L-affarijiet ħżiena li tagħmel tmurx ixxandarhom mal-erbat irjieħ.
kategorija
il-ħażin
Wisq drabi tagħmel il-ġid u jisfalek deni.
Mhux kulħadd japprezza l‑ġid li tagħmel miegħu.
Wiri b’ieħor agħar miż-żorja.
Li turi wiċċ b'ieħor hija ħafna agħar milli tipprova tagħti t-tort lil ħaddieħor. Żorja tfisser twaħħal f'xi ħadd.
Warrab il-ħajjen fil-ġid u fid-deni.
Lin-nies ħżiena u makakki warrbilhom f'kull sitwazzjoni. Il-ħajjen huwa l-bniedem malizzjuż.
Wara t-tbatija u l-għaraq jeħtieġu s-serħ u l-faraġ.
Kulħadd jittama li wara li jkun bata jsib serħan u faraġ biex ikun jista' jistrieħ.
Wara l-qtil stenna l-ħaqq.
Wara li ssir azzjoni ħażina, stenna li ssir ġustizzja.
Wara l-maltemp jiġi l-bnazzi.
Wara perjodu ikrah jiġi ieħor sabiħ.
Wara l-ħlieqa tiġi l-burdlieqa.
Wara ħafna ċajt jiġi ħafna ġlied. Ħlieqa tfisser ċajt u l-burdlieqa hija xitla tal-ispeċi Portulaca oleracea, li diffiċli ħafna tiddiġeriha.
Wara l-ħelu jiġi l-morr.
Wara xi esperjenza sabiħa stenna waħda kerha, għax il‑ħajja hekk sejra.
Wara l-ferħ itir stenna niket kbir.
Wara xi esperjenza sabiħa stenna waħda kerha, għax il‑ħajja hekk sejra.
Wara d-daħq jiġi l-biki.
Wara xi esperjenza sabiħa stenna waħda kerha, għax il-ħajja hekk sejra.
Waddab il-ħaġra qabel il-kelb.
Kun makakk u lill-għedewwa tiegħek għamlilhom xi distrazzjoni biex ma jindunawx x'inti tagħmel u tasal fejn tixtieq.
Twaqqafx l-għarix wara li jeħdulek il-bħajra.
Tiħux azzjoni meta jkun tard wisq, aħsiblu minn qabel. Bħajra tirreferi għall-bettieħ u għarix tfisser kmajra.
Turi d-debba u tqabbeż il-ħmara.
L-ewwel tgħid li se tagħmel ħaġa, imbagħad tagħmel xi ħaġa oħra.
Tuffieħa waħda mħassra tħassar il-barkata sħiħa.
Il‑ħażin dejjem iħassar it‑tajjeb. Barkata tfisser dgħajsa.
Tneħħi l-inkwiet mid-dinja ma jibqa’ xejn.
Tant hawn inkwiet u problemi fid-dinja li t-tajjeb u s-sabiħ kultant diffiċli tarahom.
Tmur fejn tmur salibek jistenniek.
Il-problemi u l-inkwiet li jkollok ma taħrabx minnhom faċilment għax isegwuk kullimkien.
Tmiem tajjeb isewwi kollox.
Wara proċess twil u mimli problemi, meta kollox jispiċċa sew tinsa l-ħażin kollu li jkun ġara.
Tixtrix il-ħażin biex joħroġ it-tajjeb.
Meta tixtri oġġett ħażin għax ikun ta' valur baxx, tistenniex li se jkun tajjeb għax titqarraq.
Titlobx xita f’Jannar għax jagħmillek is-silġ.
Ix-xita veru li żmienha f'Jannar, iżda jista' jagħmel iżjed minn hekk u jagħmel is-silġ. Bl-istess mod, m'għandekx titlob wisq għal xi ħaġa, għax mhux talli sseħħ, talli sseħħ bl-esaġerazzjoni u tispiċċa tbati xorta.
Tistenna l-faraġ joqrob u l-faraġ dejjem jitbiegħed.
Min jittama mingħajr ma jieħu azzjoni ma jasal imkien u jiddispjaċih.
Tisma’ ta’ ħaddieħor, tinsa tiegħek.
Meta tara l‑problemi u t‑tbatijiet li jgħaddi minnhom ħaddieħor, tikkonsla xi ftit bil‑problemi u t‑tbatijiet tiegħek.
Tħallix lil min iqattar ix-xemgħa fuqek.
Tħallix lin-nies jagħmlu li jridu bik.
Tgħidx fuq ta’ ħdejk għax iżżid fuq spallejk.
Toqgħodx tgħid fuq in-nies għax tkun qed iżżid mal-azzjonijiet ħżiena u l-ħtija tiegħek.
Tgħaġġilx u ma tindimx.
Meta tieħu deċiżjonijiet bl‑għaġla ma tkunx ħsibtha sew u jiddispjaċik għax tispiċċa tagħmel l‑għażla l‑ħażina.
Tfajla li titwieled nhar ta’ Ġimgħa fl-istess jum il-kelb jigdimha.
Superstizzjoni fejn min jitwieled nhar ta' Ġimgħa — jum assoċjat ma' risq ħażin — ikollu ħajja mimlija diżgrazzji.
Teħodha mingħand il-patri biex ittiha lill-qassis.
Tagħmel xi ħaġa ħażina biex mingħalik tagħmel xi ħaġa tajba mkien ieħor.
Tbiegħed minn min iqarraq bik darba.
Tkunx iblah: min ikun qarraq bik imqar darba tih il-ġenb u terġax tafdah.
Tax-xitan imur għand id-dimonju.
Dak kollu li jsir jew jinkiseb bis-serq jew bil-qerq ma jitgawdiex.
Tara ta’ ħaddieħor, tinsa tiegħek.
Meta tara l-problemi u t-tbatijiet li jgħaddi minnhom ħaddieħor, tikkonsla xi ftit bil-problemi u t-tbatijiet tiegħek.
Taqta’ mnejn taqta’ joħroġ id-demm.
Tagħmel x'tagħmel xorta se tmur minn taħt jew tbati.
Tal-ewwel ibewwel u tal-aħħar ibaħħar.
Dak li jkolli jagħmel l-ewwel xogħol, irid isegwi sew l-istruzzjonijiet u jibża' mill-iżbalji. Dak tal‑aħħar ikollu d‑dmir li jtemm il‑ħimda li tkun qed issir, u b'hekk ilaqqat ix‑xogħol kollu li jkun għad fadal. Barra minn dan, kienet popolari s‑superstizzjoni fejn...
Tal-aħħar ibaħħar.
Dak tal-aħħar ikollu d-dmir li jtemm il-ħimda li tkun qed issir, u b'hekk ilaqqat ix-xogħol kollu li jkun għad fadal. Barra minn dan, kienet popolari s-superstizzjoni fejn il-fumigazzjoni kienet issir biex jitkeċċew l-ispirti ħżiena. Għalhekk ukoll, waqt il-funerali —...
Ta’ kulħadd tiġi.
Ix‑xorti ħażina li messet lili llum u li qed tgħaddini biż‑żmien biha, għad tiġi fuqek ukoll fil‑futur.
Ta’ kulħadd tasal.
Ix‑xorti ħażina li messet lili llum u li qed tgħaddini biż‑żmien biha, għad tiġi fuqek ukoll fil‑futur.
Tagħmilha tal-ħmar biex ma tħallasx dwana.
Min jilgħabha tal‑baħnan jaħrab minn ħafna inkwiet jew responsabbiltajiet.
Tagħmel il-ġid jisfalek deni.
Meta tagħmel il-ġid lil xi ħadd ma jibqax jafhulek, anzi jagħmillek il-ħsara.
Tagħlaqx il-bieb tal-istalla meta ż-żiemel ikun ħarab.
Tiħux azzjoni meta jkun tard wisq, aħsiblu minn qabel.
Ta’ b’għajn waħda hu sultan fost l-għomja.
Dejjem se ssib min hu agħar minnek fid-dinja.
Stenna, ja ħmar, sa ma tiġi r-rebbiegħa.
Ix-xorti ħażina li messet lili llum u li qed tgħaddini biż-żmien biha, għad tiġi fuqek ukoll fil-futur.
Sebaħ fl-aħħar nhar il-ġahar.
Wieħed m'għandu qatt jitlef it-tama f'sitwazzjoni ħażina, bħal meta jisbaħ wara ġurnata mċajpra. Ġahar proprjament tfisser persuna li ma tarax sew.
