ir-relazzjonijiet
L-imġiba tan-nies ma' xulxin.
Agħmel sejfek f’għantek għax milli tagħti tieħu.
Il-ġlied aħarbu, għax kif tagħmel jagħmlulek.
Agħmilha ma’ min hu aħjar minnek u ħallas għalih.
Jaqbillek ikollok ħbieb li jkunu aħjar minnek.
Agħti kemm tiflaħ qabel ma jagħtuk.
Ara li tkun bdejt tiġġieled qabel ma jiġġilidlek ħaddieħor.
Agħtini bil-ħarta u la turinix iċ-ċiera.
Aqbad iġġieled miegħi minflok toqgħod bil-geddum.
Agħżel lil ħbiebek u ħalli lil ħbiebek jagħżlu lilek.
Bl-istess mod li l-oħrajn ifittxu lilek għax inti kumpanija tajba, agħraf agħmel l-istess.
Aħfer lil kulħadd mhux lilek innifsek.
Ma’ ħaddieħor kun qalbek tajba, imma miegħek innifsek kun strett.
Aħjar għajrek minn dellek.
Meta tiġi bżonn, il-ġirien ġieli ssibhom iżjed minn ommok.
Aħjar ħabib mal-kelb inkella ma’ sidu.
Aħjar tagħmel ħbieb ma’ dawk ta’ madwar xi ħadd li trid mingħandu.
Aħjar ħobż xott f’darek milli frisk għand ġarek.
Tajjeb li tkun kuntent b’li għandek minflok tiddependi fuq ħaddieħor jew tixtieq tiegħu.
Aħjar issuq erba’ żwiemel minn ħmar.
Aktar faċli tagħmilha ma’ nies intelliġenti milli mal-injoranti.
Aħjar jikluk il-klieb milli tiġi bżonn il-ħbieb.
Kultant il-ħbieb ma ssibhomx fil-mument tal-bżonn.
Aħjar kisra sewda d-dar milli għasel għand il-ġar.
Tajjeb li tkun kuntent b’li għandek minflok tiddependi fuq ħaddieħor jew tixtieq tiegħu.
Aħjar nuħħalti minn smid ġarti.
Aħjar dak li hu tiegħi, minkejja li tal-ġara forsi aħjar.
Aħjar paċi milli tagħmel paċi.
Aħjar ma jkollokx xi tgħid mill-ewwel ma’ persuna, milli tagħmel paċi wara.
Aħjar taqta’ int jew jaqtgħulek.
Aħjar issolvi kwistjoni barra mill-qorti biex ma teħilx flus żejda jekk ikollok tort.
Aħjar tgħix ġo girna waħdek milli f’palazz man-nies.
Aħjar tiegħek f’tiegħek f’ambjent umli milli f’ambjent sabiħ fejn ikollok isseffaq wiċċek man-nies.
Aħjar tiswija ħażina milli sentenza tajba.
Aħjar issolvi kwistjoni barra mill-qorti biex ma teħilx flus żejda jekk ikollok tort.
Aħjar toqgħod f’gorboġ b’bieb għalik milli f’dar il-qabla, min ġej u min sejjer.
Aħjar tiegħek f’tiegħek f’ambjent umli milli f’ambjent sabiħ fejn ikollok isseffaq wiċċek man-nies.
Aħjar trabbi ħanżir minn tifel ta’ ħaddieħor.
Annimal jaf japprezza iżjed dak li tagħmel miegħu mit-tfal ta’ ħaddieħor.
Aktar ma int għama, aktar il-għadu jaħbilek l-ixkora.
Aktar ma l-għadu tiegħek jarak f’diffikultà, aktar jagħmel biex tkun agħar.
Anke fost l-appostli kien hemm Ġuda.
Dejjem ser issib min jittradik.
Aqta’ jiesek u berred bużbieżek.
Min ma jħobbokx mhux se jagħmillek pjaċiri.
Bħalissa aħjar inti minn dajjaret xbinti.
F’sitwazzjoni ta’ urġenza min jinzerta ħdejk jista’ jtik l-ewwel għajnuna.
