is-soċjetà
In-nisġa tat-tessut soċjali.
Naħqa ta’ ħmar qatt ma telgħet is-sema.
Min ikun fil-poter ma jagħtix kas lil min mhux tal-kalibru tiegħu, bl-istess mod li ħadd ma jagħti kas ta’ min hu bla influwenza jew injorant.
Minn ħanut wieħed la tixtrix; minn triq waħda la tgħaddix.
Tiħux id-drawwa li tagħmel dejjem l-istess affarijiet bl-istess mod, biex min irid jissindikak u jqasqas fuqek ma tpaxxihx.
Min ma jsumx f’Ras ir-Randan jikluh il-klieb.
Min ma jsumx f’Ras ir-Randan għajb għalih.
Min joqgħod għal li jgħidu n-nies jista’ ma jmurx quddies.
In-nies jgħidu ħafna xorti u m’għandekx tagħti kashom.
Min jogħla żżejjed jieħu sabta kbira.
Aktar ma persuna tilħaq u jkollha awtorità, aktar hemm riskju li titlef kollox u terġa’ lura għal li kienet b’sens ta’ umiljazzjoni, speċjalment jekk titkabbar.
Min jitwieled fuq il-ward imut fuq ix-xewk.
Min jitwieled f’familja stabene ma jfissirx neċessarjament li jgħix fil-lussu ħajtu kollha.
Min jislat wisq drabi jrid iżomm iebes.
Min imexxi (= jislat) jeħtieġ li jżomm id-dixxiplina.
Min jilħaq jiġi fi lsien in-nies jista’ jgħid li hu miskin tassew.
Ħu ħsieb tar-reputazzjoni tiegħek għax darba titlifha.
Min jilbes ħwejjeġ in-nies, ikollu jinżagħhom f’nofs it-triq.
Dak li mhux tiegħek jistgħu jeħduhulek f’kull mument.
Min jikkmanda jagħmel il-liġi.
Għandek taċċetta li hemm min għandu iżjed awtorità minnek.
Min jiflaħ iħawwel.
Min għandu iżjed saħħa jew awtorità minnek, ma jaqbillekx ikollok xi tgħid miegħu.
Min jiflaħ aktar minnek erħilu jgħaddi.
Min għandu iżjed saħħa jew awtorità minnek, ma jaqbillekx ikollok xi tgħid miegħu.
Min jiċħad lil art twelidu, miżbla żibel lanqas tridu.
Min jittradixxi lil pajjiżu kulħadd jistmerru.
Min jara tagħbitu ma jfittixx tagħbit oħrajn.
Min jara l-problemi tiegħu ma jkunx moħħu fil-problemi tal-oħrajn. Tagħbitu tfisser it-tagħbija (= il-problemi) tiegħu.
Min iżoqq lill-oħrajn iżomm id-dqiq u jagħti n-nuħħala.
Min ikun f’pożizzjoni ta’ awtorità dejjem jieħu l-aħjar, u jħalli l-laqx lill-oħrajn.
Min hu man-nies jew bla saħħa jew bla ġieħ.
Min jaħdem man-nies biex jirnexxi jrid jew jaħdem sakemm jispiċċa bla saħħa, jew inkella jitlef ġieħu għax ibigħ lilu nnifsu.
Min hu kbir, bħal min hu fil-għoli, jara lill-oħrajn taħtu żgħar.
Min ikollu ċerta awtorità jew ikun ta’ ċerta importanza ma jistmax liż-żgħir.
Mingħajr qaddisin ma titlax is-sema.
Biex tasal fejn trid, jeħtieġ li ssib min jgħinek jew jgħaddilek kelma.
M’hemmx żiemel li jiġri wisq u ma sabx ieħor li għaddieh.
Dejjem ser issib xi ħadd aqwa minnek, tajjeb kemm inti tajjeb.
Meta tidħol il-qorti, inti tiekol sardina u l-avukat jiekol gallina.
L-avukati jagħmlu kemxa flus ġmielha minn fuq dahrek meta jkollok xi każ il-qorti.
Meta taqa’ l-baqra jaqgħu s-skieken.
Meta titlef il-pożizzjoni ta’ awtorità li tkun fiha, dawk li mingħalik kienu ħbieb tiegħek jieqfu jirreċtaw.
Meta s-sultan iħoss il-far, jiftaħ in-nar.
Kulħadd jiddefendi lilu nnifsu meta jħossu attakkat. Il-far tfisser l-għadu.