Sax-xemx u l-qamar jiġġieldu.
It‑tilwim u l‑ġlied huma komuni ħafna.
Sargu tal-port b’gamblu jinten jinqabad.
Min mingħalih moħħu jilħaqlu għad isib lil xi ħadd li jgħaddih fil‑makakkerija u jagħmillu ħażen agħar. Sargu hija ħuta tal‑ispeċi Diplodus sargus.
Sargu xiħ b’gamblu jinten jinqabad.
Min mingħalih moħħu jilħaqlu għad isib lil xi ħadd li jgħaddih fil-makakkerija u jagħmillu ħażen agħar. Sargu hija ħuta tal-ispeċi Diplodus sargus.
Sa l-għasafar fil-bejta jkollhom xi jgħidu.
It-tilwim u l-ġlied huma komuni ħafna.
Ras li ma titkellimx tissejjaħ qargħa.
Min mhux kapaċi jitkellem meta jara l-ħażin huwa injorant tassew.
Rajna u ħsibna, morna u qisna, u kollox tlifna.
Minkejja li għamilna minn kollox biex l-affarijiet imorru tajjeb, xorta waħda ma rnexxilniex.
Qattusa għaġġelija tagħmel ‘l uliedha għomja.
Meta tieħu deċiżjonijiet bl‑għaġla ma tkunx ħsibtha sew u tispiċċa tagħmel l‑għażla l‑ħażina.
Qatt tifraħ bid-deni ta’ ħaddieħor.
Tiħux pjaċir bid-deni ta' ħaddieħor, għax għad jiġi żmien fejn tkun għaddej inti minn żmien diffiċli u tkun tixtieq lil min jgħinek.
Qatt taħqar jew tmaqdar lil ħadd; ftakar li l-iċken insett iħoss u l-aktar farka żgħira tagħmel id-dell tagħha.
Meta taħqar bil-kliem, anke jekk ftit, tkun qed tweġġa' lil dak li jkun u tħalli effett ħażin fuqu.
Qatt tagħti lok għall-ħsieb ħażin.
Keċċi l-ħsibijiet ħżiena li jiġuk f'moħħok għax jagħmlulek ħajtek miżerja.
Qalb niexfa ma tagħder lil ħadd.
In-nies ħżiena ma jafux jagħdru.
Qalb ħażina, jekk tobton ħniena, tarmi.
In‑nies qalbhom ħażina ma jafux x'inhi ħniena, bħal ġisem li ma jħennx għal fetu mhux vijabbli u jagħmel abort (hekk tfisser tarmi). Tobton tfisser tnissel.
Qalb ħażina, jekk tiled xi ħniena, tkun rimi.
In-nies qalbhom ħażina ma jafux x'inhi ħniena, bħal ġisem li ma jħennx għal fetu mhux vijabbli u jagħmel abort (hekk tfisser rimi).
Qalb ħanina tmut miskina.
Min ikollu qalbu tajba wisq ibati ħafna għax kulħadd jabbuża minnu.
Qaħba xaħxeħija ma għandha qatt xjuħija.
Iż-żmien bħal donnu ma jilħaqx lill-prostituti li jieħdu ħsieb tagħhom infushom. Xaħxeħija tfisser li tgħix ħajja ta' lussu. Qawl li jfisser ukoll li l-ħażin dejjem isib modi kif jibqa' jgawdi, għax moħħu jilħaqlu.
Qabil il-bagħal jagħti biż-żewġ jaf.
Il‑ħażin aħarbu għax ħsara biss jista' jagħmillek. Qabil il‑bagħal tfisser ir‑razza tal‑bagħal.
Qabil il-bagħal aħrab minnu għax jew jigdmek jew jagħtik ix-xewka.
Il-ħażin aħarbu għax ħsara biss jista' jagħmillek. Qabil il-bagħal tfisser ir-razza tal-bagħal jew il-bagħal taż-żunżan.
Post faktum rawta.
Il-ħażin issa sar u jiswa daqs rawta, jiġifieri ħmieġ tal-bhejjem. Post faktum hija fil-fatt post factum bil-Latin, jiġifieri wara li tkun saret l-azzjoni.
Omm il-ġifa qatt ma tagħli.
Min jilgħabha tal-baħnan jaħrab minn ħafna inkwiet. Ġifa tfisser iblah jew baħnan, li ommu ma tkun tista' tgħidlu jew tqabbdu xejn.
Nistenna l-wens iwennisni, iberraq għajnejh u jkexkixni.
Il-ħajja mimlija problemi u l-wens ma jasal qatt għax ikollna wisq inkwiet.
Nies tal-għatba u t-taraġ ma fihomx faraġ.
Evita lil min jipprova jissendika biex ma jsibx xi jgħid fuqek man-nies.
Nies ta’ bla fehma ħajrhom saħta u reħma.
Min irid kollox kif irid hu, jew tgħaddi tiegħu jew jeħodha kontra l-oħrajn u joqgħod jitħassar lilu nnifsu. Reħma tfisser mogħdrija.
Neħħi s-sewwa mid-dinja u ma jibqax ħlief min jagħti.
In-natura tal-bniedem hija predisposta aktar għall-ħażin milli għat-tajjeb.
Neħħi minna l-ħażen u żomm idek filli jibqa’.
In-natura tal-bniedem hija predisposta aktar għall-ħażin milli għat-tajjeb.
Miżbla qatt ma fieħet.
Tistenniex ġid mingħand persuna ħażina jew mimlija vizzji.
Mitt xejn qatlu ħmar.
Ħafna affarijiet żgħar u ħżiena jagħmlu iżjed ħsara minn ħaġa waħda kbira u ħażina.
Mitħna tar-riħ kien u mitħna tar-riħ baqa’.
Kellu xortih ħażina qabel u għadu xortih ħażina issa.
Mit-tajjeb stenna t-tajjeb u mill-ħażin xejn għajr ħażin.
Kull azzjoni, tajba jew ħażina, għandha l-konsegwenzi tagħha.
Miskin min joqgħod tal-aħħar għax kollox ilaqqat.
Tal-aħħar dejjem jieħu mill-agħar.
Miskin, fqir u għakkar, u jrid iniggeż il-ħmar.
Qiegħed f'sitwazzjoni ħażina u xorta waħda jdejjaq lil ħaddieħor.
Miskin dak l-għama li fiż-żmien jittama.
L-isfortunat qatt m'għandu jittama li l-affarijiet ser jitranġaw biż-żmien.
Min żara’ x-xewk ma jimxix ħafi.
Min jagħmel il-ħażin lil ħaddieħor, għandu jistenna l-istess attitudni mingħandu.
Minn kull fejn taqta’ joħroġ id-demm.
Tagħmel x'tagħmel se taqlagħha.
Min ma setax għall-ħmar, dar għall-berdgħa.
Min ma jirnexxilux jagħmillek azzjoni ħażina, idur għal xi ħadd jew xi ħaġa li tħobb. Berdgħa hija dik li tpoġġi bilqiegħda fuqha meta tirkeb fuq iż-żiemel.
Min ma jridx bis-sewwa jeħtieġ irid bid-dnewwa.
Min ma jifhimx bil-kelma t-tajba jkollu jifhem bil-forza.
Min ma jitkellimx ommu qaħba.
Min jaf li għandu tort jew għandu x'jaħbi ma jgħid xejn biex ma jinkixifx.
Min ma jistħix minnek tisħix minnu.
Qis li tiddefendi lilek innifsek kontra min jipprova jagħmillek il-ħsara.
Min ma jifhimx bis-sewwa jifhem bid-dnewwa.
Min ma jifhimx bil-kelma t-tajba jkollu jifhem bil-forza.
Min ma jħobbx jaħdem mal-Insara jkollu jorqod mal-ilsiera.
Min ma jridx jagħmel il-ħaġa t-tajba, mela jispiċċa jagħmel il-ħaġa l-ħażina u jiġi kkastigat għaliha.
Min ma jħarisx ’il quddiem jitfa’ siequ fil-vojt.
Min ma jippjanax u ma jqisx l-affarijiet minn qabel jiżbalja.
Min ma jġarrabx ma jemminx.
Trid tkun għaddejt mill-istess esperjenzi koroh ta' ħaddieħor biex tassew tifhmu u tagħdru.
Min ma jġarrabx il-ħażin ma jafx it-tajjeb x’jiswa.
Irridu ngħaddu mill-esperjenzi koroh tal-ħajja biex nitgħallmu napprezzaw is-sabiħ tagħha.