Bħalma jdaħħqek ibikkik.
Il-ħbieb kapaċi jferrħuk daqs kemm kapaċi jqabbduk id-dwejjaq.
Bħalma lilek hekk lil għajrek.
Qis li tħobb lill-proxxmu tiegħek, bħalek innifsek.
Bieb ma’ ġenbek aħjar minn waħdek.
F’każ li jinqala’ xi ħaġa, taf li għandek il-ġirien ħdejk.
Bil-kappell li kelli sellimtlek.
Għamilt għalik dak li stajt.
Bil-kelma t-tajba joħroġ il-far mit-toqba.
Bil-ġentilezza jirnexxilek tieħu li trid mingħand xi ħadd.
Bil-kelma t-tajba sal-far joħroġ mit-tqajba.
Bil-ġentilezza jirnexxilek tieħu li trid mingħand xi ħadd.
Billi tagħti tieħu.
In-nies jimxu miegħek skont kif timxi magħhom.
Bla ħbieb bħal dar bla bieb.
Mingħajr il-ħbieb ma tkunx tista’ titlob pjaċir.
Bla ħbieb ma tagħmel xejn.
Mingħajr il-ħbieb ma tkunx tista’ titlob pjaċir.
Bla qaddisin ma tmurx il-ġenna.
Fid-dinja għandek bżonn il-ħbieb biex tirnexxi.
Bla xaħam ma tvarax.
Fid-dinja għandek bżonn il-ħbieb u l-kuntatti biex tirnexxi.
Bogħod mill-għajn, bogħod mill-qalb.
Lil min tkun ilek ma tarah tinsieh.
Daħħal sejfek f’għantek għax billi tagħti tieħu.
Ittratta tajjeb lil ta’ madwarek biex jagħmlu l-istess lilek.
Dak li jkun tagħmillu mitt pjaċir u tonqsu darba kollox jispiċċa.
Għax tiżbalja mqar darba, in-nies jinsew il-pjaċiri kollha li tkun għamiltilhom qabel.
Dak li ma jgħinekx fil-waqt la titmax fih u lanqas qatt m’għandek taqa’ għalih.
Meta jkollok bżonn l-għajnuna ta’ ħabib u ma ssibux, tibqax tisforza biex iżżomm ħbiberija falza. Titmax ifisser li ma turix tama.
Dak li ma tridx lilek lanqas tridu ’l għajrek.
Ġib ruħek ma’ ħaddieħor bl-istess mod li tixtieq li ħaddieħor iġib ruħu miegħek.
Dejjem jagħtu donnhom kelb u qattus.
Ma jiqfux jiġġieldu.
Erfa’ salibek u ħallik min-nies.
Ara l-affarijiet tiegħek u ħalli lil ħaddieħor bi kwietu.
Erħi lil kulħadd jimxi għal rasu.
Għix ħajtek u ħalli lil ħaddieħor bi kwietu.
Fejn hemm il-ftehim il-basal isir laħam.
Meta jintlaħaq ftehim l-impossibbli jsir possibbli.
Fid-dinja lkoll niġu bżonn xulxin.
Itlob l-għajnuna meta jkollok bżonnha u għin meta jitolbuk l-għajnuna.
Fin-niket u l-ħmum jidhru l-ħbieb u l-għemum.
Il-ħbieb ta’ veru tagħrafhom meta tkun fil-bżonn. Ħmum tfisser għawġ u l-għemum huma l-ħbieb.
Fit-tgawdija kulħadd merħba bik, fit-tbatija kulħadd iħallik.
Meta kollox ikun sejjer sew iduru miegħek il-ħbieb, u meta kollox jibda sejjer ħażin jabbandunawk.
Ftehima bejn tnejn isseħħ f’jumejn, bejn tlieta tieħu xahrejn.
Tnejn min-nies jiftiehmu malajr u aktar kemm iżżid nies, aktar isir diffiċli tiftiehem.
Ftit huma l-veri ħbieb.
Fil-ħajja mhux faċli ssib ħbieb ġenwini.
