Tfajla mibruma hija tfajla sabiħa.
Kategorija: il-mara
Ir-rokon tad-dar ma jagħmlux għar.
Il-mara tad-dar m’għandhiex għalfejn tħossha inqas minn ħaddieħor, għaliex xorta xogħol tagħmel. Għar tfisser diżunur.
In-nemla mara bieżla u n-naħla raġel għaqli.
Jekk il-mara tkun bieżla daqs nemla u r-raġel ikun għaqli daqs naħla, il-familja tkampa sew.
Il-qamar mimli imma le jsellimli.
Meta l-mara ma tarax demm mestruwali, dan huwa sinjal li rnexxielha tinqabad tqila. Il-qamar mimli jirreferi għall-fatt li jkun għadda xahar.
Il-kliem żejjed ħallih għan-nisa.
Tgħid xejn bla bżonn.
Il-kliem tan-nisa jaħraq bħan-nar.
Ilsien ta’ mara jista’ jweġġa’ ħafna.
Il-ħajja tal-bnejta bħal mindil fil-bejta.
Dari t-tfajliet kienu ddestinati li jbatu bix-xogħol tad-dar. Bnejta tfisser tfajla u mindil tfisser sarvetta.
Il-ħafa jitfi ż-żina.
In-nisa li dari kienu jimxu ħafjin barra kienu jitilfu mis-sbuħija tagħhom. Żina (bl-aċċent fuq l-i) tfisser ġmiel.
Il-ġuvni bandiera bajda.
Ġuvni jeħlisha eħfef minn xebba meta jagħmel xi ħaġa ħażina.
Il-frawla saret u x-xebba ħmaret.
Il-ġmiel ta’ frawla li tkun saret jitqabbel mal-ġmiel ta’ tifla li tkun saret xebba.
Il-bint għandha tiskot, toqgħod fir-rokon, tilbes il-għoqod u tiekol il-loqom.
Dari n-nisa kienu ddestinati għax-xogħol tad-dar u għal ħajja li ftit li xejn kienet ta’ sodisfazzjon.
Id-dmugħ f’għajnejn in-nisa sponża.
In-nisa joqogħdu jibku biex jagħmlu bik li jridu.
Id-debba l-ġerrejja jekk ma tkunx l-ewwel dis-sena tieħu li ġejja.
In-nisa irresponsabbli xi dabra għad jispiċċaw f’inkwiet kbir.
Id-dbielet twal ikarkru t-trab, imma d-dbielet qosra jkarkru l-erwieħ.
In-nisa għandhom jilbsu onest.
Ibża’ minn geddum ta’ ħanżir, sieq ta’ tiġieġa u lsien ta’ mara.
Ilsien in-nisa ma jieqaf qatt, bħal geddum il-ħanżir u sieq it-tiġieġa.
Ħu l-inbid biex isir ħall u mhux il-ħall biex isir inbid.
Jekk tiżżewweġ lil xi ħadd b’karattru sabiħ, hemm ir-riskju li fil-futur ma jibqax sabiħ; jekk tiżżewweġ lil xi ħadd b’karattru ikrah, dan żgur qatt mhu ser isir sabiħ.
Ħotba f’San Mark tpoġġik taħt l-art.
Superstizzjoni ta’ dari fejn kienu jemmnu li bħalma f’San Mark tagħmel ħafna xita li teqred l-uċuħ tar-raba’, bl-istess mod il-ħotba (meta kienu jlaqqgħu mara u raġel) kien hemm ċans kbir li ma tirnexxix.
Ħares lejn il-qamar bil-ħajra għax għalik ikollu l-għira.
Superstizzjoni: dari kienu jemmnu li jekk mara tħares lejn il-qamar issib ir-raġel li tixtieq.
Hemm dwieb u dwieb, tal-għenienel u tal-mantijiet.
In-nies ta’ intern ħażin kullimkien qegħdin, uħud jidhru u oħrajn le. Dwieb huwa l-plural ta’ debba u għenienel huwa l-plural ta’ għonnella.
Għonq bla ras, tina bla toqba u tifla bla mistħija la fihom ħajr u lanqas ħotba.
Mara bla pudur ta’ min jaħrabha.
Għax-xiħa taħdit u l-imgħażel.
Dari n-nisa xjuħ ma kellhomx biex jedhew ħlief fil-paroli u fl-insiġ. L-imgħażel huwa għodda għall-insiġ.
Għall-ħwietem u għall-imsielet baqgħet bla ma kielet.
