għandu jsir fil-mument opportun.
Kull barrani jibża’ minn ta’ qattagħni.
Meta ma nkunux f’post jew sitwazzjoni li mdorrijin fiha, nibżgħu u noqogħdu iżjed attenti.
Kulħadd iridha dik iċ-ċajta kultant.
Ċajta ta’ kultant tagħmillek il-ġid.
Kulħadd iridha dik il-ħlieqa kultant.
Ċajta ta’ kultant tagħmillek il-ġid.
Kulħadd irid il-ħniena u l-Ħniena fit-triq tar-Rabat.
Ħadd ma jħenn għalik fid-dinja. Il-Kappella tal-Ħniena tinsab fit-triq tar-Rabat, Għawdex.
Kulħadd għandu mnieħer biex ixomm.
Ħadd mhu iblah, kulħadd jaf x’għandu jagħmel.
Kollox jiġi f’waqtu.
Hemm il-ħin u l-mument it-tajjeb għal kollox.
Kollox duħħan fuq din l-art.
Kollox jasal fi tmiemu fid-dinja.
Kieku waqa’ u kiser siequ.
Issa li sar sar, għalxejn toqgħod taħseb fuq dak li seta’ kien.
Kieku u kien qatt ma nstabu flimkien.
Issa li sar sar, għalxejn toqgħod tinkwieta fuq dak li seta’ kien.
Kieku u kien qatt ma ltaqgħu flimkien.
Issa li sar sar, għalxejn toqgħod tinkwieta fuq dak li seta’ kien.
Kelb rieqed la tqajmux.
Tagħmilx dak li taf li ser joħloq ħafna problemi.
Jiswa wisq aktar il-ħmar tiegħek miż-żiemel ta’ ħaddieħor.
Apprezza li għandek, anke jekk forsi inqas minn ta’ ħaddieħor.
Jew tkanta jew terfa’ s-salib.
Ma tistax tleħħaq ma’ kollox f’salt.
Jew tiekol jew issaffar.
Ma tistax tleħħaq ma’ kollox f’salt.
Jew iddoqq jew tiżfen.
Ma tistax tleħħaq ma’ kollox f’salt.
Jekk trid tiekol il-bajtar, itla’ aqta’ int.
Jekk biċċa xogħol diffiċli tridha ssir sew, agħmilha int u tqabbadx lil ħaddieħor.
Jekk trid il-ħut mur is-suq.
Meta tkun trid xi ħaġa, aqbad u mur għaliha.
Jekk trid il-ħaġa ssir mur int, u jekk ma tridx ibgħat.
Trid tieħu inizjattiva inti biex l-affarijiet isiru, inkella qabbad lil xi ħadd kapaċi.
Jekk trid il-ħaġa magħmula sewwa, agħmilha int.
Biex ħaġa ssir skont l-aspettattivi tiegħek, aqbad u agħmilha inti.
Jekk tiġbed wisq tinqata’ l-ħajta.
Tesaġerax u tabbużax għax ikollok tbati l-konsegwenzi.
Jekk ma titlobx ma taqlax.
Toqgħodx lura milli titlob dak li teħtieġ.
Jekk ma tafx ħrafet pajjiżek, ħrafet min taf? Ħrafet qaddisek?
Il-Maltin għandhom ikunu jafu l-istorja ta’ Malta (= ħrafet pajjiżhom).
Jekk jaqbel qabbillu.
Uża moħħok biex dejjem tasal għad-deċiżjoni t-tajba.
Jekk int mgħaġġel mur mal-vapur.
Ħu paċenzja u stenna wara min imissek fil-kju, inkella itlaq.
Iż-żejjed kollu żejjed.
Uża l-moderazzjoni f’dak kollu li tagħmel.
Iż-żejjed imbidded.
Uża l-moderazzjoni f’dak kollu li tagħmel. Imbidded tfisser imxerred.
Iż-żejjed ħu n-nieqes.
Uża l-moderazzjoni f’dak kollu li tagħmel.
Ix-xejn xejn.
Fid-dinja ħu pjaċir ukoll bl-affarijiet żgħar u tajbin li jiġrulek.
Ixxammarx kmiemek qabel ma jasal żmienek.
Tiftaħarx qabel ma jkollok tassew biex.
It-triq tal-ħmar twasslek id-dar.
Min jagħmel bħal ħaddieħor ftit li xejn jiżgarra.
It-Tork jgħid min iġarrab jagħraf, aħseb u ara xi jgħid in-Nisrani.
It-tiġrib tal-ħajja huwa l-akbar sors ta’ tagħlim.