Ġar mill-agħar fil-qrib tiegħek huwa saħta mkaħħla miegħek.
Ġar li ma jkunx minn tagħna jagħmillek ħajtek wisq diffiċli.
Għajn b’għajn, sinna b’sinna.
Kif tagħmel jagħmlulek.
Għajnejn żoroq jisirqu n-nies mit-toroq.
Min hu għajnejh blu jsaħħrek u jagħmel bik li jrid. Żoroq tfisser blu.
Ġirienek f’darek, ġurdien f’għamarek.
Tagħtix kunfidenzi żejda lill-ġirien u ħu ħsieb il-privatezza ta’ darek.
Ħabib fil-bżonn, ħabib tal-kunjom.
Il-ħbieb ta’ veru huma dawk li ssibhom meta tiġi bżonnhom.
Ħabib kulħadd u ħabib ħadd.
Aħjar ma tagħtix kunfidenzi żejda u tittratta lil kulħadd l-istess.
Ħabibek jistrok u jgħattilek.
Il-ħbieb ta’ veru jippruvaw jgħattulek l-iżbalji, għax jixtiqulek il-ġid. Jistrok tfisser jgħattik.
Ħadd ma jagħmel xejn għal xejn.
Min jagħmel xi ħaġa jkun qed jistenna xi ħaġa lura tagħha.
Ħadd ma jaħraq il-kamra li joqgħod fiha.
Meta xi ħadd ikun kompliċi f’xi ħaġa ħażina, mhux ser jikxef lill-kompliċi l-oħrajn għax ibati hu.
Ħadd ma jidħaqlek għall-bjuda ta’ snienek.
Min joqgħod jgħaddilek il-kumplimenti u jżiegħel bik ikun qed jistenna xi pjaċir mingħandek.
Ħares tajjeb lil darek u la tħallilx lil ġarek.
Ħu ħsieb l-affarijiet tiegħek u twaqqax lil ħaddieħor fit-tentazzjoni billi tħalli oġġetti ta’ valur fid-deher.
Ħobb lil ġarek iżda ddaħħlux f’darek.
M’hemmx kunfidenzi żejda mal-ġirien.
Ħobb lil għajrek, qarib u għarib.
Ħobb lil kulħadd bl-istess mod. Għarib tfisser barrani.
Ħobb lil kulħadd biex ma tagħli qatt.
Tagħmel lil ħadd għadu tiegħek.
Id-dinja katina, ħolqa wara ħolqa.
Kulħadd għandu bżonn l-għajnuna ta’ ħaddieħor fid-dinja.
Il-bniedem waħdu mhu xejn.
Għandna bżonn lil ħaddieħor biex ngħixu kuntenti.
Il-ġara tgħallmek tgħammar.
In-nies ta’ madwarek jgħallmuk kif tħares l-interessi tiegħek.
Il-ġara tgħallmek tgħix.
In-nies ta’ madwarek jgħallmuk kif tħares l-interessi tiegħek.
Il-ġirien tagħżel il-ġirien.
Inti tagħżel liema ġirien tkellem, jaf ikun hemm uħud li ma taħmilx.
Il-ħabib dak li jaqbeż għalik.
Tinduna li xi ħadd tassew ħabib tiegħek meta jkun lest jaqbeż għalik.
Il-ħabib ħobbu b’għewiedu.
Jeħtieġ li ħabib taċċettah kif inhu, bil-preġji u d-difetti tiegħu b’kollox. Għewiedu tfisser id-drawwiet tiegħu.
Il-ħaġa tiegħi titkellem u minn tal-ġara mank tissellem.
Meta titlob l-għajnuna lill-ġirien ma tasalx, iżda meta jkollhom bżonn l-għajnuna huma jistennewha mingħandek.
Ilħaq għastek biss u mhux għast ħaddieħor.
Ara l-affarijiet tiegħek u ħalli lil ħaddieħor bi kwietu.
Il-ħbieb sal-bieb.
Il-kunfidenzi żejda m’għandekx xi tridhom, għax inkwiet iġibu magħhom.