Meta nikbru ninsew x’konna.
Meta nilħqu jew navvanzaw fil-karriera, ninsew minn fejn konna bdejna, bl-istess mod li meta nixjieħu ninsew li xi darba konna żgħar.
Meta nibet il-ħaxix miet iż-żiemel.
Il-każijiet il-qorti tant idumu jkaxkru li sakemm jinqatgħu, min kellu raġun ikun laħaq miet.
Meta jkollok issib il-ħbieb, meta ma jkollokx issib il-klieb.
In-natura tal-bniedem dik hi: meta jkollok il-flus iduru miegħek, u meta ma jkollokx jabbandunawk.
Meta jilħaq il-fqir, agħmillu rixa ħalli jtir.
Meta xi ħadd li jkun ġej minn ambjent ta’ faqar jilħaq, jitkabbar u jxammar imnieħru.
Man-nies jew bla saħħa jew bla ġieħ.
Man-nies jew tieħu saħħtek biex tikseb xi ħaġa, jew titlef ġieħek biex takkwista li trid.
Malta żgħira u n-nies magħrufa.
Malta pajjiż żgħir u kulħadd jaf lil xulxin, jiġifieri oqgħod attent.
Malta tixba’ bil-ftit.
Peress li Malta żgħira, ftit għajnuna wkoll biżżejjed.
Ma jmutx re u jitfaċċa ieħor aħjar minnu.
Meta jinbidel il-mexxej ta’ xi organizzazzjoni, stennieh ikun agħar mhux aħjar.
Ma jgħoddx kif tibda, jgħodd kif tispiċċa.
L-ambjent li titwieled fih ma jiddeterminax x’tip ta’ ħajja għad ikollok fil-futur.
M’hemmx żiemel li jimxi wisq u ma sabx ieħor li għaddieh.
Dejjem ser issib xi ħadd aqwa minnek, tajjeb kemm inti tajjeb.
M’hemmx widnejn maħmuġa daqs tal-konfessur.
Il-konfessur jisma’ d-dnubiet u jaf il-qoħob ta’ kulħadd.
L-ixkubetta fiha l-grillu u kulħadd jagħmel li jaqbillu.
Kulħadd l-interessi tiegħu jara.
Li ssellem hija mġiba tajba, iżda li ssellem huwa dmir.
Kulħadd għandu jsellem għaliex huwa dmir, mhux biss edukazzjoni.
L-inbid ġdid ikemmex il-ħalq.
Meta jinbidlu r-regoli dejjem ser ikun hemm min jopponi.
L-ilsir ikollu jbus l-id li jixtieq maqtugħa.
Kultant ikollna nagħmlu affarijiet li ma nixtiqux nagħmlu.
Lill-furnar ħobża islifhielu, għax jekk ma jroddhilekx issib kif teħodhielu.
Tħabbeb ma’ min għandu l-flus jew l-awtorità, tmur minn fuq tista’.
La kull tina, tina. La kull qargħa, qargħa.
Kulħadd differenti fid-dinja.
L-aħjar kulħadd merqtu u ftietu.
Ara l-affarijiet tiegħek u ħalli lil ħaddieħor bi kwietu.
Kulma jingħad minn warajja nistmah taħt saqajja.
Dak li n-nies jgħidu minn wara dahrek tagħtix kasu.
Kull qawwi hawn ieħor għalih.
Dejjem hemm xi ħadd aqwa minnek, int min int u għandek setgħa kemm għandek setgħa.
Kull qabil għal qabilu.
Kulħadd ifittex lil min ikun jixbhu: fil-karattru, fl-età, fil-klassi soċjali, eċċ. Qabil tfisser speċi (species).
Kull par għal paru.
Kulħadd ifittex lil min ikun jixbhu: fil-karattru, fl-età, fil-klassi soċjali, eċċ.
Kulħadd tajjeb iżda ibża’ minn kulħadd.
Kulħadd għandu t-tajjeb tiegħu, iżda xorta waħda tafdax.
Kulħadd taħt sema wieħed.
Kulħadd irid iseffaq wiċċu mal-problemi tal-ħajja.
Kulħadd taħt saqaf wieħed.
Kulħadd irid iseffaq wiċċu mal-problemi tal-ħajja.
Kulħadd merqtu u ftietu.
Agħti kas l-affarijiet tiegħek u ħallik minn ta’ ħaddieħor.
Kulħadd jiġbed għalih sakemm jara l-qiegħ.