Xi nisa jaslu li jagħmlu minn kollox għall-flus. Il-ħwietem huma ċ-ċrieket.
Għal kull nittiena hemm żmienha.
Bniedem ħażin xi darba jeħodha wkoll il-lezzjoni.
Għal ħafna subien lesti l-bsaten u t-tmien, għal ħafna bniet lesti ċ-ċraret u l-biċċiet.
Dari s-subien biss kellhom opportunità għal karriera, il-bniet kienu jagħmlu biss ix-xogħol tad-dar. Tmien huma kpiepel.
Għaġin u torti u nbid bil-kwarti, u aħjar żaqqi minn żaqq marti.
Ċerti rġiel moħħhom biex jixxalaw u jiddevertu u lil marthom jinsewha.
Fil-ħarifa l-mara timla l-qaleb bil-ġbejna u tħawwad il-brejma bin-nejna.
Il-mara tad-dar għandha ħafna xogħol kemm fid-dar kif ukoll fit-trobbija tat-tfal. Il-brejma tirreferi għal skutella u n-nejna hija kelma tat-tfal għal ikel.
Din hi l-għarusa; jekk togħġbok aqbadha u jekk ma togħġbokx ħallini nraqqadha.
Meta ma jkollokx għażla, jew tieħu li hemm jew ibqa’ b’xejn.
Dik soru msawra u fuq bejt imtajra.
Mara tal-affari tagħha xorta tattira l-attenzjoni bis-sbuħija tagħha.
Debba bla lġiem tiġġarraf.
Il-mara għandha toqgħod attenta f’dak li tagħmel biex ma jiddispjaċihiex.
Debba bla lġiem fis tikser għonqha.
Il-mara għandha toqgħod attenta f’dak li tagħmel biex ma jiddispjaċihiex.
Darba l-għadma ta’ raġel mejjet resqet mal-għadma ta’ mara mejta.
Il-ġibda sesswali hija parti min-natura tal-bniedem.
Dar b’żewġ nisa maħmuġa.
Id-dar titmexxa minn mara waħda.
Dar bla mara ma fihiex x’tara.
Il-mara żżomm id-dar fuq saqajha.
Bin in-nies trabbihx, xbinek bi żbirr teħdux u l-mara turihiex kollox.
Trabbix tfal ta’ nies oħra, tiżżewwiġx pulizija u lill-mara tgħidilhiex kollox għax tużah kontrik.
Billejl in-nisa kollha xorta.
Fid-dlam il-pjaċir sesswali kollu l-istess.
Bewsa ta’ żewġek xħin tiftakar fiha terġa’ tmewġek.
Il-bewsa tal-mara jew ir-raġel tiegħek tqanqlek.
Bewqet xaqqha biex żejnet żaqqha.
Tilfet ġieħha kollu għall-flus.
Tifla ħudha minn dar ta’ nies jistgħu, u għalqa ħudha mingħand għażżien.
Dari ma kontx tiżżewweġ biss għall-imħabba iżda wkoll għad-dota tax-xebba – bl-istess mod, kien jaqbillek iżjed tikri għalqa li qatt ma tkun inħadmet.
Armla ta’ tletin tfittex raġel bħall-għamjin, armla ta’ ħamsin tagħżel mill-qalbenin.
Armla li tkun għadha żagħżugħa toqgħod inqas attenta minn armla aktar imdaħħla fiż-żmien meta tfittex raġel ieħor.
Armla bħal ġemel: għaliha ż-żwieġ mimli nemel.
In-nisa romol ikunu diġà għaddew minn ħafna tbatija u ma tkunx faċli għalihom li jerġgħu jiżżewġu.
Armel u mrabbab ma fiex xi ttellet.
In-nisa ma jkunux iridu rġiel romol li diġà jkollhom it-tfal.
Aħjar ġerrejja tiġbor ġieħha milli fqir isir sinjur.
Aħjar il-ħażin li jsir tajjeb, milli l-fqir isir sinjur – il-flus jitilgħulu għal rasu.
Ir-raġel tiegħek sal-kantuniera.
Mara m’għandha qatt taqla’ għajnejha minn fuq żewġha.
Ir-raġel jiżra’ mtira u l-mara tagħmillu ftira.
Ir-raġel jaħdem fl-għalqa u martu ġġiblu x’jiekol. Mtira hija biċċa art.
Ir-raġel ġiebja u l-mara sieqja.
Ir-raġel jaħdem għall-flus u l-mara tberbaqhom.
Ir-raġel dejjem bandiera bajda.
Raġel dejjem jeħlisha eħfef minn mara meta jagħmel xi ħaġa ħażina.