Il-ħbieb u l-qraba jidhru fil-waqt.
Il-ħbieb ta’ veru u l-qraba li jimpurtahom minnek issibhom meta jkollok bżonnhom.
Il-ħniena kienet u tkun, inkella m’hemmx iżjed dinja.
Għandek tħenn għalik innifsek u għall-oħrajn fid-dinja.
Jekk il-bniedem tagħtih il-kunfidenza idaħħlek fil-gradenza.
Il-kunfidenza żejda man-nies m’għandekx xi tridha, għax jistgħu jabbużaw minnek eż. billi jisirquk f’darek stess.
Jekk ma taqbilx mal-ġar, biddel fis id-dar.
Ġieli tant ikollok ġirien diffiċli li ma jkollokx għażla oħra ħlief li titlaq mit-triq.
Jekk mill-ħġieġ magħmula darek, titfax ħaġar lil ta’ ġarek.
Tgħajjarx lil ħaddieħor bid-difetti tiegħu, għax inti wkoll għandek id-difetti tiegħek.
Kif iddoqqli niżfinlek.
Kif iġġib ruħek miegħi inti, inġib ruħi miegħek jiena.
Kif iżżomm ruħek, in-nies iżżommok.
Il-mod ta’ kif tittratta lilek innifsek huwa riflessjoni ta’ kif jittrattak ħaddieħor.
Kif tagħmel issib.
Kif iġġib ruħek man-nies inti, hekk iġibu ruħhom huma miegħek.
Kif tagħmel jagħmlulek.
Kif iġġib ruħek man-nies inti, hekk iġibu ruħhom huma miegħek.
Kif tiżra’ jinbitlek, kif issajjar tiekol.
Kif iġġib ruħek man-nies inti, hekk iġibu ruħhom huma miegħek.
Kif tkejjel ikejluk.
Kif iġġib ruħek man-nies inti, hekk iġibu ruħhom huma miegħek.
Kulħadd għandu min iħobbu u min jobogħdu.
Ma jistax ikun li tkun maħbub minn kulħadd.
Kulħadd ikollu xi jgħid kultant.
Jiġu drabi fejn ma naqblux ma’ xi ħadd u jkollna xi ngħidu.
Kulħadd iqis b’xibru.
Kulħadd jiġġudika lil ħaddieħor skont il-fehma tiegħu.
Kull ħaġa ħu ħsiebha.
Meta xi ħadd jagħmillek xi pjaċir, ikollok tagħmillu wieħed lura.
La ddardarx l-għajn li trid tixrob minnha.
Qis li ma jkollokx xi tgħid - jew tbiegħed minnek - lil min għandek bżonn jew li għad tiġi bżonnu fil-futur.
La torbotx rabta ċoff.
Qis li l-ftehim ikun sod.
Ladarba tbiegħed, nesa kulma wiegħed.
Il-wegħdiet malajr isiru u malajr jintesew.
L-akbar ġlieda ta’ bejn il-ħbieb.
Il-ħbieb ikunu jafu lil xulxin sew u l-ġlied ikun ikbar.
L-akbar ġlieda ta’ bejn l-aħwa.
L-aħwa jkunu jafu lil xulxin sew u l-ġlied ikun ikbar.
L-ewwel li trid tagħmel ħbieb mal-kelb.
Aħjar tagħmel ħbieb ma’ dawk ta’ madwar xi ħadd li trid mingħandu.
L-għajnuna kulħadd jixtieqha.
Kulħadd japprezzaha l-għajnuna.
L-għawi ħu l-ġenn.
Ma tibqax tirraġuna jekk temmen dak kollu li tisma’ fuq in-nies.
L-għira bażwija.
Min jgħir ħafna għalik, jasal biex saħansitra jgħir ukoll għall-ħażin tiegħek.
Li kieku l-għira kienet bażwija, kieku kulħadd bażwi.
Min jgħir ħafna għalik, jasal biex saħansitra jgħir ukoll għall-ħażin tiegħek.