Kulħadd lejn l-interessi tiegħu jħares, sal-aħħar nett.
Kulħadd jiġbed għal qabilu.
Kulħadd lejn l-interessi tiegħu jħares. Qabilu tfisser l-ispeċi tiegħu.
Kulħadd jagħmel dak li jaqbel.
Kulħadd lejn l-interessi tiegħu jħares.
Kulħadd jaf hu fiex inhu.
Ħu ħsieb l-affarijiet tiegħek u ħallik minn ħaddieħor.
Kulħadd jaf għal tiegħu.
Kulħadd lejn l-interessi tiegħu jħares.
Kulħadd iħobb jikkmanda.
Kulħadd jaħseb li tiegħu tajjeb.
Kulħadd fis-setgħa tiegħu.
Kulħadd għandu limitu sa fejn jista’ jasal, skont kemm għandu poter fis-soċjetà.
Kul għal qalbek u imxi għal għajn in-nies.
Waħdek agħmel li trid, iżda man-nies imxi mal-kurrent.
Kappell ma jmejjilx ieħor.
Min ikun f’pożizzjoni ta’ awtorità ma jwaqqax lil ħaddieħor li jkun fl-istess f’pożizzjoni, anzi ġieli jikkonfoffa miegħu.
Kap ġdid, liġi ġdida.
Meta tinbidel it-tmexxija, ikun hemm il-bidla.
Jisbaħ bis-serduq u jisbaħ bla serduq.
Ħadd mhu importanti daqs kemm jaħseb fid-dinja.
Jekk tiżżewweġ aħjar tieħu bidwi, gabillott jew biċċier milli ferħ ta’ kavallier.
Aħjar issib lil xi ħadd li ġej minn ambjent umli minn privileġġat.
Jekk terfa’ l-ġlekk taqla’ u jekk ma terfgħux ukoll.
Tagħmel x’tagħmel dejjem taqlagħha ġo wiċċek.
Jekk l-ixkupa ma jaqbadhiex il-kennies taqbadha r-reġina.
Ix-xogħol meqjus bħala baxx bilfors irid jagħmlu xi ħadd.
Jekk jiena nibni kulħadd iweġibni.
Meta jkollok il-propjetà, ifisser li inti tal-flus u n-nies jibdew jirrispettawk iżjed.
Iż-żgħir qatt ma jaħseb tajjeb fil-kbir.
Dawk li fis-soċjetà jgħixu modestament jew m’humiex imlaħħqin dejjem jaħsbu ħażin f’min għandu ħafna flus jew ikun imlaħħaq.
Iż-żgħir dejjem minn taħt.
Dawk li m’għandhomx setgħa jkollhom joqogħdu għal min ikun fuqhom.
Is-smigħ ma fihx irfigħ.
Min jeżegwixxi l-ordnijiet ta’ dawk ta’ fuqu, ma jerfa’ l-ebda responsabbiltà.
Is-sagristan jekk ma jmissx max-xema’ jmiss mar-ruttan.
Meta ma jkun hemm ħadd jissorvelja, kulħadd jagħmel li jrid, bħas-sagristan diżonest li jobrom li jista’. Ruttan tfisser xema’ mdewba.
Ir-rigali ktajjen fl-idejn u bżar fl-għajnejn.
Meta tirċievi rigal u taċċettah, tispiċċa tintrabat.
Ir-rigali jagħmu l-għajnejn.
Ir-rigali jingħataw biex dak li jkun jagħlaq għajnejh għall-abbużi.
In-nies inġies.
In-nies lesti jaqgħu fil-baxx biex jieħdu li jridu.
In-naħal jaħdem u r-reġina tieħu l-ġieħ.
Il-ħaddiema jaħdmu u jbatu u ta’ fuqhom igawdu l-frott ta’ xogħolhom.
In-naħal issibu fejn hemm l-għasel.
Fejn hemm il-ġid kulħadd irid biċċa.
Imselħa ġdida tħaxwex.
Meta jkun hemm xi ħadd ġdid f’pożizzjoni ta’ awtorità, ċerti deċiżjonijiet u ordnijiet ġodda jdarrsu. Imselħa hija xkupa.
Minħabba wieħed jeħel kulħadd.
Fid-dinja m’hawnx ġustizzja, l-innoċenti jeħel ma’ min għandu tort.
Il-wegħda jew ittemmha jew ittemmek.
