Il-mara kemm tal-kaċċatur kif ukoll tal-furnar dejjem nieqsa mill-flus.
Raġel id-dar, ħatba fin-nar.
Raġel li joqgħod id-dar, joqgħod jindaħal lil martu.
Xi wħud mill-qwiel b’rabta man-nisa u l-irġiel jagħtuna perspettiva antikwata tar-rwoli tagħhom fis-soċjetà, u ma jirriflettux neċessarjament il-valuri moderni. Ħudhom għaldaqstant minn lenti storika. Apprezza r-rikkezza lingwistika u kulturali waqt li żżomm f’moħħok li ż-żminijiet u l-attitudnijiet inbidlu.
Għal ħafna subien lesti l-bsaten u t-tmien, għal ħafna bniet lesti ċ-ċraret u l-biċċiet.
Dari s-subien biss kellhom opportunità għal karriera, il-bniet kienu jagħmlu biss ix-xogħol tad-dar. Tmien huma kpiepel.
Mara ssaffar u tiġieġa tidden la żżommhomx id-dar.
Superstizzjoni: mara li ssaffar u tiġieġa li tidden iġibulek il-fell.
Darba l-għadma ta’ raġel mejjet resqet mal-għadma ta’ mara mejta.
Il-ġibda sesswali hija parti min-natura tal-bniedem.
Il-mara li ma tifhimx b’daqqa ta’ għajn, ma tifhimx b’daqqa ta’ ponn.
Bil-vjolenza xorta m’intix se ddawwar il-fehma ta’ mara.
Mara sabiħa, id-dota ġewwa.
Mara sabiħa dejjem issib min iridha.
Għaġin u torti u nbid bil-kwarti, u aħjar żaqqi minn żaqq marti.
Ċerti rġiel moħħhom biex jixxalaw u jiddevertu u lil marthom jinsewha.
Ħu mara armla u mhux waħda ta’ żmien it-tamla.
Aħjar tieħu mara armla bil-problemi tagħha, minn mara li trid dejjem ir-raġun (tamla hekk tfisser).
Kliem il-mara isimgħu u agħmel rajk.
Isma’ x’għandha xi tgħid il-mara, imma wara ddeċiedi inti.
Bir-raġel tiġieġa u bil-mara serduq, id-dar tinqaleb ta’ taħt fuq.
Jekk il-mara tmexxi lir-raġel fid-dar, kollox imur ħażin.
L-iben kif trabbih u l-missier kif iddarrih.
Il-mara trid iddarri r-raġel mod ieħor min kif kien jagħmel għand ommu, u t-tfal jikbru skont kif trabbihom.
Il-mara tas-sajjied tagħġen b’id waħda, tas-suldat ma tagħġen xejn.
Il-mara tas-suldat tbati iżjed fil-flus mill-mara tas-sajjied.
Il-mara tajba żżomm ir-raġel.
Mara tkun tajba skont kemm ikollha ħila żżomm lir-raġel fidil lejha.
Il-mara sewwa, tidħaq u tgawdi ġewwa.
Ħsieb il-mara għandu jkun f’familtha.
Ir-raġel dejjem bandiera bajda.
Raġel dejjem jeħlisha eħfef minn mara meta jagħmel xi ħaġa ħażina.
Raġel jaħlef u mara tibki temminhomx f’li jgħidulek.
M’għandekx temmen raġel li jaħlef u mara li tibki.
Meta bewsa tagħtik mara, imbagħad trid tara xi jkun ġara.
In-nisa manipulattivi u jiġu jinħabbu miegħek għax ikollhom bżonn xi ħaġa.
Billejl in-nisa kollha xorta.
Fid-dlam il-pjaċir sesswali kollu l-istess.
Meta s-sider ma jinfirixx, il-ħannieqa ma tissensilx.
Il-ġiżirana (= ħannieqa) toqgħod aħjar fuq mara li tkun sidirha mimli.
Mara sabiħa tal-għoxrin ġmielha jibqa’, u għal raġel issir seħer tal-ħamsin.
Mara tkompli tikber u tisbieħ bl-esperjenza tal-ħajja.
In-nisa lsienhom għandhom.
In-nisa jgħidu ħafna u ma tistax tafdahom.