Raġel jaħlef u mara tibki temminhomx f’li jgħidulek.
M’għandekx temmen raġel li jaħlef u mara li tibki.
Raġel id-dar, xitan fuq xkaffa.
Raġel li joqgħod id-dar, joqgħod jindaħal lil martu.
Raġel id-dar, ħatba fin-nar.
Raġel li joqgħod id-dar, joqgħod jindaħal lil martu.
Raġel ħalliel, mhux tifel sinċier.
Il-mewt tar-raġel, f’ħajjet martu tħalli vojt li l-imħabba u s-sinċerità ta’ wliedha ma jkunux kapaċi jimlew.
Ir-raġel qalbu qaqoċċa; jagħti werqa lil kulħadd imma l-qalba jagħtiha lill-mara.
Il-mara dejjem għandha post speċjali f’qalb żewġha.
Raġel kif iddarrih, u t-tifel kif trabbih.
Il-mara trid iddarri r-raġel mod ieħor min kif kien jagħmel għand ommu, u t-tfal jikbru skont kif trabbihom.
Agħtini r-raġel mingħajr sħabu.
Mara tkun trid lir-raġel tagħha għaliha biss, ma tkunx tridu jkollu l-ħbieb jinfluwenzawh.
Tifla sabiħa tagħtihiex imħabbtek mal-mument għax issir iebsa daqs is-siment.
Lin-nisa turihomx imħabbtek mill-ewwel għax jagħtuk bis-sieq.
Tifla sabiħa tinqala’ b’ġieħha, tifla kerha tinqala’ bil-mera.
Mara naturalment sabiħa m’għandhiex għalfejn tagħmel l-isforz li tagħmel mara kerha biex tidher sabiħa.
In-nisa xibka tax-xitan.
In-nisa kapaċi jqarrqu bik daqs ix-xitan.
In-nisa xagħarhom twil u sens qasir.
In-nisa bla sens komun.
In-nisa sbieħ biex tħares lejhom.
In-nisa sbieħ mhux dejjem ikollhom karattru sabiħ.
In-nisa qrieqeċ u l-irġiel mazzit.
L-irġiel ikollhom joqogħdu għal li jgħidu n-nisa tagħhom.
In-nisa laħam il-kelb.
In-nisa kattivi.
In-nisa lsienhom għandhom.
In-nisa jgħidu ħafna u ma tistax tafdahom.
In-nisa kollha fisa.
In-nisa jgħidu ħafna u ma tistax tafdahom.
Aħjar mart min int milli bint min int.
Aħjar tkun mara miżżewġa milli xebba.
Aħjar imqattgħa u ħorra milli għanja u żorra.
Aħjar mara fqira u qalbha tajba minn mara tal-flus u lsienha ħażin.
Aħjar id-duda f’tamla milli f’qalb ta’ armla.
Mara armla tibqa’ tħoss in-nuqqas ta’ żewġha ħafna wara mewtu.
Mara taħdem il-bizzilla, għal qrun ir-raġel ma tistax tiddwella.
Mara li tkun id-dar ma tkunx taf x’qed jagħmel ir-raġel meta jkun barra.
Mara tagħmillek sold dejn, u oħra tagħmillek sold tnejn.
Hemm nisa li jberbqu flus kemm jifilħu, u oħrajn li jibżgħu għalihom.
Mara ta’ sultan dejjem tispiċċa fi ħdan.
In-nisa ta’ min hu sinjur dejjem jaqgħu fit-tentazzjoni.
Mara ssaffar u tiġieġa tidden la żżommhomx id-dar.
Superstizzjoni: mara li ssaffar u tiġieġa li tidden iġibulek il-fell.
Mara sabiħa, tikber kemm tikber, dejjem tajba għat-tieqa.
Mara sabiħa dejjem sabiħa tibqa’.
Mara sabiħa tal-għoxrin ġmielha jibqa’, u għal raġel issir seħer tal-ħamsin.
Mara tkompli tikber u tisbieħ bl-esperjenza tal-ħajja.
Mara sabiħa, id-dota ġewwa.
Mara sabiħa dejjem issib min iridha.
Mara sabiħa, ġmielha jibqa’ sakemm titlef ġieħha.
Mara tibqa’ sabiħa jekk tagħraf tkun onesta.
Mara mill-Imsida, il-gidba f’idha.
In-nisa Misidjani giddibin.
Mara mfettħa, boxxla mbettħa.