Li ma tridx lilek lanqas imissek tridu lil għajrek.
Ittratta lil ħaddieħor bħalma tittratta lilek innifsek - jiġifieri tajjeb.
Lil Ġaħan il-libsa għamlitu nies.
In-nies jirrispettawk skont kif tilbes u kemm tieħu ħsieb persuntek; l-ilbies saħansitra ġabar lil Ġaħan mill-injoranza tiegħu.
Lil min issemmih lesti x’tagħtih.
Semmi lil xi ħadd u kumbinazzjoni tarah ġej.
L-ilbies jagħmlek nies.
In-nies jirrispettawk skont kif tilbes u kemm tieħu ħsieb persuntek.
L-imħabbat iħabbat lil min imiss miegħu.
Min ikollu l-inkwiet jew ikun iħobb jaqla’ l-inkwiet, jagħmel ħajjet kull min ikollu x’jaqsam miegħu diffiċli wkoll.
L-inkwiet tal-ġara wara denb il-ħara.
Xi kultant bilfors jinqala’ xi inkwiet mal-ġirien.
Merħba bik meta tiġi u ġġib, u jekk ġejt b’idek f’idek m’għandix xi rridek.
Hawn min jitħabbeb miegħek biss għall-pjaċiri u r-rigali, u mhux għax tassew japprezzak.
Meta l-qalb tuġa’, kull demgħa tixgħel xemgħa.
Meta jkollok qalbek maqsuma tkun iżjed sensittiv(a).
Miġja tal-ġara ġġib il-ħsara.
Meta tara l-ġirien ġejjin iħabbtulek il-bieb, għid li ġej l-inkwiet.
Min dari jibgħathulek sħun, issa jibgħathulek biered.
Min qatt ma xtaqlek il-ġid qabel, mhux ser jixtieqlek il-ġid issa. Dari tfisser qabel.
Min għandu l-ħbieb għandu kollox.
Min għandu l-ħbieb għandu min jgħinu jasal fejn irid.
Min ġie ferraħni, min ma ġiex serraħni.
Min ġie għandi fraħt bih, u min ma ġiex serraħli rasi għax ifisser li m’għandix inkwiet miegħu.
Min ibaxxi għajnejh ma jħarsux u jtennu lejh.
Min jagħmel l-affarijiet tiegħu ma jistedinx kunfidenzi żejda.
Min ibusek fuq ġbinek jurik nofs ħiltek.
Bewsa fuq ġbinek (moħħok) mhix bewsa intima li tiftaħ il-bieb għall-kunfidenzi żejda.
Min iħobb lill-kelb iħobb lil sidu.
Meta persuna ġġibilha rispett, iġġib rispett ukoll lil dawk ta’ madwarha.
Min ikun tassew irid, mhux se joqgħod jistaqsik.
Min ikun irid tassew jgħinek, ma joqgħodx jistaqsik għandekx bżonn l-għajnuna: jaqbad u jgħinek.
Min irid jagħtik ma jistaqsikx l-ewwel jekk tridx.
Min ikun irid tassew jgħinek, ma joqgħodx jistaqsik għandekx bżonn l-għajnuna: jaqbad u jgħinek.
Min itik bix-xewk ara tagħtih bil-ward; middu u xebgħa ġebla agħtih fl-art.
Min jittrattak ħażin teħdux bil-ħlewwa, anzi ddefendi lilek nnifsek.
Min itik, jew ħadlek jew irid jeħodlok.
Ħadd ma jtik xejn ta’ xejn, dejjem hemm raġuni.
Min ixaħħam jitlaħħam.
Min ixaħħam jasal fejn jixtieq.
Min jagħtihielek bi qronfla, agħtihielu b’warda; u min b’xewka, agħtihielu b’labra.
Ġib ruħek ma’ ħaddieħor bl-istess mod li hu jġib ruħu miegħek.
Min jagħtik daqqa ta’ ħarta, tistħix twieġbu b’oħra int.
Min ma jiddejjaqx iweġġgħek, tiddejjaq xejn tiddefendi ruħek u tagħmillu l-istess.