Superstizzjoni Maltija fejn kienu jemmnu li jekk ma ttemmx wegħda, jiġrulek affarijiet ħżiena.
Il-qorti għatba taż-żift, tmidd sieqek fuqha u teħel.
Ladarba tidħol il-qorti, kun lest għal ħafna kumplikazzjonijiet u skossi.
Il-qorti għatba tal-infern.
Ladarba tidħol il-qorti, kun lest għal ħafna kumplikazzjonijiet u skossi.
Il-qorti fiha bieb mnejn tidħol u le mnejn toħroġ.
Il-kawżi l-qorti jdumu ħafna biex jinqatgħu.
Il-qawwa u d-dnewwa jitbqu l-fomm.
L-użu tas-setgħa u l-vjolenza (= dnewwa) jagħlqu ħalq min jazzarda jirvilla.
Il-qarn xieraq f’ras il-baqra.
Għandek dejjem tilbes adatt għalik. Dari kienu joqogħdu attenti li jilbsu skont il-klassi soċjali.
Il-piki jaqtgħu l-aptiti.
Nies impikati ma’ xulxin jaħdmu u jistinkaw kemm jifilħu biex iġibu fix-xejn lill-avversarji tagħhom, anke akkost li jagħmlu l-ħsara lilhom infushom.
Il-piki jagħtu l-aptiti.
Nies impikati ma’ xulxin jaħdmu u jistinkaw kemm jifilħu biex iġibu fix-xejn lill-avversarji tagħhom.
Il-pastizz m’għandux jinkiser qabel ma tkun tlieta.
Superstizzjoni Maltija fejn kienu jemmnu li biex tiekol il-pastizzi trid tkun grupp ta’ tlieta.
Il-musmar imsaddad irqiq u jagħmel ħoss.
In-nies ta’ klassi baxxa u bla manjieri ma jiswew xejn imma jagħmlu ħafna storbju biex jidhru.
Il-liġijiet għal kulħadd xorta waħda.
Suppost li kulħadd indaqs f’għajnejn il-liġi.
Il-liġi tiġġebbed kemm tridha.
Il-liġi tista’ tiġi interpretata b’diversi modi, skont min int u lil min taf.
Il-liġi taqbad il-ħuta ż-żgħira.
Maż-żgħir il-ġustizzja għandha ħafna saħħa, iżda mhux mal-kbir.
Il-liġi saret bħall-banavolja.
In-nies ħżiena jmorru aħjar mal-ġustizzja mill-vittmi. Banavolja tfisser brikkun.
Avukat jekk ma jiħdux Alla jieħdu x-xitan.
Avukat ħażin fl-aħħar mill-aħħar jieħu dak li ħaqqu.
Il-liġi donnha mhix għal kulħadd xorta waħda.
Tistenniex ġustizzja fid-dinja.
Il-leħja tas-sinjur f’idejn is-seftur.
Dawk li jaħdmu għal min hu mleħħaq u sinjur igawdu wkoll.
Il-kok ta’ wiċċ il-borma jiekol.
In-nies imlaħħqin japprofittaw mill-pożizzjoni tagħhom, bħall-kok li jiekol l-aħjar parti.
Il-knisja tagħna u l-kappillan qaribna.
L-influwenza tal-kappillan hija kbira u jkun jista’ jġib li jrid għall-parruċċana.
Il-kelb qabel ma tinbxu kun af sidu min hu.
Qabel tiksirha minn ma’ xi ħadd, qis li tkun taf min hu u sa fejn kapaċi jasal.
Il-karfa ssibha kullimkien.
F’kull soċjetà ssib il-marmalja (= il-karfa).
Il-ħuta minn rasha tinten.
F’organizzazzjoni jew ġerarkija, il-problemi jkunu ġejjin mit-tmexxija ħażina tad-diriġenti.
Il-ħuta ż-żgħira qatt ma kielet il-ħuta l-kbira.
Ma tista’ tagħmel xejn kontra min għandu iżjed setgħa minnek.
Il-ħuta l-kbira dejjem kielet iż-żgħira.
Ma tista’ tagħmel xejn kontra min għandu iżjed setgħa minnek.
Il-ħotra tegħleb il-kotra.
In-nies trid taċċetta lil min intgħażel biex imexxi, bħal f’elezzjoni. Il-ħotra tfisser l-għażla u l-kotra huma n-nies fis-soċjetà.
Il-ħmar li jġorr l-inbid jixrob l-ilma.