Min ma jduqx il-morr ma jtigħemx il-ħelu.
Irridu ngħaddu mill-esperjenzi koroh tal-ħajja biex nitgħallmu napprezzaw is-sabiħ tagħha.
Min ma jbossx jifsa.
Hemm min jagħmel xi ħaġa ħażina u jaraha kulħadd, u hemm min jagħmel ħafna agħar minn taħt bla ma jarah ħadd.
Min ma jbiddilx iqammel.
Il-bidla f'kollox sabiħa (fil-ħbieb, ix-xogħol, l-attutidni, il-mentalità, eċċ.) għaliex tevita konsegwenzi koroh (il-monotonija, l-abbużi, il-passività, l-arroganza, eċċ.).
Min ma jbiddilx idewwed.
Il-bidla f'kollox sabiħa (fil-ħbieb, ix-xogħol, l-attutidni, il-mentalità, eċċ.) għaliex tevita konsegwenzi koroh (il-monotonija, l-abbużi, il-passività, l-arroganza, eċċ.).
Min ma jaqax ma jqumx.
Tgħallem mill-iżbalji tiegħek biex terġa' fuq saqajk u tmur għall-aħjar.
Min m’għandux x’jiekol m’għandux x’jitma’.
Min mhux kapaċi jieħu ħsieb tiegħu nnifsu, mhux kapaċi jieħu ħsieb ħaddieħor.
Min m’għandux salib għandu domna.
Kbira jew żgħira, kulħadd għandu xi tip ta' problema fid-dinja.
Min joqtol ma jaħtix daqs min jagħwi.
Min jagħmel azzjoni ħażina m'għandux tort daqs min istigah jagħmilha.
Min joqgħod moxxu jaqa’ taħt dwiefer l-oħrajn.
Min joqgħod għal kollox u ma jiddefendix ruħu, jagħmlu li jridu bih l-oħrajn.
Min joqgħod fuq żewġt iċwejjem ħażin imur.
Min mhux kapaċi jieħu deċiżjoni ma jmurx tajjeb. Ċwejjem huwa l-plural ta' ċima.
Min jobżoqlok f’wiċċek tistħix tobżoqlu f’wiċċu.
Tħallix min jagħmillek il-ħsara, iddefendi lilek innifsek.
Min jobżoq għas-sema jiġi f’wiċċu.
Min jipprova jagħmel xi vendikazzjoni jew ipattiha lil xi ħadd, jispiċċa jbati hu stess.
Min jiżra’ r-riħ jaħsad it-tempesti.
Il-kastig ikun kbir skont kemm ikun kbir il-ħażin li tkun għamilt.
Min jiżra’ fin-niket jaħsad fil-ferħ.
Min għaddej minn żmien diffiċli għad jasal żmien fejn jerġa' jkun ferħan.
Min jixrob bewlu jieħu lewnu.
Min jagħmilha ma' kumpanija ħażina, jieħu l-influwenzi ħżiena kollha.
Min jitkaża jaqa’ fil-każa.
Min jitkaża bl-iżbalji ta' ħaddieħor, jispiċċa jagħmel l-istess żball huwa stess.
Min jistor il-ħalliel għandu sehem mill-ħtija.
Meta lil min jagħmel ħażin tgħattilu, tkun kompliċi miegħu.
Min jisraq bajda jaf jisraq tiġieġa.
Min jagħmel ftit ħsara, imbagħad jagħmel ħsara akbar.
Min jirteħa jittieħed.
Min hu bla direzzjoni morali, jispiċċa jinġarr mill-ħażin.
Min jilgħab bin-nar jinħaraq.
Min jabbuża żżejjed ikollu jbati l-konsegwenzi.
Min jikser jgħammar.
Min jagħmel il-ħażin jeħtieġ li jpatti għalih.
Min jigdeb u jobgħod, jagħmel deni lilu nnifsu u lil min jemmnu.
Min jigdeb u jaqla' l-qlajjiet jagħmel ħsara kbira lilu nnifsu u lil ta' madwaru.
Min jiġbed ħafna jaqta’ l-ispaga.
Meta tagħmel azzjoni ħażina ripetutament, tasal dik id-darba fejn jaqbduk.
Min jiftaħ biebu, jitlef lil uliedu.
Meta wliedek jibdew joħorġu mid-dar titlifhom, għax jibdew jagħmluha ma' kumpanija ħażina.
Min jixtieq deni lil ġaru jiġi f’daru.
Min jieħu gost bil-ħażin ta' ħaddieħor, dak l-istess ħażin jiġi fuqu.
Min jifraħ bl-għawġ ta’ ġaru, l-għada jisbaħlu f’daru.
Min jieħu gost bil-ħażin ta' ħaddieħor, dak l-istess ħażin jiġi fuqu.
Min jidħaq il-Ġimgħa jibki s-Sibt.
Superstizzjoni Maltija li min jidħaq nhar ta' Ġimgħa, peress li f'kuntest reliġjuż huwa jum traġiku, ibati l-konsegwenzi u jibki l-għada.
Min jibki u min jidħaq.
Kulħadd xortih fid-dinja, min ferħan u min imdejjaq.
Min jersaq ħada l-ġmied jiġġemmed.
Min jagħmilha ma' nies ta' karattru ħażin, jieħu l-influwenza ħażina u jsir bħalhom. Ħada tfisser ħdejn.
Min jerfa’ għalik, jerfa’ għal ħaddieħor.
Min jagħti fastidju sesswali (= jerfa') lilek, ibqa' ċert li jagħtih lil ħaddieħor ukoll.
Min jeqleq żejjed fl-aħħar isibha xortih.
Min qatt ma jikkuntenta b'xejn sa fl-aħħar tasal xi ħaġa li togħġbu. Jeqleq tfisser jilmenta.
Min jara tagħbitu ma jfittixx tagħbit oħrajn.
Min jara l-problemi tiegħu ma jkunx moħħu fil-problemi tal-oħrajn. Tagħbitu tfisser it-tagħbija (= il-problemi) tiegħu.
Min jaqla’ u jagħti l-infern ibati.
Superstizzjoni Maltija li jekk xi ħadd jagħtik xi ħaġa u tagħtiha, ikollok tbati l-infern ta' kemm kont ingrat.
Min jaqla’ laqam għandu seba’ snin il-purgatorju.
Superstizzjoni Maltija li min jasal jaqla' laqam ikollu jpatti għalih billi jqatta' seba' snin il-purgatorju wara mewtu.
Min jagħtik xewka, imbagħad jagħtik rizza.
Min jagħmillek ftit ħsara, imbagħad jagħmillek ħsara akbar; iqaflu mill-ewwel.
Min jagħtik daqqa ta’ ħarta, tistħix twieġbu b’oħra int.
Min ma jiddejjaqx iweġġgħek, tiddejjaq xejn tiddefendi ruħek u tagħmillu l-istess.
Min jagħtihielek bi qronfla, agħtihielu b’warda; u min b’xewka, agħtihielu b’labra.
Ġib ruħek ma' ħaddieħor bl-istess mod li hu jġib ruħu miegħek.
Min jagħmillek id-deni agħmillu l-ġid.
Azzjoni ħażina pattiha b'azzjoni tajba.
Min jagħmilha maz-zopp, għeluq is-sena jsir zopp bħalu.
Min jagħmilha ma' nies ta' karattru ħażin, jieħu l-influwenza ħażina u jsir bħalhom.
Min jagħmel jaħmel.
Min jagħmel il-ħsara jeħtieġ li jpatti tal-ħażin li jkun għamel.
Min jagħmel il-ħsara jħallas għaliha.
Min jagħmel il-ħsara jeħtieġ li jpatti tal-ħażin li jkun għamel.
Min ixarrab il-bakkaljaw jieklu.
Min jagħmel il-ħażin lil ħaddieħor, dak l-istess ħażin jiġi fuqu.
Min itik bix-xewk ara tagħtih bil-ward; middu u xebgħa ġebla agħtih fl-art.
Min jittrattak ħażin teħdux bil-ħlewwa, anzi ddefendi lilek nnifsek.
Min imur ikittef joħroġ imnittef.
Min jagħmel il-ħażin lil ħaddieħor, dak l-istess ħażin jiġi fuqu.
Min imiss iż-żift jiċċappas.
Min jagħmilha ma' nies ta' karattru ħażin, jieħu l-influwenza ħażina u jsir bħalhom.