It-tiġrija sal-barkun biex tintrebaħ.
M’għandek qatt tagħmilha fatta li rbaħt jew li xi ħaġa saret tiegħek, stenna sal-aħħar biex tevita d-diżappunt.
It-tħollija ta’ xi ħaġa mil-lum għall-għada ma tasal qatt.
Il-prokrastinazzjoni ma twasslek imkien – aqbad u agħmel li għandek tagħmel.
Is-siġra ma tagħmilx frott barra minn żmienha.
Fid-dinja kollox f’ħinu u f’waqtu, bħaċ-ċiklu tan-natura.
Is-self wisq drabi jinbidel f’telf.
Meta tislef oġġett jew il-flus lil xi ħadd, tistenniex li se jroddhomlok lura malajr jew fl-istess stat tajjeb li tkun slifthulhom int.
Is-self ħu t-telf.
Meta tislef oġġett jew il-flus lil xi ħadd, tistenniex li se jroddhomlok lura malajr jew fl-istess stat tajjeb li tkun slifthulhom int.
Is-self joħroġ jidħaq u jidħol jibki.
L-affarijiet tiegħek tieħu ħsiebhom, iżda meta tislifhom lil ħaddieħor kun af li mhux ser jieħu ħsiebhom bl-istess mod.
Il-logħob tal-idejn ibikki l-għajnejn.
Il-logħob tal-idejn iwassal għall-biki, la jweġġa’ xi ħadd.
Ir-raġġ tal-idejn ibikki l-għajnejn.
Il-logħob tal-idejn iwassal għall-biki, la jweġġa’ xi ħadd.
Trid tgħallem ’l ommok tbennen.
Ma tistax tgħallem lil min għandu iżjed esperjenza minnek f’xi ħaġa.
Imżaqq tajjeb isemmen.
L-ikel (= imżaqq) tajjeb iħaxxen.
Il-wiċċ li jindara bil-ħara jinxtara.
Il-kunfidenza żejda ġġib nuqqas ta’ rispett.
Il-wiċċ li jindara biċ-ċajt jinxtara.
Il-kunfidenza żejda ġġib nuqqas ta’ rispett.
Il-qadim żomm miegħu.
Il-qadim irnexxielu jegħleb l-isfidi matul iż-żmien u allura ta’ min joqgħod fuqu.
Il-paċenzja ma jbigħux minnha l-ispiżjara.
Il-paċenzja trid tara minn fejn se ġġibha inti, għax mhu ser jagħtihielek ħadd.
Il-munxar għana u l-qaduma ħala.
Kun effiċjenti, bħas-serrieq (= munxar) li huwa iżjed effiċjenti mill-mannara (= qaduma).
Il-magħmul tqisu tista’ imma le ssewwih.
Issa li sar sar, għalxejn toqgħod tinkwieta għax ma tistax treġġa’ kollox lura.
Il-lest lest.
Li tkun lestejt m’għandekx iżjed ħsiebu.
Il-lejl għandu wliedu suwed.
Isiru ħafna affarijiet ħżiena billejl, mela oqgħod attent(a).
Il-lejl għal-lpup.
Toħroġx tiġri barra billejl, evita l-periklu. Lpup huwa l-plural ta’ lupu.
Il-kruha hi wisq agħar mill-bluha.
Aħjar tkun iblah milli ikrah, tal-inqas il-bluha ma tidhirx.
Il-ħolm la fih x’torbot u lanqas xi tħoll.
Il-ħolm waħdu ma jwasslek imkien.
Il-ħobż minn ħalqi nieklu.
M’iniex injorant daqs kemm qed taħsibni, naf x’għandi nagħmel.
Il-ħmar tiegħi u nirkeb wara.
Ara li dak li hu tiegħek tgawdih int, mhux tħalli lil ħaddieħor igawdih hu minflokok.
Il-ħbar hi li l-għasfur tar u l-għoxx baqa’ battal.
Jekk ma taħtafx l-opportunità, wara jkun tard wisq. Ħbar tfisser aħbar u għoxx tfisser bejta tal-għasafar.
Il-ħaġa tkun taf kemm tiswa meta tiġi bżonnha.
Taqbadx u teħles minn xi ħaġa, għax għad jasal il-mument li tiġi bżonnha.
Il-ħaġa f’waqtha tajba.
Agħmel li għandek tagħmel mill-ewwel u taħlix żmien.
Il-ħafi għama.
Min ma jiħux il-prekawzjonijiet neċessarji jkollu jbati l-konsegwenzi, bħal min joħroġ ħafi barra.