Mara għandha tpoġġi bilqiegħda b’saqajha miġburin. Boxxla mbettħa tirreferi għall-bieb tal-antiporta, li jkun miftuħ.
Mara, meta tkun qed tfittixha, taqrahiex minn wiċċha.
Wiċċ mara huwa importanti daqs il-karattru tagħha.
Mara ma taħmilx oħra.
In-nisa jgħiru għal xulxin.
Mara li trabbi t-tjur, għall-kexxun iddur.
Mara li trabbi t-tjur, ftit li xejn kienet taqla’ flus.
Mara lesta għall-ġlied ma żżarradx żnied.
Mara ġellieda qis li twarrabha.
Aħjar tieħu mara armla milli bint il-qamla.
Aħjar tiżżewweġ mara armla milli bint mara bla prinċipji.
Mara ħobbha u turihiex, u milli jkollok tagħtihiex.
r-raġel għandu joqgħod lura milli jikkuntenta wisq lill-mara.
Mara għajnejha żoroq issaħħar it-toroq.
L-irġiel jiġġennu wara n-nisa b’għajnejhom blu.
Mara b’tarbija ma tesagħhiex ta’ Brija.
Mara għandha toqgħod id-dar tieħu ħsieb it-tarbija. It-Triq ta’ Brija hija triq is-Siġġiewi.
Mara bla żaqq bħal tieġ bla daqq.
Mara bla tfal mhix mara kuntenta.
Mara bix-xewqa, lewn uliedha jiġu mżewqa.
Superstizzjoni: jekk mara tibqa’ bix-xewqa waqt it-tqala, dan ikun jidher fit-tarbija.
Mara bil-għonnella qatt ma taf x’għamlet u x’kellha.
Fl-antik l-għonnella kienet tgħatti t-tqala.
Li s-self kien tajjeb kieku r-raġel jislef il-mara.
Qatt tislef dak li hu tiegħek.
L-ilsien ta’ mara jxoqq l-għadam.
In-nisa lsienhom ħażin.
Kliem il-mara isimgħu u agħmel rajk.
Isma’ x’għandha xi tgħid il-mara, imma wara ddeċiedi inti.
Jekk ir-raġel jikxef karusu, il-mara tieħdu għal flusu.
Ir-raġel m’għandux juri lill-mara kemm għandu flus qabel jiżżewwiġha.
Ir-raġel kif iħossu, u l-mara kif turihom.
Tibqa’ żagħżugħ biss jekk iżżomm ruħek u jkollok perspettiva tajba tal-ħajja.
Il-wiċċ fil-mara jikxef il-ġieħ.
Minn ħarsitha tinduna mara hix tal-affari tagħha.
Il-mara u l-pinna ma jissellfux.
Mara waħda u raġel wieħed għandu jkollok.
Il-mara turihiex kollox.
M’għandekx tafda lill-mara b’għajnejk magħluqin!
Il-mara tqila tirbaħ il-għażż u titlef il-ħila.
Hemm bżonn li mara tqila tistrieħ u mhux taħdem.
Il-mara tqila ġo did-dinja turi l-ħila.
l-mara li tgħaddi minn tqala turi kemm għandha kuraġġ.
Il-mara tingħaraf minn għadietha.
Il-mara tkun taf xi ssarraf minn kif iġġib ruħha.
Il-mara tilbes minn rasha u r-raġel minn saqajh.
Qawl inkejjuż: ir-raġel aqwa mill-mara!
Il-mara tħammar u r-raġel jgħammar.
Sakemm il-mara jibqa’ jkollha ċ-ċiklu mestruwali, tkun għadha fiċ-ċans li jkollha t-tfal.
Il-mara tgħabbi daqs bagħal, ir-raġel jimla daqs għar.
Sabiex il-mara jkollha x’tonfoq, ir-raġel irid ibati f’xogħlu.
Il-mara tas-sajjied tagħġen b’id waħda, tas-suldat ma tagħġen xejn.
Il-mara tas-suldat tbati iżjed fil-flus mill-mara tas-sajjied.
Il-mara tal-kaċċatur hi bħall-mara tal-furnar, bi driegħ wieħed.
Il-mara kemm tal-kaċċatur kif ukoll tal-furnar dejjem nieqsa mill-flus.
Il-mara tajba żżomm ir-raġel.
Mara tkun tajba skont kemm ikollha ħila żżomm lir-raġel fidil lejha.
Il-mara taf tgħollik fis-sema u taf titfgħek l-infern.
Il-mara kapaċi tagħmel il-ħajja tar-raġel sabiħa daqs kemm hi kapaċi tagħmilha kerha.