Min ikun se jegħreq jaqbad imqar ma’ tibna.
Min ikun f'sitwazzjoni ta' periklu jew disperazzjoni, minn kollox jagħmel biex isalva jew joħroġ minnha.
Min ikun muġugħ jokrob.
Kulħadd għandu raġuni għaliex jilmenta.
Min ikun mimli ċomb ma jintefax il-baħar.
Min jaf li għandu tort jipprova jaħbi l-ħażin li għamel akkost ta' kollox.
Min ikun fuq is-salib mhux bħal min ikun taħtu.
Min ma jkunx għadda mill-esperjenza kerha ta' ħaddieħor, ma jkunx jaf eżatt x'jiġifieri.
Min iħoss toqlu ma jħossx tal-oħrajn.
Min għandu ħafna problemi ma jimpurtahx mill-problemi ta' ħaddieħor.
Min ħarreb imut imħarreb.
Min jagħmel il-ħsara lil ħaddieħor, il-ħajja tpattihielu billi tagħmillu l-istess tip ta' ħsara. Iħarreb tfisser joqtol, u mħarreb tfisser maqtul.
Min iħammel id-demel jitħammeġ bih.
Min jagħmilha ma' nies ta' karattru ħażin, jieħu l-influwenza ħażina u jsir bħalhom.
Min jgħawwed jgħawweġ.
Bil-gideb u t-tgħawwiġ tal-fatti, il-bniedem ħażin jagħmel il-ħażin u jerġa' (= jgħawwed).
Min jgħammar qalb il-ħadid jiċċappas bis-sadid.
Min jagħmilha ma' nies ta' karattru ħażin, jieħu l-influwenza ħażina u jsir bħalhom.
Min jgħaġġel wisq jibdielu.
Meta tieħu deċiżjonijiet bl-għaġla ma tkunx ħsibtha sew u jiddispjaċik għax tispiċċa tagħmel l-għażla l-ħażina.
Min igerger minn salibu jiġih wieħed agħar.
Min jilmenta mill-ħażin li għandu f'ħajtu jagħmel ħażin, għax dejjem tista' tkun agħar.
Min ifottik fin-negozju ipprova fottih.
In-negozjanti huma kompetittivi ħafna u moħħhom biex ikissru lil xulxin.
Min ifittex ‘il ommu wisq isibha mara ħażina.
Min isaqsi ħafna mistoqsijiet u jsir jaf persuna jew sitwazzjoni aħjar, jinduna li hemm ħafna ikrah mas-sabiħ.
Min hu mweġġa’ jokrob.
Kulħadd għandu raġuni għaliex jilmenta.
Min hu mgħaġġel jaqbillu jistenna.
Meta tieħu deċiżjonijiet bl-għaġla ma tkunx ħsibtha sew u tispiċċa tagħmel l-għażla l-ħażina.
Min hu mejjet għal qatra u min hu mejjet fis-sakra.
Il-bilanċ ma jeżistix, għax hemm min m'għandu xejn u hemm min għandu żżejjed.
Min għandu l-faħam miblul kull xkumvata jaħsibha gremxul.
Min jaf li għandu xi ħaġa fuq il-kuxjenza jaħseb ħażin. L-ixkumvat huwa ħelu tradizzjonali Malti tal-Milied.
Min għandu l-faħam miblul jibża’ biss.
Għandu għalfejn jibża' biss min jaf li għandu tort.
Min ġera ma laħaqx u min laħaq ma daqux.
Meta jkollok bżonn ħafna ta' xi ħaġa ma ssibhiex, u meta jkollok ħafna minnha ma jkollokx aktar bżonnha.
Mill-ward joħroġ ix-xewk u mix-xewk joħroġ il-ward.
Mill-affarijiet it-tajbin joħorġu affarijiet ħżiena, u viċeversa.
Mill-ħażin tistenniex li joħroġ it-tajjeb.
Mingħand min hu azzjonitu ħażina tistenniex mod ieħor.
Mill-għeneb joħroġ l-inbid, imma joħroġ il-ħall ukoll.
Minn kull ħaġa tista' toħroġ it-tajjeb jew il-ħażin, skont l-azzjonijiet tiegħek.
Miġja tal-ġara ġġib il-ħsara.
Meta tara l-ġirien ġejjin iħabbtulek il-bieb, għid li ġej l-inkwiet.
Miġja ta’ nutar, tajjeb jew ħażin, iġġib l-aħbar.
Dari n-nutar kien imur fid-dar tan-nies, u l-miġja tiegħu kienet tkun tfisser li ser jiġri xi ħaġa kbira, bħal xi wirt, testment, kuntratt, eċċ.
Mhux dejjem tiġi żewġ.
L-affarijiet mhux dejjem jirnexxu.
Mhux dak biss li joħroġ jisraq billejl jissejjaħ ħalliel.
Hemm diversi modi kif tisraq, fosthom billi tbigħ jew tagħti servizz bi prezzijiet qarrieqa.
M’hemmx warda bla xewk.
Is-sabiħ jiġi mal-ikrah fil-ħajja.
Meta tisma’ hemm l-oħrajn, tinsa tiegħek.
Tikkonsla meta tisma' bl-affarijiet il-ħżiena li jiġru lil ħaddieħor.
Meta taqa’ l-baqra jaqgħu s-skieken.
Meta titlef il-pożizzjoni ta' awtorità li tkun fiha, dawk li mingħalik kienu ħbieb tiegħek jieqfu jirreċtaw.
Meta tagħġen il-qaħba bieb il-forn jaqa’.
Hemm min hu xortih ħażina f'kull ħaġa li jagħmel.
Meta raġel iżiegħed il-but, ħajtu dejjem f’xifer ix-xtut.
Meta tkun stabene u ġidek dejjem jiżdied (= iżiegħed il-but), dejjem għandek ir-riskju li jisirquk jew jagħmlulek xi tip ta' vendikazzjoni.
Meta l-laħam hu ħażin, agħar jiġi l-brodu.
Mill-affarijiet il-ħżiena joħorġu affarijiet agħar.
“Merħba, ja mewt,” qal il-ġurdien kif ħass in-nassa tingħalaq fuqu.
Ladarba l-affarijiet jibdew ġejjin ħażin, aċċetta u ssaporti.
Mejjet ma jerfax ieħor.
Min ikun f'sitwazzjoni diffiċli ma jkunx jista' jgħin lil ħaddieħor.
Mar biex ikittef u ħareġ imnittef.
Il-ħsara li pprova jagħmel lil ħaddieħor ġiet fuqu.
Malti tajjeb aħarqu, aħseb u ara ħażin.
L-Għawdxin ma jafdawhomx lill-Maltin.
Ma tistax togħġob lil kulħadd.
Agħmel dak li inti taħseb hu tajjeb u ħallik minn x'jaħseb ħaddieħor.
Ma tistax isservi ‘l Alla u x-xitan.
Ma tistax tagħmel żewġ affarijiet opposti fl-istess ħin.
Ma setax idur għall-ħmar, dar għall-berdgħa.
Ma setax ipattihielu u minflok dar fuq xi membru tal-familja tiegħu jew xi ħabib tiegħu. Il-berdgħa tirreferi għad-drapp taħt is-sarġ fuq dahar il-ħmar.
M’hemmx ħelu mingħajr morr.
Mingħajr l-ikrah tal-ħajja m'hemmx is-sabiħ.
Lil min toqorsu joqmos.
Meta tagħmel azzjoni ħażina lil xi ħadd, stenna reazzjoni mingħandu.
Lil min toqgħodlu jgħabbik.
Qis li tieqaf lil min jipprova jagħmel li jrid bik.
Lil min tniggżu jgħid “ajma”.
Meta tagħmel azzjoni ħażina lil xi ħadd, stenna reazzjoni mingħandu.
Lil min jigdem Alla ma jtihx snien.
Min jagħmel il-ħażin lill-ħaddieħor, Alla ma jtihx it-tajjeb.
Lil min jaħralek f’idek tiddejjaqx iċċappashulu ma’ wiċċu.
Qis li tiddefendi lilek innifsek kontra min jipprova jagħmillek il-ħsara.
Lil min jaħralek f’idek tiddejjaqx iċċappashulu ma’ geddumu.
Qis li tiddefendi lilek innifsek kontra min jipprova jagħmillek il-ħsara.
L-ilma jsaqqi l-ħatab u l-ħatab jgħalli l-ilma.