Min jagħtik xewka, imbagħad jagħtik rizza.
Min jagħmillek ftit ħsara, imbagħad jagħmillek ħsara akbar; iqaflu mill-ewwel.
Min jaħarbek tiġrix warajh.
Min ma jridx jaf bik m’għandekx x’tambih.
Min jaħsilli wiċċi naħsillu dahru.
Min jagħmilli pjaċir, nagħmillu ieħor.
Min jerħi ruħu, jgħabbulu.
L-iblah li joqgħod għal kollox jagħmlu li jridu bih.
Min jerħilek żenbilu, għabbilu.
Approfitta ruħek mill-iblah li joqgħod għal kollox u agħmel li trid bih. Żenbilu tfisser il-basket tiegħu.
Min jibża’ jibqa’ d-dar.
Min ma jridx ikollu x’jaqsam man-nies ma jidhirx fil-pubbliku.
Min jibża’ mill-għarnuq ma jiżrax ful.
Min ma jridx li n-nies jgħidu bih, m’għandux jgħid fuq in-nies.
Min jidħaqlek irid jisraqlek.
Min jidħaqlek irid iqarraq bik.
Min jidħol għalik idħol għalih.
Min jgħinek meta tkun fil-bżonn, qis li tagħmel l-istess għalih.
Min jidħollok idħollu.
Min jittrattak ħażin teħdux bil-ħlewwa, anzi ddefendi lilek nnifsek.
Min jiekol waħdu, jagħmel waħdu.
Min ma jagħti kas ta’ ħadd u ma jgħin lil ħadd, ħadd ma jagħti kasu meta jkun fil-bżonn.
Min jiġi jżurek mhux għalxejn.
Min jindiehes miegħek sinjal li għandu bżonn xi ħaġa mingħandek.
Min jiġi merħba bih, min ma jiġix Alla jhennih.
Min ġie għandi fraħt bih, u min ma ġiex serraħli rasi għax ifisser li m’għandix inkwiet miegħu.
Min jimpika jispikka.
Min jimpika aħjar ikun ċert li jista’ jirbaħ għax l-attenzjoni tkun fuqu, u jekk jitlef jaqa’ iżjed għaċ-ċajt.
Min jiskuża jinsa l-akkuża.
Jekk se tiskuża lil xi ħadd għal xi azzjoni ħażina li jkun għamel, ma tistax terġa’ taqlagħha fil-futur.
Min jitlagħlek tarġa itlagħlu tnejn.
Tħalli lil ħadd jagħmel li jrid bik; anzi, min jipprova wrieh xi ssarraf darbtejn.
Min jitma fil-ġar jorqod bil-ġuħ.
Tistenniex għajnuna mingħand il-ġirien għax toħroġ diżappuntat.
Min jitma fil-ġar xejn ma jitma’ lil tad-dar.
Tistenniex għajnuna mingħand il-ġirien għax toħroġ diżappuntat.
Min jittiekel għal ġaru, jibqa’ bla għaxa f’daru.
Min jagħti wisq milli għandu jispiċċa jbati. Bla għaxa tfisser bla ikel.
Min jiżra’ l-korla jaħsad l-indiema.
Oqgħod attent lil min tirrabja għax jiddispjaċik fil-futur.
Min jobżoq għas-sema jiġi f’wiċċu.
Min jipprova jagħmel xi vendikazzjoni jew ipattiha lil xi ħadd, jispiċċa jbati hu stess.
Min jobżoqlok f’wiċċek tistħix tobżoqlu f’wiċċu.
Tħallix min jagħmillek il-ħsara, iddefendi lilek innifsek.
Min ma jagħmilx ġid lilek lanqas jagħmel lill-oħrajn.
Min ma jġibx ruħu tajjeb miegħek, lanqas ma’ ħaddieħor ma jġib ruħu tajjeb.
Min ma jagħtikx fastidju la tagħtihx.
Min iħallik xi kwietek, ħallih bi kwietu.
Min ma jbigħx qamħ ma nibżax minnu.