Mit-tbatija ta’ ħaddieħor japprofittaw irwieħhom il-pampaluni.
Il-ħajjat qalzietu mraqqa’.
Min joffri servizz tajjeb lil ħaddieħor jispiċċa joffri l-istess servizz ħażin lilu nnifsu.
L-għassa mbajda u l-ispettur ġdid.
L-affarijiet jinbidlu meta jilħaq xi ħadd ġdid f’pożizzjoni ta’ awtorità.
L-għaqda ġġib is-saħħa.
Meta nkunu magħqudin inkunu iżjed b’saħħitna u jkun iżjed diffiċli tegħlibna.
Il-ġustizzja tkabbar nazzjon u d-dnub jirvinaha.
Il-ġustizzja ssawwar is-sens morali ta’ nazzjon, iżda l-azzjonijiet ħżiena jeqirduha.
Il-ġustizzja mis-sema ’l fuq.
Fid-dinja m’hawnx ġustizzja.
Il-ġustizzja fis-sema tinstab.
Fid-dinja m’hawnx ġustizzja.
Il-bass jiġi wara r-rass.
Jekk tkun bniedem aħrax u opprimenti, xi darba se jduru kontrik.
Il-banda ddoqq u l-bajtar dieħel.
Meta ħadd ma jkun jimpurtah kollox imur ħażin.
Id-drawwa hija t-tieni natura.
Id-drawwiet ta’ poplu ma jinqatgħux kif ġieb u laħaq.
Id-drawwa hija t-tieni din.
Id-drawwiet ta’ poplu ma jinqatgħux kif ġieb u laħaq. Din tfisser reliġjon.
Id-dmir jagħmlek ilsir.
Dmirijietna jeħtieġ li naqduhom, anke jekk m’għandniex aptit.
Id taħsel l-oħra, u t-tnejn jaħslu l-wiċċ.
Il-korruzzjoni hekk taħdem u toktor, kulħadd jagħmel il-pjaċiri lil xulxin.
Ibża’ minn qrun il-fart u għaddi minn warajh.
Tisfidax lil min taf li għandu l-poter jagħmillek il-ħsara.
Ibża’ mill-fqir li jsir sinjur u mill-qaħba li tiġbor l-unur.
Min jagħmel suċċess ikun bata u minħabba f’hekk, iwebbes qalbu.
Ħalli x-xini jimxi għal ġenbu.
In-nies jgħidu ħafna xorti imma f’idejk kemm tagħti kashom.
Ħajt tas-sejjieħ la jaqa’ jistrieħ.
F’ċerti sitwazzjonijiet, tagħmel x’tagħmel ma tkunx tista’ tgħin lill-persuna.
Ħajt tad-dell ftit ħajr fih u x-xemx jeħtieġha.
Min hu dgħajjef jeħtieġ l-għajnuna, ma jistax jagħtiha hu lil ħaddieħor.
Ħadd mhu aħjar minn ħadd.
Ħadd mhu speċjali iżjed minn ħaddieħor.
Ħadd ma mess is-sema b’idu.
Ħadd mhu partikolarment speċjali, twarrab inti jeħodlok postok ħaddieħor.
Ħadd ma jtella’ lil nanntu fis-sala.
Hemm min ikun laħaq jew tal-flus u jkun jistħi juri li ġej minn ambjent umli.
Ħadd ma jrid il-pulizija/ġustizzja/ħaqq wara biebu/daru.
Kulħadd ifittex li ma jxellifx difrejh mal-ġustizzja.
Ħadd ma jinħtieġ għal ħadd.
Ħadd mhu partikolarment speċjali, twarrab inti jeħodlok postok ħaddieħor.
Ħadd ma jġib xejn minn żaqq ommu.
Ħadd ma twieled speċjali iżjed minn ħaddieħor.
Ħadd ma jaħsillek wiċċek biex tkun isbaħ minnu.
Kulħadd ifittex li jkun aħjar minn ħaddieħor.
Ħadd ma jagħmel imsarnu f’żaqqu.
Kulħadd ifittex li jkun aħjar minn ħaddieħor.
Ħadd għadu ma twieled bil-ħwejjeġ.
Ħadd ma twieled speċjali iżjed minn ħaddieħor.
Għall-kotra m’hemmx tarf.
Diffiċli tintgħażel meta tkun fil-folla.
Fil-għaqda s-saħħa.
Meta nkunu magħqudin inkunu iżjed b’saħħitna u jkun iżjed diffiċli tegħlibna.