Tagħmel il-ġid mal-proxxmu, iżda dan ma jkunx rikonoxxenti.
Lill-pastaż agħtih biċċa minn dejlek u erħilu jmur.
Aħrab il-ħażin u lil min jaqla' l-inkwiet. Dejlek tfisser id-dublett tiegħek.
Lill-ħażin agħtih biċċa minn dejlek u erħilu jmur.
Aħrab il-ħażin u lil min jaqla' l-inkwiet. Dejlek tfisser id-dublett tiegħek.
Lil kulħadd tiġi sigħetu.
Kulħadd irid iwieġeb għat-tajjeb u l-ħażin kollu li jkun għamel.
L-ikrah jagħmel x’jagħmel ma jsirx sabiħ.
Min hu ikrah dejjem jiġi ttrattat iżjed ħażin minn min hu sabiħ, anke jekk bla tort.
L-ikrah għandu mankament wieħed iżda s-sabiħ għandu ħafna.
Id-difetti fuq min hu ikrah jidhru ħafna iżjed minn dawk fuq min hu sabiħ; min hu sabiħ imbagħad ikollu ħafna iżjed difetti x'jaħbi.
L-għira bażwija.
Min jgħir ħafna għalik, jasal biex saħansitra jgħir ukoll għall-ħażin tiegħek.
L-għerf jirfina u n-nies tirvina.
Il-bniedem qiegħed kulma jmur isir iżjed għaref, iżda fl-istess ħin qiegħed ukoll isir iżjed makakk u manipulattiv.
L-għerf jikber u n-nies teħżien.
Il-bniedem qiegħed kulma jmur isir iżjed għaref, iżda fl-istess ħin qiegħed ukoll isir iżjed makakk u manipulattiv.
L-għajnejn huma t-twieqi tal-qalb.
L-għajnejn espressivi u juru x'hemm f'qalb persuna.
L-għada li titwieled biha l-kefen biss ineħħiha.
Id-drawwiet tiegħek - tajbin u ħżiena - sa mewtek tibqa' bihom. Għada tfisser drawwa u l-kefen huwa t-tebut.
L-ewwel ma tiekol l-għajn.
L-ewwel ma ninnutaw hija d-dehra esterna tal-affarijiet, mela agħti kasha wkoll.
L-azzjoni ta’ min jagħmilha, mhux ta’ min jirċeviha.
Azzjoni ħażina tirrifletti ħażin fuq l-aggressur mhux fuq il-vittma.
La tiġi iftħilha l-bieb.
Ladarba jibda l-inkwiet ma jkun irid jieqaf b’xejn.
Larinġa ħażina tħassar qartalla.
Il-ħażin dejjem iħassar it-tajjeb. Qartalla tfisser basket kbir tal-qasab.
La marret l-id ħa jmorru s-swaba’.
Min ikun għadda minn esperjenza kerha ħafna ma jagħtix kas l-affarijiet iż-żgħar.
La l-qalb mimlija, il-fomm jitbewwaq.
Kulħadd għandu raġuni għaliex jiftaħ qalbu.
La kull hemm jhemm u la kull semm isemm.
Il-problemi fil-ħajja huma sors ta' tagħlim. Hemm tfisser ħsara u jhemm huwa verb li jfisser tagħmel ħsara. Semm tfisser velenu u jsemm huwa verb li jfisser tivvelena. Mela mhux kull ħsara tagħmel ħsara u mhux kull velenu jivvelena.
L-aktar magħkus imur minn taħt.
Aktar kemm tkun f'sitwazzjoni diffiċli, aktar il-ħajja ttik mill-agħar.
L-“ajma ma” qatt ħadd ma qalha għalxejn.
Kulħadd għandu raġuni għaliex jilmenta.
L-aħħar tibna kisret dahar il-ħmar.
Kien jonqos l-aħħar azzjoni żgħira biex persuna jew sitwazzjoni tikkrolla wara serje ta' problemi akkumulati.
L-aħbar ħażina tasal malajr.
Aħbar ħażina kulħadd isir jaf biha malajr.
Kull qaħba għandha ‘l Ġakka.
Meta ssir xi azzjoni ħażina, dejjem ikun hemm xi ħadd kompliċi (= Ġakka).
Kull niżla sewwiqija.
Meta ma jkunx hemm problemi kollox jimxi sew.
Kull min jintreħa jittieħed.
Min ma jiħux ħsieb biex jagħmel it-tajjeb jispiċċa jitkaxkar mill-ħażin.
Kull min jagħmel il-qabar għal sieħbu jindifen fih.
Min jagħmel id-deni lil ħaddieħor, ma jsibx ġid mingħand ħaddieħor; anzi, il-ħajja tpattihielu.
Kull min il-ħobż itellef, għalih ma jsibx jissellef.
Min jagħmel id-deni lil ħaddieħor, ma jsibx ġid mingħand ħaddieħor.
Kull kobba fiha tarfha.
Kull sitwazzjoni diffiċli u kkumplikata tissolva.
Kull ħelu fih il-morr.
Ma jistax ikun ikun hemm is-sabiħ mingħajr l-ikrah.
Kull baħar jipplaka.
Kull ħaġa ħażina xi darba tasal fi tmiemha. Jipplaka tfisser jikkalma.
Kulħadd xogħlu jogħġbu.
Kulħadd jara tiegħu tajjeb u ta' ħaddieħor ħażin, anke fix-xogħol.
Kulħadd tiġi sigħetu.
Kulħadd għad ipatti tal-ħażin kollu li jkun għamel.
Kulħadd tajjeb iżda ibża’ minn kulħadd.
Kulħadd għandu t-tajjeb tiegħu, iżda xorta waħda tafdax.
Kulħadd taħt sema wieħed.
Kulħadd irid iseffaq wiċċu mal-problemi tal-ħajja.
Kulħadd taħt saqaf wieħed.
Kulħadd irid iseffaq wiċċu mal-problemi tal-ħajja.
Kulħadd tad-demm u l-laħam.
Kulħadd jista' jieħu żball għax kulħadd bniedem.
Kull deni ħudu b’ġid.
Tgħallem mill-affarijiet il-ħżiena li jiġrulek.
Kulħadd kif inhu magħġun.
Kulħadd bil-karattru tiegħu, bit-tajjeb u l-ħażin b'kollox.
Kulħadd jixħet it-tebqa tal-ħorġ wara dahru.
Id-difetti tiegħu ħadd ma jarahom.
Kulħadd jista’ jkun bla raj.
Kulħadd jista' jieħu żball.
Kulħadd jieħu li ħaqqu.
Meta tagħmel xi ħaġa ħażina, trid tkun lest tbati l-konsegwenzi.
Kulħadd b’xi għilla, min bis-sabar u min bil-qilla.
Kulħadd għandu t-taqbida tiegħu fil-ħajja, hemm min jieħu paċenzja u hemm min jirrabja. Għilla tfisser mard.
Kulħadd b’xi imma, min bis-sabar u min bil-qilla.
Kulħadd għandu t-taqbida tiegħu fil-ħajja, hemm min jieħu paċenzja u hemm min jirrabja.
Kulħadd b’xi ħaġa.
Kulħadd għandu t-taqbida tiegħu fil-ħajja, min ħaġa u min oħra.
Kulħadd bniedem.
Kulħadd tad-demm u l-laħam u kapaċi jagħmel żball.
Konna aħjar meta konna agħar.
Mingħalina li l-affarijiet kienu se jmorru għall-aħjar, imma minflok marru għall-agħar.
Kieku l-forn jara ħotobtu, ma kienx jaħmi ħobżu.
Tidħaqx bid-difetti ta’ ħaddieħor għax id-difetti tiegħek huma ferm akbar.
Kelma sewwa ssewwi dinja u kelma belha tgħarraq dinja.
Il-kliem jagħmel ġid daqs kemm jagħmel ħsara.
Kelb li jilgħab bl-irmied tafdalux dqiq.
Bniedem li jagħmel il-ħażin, f'kollox jagħmlu.
Kelb għalkemm jixjieħ jibqa’ jigdem.
Bniedem ħażin ma jinbidilx, mhux imbilli jixjieħ.
Jitħaxxen il-ħajt, tidjieq l-għorfa.
Ħaġa tmur tajjeb u l-oħra ħażin.
Jekk tmiss ħwejġek ma’ ħwejjiġha, jew sentejn jew tiżżewwiġha.
Tagħmel x'tagħmel se teħilha. Sentejn tfisser sentejn ħabs.