Il-mara tad-dnub b’ħilitha stess iddub.
Il-prostituta waħedha tinqered.
Il-mara ta’ fqajjar qatt ma tmur tittajjar.
Mara li trid tieħu ħsieb familja fqira m’għandhiex ċans għall-frivolitajiet.
Il-mara sieqha wara.
Dari l-mara ma kenitx tingħata l-istess importanza tar-raġel.
Il-mara sewwa, tidħaq u tgawdi ġewwa.
Ħsieb il-mara għandu jkun f’familtha.
Il-mara sewda r-raġel tagħmlu għuda.
In-nisa samranin dejjem iridu wisq mingħand ir-raġel. Sewda tfisser samranija.
Il-mara mżejna minn butha mdejna.
Mara responsabbli ma tberbaqx flus.
Mara tibki temminhiex.
Il-mara tkun lesta tqarraq bir-raġel f’kull ħin.
Mara li tkellmek tidħaq, trid tqarraq bik; dik li tkellmek tibki, tkun qarrqet bik.
Il-mara tkun lesta tqarraq bir-raġel f’kull ħin.
Il-mara meta tidħaq trid tqarraq bik, u meta tibki tkun qarrqet bik.
Il-mara tkun lesta tqarraq bir-raġel f’kull ħin.
Il-mara li turiha, turik.
Il-mara timxi miegħek skont kif timxi magħha.
Il-mara li tilbes imqaċċat, max-xitan għamlet rabta.
Mara tal-affari tagħha dejjem tilbes deċenti.
Il-mara li ma tifhimx b’daqqa ta’ għajn, ma tifhimx b’daqqa ta’ ponn.
Bil-vjolenza xorta m’intix se ddawwar il-fehma ta’ mara.
Il-mara għad-dnub imdawra, m’għonqha dejjem imġawhra.
Prostituta kemm trid issib klijenti u b’hekk dejjem ikollha l-flus.
Mara tal-għaqal iżżomm id-dar, tiġbor ʼl uliedha u xedda fin-nar.
Bis-saħħa tal-mara bieżla li tieħu ħsieb, il-familja tgħix kuntenta.
Mara bieżla, il-kumdità.
Bis-saħħa tal-mara bieżla li tieħu ħsieb, il-familja tgħix kuntenta.
Il-mara ġabbara hi l-għana ta’ darha.
Bis-saħħa tal-mara bieżla li tieħu ħsieb, il-familja tgħix kuntenta.
Il-Malti u l-far iddaħħalhomx id-dar għax iħassrulek il-mara u t-tfal.
Il-Malti jaf jagħmel ħsara daqs il-far.
Id-dmugħ tal-mara bħall-bnazzi fix-xitwa.
Id-dmugħ tal-mara, dmugħ tal-kukkudrilli.
Aħjar mara ratba minn mara qaħba.
Mara għażżiena aħjar minn mara diżonesta.
Ħu mara armla u mhux waħda ta’ żmien it-tamla.
Aħjar tieħu mara armla bil-problemi tagħha, minn mara li trid dejjem ir-raġun (tamla hekk tfisser).
Il-mara hi bħal tuffieħa, minn ġewwa mherrija u minn barra sabiħa.
Mara sabiħa mhux bilfors ikollha karattru sabiħ.
Bir-raġel tiġieġa u bil-mara serduq, id-dar tinqaleb ta’ taħt fuq.
Jekk il-mara tmexxi lir-raġel fid-dar, kollox imur ħażin.
Aħjar mara ta’ baħri milli ta’ raġel jistad għall-kaħli.
Mara ta’ baħri kien ikollha iżjed xi troxx, peress li s-sajjied tal-kaħli mhux dejjem kien jaqbad ħafna ħut.
Il-mara dellha tqil.
Il-mara tinqabad mal-inqas ħaġa li tagħmel.
Il-mara b’sufha mbiegħed, ir-raġel tbiegħed.
Xagħar il-mara dejjem apprezzat mir-raġel. Sufha jfisser xagħarha.
Il-mara bħal-lumija, tagħsarha u tarmiha.
Il-mara tużaha kif trid u wara tagħtiha l-ġenb.
Il-mara armla tqabbad ʼl uliedha jħufu fir-ramla.
Wara l-mewt tal-missier, il-familji kienu jbatu ħafna. Iħufu fis-sens ta’ jfittxu l-ikel.
Awwissu jaħbat ʼil-mara kemm imissu.
Ix-xemx ta’ Awwissu tkun qawwija ħafna.