Min hu pezzakustjoni xorta waħda konxju mill-fatt li ma jaqbillux jikser il-fus ma’ min għad jiġi bżonnu.
Min ma jgħinx ruħu jibqa’ fejn ikun.
Jeħtieġ li tagħmel sforz ġenwin biex tegħleb problema, inkella ma tasal imkien.
Min ma jħobbokx jgħid li fommok jinten.
Min ma jħobbokx jew ma jridx jaf bik minn kull tip ta’ skuża jsib.
Min ma jħobbokx jobogħdok.
Min ma jridx ikun ħabib tiegħek, ikun l-għadu tiegħek.
Min ma jridx ibusek jgħid li fommok jinten.
Min ma jħobbokx jew ma jridx jaf bik minn kull tip ta’ skuża jsib.
Min ma setax għall-ħmar, dar għall-berdgħa.
Min ma jirnexxilux jagħmillek azzjoni ħażina, idur għal xi ħadd jew xi ħaġa li tħobb. Berdgħa hija dik li tpoġġi bilqiegħda fuqha meta tirkeb fuq iż-żiemel.
Min tagħtih il-wiċċ jidrak.
Meta dak li jkun jidrak, jibda jonqsok mir-rispett.
Min tagħtih qalbek jagħtik bis-sieq.
Lil min tkun qalbek tajba miegħu, mhux talli ma jkunx jafhulek, talli jittrattak ħażin ukoll.
Min tagħtih sebgħek jeħodlok idek.
Tkunx qalbek tajba żżejjed għax in-nies jabbużaw mit-tjubija tiegħek.
Min tobogħdu għidlu: “Ġorr u bajjad.”
Lil min idejqek, agħmel minn kollox biex iħallik bi kwietek. F’dan il-qawl, naraw il-mibegħda bejn sid il-kera u l-kerrej (dak li jġorr u jbajjad).
Min trid minnu żiegħel bih.
Lil min taf li għad tiġi bżonnu, qis li żżomm relazzjoni tajba u tintgħoġob miegħu.
Min żara’ x-xewk ma jimxix ħafi.
Min jagħmel il-ħażin lil ħaddieħor, għandu jistenna l-istess attitudni mingħandu.
Miskin hu min jiġi bżonn in-nies.
Meta tkun trid mingħand in-nies, tkun d’pożizzjoni skomda ħafna għax ma tkunx taf humiex ser jgħinuk u kemm.
Mis-seba’ jieħu l-id.
Tkunx qalbek tajba żżejjed għax in-nies jabbużaw mit-tjubija tiegħek.
Mort għand il-ġara biex nistrieħ, għamlitli l-karwata fil-bieb.
Mingħand il-ġirien m’intix ser issib wens jew għajnuna. Karwata tfisser kutra.
Naħfer ta’ Nisrani u ninsa ta’ ħmar.
Aħfer lil min jagħmillek il-ħsara iżda tkunx iblah.
Nies annuna jgħixu bla muna.
In-nies li kapaċi jgħinu lil xulxin, jgħixu iżjed kuntenti u ma jħossuhomx waħedhom. Il-muna hija l-ħażna tal-ikel.
Ostorni biex nostrok.
Għattili l-ħażin li nagħmel biex jiena ngħattilek tiegħek. Ostorni tfisser aħbini u nostrok tfisser naħbik.
Qabel ma tara d-dar saqsi għall-ġar.
Kun trankwill f’darek skont kemm iħalluk il-ġirien.
Qatt tikxef għommtok man-nies.
Tmurx tgħid lin-nies bil-problemi tiegħek għax tispiċċa fi lsienhom.
Qis li ma ddendilx kusek ma’ bieb l-imgħallaq.
Ara li ma jkollokx x’taqsam ma’ min taf li jaqla’ l-inkwiet. Kus (pl. kwies) ifisser vażett żgħir tal-fuħħar jew tal-ħġieġ.
Quddiem in-nies iblah u meta hu miegħi iżraq.
Ma’ ħaddieħor iġib ruħu ħażin, u miegħi terġa’ jġib ruħu agħar. Iżraq tfisser kompletament għama.