Jekk titfa’ bomba fit-Tramuntana tiġilek fin-Nofsinhar.
Kollox ġej ħażin.
Jekk mhux b’xi salib, b’domna.
Kulħadd għandu l-problemi tiegħu xi jsolvi.
Jeħtieġ teħodha kif tiġi.
Aċċetta li fil-ħajja mhux kollox imur tajjeb u kif tixtieq.
Iżżarma knisja biex tarma oħra.
Biex tirranġa xi ħaġa, kellek tkisser xi ħaġa oħra.
Ix-xemx ma titgħattiex bl-għarbiel.
Meta jsir xi ħażin kbir, diffiċli ħafna tgħattih.
It-twajjeb miskin.
Min ikun twajjeb wisq ibati għax kulħadd jagħmel li jrid bih.
It-triq tan-nofs l-aħjar.
L-estremi dejjem ħżiena - tgħallem immodera.
It-tiġieġa tbid fejn tiekol in-nuħħala.
Kulħadd irid iwieġeb ta' għemilu, kemm fit-tajjeb kif ukoll fil-ħażin.
It-tiġieġa fejn tiekol in-nuħħala tmur tbidha l-bajda.
Kulħadd irid iwieġeb ta' għemilu, kemm fit-tajjeb kif ukoll fil-ħażin.
Itfagħha għal rasha forsi tiġi għal saqajha.
Fejn ma tafx, ħu sogru u agħmel xi ħaġa kif ġie ġie - jekk tkun xortik tajba, jaf tiġik tajba wkoll.
Is-sewwa ħarbet għax ħadd ma ried jilqagħha f’daru.
Donnu ħadd ma sar jagħżel li jagħmel it-tajjeb illum il-ġurnata.
Is-sabiħ maħbub bla ma jaf, l-ikrah mibgħud bla ma jaħti.
Wiċċ sabiħ jattirak inkonxjament, mentri wiċċ ikrah jimbuttak anke jekk forsi l-persuna jkollha karattru sabiħ.
Israq ftit tirrokka żgur, israq ħafna u ssir sinjur.
Jekk tisraq ftit jaqbduk żgur, mentri jekk tisraq ħafna tieħu l-qagħda u tgawdi għax ma jaqbdukx.
Ir-riħ imexxi l-bastimenti, imma hu jgħarraqhom.
Oqgħod attent għax ħaġa tista' daqqa tagħmillek il-ġid, u daqqa tagħmillek il-ħsara.
Ir-riħ erħilu jonfoħ.
Meta tagħmel it-tajjeb, jiġri x’jiġri jkollok il-kuxjenza nadifa.
Ir-ras meta tifliha tkun taf x’fiha.
Tara tassew sa fejn tkun waslet il-ħsara meta tipprova ssewwiha.
Imxi sewwa u ħalli l-baħar iħabbat.
Meta tagħmel it-tajjeb, jiġri x'jiġri jkollok il-kuxjenza nadifa.
Il-wied dejjem għan-niżla.
Meta ma tibqax tidħaqlek ix-xorti, l-affarijiet imorru mill-ħażin għall-agħar.
Qattusa għaġġelija frieħ għomja tagħmel.
Meta tieħu deċiżjonijiet bl-għaġla ma tkunx ħsibtha sew u tispiċċa tagħmel l-għażla l-ħażina.
Il-qarnita fl-aħħar iddur għal subgħajha.
Meta tkun iddisprat minn kollox tasal tagħmel biex tilħaq l-għanijiet tiegħek.
Il-miżbla qatt ma tkun tfuħ.
Mingħand xi ħadd ta' intern ħażin tistenniex it-tajjeb.
Il-lupu jbiddel sufu u mhux għemilu.
Bniedem ħażin jipprova jagħtik x'tifhem li nbidel, iżda fil-fond ta' qalbu ħażin jibqa'.
Illum jien u għada int.
It-tajjeb li mess lili llum imiss lilek għada, u l-istess bil-ħażin.
Illum baram lil wieħed, għada jiftel lill-ieħor.
Qatt m'għandek tafda bniedem ħażin. Jiftel hawn tfisser iqarraq.
Il-logħob u l-ħlieqa ġlied jistgħu jġibu.
Il-ħafna ċajt wara jwassal għall-ġlied u l-biki. Ħlieqa huwa ċajt.
Il-logħob tal-idejn iweġġa’ l-għajnejn.
Il-logħob tal-idejn m'għandux ikun.
Il-liġi saret bħall-banavolja.
In-nies ħżiena jmorru aħjar mal-ġustizzja mill-vittmi. Banavolja tfisser brikkun.
Il-lejl għandu wliedu suwed.
Isiru ħafna affarijiet ħżiena billejl, mela oqgħod attent(a).
Il-kelb in-nagħaj idejjaq in-nies tad-dar u tal-ġar.
Superstizzjoni Maltija tgħid li l-klieb li jingħu jbassru xorti ħażina.
Il-kelb il-mismut kull ilma jaħsbu misħun.
Min ikun għadda minn esperjenza ħażina joqgħod iżjed attent li ma jerġax jgħaddi minnha.
Il-ħuta minn rasha tinten.
F'organizzazzjoni jew ġerarkija, il-problemi jkunu ġejjin mit-tmexxija ħażina tad-diriġenti.
Il-ħsieb raġel ħażin.
Toqgħodx taħseb ħażin għax spiss titqarraq.
Il-ħsieb ħażin iqarraq u jfalli f’ħin.
Toqgħodx taħseb ħażin għax spiss titqarraq.
Il-ħmira żejda tħassar l-għaġina.
Iż-żejjed ma jagħmilx ġid.
Il-ħmara tbul fuq l-għadira.
L-affarijiet il-ħżiena malajr jiżdiedu u jinfirxu.
Il-ħmar il-magħlub iliegħeb.
Aktar kemm tkun f’sitwazzjoni diffiċli, aktar il-ħajja ttik mill-agħar.
Il-ħmar iwaħħal f’denbu.
Qed jgħajjar lil ħaddieħor bid-difetti tiegħu stess.
Il-ħmar il-magħkus idur għalih id-dubbien.
Aktar kemm tkun f'sitwazzjoni diffiċli, aktar il-ħajja ttik mill-agħar.
Il-ħell u ż-żina ma jdumux fil-ħabi sena.
Min jisraq jew jiżni malajr jinqabad. Ħell tfisser serq.
Il-ħbiberija tax-xitan twassal sal-bieb tal-ħabs.
Jekk tippreferi tagħmel il-ħażin, xi darba għad tieħu l-kastig li jkun ħaqqek.
Il-ħażin titimgħu ħobżok u jidgħilek.
Tagħmilx pjaċiri lin-nies ħżiena għax f'wiċċek jibqa'.
Il-ħażin malajr kulħadd jitgħallmu.
Huwa faċli ħafna li taqa' fit-tentazzjoni li tagħmel il-ħażin.
Il-ħażin malajr jingħoġob.
Aktar faċli temmen il-ħażin milli t-tajjeb.
Il-ħażin kulma tagħmel miegħu kollu mitluf.
Tagħmilx pjaċiri lin-nies ħżiena għax f'wiċċek jibqa'.
Il-ħażin joħroġ minn dar l-għaref u jidħol f’dar l-iblah.
Il-ħażin jibqa' ħażin għal kulħadd, hu x'inhu l-livell ta' intelliġenza.
Il-ħażin jitwemmen aktar malajr.
Aktar faċli temmen il-ħażin milli t-tajjeb.
Il-ħażin ilgħablu l-ħajna.
Man-nies makakki ara li tuża l-istess livell ta' makakkerija. Il-ħajna tfisser makakkerija.
Il-ħaxixa ħażina malajr tikber.
Il-ħażin malajr jinxtered.
Il-ħaxixa ħażina taqtagħhiex, aqlagħha.
Il-ħażin eħles minnu akkost ta' kollox u oqtlu mill-għeruq.
Il-ħaxixa ħażina l-aktar li żżerragħ.
Il-ħażin malajr jinxtered. Iżżerragħ tfisser tagħmel iż-żerriegħa.
Ħalli l-ħuta tinqela b’żejtha.
In-nies ħżiena malajr isibu lil xi ħadd bħalhom li jagħmlilhom il-ħsara.
Il-ħanżir b’xaħmu jinqela.
In-nies ħżiena malajr isibu lil xi ħadd bħalhom li jagħmlilhom il-ħsara.
Il-ħanfus oqtlu biex ma jnittnekx.