L-għaqal isbaħ mill-ġmiel.
Aħjar tkun għaqli(ja) milli tkun sabiħ(a).
L-għajn trid sehemha.
Importanti li tattira l-attenzjoni tan-nies fuq xi ħaġa billi tagħmilha attraenti.
Il-ġuħ iġiegħlek tiekol kollox.
Meta jkollok bżonn xi ħaġa ma taħsibhiex darbtejn, taqbad u tagħmilha.
Il-ġifa qatt ma wera għaqal.
Min jibża’ m’għandux għaqal.
Il-ġdid dejjem sabiħ.
L-affarijiet il-ġodda dejjem iżjed attraenti.
Il-fuħħara li ġġelġel hija mxiegħra.
Trid taċċetta li tagħmel x’tagħmel ser issir il-ħsara. Fuħħara tfisser reċipjent tal-fuħħar u mxiegħra tfisser li tkun ixxaqqet.
Il-ftit tajjeb u jgħallem bħall-wisq.
Jekk il-ftit li tieħu jkun tajjeb, mela xorta tkun moqdi.
Il-ftit ma jxebbax.
Bħal meta tiekol ftit u ma tixbax, hekk ukoll ċerti affarijiet jitolbu iżjed minn ftit sforz biex jirnexxu.
Il-ftira sħuna tajba.
Agħmel li għandek tagħmel mill-ewwel u taħlix żmien.
Il-fartas ma jislifx xagħar.
Dak li m’għandix ma nistax nagħtihulek.
Il-bżonn iħarrek ir-riġlejn.
Meta jkollok bżonn xi ħaġa ma taħsibhiex darbtejn, taqbad u tagħmilha.
Il-bżonn iġiegħlek tagħmel kollox.
Meta jkollok bżonn xi ħaġa ma taħsibhiex darbtejn, taqbad u tagħmilha.
Il-borma tal-ġar tfuħ aktar minn tad-dar.
L-affarijiet ta’ ħaddieħor dejjem se jidhru aħjar minn tiegħek.
Il-borma min iħawwarha jaf x’fiha.
Min ikun għamel xi ħaġa hu stess ikun jaf eżatt x’sar u x’ma sarx.
Il-beċċun jolqot il-ħabba.
Kulħadd jaf xi jrid, u jagħmel minn kollox biex jiksbu. Il-ħabba hija biċċa ikel.
Iftaħ biebek u ftaħar jew agħlqu u nsatar.
Jekk se tiftaħar ara li jkollok biex, għax taqa’ għaċ-ċajt.
Id-dinja ma saritx f’daqqa.
Biex l-affarijiet isiru sew, iridu jsiru bil-mod u bil-paċenzja. Xejn ma jsir f’daqqa.
Ħażin jagħmel min jimxi ħafi billejl.
Dejjem ħu l-prekawzjonijiet kollha, bl-istess mod li ma timxix ħafi fid-dlam.
Ħalli tmur id-dgħajsa, ladarba hu riħha.
Ħu l-opportunità li ġietek.
Ħajt imżaqqaq għaddi bgħid minnu.
In-nies ta’ reputazzjoni ħażina m’għandekx xi tridhom, għax huma perikolużi daqs ħajt li ser jaqa’.
Ħajri ma nagħtihx lil għajri.
M’iniex ser nissagrifika l-kuntentizza tiegħi għal ħaddieħor.
Ħaġa li ma jaqbilx tagħmilha jaqbel tħalliha.
Agħraf liema opportunitajiet jaqbillek tieħu u l-bqija ħallihom għaddejjin.
Għajnejk u widnejk misshom b’minkbejk.
Toqgħodx tmiss għajnejk u widnejk għax tlaqqat infezzjoni.
Għasfur f’idejk aħjar minn mija fl-ajru.
Aħjar ikollok xi ħaġa fiċ-ċert minn ħafna affarijiet bla garanzija li xi darba se jkunu tiegħek.
Għall-pariri kulħadd raġel.
Kulħadd jaf jagħti parir għax faċli ħafna, kelma tmur fin-nofs.
Għall-magħmul m’hemmx kunsill.
Issa li sar sar, għalxejn toqgħod tinkwieta.
Għal musmar titlef in-nagħla.
Għal ħaġa mhi xejn tispiċċa titlef kollox.
Għal min mhux mistieden m’hemmx siġġu għalih.
Min ma jridekx mhux se jilqgħek.
Għaddi dejjem mnejn jgħaddi l-ħmar u ma jibdilekx.