Ta’ kuljum iweġġa’ r-ras.
Inħossuna negħjew meta jkollna nħabbtu wiċċna mal-istess problemi jew rikjesti ta’ spiss.
Tagħna tagħna u tan-nies fin-nar.
Kulħadd minn tiegħu biss jimpurtah, minn tal-oħrajn ħadd ma jimpurtah.
Tagħti fellus biex tieħu dundjan.
Impossibbli li tagħti ftit u tieħu ħafna.
Tagħti pesta u tieħu ċmajra.
Tagħti kemm tiflaħ bl-abbundanza iżda toħroġ diżappuntat meta tieħu lura bil-wisq inqas milli stennejt.
Tagħtix fastidju lil min ma jagħtikx.
Ħalli lil ħaddieħor bi kwietu jekk lilek ħallewk bi kwietek.
Tajba jew ħażina l-kumpanija aħrabha.
Il-kumpanija li tagħmilha magħha dejjem tinfluwenzak b’xi mod jew ieħor, aħjar għal rasek.
Tajjeb ma’ kulħadd iżda qalbek turi ’l ħadd.
Ġib rispett lil kulħadd, iżda tikxef affarijiet personali ma’ ħadd għax tispiċċa fi lsien in-nies.
Tajtu pesta u tani ċmajra.
Tagħti kemm tiflaħ bl‑abbundanza iżda toħroġ diżappuntat meta tieħu lura bil‑wisq inqas milli stennejt.
Tibżax minn min jidħaqlek imma minn min itaptaplek.
Min juri ħafna kunfidenza żejda miegħek ittihx wiċċ, għax sinjal li jkun irid xi ħaġa mingħandek.
Tiegħi titkellem u tal-ġara mank issellem.
Tagħmel il-pjaċiri u taqdi lil kulħadd, iżda malli tiġi bżonn inti ħadd ma jkun lest ipattilek tal-pjaċiri.
Tikxifx għajnek man-nies.
Tmurx tikxef il-ħajja privata tiegħek man-nies.
Tindaħalx fejn ma jesgħekx.
Agħmel l-affarijiet tiegħek u ħalli lil ħaddieħor bi kwietu.
Tingaġġax u timpiċċkax biex deni ma tarax.
Toqgħodx tindaħal fl-affarijiet ta’ ħaddieħor biex ma tispiċċax tidħol fl-inkwiet. Timpiċċkax tfisser tindaħalx.
Tini bil-ħarta u tħarisx lejja biċ-ċiera.
Aqbad iġġieled miegħi minflok toqgħod bil‑geddum.
Tislifx iċ-ċavetta lil ħabibek għax ftit ftit jisraqlek lil għażiżek.
Tagħtix kunfidenzi żejda għax jirvinaw l-għaqda tal-familja. Għażiżek tfisser il-persuna li tkun tħobb.
Tixtieqx lil ħaddieħor dak li ma tixtieqx lilek.
Qis li tittratta lil ħaddieħor bl-istess mod li tittratta lilek innifsek.
Waħdek ma tridx tkun lanqas il-ġenna.
Il-bniedem mhux magħmul biex joqgħod waħdu, għandu bżonn l-għajnuna tal-oħrajn.
Wara l-festa jinxef il-weraq.
Meta tagħmel xi pjaċir lil xi ħadd ma jdumx ma jinsieh.
Wara tmellisa stenna gidma.
Min joqgħod jittrattak b’ħafna ħlewwa, wara jagħtik bis-sieq meta jieħu dak li jkun ried mingħandek.
Xi drabi jkollok tbus l-id li tixtieq maqtugħa.
Kultant ikollna nagħmlu affarijiet li ma nixtiqux nagħmlu, bħal nirrispettaw lil min ma ħaqqux ir-rispett tagħna.
Xi ħabib jittradik.
Trid tkun lest li xi darba jew oħra se jkollok ħabib li jweġġagħlek qalbek u jittradik.
Il-qwiel kollha, f’post wieħed.