Il-ħażin eħles minnu akkost ta' kollox u oqtlu mill-għeruq. Il-ħanfus jagħmel riħa tinten biex jiddefendi ruħu.
Il-brikkun ma jurix fiex inhu.
Min ikun f'sitwazzjoni ħażina ma jmurx jinkixef ma' ħaddieħor.
Il-ħajjen ma jurix fiex inhu.
Min ikun f'sitwazzjoni ħażina ma jmurx jinkixef ma' ħaddieħor.
Il-ħadid ħażin dejjem mal-mola jmur.
In-nies ħżiena ma' xulxin jagħmluha. Mola hija dik li bl-Ingliż tissejjaħ grindstone.
L-għajjur bil-ġuħ imut.
In-nies għajjurin bla sodisfazzjon jibqgħu.
L-għajjur bil-weġgħa jmut.
In-nies għajjurin bla sodisfazzjon jibqgħu.
L-għadu tih biċċa minn dejlek ħa jitlaq bih.
Żomm 'il bogħod min-nies ħżiena. Dejlek tfisser ħwejġek f'dan il-każ.
L-għada li titrabba fiha l-kefen biss ineħħiha.
Id-drawwiet tiegħek - tajbin u ħżiena - sa mewtek tibqa' bihom. Għada tfisser drawwa u l-kefen huwa t-tebut.
Il-ġustizzja tkabbar nazzjon u d-dnub jirvinaha.
Il-ġustizzja ssawwar is-sens morali ta' nazzjon, iżda l-azzjonijiet ħżiena jeqirduha.
Il-ġid ma jingħamilx bilfors.
Mhux kulħadd jagħmel it-tajjeb.
Il-ġenna ma jidħlux xjaten.
Ix-xitan jagħmel li jrid bil-bniedem, iżda mhux b'Alla. Dan ifisser li xi darba t-tajjeb għad jirbaħ fuq il-ħażin.
Il-ġarra ġejja u sejra fl-aħħar tinkiser.
Meta tagħmel azzjoni ħażina ripetutament, tasal dik id-darba fejn jaqbduk.
Il-ġarra bl-aħħar qatra tfur.
Meta żżomm ġo fik, fl-aħħar tispiċċa biex tinfaqa'.
Il-fuħħara li ġġelġel hija mxiegħra.
Trid taċċetta li tagħmel x'tagħmel ser issir il-ħsara. Fuħħara tfisser reċipjent tal-fuħħar u mxiegħra tfisser li tkun ixxaqqet.
Il-ftit u tajjeb aħjar mill-wisq u ħażin.
Aħjar tagħmel ftit u tajjeb milli tipprova tagħmel ħafna u ħażin.
Il-fortuna mal-ħmir u s-skaren.
Ix-xorti tidħaq lin-nies injoranti u lis-sakranazzi.
Il-forn li jara ħotobtu ma jsajjarx ħobżu.
Tidħaqx bid-difetti ta’ ħaddieħor għax id-difetti tiegħek huma ferm akbar.
Il-forka għall-iżvinturat.
Minn tant nies li jagħmlu l-ħażin u qatt ma jinqabdu, ix-xorti ħażina tkun messet lil min jingħata l-forka. Id-dinja inġusta.
Il-bniedem mogħti għall-ħażen.
Il-bniedem jattirah il-ħażin.
Il-bniedem għal dnubu niedem.
Xi affarijiet ħżiena li nġibu fuqna huma kollha tort tagħna.
Ilbieraħ kilt tiġieġa, illum bajda mgħollija u għada nixrob l-ilma tal-lissija.
Ix-xorti taf tkun kattiva ħafna, għax filli tidħaqlek u filli ttik bis-sieq. L-ilma tal-lissija huwa l-ilma tal-ħasil.
Il-banda ddoqq u l-bajtar dieħel.
Meta ħadd ma jkun jimpurtah kollox imur ħażin.
Il-bajtar tax-xewk ma jagħmilx ħawħ.
Mingħand in-nies ħżiena m'hemmx azzjonijiet tajbin.
Id-dnub mistqarr nofsu maħfur.
Meta tammetti li għamilt ħażin dak li jkun ikun lest jaħfirlek iżjed malajr.
Id-dnub ma jorqodx.
Meta tagħmel xi ħaġa ħażina, xi darba jew oħra għad tinqabad.
Id-dinja tal-brikkun.
Fid-dinja n-nies ħżiena jirnexxu iżjed min-nies twajba.
Id-dinja rota, in-nies imgħażel u x-xitan jagħżel.
Tul il-ħajja dejjem insibu xi ħaġa tittanta. Imgħażel huwa għodda għall-insiġ.
Id-dinja raddiena, daqqa minn fuq int u daqqa minn fuq jiena.
Mhux dejjem inkunu xortina tajba, iżda mhux dejjem inkunu xortina ħażina.
Id-dinja gaġġa tal-imġienen.
Fid-dinja l-loġika mhix ħaġa ovvja.
Id-dinja dejjem miexja, daqqa dritt u daqqa mgħawweġ.
Bit-tajjeb u l-ħażin kollu tagħha, il-ħajja tibqa' għaddejja.
Iċ-ċomb jgħum u r-rix jegħreq.
Kollox ta' taħt fuq: min kapaċi jasal qed jibqa' lura u min mhu kapaċi għal xejn qed isib min jaqilgħu.
Iċ-ċomb jgħum u t-tiben jegħreq.
Kollox ta' taħt fuq: min kapaċi jasal qed jibqa' lura u min mhu kapaċi għal xejn qed isib min jaqilgħu.
Ħobż ix-xitan ma jxabbax.
Dak kollu li tkun akkwistajt bid-diżonestà ma tgawdihx.
Ħaxixa ħażina tikber kullimkien.
Il-ħażin kullimkien issibu, tmur fejn tmur.
Ħaxix ħażin aħarqu.
Il-ħażin eħles minnu akkost ta' kollox u oqtlu mill-għeruq.
Ħares warajk u tħarisx quddiemek.
Oqgħod attent, huwa aktar faċli li ħaddieħor jagħmillek il-ħażin minn wara dahrek milli f'wiċċek.
Ħaġa li ma tixraqx tagħmilhiex u kelma li tisma’ d-dar la ttennihiex.
Ġib ruħek tajjeb u qis kliemek, tikxifx dak li jingħad id-dar.
Ħadd ma jara ħotobtu għax jaqa’ u jmut zoptu.
Tidħaqx bid-difetti ta' ħaddieħor għax id-difetti tiegħek huma ferm akbar.
Ħadd ma jaħraq il-kamra li joqgħod fiha.
Meta xi ħadd ikun kompliċi f'xi ħaġa ħażina, mhux ser jikxef lill-kompliċi l-oħrajn għax ibati hu.
Ħa l-qamħ u ħalla l-ħliefa.
Żamm l-aħjar għalih u ħalla l-laqx lil ħaddieħor.
Hemm dwieb u dwieb, tal-għenienel u tal-mantijiet.
In-nies ta' intern ħażin kullimkien qegħdin, uħud jidhru u oħrajn le. Dwieb huwa l-plural ta' debba u għenienel huwa l-plural ta' għonnella.
Għan-niżla kull qaddis jgħin.
Meta ma jkunx hemm problemi kollox jimxi sew.
Għam il-baħar kollu u għereq fir-ramla.
Kien sejjer tajjeb, sakemm żgarra fl-aħħar naqra.
Għal tal-aħħar is-swat.
Tal-aħħar dejjem jieħu mill-agħar.
Għal kull niżla hawn telgħa.
Għal kull ħaġa ħażina hemm oħra tajba.
Għal kull nittiena hemm żmienha.
Bniedem ħażin xi darba jeħodha wkoll il-lezzjoni.
Għal kull lagħqa għasel hemm bettija morr.
L-affarijiet sbieħ li jiġru fil-ħajja huma ftit meta tqabbel mal-affarijiet koroh kollha.
Ġonġol imġenġel qatt ma jiġġenġel.
Il-ħażin, ħażin jibqa’.
Ġaħan beda minn qrabatu.
L-ewwel tagħlim dwar x'inhu tajjeb u ħażin mid-dar tieħdu.
Fuq tlieta toqgħod il-borma.
Ma' kull ħaġa tajba jew ħażina li tiġri, stenna tnejn oħra!
Fuħħara li ġġelġel imxiegħra.
Il-ħażin, ħażin jibqa'. Fuħħara hija reċipjent u "imxiegħra" tfisser "imxaqqa".