Jekk tagħmel bħal ħaddieħor ma tiżbaljax.
Ftit laħam isebbaħ qattus.
L-irquqija żejda mhix tajba għas-saħħa lanqas.
Fittex li tboss mingħajr ma tagħmel ħoss.
Dak li għandek tagħmel agħmlu b’mod diskret.
Fil-borma fula niexfa u fit-taġen fula xierfa.
Ir-riżultat huwa determinat minn dak li tiddeċiedi li tagħmel inti.
Fid-dinja ma trid taħlef għal ħadd.
M’għandekx tafda għax kulħadd kapaċi jiżbalja.
Fid-dinja kollox jista’ jkun.
Ħadd mhu speċjali, jista’ jiġrilek kull ħaġa li tista’ tiġri lil ħaddieħor.
Fejn ma tafx tindaħalx.
Jekk ma tafx biżżejjed dwar is-suġġett jew is-sitwazzjoni mela tgħid xejn u tagħmel xejn.
Fejn il-kotra ma ssibx tarf.
Tagħmel x’tagħmel, ma tistax tintgħoġob ma’ kulħadd.
Fejn għajnejk, oħrajn għajrek.
Dak li trid inti wisq probabbli jridu ħaddieħor ukoll.
F’kull għemilek aħseb dejjem x’jiġri wara.
Żomm f’moħħok il-konsegwenzi ta’ azzjonitek qabel tagħmel xi ħaġa.
Erba’ għajnejn aħjar minn tnejn.
Meta jkun hemm aktar minn persuna waħda tiċċekkja biċċa xogħol, hemm aktar ċans li jinqabdu l-iżbalji.
Dur, dur, dur madwar in-nassa, fl-aħħar il-ġurdien jidħol fl-ingassa.
Min jersaq wisq viċin tal-periklu xi darba se jweġġa’.
Drabi l-qalb taħber.
F’ċerti ċirkostanzi, faċli tobsor xi jkun se jiġri.
Darba jingidem il-bniedem.
Tħalli lil ħadd iqarraq bik aktar minn darba. Tafdax.
Dak li ma kienx għad jista’ jkun.
Dak li ma ġarax il-passat jista’ jiġri fil-futur.
Dak li jidħol fil-wiżna ma jidħolx fil-qantar.
L-affarijiet iż-żgħar ma jagħmlux differenza meta jitqiesu fil-kuntest tal-affarijiet il-kbar.
Dak li jagħmilhielek darba jagħmilhielek mitt darba.
Min diġà tak prova li ma tistax tafdah tkunx iblah u terġa’ tafdah.
Dak li għandek tirhan bigħu.
Jekk għandek xi ħaġa x’tagħmel agħmilha minnufih.
Dak li għandek tagħmel aħseb għalih kmieni.
Jekk għandek xi ħaġa x’tagħmel agħmilha minnufih.
Dabbar rasek għax idabbruhielek.
Ara l-affarijiet tiegħek għax ħaddieħor tiegħu wkoll jara.
Ċawla bajda ma dehret qatt.
Dak li ma jista’ qatt iseħħ taħsibx fih.
Bużobba b’li kellu ddobba.
Tiddobba b’dak li jkollok, m’hemmx mod ieħor.
Bormot ġarek tfuħ aktar minn ta’ darek.
L-affarijiet ta’ ħaddieħor dejjem se jidhru aħjar minn tiegħek.
Bniedem mhux mistieden m’hemmx siġġu għalih.
Min ma jridekx mhux se jilqgħek.
Bniedem imġarrab jibża’ minn dellu.
Bniedem li jkun għadda minn esperjenza kerha joqgħod iżjed attent fil-futur.
Bniedem avżat nofsu armat.
La tkun taf b’xi ħaġa minn qabel, għandek kull opportunità biex tlesti ruħek.
Bin-nies ma tistax tboss.
Ma tistax tagħmel li trid għax in-nies jgħidu bik.
Bin in-nies trabbihx, xbinek bi żbirr teħdux u l-mara turihiex kollox.
Trabbix tfal ta’ nies oħra, tiżżewwiġx pulizija u lill-mara tgħidilhiex kollox għax tużah kontrik.
Bil-paċenzja u ż-żejt, iljunfant ħexa nemla.
Trid tieħu paċenzja biex l-affarijiet jitranġaw.
Bil-paċenzja nsewwu kollox.
Trid tieħu paċenzja biex l-affarijiet jitranġaw.
Bil-mod kollox isir.
Bi ftit paċenzja kollox isir.