Fid-dinja min hu ras u min hu denb.
Jew tikkmanda jew jikkmandawk.
Fid-dinja mhux sewwa, min jirkeb u min iniegħel.
Fid-dinja m’hawnx ġustizzja; ħafna jgawdu spejjeż ħaddieħor.
Fejn ma jersaqx id-dubbien, ma jbejtux il-firien.
Fejn hemm il-ġid kulħadd irid biċċa.
Fejn il-bosta, xammar u aħrab.
Irid ikollok biżżejjed kuraġġ biex taffronta sitwazzjonijiet diffiċli, bħal meta trid tgħaddi minn folla nies irossu.
Fejn hemm il-għasel jersaq id-dubbien.
Fejn hemm il-ġid kulħadd irid biċċa.
Fejn ikun hemm l-għasel, ikun hemm in-naħal.
Fejn hemm il-ġid kulħadd irid biċċa.
Fejn hemm it-tfesfis fil-widnejn, aktarx hemm il-gideb.
Meta tiġri xi xniegħa mhux kollox ikun veru.
Fejn hemm is-susa, il-ġlied ma jonqosx.
Meta l-morali tas-soċjetà jibdew jiddgħajfu, jinqala’ l-inkwiet.
Fejn hemm il-kotra xammar u għaddi.
Irid ikollok biżżejjed kuraġġ biex taffronta sitwazzjonijiet diffiċli, bħal meta trid tgħaddi minn folla nies irossu.
Drabi felula tfaqqas oħra.
Jekk abbuż wieħed ma jsir xejn dwaru, isiru oħrajn warajh.
Dejjem sebaħ bla serduq.
Ħadd mhu daqshekk importanti fid-dinja li ma jistax jeħodlu postu ħaddieħor.
Dar is-sultan min tiela’ u min nieżel.
Min hu f’pożizzjoni ta’ awtorità jista’ jkun iġibek daqs kemm ikun jista’ ma jniżżlekx.
Daqqa ta’ għama semagħha trux.
Jekk min suppost qed imexxi ma jikkonvinċix bl-argumenti tiegħu, ħadd ma jagħti kasu.
Dak li jibża’ ma jitteħidx.
Min joqgħod attent ma min jagħmilha fis-soċjetà ma jiħux eżempji ħżiena.
Dak li hu fil-għoli ma jsirx mingħajr il-baxx.
Dawk li qegħdin f’pożizzjoni għolja għandhom bżonn lil dawk f’pożizzjoni baxxa biex l-affarijiet jirnexxu.
Ċafċaflu papru la sibt l-ilma.
Fejn m’hemmx dixxiplina jkun hemm abbuż wara abbuż, bla rażan.
Bormot ix-xirka qatt ma ssir sewwa.
Hemm bżonn li xi ħadd wieħed biss imexxi l-partijiet kollha ta’ proġett.
Borma bejn l-ixirka jew nejja jew maħruqa.
L-affarijiet ma jimxux sew meta jkun hemm ħafna mexxejja.
Bil-ħabba l-ħabba tikber u titrabba.
Min jitwieled f’familja mhux tal-flus irid jagħmel iżjed sforz biex fis-soċjetà jsib postu.
Bik amir u bija amir, min se jsuq il-ħmir?
Jeħtieġ li xi ħadd wieħed biss imexxi.
Aħjar tikkmanda x-xjaten milli jikkmandawk l-anġli.
Aħjar tikkmanda inti u b’mod forsi mhux daqshekk tajjeb, milli jkollok issegwi l-kmand ta’ ħaddieħor.
B’laqxa waħda ma ssajjarx.
Kultant biex timxi ‘l quddiem ftit għajnuna mhix biżżejjed.
Akbar m’aħna, akbar qnatarna.
Aktar ma jkollok kariga għolja, aktar għandek responsabbiltajiet.
Akbar m’int, akbar hu hemmek.
Aktar ma jkollok pożizzjoni għolja, aktar għandek responsabbiltà u inkwiet.
Aħjar ras ta’ nemla minn denb ta’ ljun.
Aħjar tkun żgħir u tmexxi inti, milli taqdi u tpaxxi lill-kbir.
Aħjar tobdi milli tikkmanda.
Min imexxi għandu iżjed responsabbiltà.
Aħbar ħażina malajr tinxtered.
Aħbar ħażina kulħadd jieħu interess fiha.
Il-qwiel kollha, f’post wieħed.