Ftit u tajjeb aħjar minn ħafna u ħażin.
Aħjar dak li għandu jsir, isir bil-mod u tajjeb.
Ftira mimlija bl-għaġla iġri kulha, inkella tiqras.
Jekk għamilt xi żball għax ma qgħadtx attent, sewwih mill-ewwel qabel ikun tard wisq.
Fil-ħajja gwerra l-ħin kollu.
Fil-ħajja dejjem hemm xi diffikultà x'tegħleb.
Fid-dinja tħobb ħaġa u tobgħod oħra.
Ma tistax tistenna li kollox imur kif tixtieq fil-ħajja.
Fid-dinja tajjeb tkun f’saħħtek, iżda mitt darba aħjar tkun rasek tilħaqlek.
Is-saħħa importanti iżda iktar importanti li tuża moħħok u tkun makakk.
Fid-dinja tagħmel il-ġid u jisfalek deni.
Mhux kulħadd japprezza l-ġid li tagħmel.
Fid-dinja mhux dejjem ir-rebbiegħa.
Ma tistax tistenna li kollox imur tajjeb fil-ħajja.
Fid-dinja kollox frugħa; is-sabiħ filgħodu, filgħaxija tarah kruha.
Fid-dinja trid toqgħod attent għax id-dehra tqarraq bik.
Fid-dinja ħadd mhu tassew kuntent.
Ma ssibx kuntentizza fid-dinja, kulħadd isib fuq xiex jilmenta.
Fejn hemm it-tfesfis fil-widnejn, aktarx hemm il-gideb.
Meta tiġri xi xniegħa mhux kollox ikun veru.
Fejn bidt, mur kul il-qanneb.
Issa li għamilt id-deċiżjoni l-ħażina, lesti ruħek biex tbati l-konsegwenzi.
F’waqtha raqqagħha jekk ma tridx terġa’ taqtagħha.
Jekk saret xi ħsara pprova sewwiha mill-ewwel biex ma tkomplix tikber.
F’kollox issib it-tajjeb u l-ħażin.
Kull ħaġa għandha s-sabiħ u l-ikrah tagħha.
F’kollox issib il-karfa.
F'kull ħaġa ssib difett, xejn mhu perfett. Il-karfa tfisser il-frak tat-tiben.
F’għalqa waħda jikbru l-qamħ u s-sikrana.
Għal kull ħaġa tajba ssib waħda ħażina, u bil-kontra.
Erba’ bajtriet qatt ma wiżnu qantarejn.
L-isforzi biex wieħed jirranġa sitwazzjoni ħażina ma jkunux biżżejjed biex tinqaleb il-folja.
Ebda warda bla xewk.
Is-sabiħ jiġi mal-ikrah fil-ħajja.
Drabi tajba xi tbeżbiża.
Tbeżbiża tajba għal azzjoni ħażina jkun hemm bżonnha.
Dnub mistqarr nofsu maħfur.
Huwa aktar faċli taħfer azzjoni ħażina jekk min għamilha jammettiha.
Din id-dinja għall-imxuma.
Fid-dinja trid taċċetta li hawn ħafna ħażin u dwejjaq. Imxuma tfisser dwejjaq.
Denbu taħt il-blat; jitqanżaħ iżda ma jinqalax.
Jiġu ċirkostanzi fejn il-ħajja tagħtik wisq mill-agħar, u tagħmel x'tagħmel ma tkun tista' teħles b'xejn mill-għawġ.
Dejjem ħares lejn min hu agħar minnek.
Ikkonsla, żgur hemm xi ħadd li f'ħajtu l-affarijiet sejrin agħar.
Darba fit-tant tmiss lill-Papa.
It-tajjeb u l-ħażin xi darba lil kulħadd jiġru, anke lin-nies importanti.
Daqqa jmissek l-għadma u oħra l-laħma.
Fil-ħajja daqqa tiġik tajba u daqqa tiġik ħażina.
Daqqa fuq iċ-ċirku u oħra fuq il-bettija.
Bniedem li jġib ruħu ħażin u bis-salvaġiżmu wara jpattilu bil-ħlewwa u l-ġentilezza.
Dak li jidħol mill-gerżuma ‘l ġewwa kollu sewwa.
Bħalma l-bniedem jiekol biss ikel tajjeb, hekk ukoll jaf jagħżel it-tajjeb mill-ħażin.
Dak li jeħel fid-dras ma jxebbax.
L-isforzi biex wieħed jirranġa sitwazzjoni ħażina ma jkunux biżżejjed biex tinqaleb il-folja.
Dak li baram lili, għada jista’ jiftel lilek.
Ħadd mhu speċjali, jista' jiġrilek kull ħaġa li tista' tiġri lil ħaddieħor.
Ċappa tin u tamal ma fihomx x’titqażżeż.
Twarrabx xi ħaġa tajba sempliċement għax tidher kerha.
Ċallas ballas min ikisser iħallas.
B'xi mod trid tħallas tal-ħsara li tkun għamilt.
Aħjar tidħaq milli tibki.
Aħjar tieħu l-affarijiet biċ-ċajt meta jibdew sejrin ħażin.
Aħjar hekk inkella agħar.
Aħjar nieħdu paċenzja bil-ħażin li ġara, dejjem setgħet ġiet agħar.
Bagħal magħlub ibelgħen.
Aktar ma l-affarijiet jibdew ġejjin ħażin, aktar ikollok xortik ħażina.
Agħtini xortija u itfagħni l-baħar.
Meta xi ħadd ikun xortih tajba, anke fil-ħażin ma jbatix daqshekk.
B’ħobża tagħmel mitt mil u b’mitt ħobża ma tagħmilx mil.
Meta kollox ikun miexi sew teħles malajr, iżda meta kollox jibda ġej bil-kontra, iddum ħafna iżjed.
B’ħabel jitgħallaq bniedem, b’ħabel isalva ieħor.
Dak li jagħmel il-ħsara lil persuna jista' jagħmel il-ġid lil persuna oħra.
Armi l-ħażin u żomm it-tajjeb.
Qis li dejjem tagħżel l-aħjar.
Aktar tmut in-nies bix-xaba’ milli bil-ġuħ.
Iż-żejjed jagħmel ħsara daqs in-nieqes.
Aħseb il-ħażin biex it-tajjeb ma jonqosx.
Tafdax iżżejjed u ma titqarraqx.
Aħseb dejjem li l-hemm li temm lil ġarek jista’ jidħol f’darek.
M'intix speċjali, dak li jiġri lil ħaddieħor jista' faċilment jiġri lilek.
Agħder għax ma tafx fiex tiġi.
Kun qalbek tajba għax ma tafx min tiġi bżonn.
Agħlaq il-bieb qabel ma taħrab id-debba.
Ilqa' għall-ħsara li tista' ssir; wara jkun tard wisq.
Aħjar waħdek minn wensek.
Għalkemm mhux dejjem faċli, għandek tagħżel li tagħmel it-tajjeb.
Aħjar torqod fix-xemx taħraq inkella toqgħod fid-dell tal-ħażin.
Għalkemm mhux dejjem faċli, għandek tagħżel li tagħmel it-tajjeb.
Agħmel il-ġid u nsieh; agħmel id-deni u ftakar fih.
Ftakar fid-deni li tkun għamilt biex tpatti għal għemilek.
Ix-xitan jibża’ mill-ilma mbierek.
Il-ħażin trid tiġġilidlu bit-tajjeb.
Alla fi lsienu u x-xitan f’qalbu.
In-nies wiċċ b’ieħor isemmu lil Alla, imma f’qalbhom ikun hemm il-ħażen.
Alla jibgħatha tajba għax ħażina ilha.
Meta jkunu ilhom sejrin ħażin l-affarijiet, wieħed jitlob lil Alla biex imorru għall-aħjar.
Alla jibni knisja, ix-xitan itella’ kappella.
Il-ħażin dejjem lest biex jirbaħ fuq it-tajjeb.
Alla lill-bniedem iħallsu skont qalbu.
Alla jippremja jew jikkastiga skont l-imġiba tal-bniedem.
Alla tani l-għama u l-għadu ħbieli l-ixkora.
Aktar ma tkun magħkus, aktar jgħakksuk.
Alla jagħti l-għama u x-xitan jaħbi l-ixkora.
Aktar ma tkun magħkus, aktar jgħakksuk.
Il-qwiel kollha, f’post wieħed.