Bil-meħel kollox isir.
Bi ftit paċenzja kollox isir.
Billi tidħaq jew tinkwieta lanqas tixtri b’ħabba ftieta.
Għandek dejjem tuża s-sens komun fil-ħajja.
Biex tolqot ħu l-mira tajjeb.
Trid taħsibha sew qabel ma tgħid jew tagħmel xi ħaġa.
Biex tneħħi l-għanqbut, oqtol il-brimba.
Jekk trid li xi ħaġa tinbidel, ara x’qed joħloqha u eqirdu.
Biex titgħallem tgħum ma tridx tibża’ mill-ilma.
Min jibża’ mkien ma jasal.
Biex tagħmel l-arja jrid ikollok biex.
Irid ikollok raġuni tajba biex tiftaħar b’xi ħaġa.
Bejlek għajnek għax b’rasek idur.
Trid toqgħod attent biex ħadd ma jgħaddi ż-żmien bik.
Aringa filgħodu deheb, aringa f’nofsinhar fidda, aringa filgħaxija ram.
L-affarijiet għandek tgawdihom meta jkunu fl-aqwa tagħhom, qabel ma jkun tard wisq.
Ara xi qbadt u mhux x’sajjart.
L-affarijiet isiru sew skont xi tkun użajt biex tagħmilhom.
Ara u erġa’ ara qabel ma taqbeż.
Aħsibha sew qabel tieħu deċiżjoni.
Aktar ma tqalleb, aktar titqalleb.
Aktar ma tbiddel, aktar toħloq konfużjoni.
Aktar hu ħafif biex taqa’ milli biex tqum.
Faċli iżjed tiżbalja milli ġġibha tajba.
Aħxen il-komma mid-driegħ, jekklile huwa u dieħel jaqsamha.
Jekk il-komma tkun iżgħar mid-driegħ, id-driegħ ma jidħolx. Bl-istess mod, għandek tadatta skont is-sitwazzjoni.
Aħsibha qabel ma tagħmilha.
Żomm f’moħħok il-konsegwenzi ta’ azzjonitek qabel tagħmel xi ħaġa.
Aħseb ħafna, tkellem ftit, ikteb inqas.
Inqas ma taħseb, titkellem u tikteb, inqas hemm ċans li tagħmel żball.
Aħseb dejjem x’jiġri wara għax ta’ wara ma ġġibux ‘il quddiem.
Żomm f’moħħok il-konsegwenzi ta’ azzjonitek qabel tagħmel xi ħaġa.
Aħseb dejjem x’jiġi wara.
Żomm f’moħħok il-konsegwenzi ta’ azzjonitek qabel tagħmel xi ħaġa.
Aħjar għasfur f’idejk milli mija fl-ajru.
Aħjar ikollok iċ-ċertezza li xi ħaġa hija tiegħek, milli ma jkollok ebda ċertezza fuq ħafna affarijiet.
Aħjar weġgħa minn demgħa.
Aħjar tonfoħ bid-dwejjaq milli tokrob bl-uġigħ.
Aħjar uff inkella aħħ.
Aħjar tonfoħ bid-dwejjaq milli tokrob bl-uġigħ.
Aħrab il-ħażin qabel iġġarrbu.
Evita li tgħaddi minn esperjenza ħażina.
Aħjini llum u oqtolni għada.
Apprezza dak li għandek illum għax għada ma tafx x’se jkollok.
Aħrab l-iff, il-puff u l-jaqq għax iġibu wġigħ ta’ żaqq.
Tbati inqas jekk titgħallem mill-iżbalji ta’ ħaddieħor.
Aħjar timxi għan-niżla milli għat-telgħa.
Aħjar teħles ħafif milli tikkumplika l-affarijiet.
Aħjar tgħawweġ milli tkisser.
Agħmel żball li jissewwa mhux wieħed li ma jissewwiex.
Aħjar ħarba minn karba.
Aħjar tevita l-periklu milli jkollok tbati l-konsegwenzi tiegħu wara.
Aħjar ftit minn xejn.
Aħjar tikkuntenta bi ftit.
Aħbar li ma taqbillekx, toqgħodx tismagħha.
M’hemmx għalfejn tkompli tisma’ aħbar ħażina.
Agħti fuq il-ħadida meta tkun mikwija.
Toqgħodx tistenna biex tagħmel xi ħaġa, aqbad u agħmilha.
Agħmel li tista’, imbagħad isir li jsir.
Agħmel ħiltek imbagħad jiġri li jrid.
Il-qwiel kollha, f’post wieħed.