Is-sajjieda għandhom ħajja diffiċli għax idumu biex jaqbdu l-ħut. L-istess kien japplika għall-kaċċaturi fil-passat.
kategorija
is-sajd
Tagħmilx zalza qabel ma taqbad il-ħut.
Titwebbilx li se jkollok xi ħaġa qabel ma tassew tiksibha.
Sargu tal-port b’gamblu jinten jinqabad.
Min mingħalih moħħu jilħaqlu għad isib lil xi ħadd li jgħaddih fil‑makakkerija u jagħmillu ħażen agħar. Sargu hija ħuta tal‑ispeċi Diplodus sargus.
Sargu xiħ b’gamblu jinten jinqabad.
Min mingħalih moħħu jilħaqlu għad isib lil xi ħadd li jgħaddih fil-makakkerija u jagħmillu ħażen agħar. Sargu hija ħuta tal-ispeċi Diplodus sargus.
Sajjied bla lixka ma jaqbadx vopi.
Biex ix-xogħol jirnexxi, jeħtieġ li jkollok il-mezzi u l-għodda t-tajba.
Qasba u xlief, imbiċċer u tellief.
Xogħol is-sajjied huwa diffiċli ħafna.
Passa alwett, passa lampuki.
Meta jpassi l-alwett (għasfur tal-ispeċi Alauda arvensis), ipassu wkoll il-lampuki.
Min ma jistadx ma jaqbadx ħut.
Min ma jridx jaħdem u jistinka ma jagħmilx suċċess fil-ħajja.
Min ma jbakkarx ma jaqbadx ħut.
Min ma jridx jaħdem u jistinka ma jagħmilx suċċess fil-ħajja.
Min jorqod ma jaqbadx ħut.
Min ma jridx jaħdem u jistinka ma jagħmilx suċċess fil-ħajja.
Min jixtri l-ħut fil-baħar jieklu jinten.
Min iħallas għal xi ħaġa minn qabel mingħajr ma jara xi kwalità qed jieħu jiddispjaċih.
Min jaqbad ix-xlief, ħajtu ssir tlief.
Xogħol is-sajjied (= dak li jaqbad ix-xlief) huwa diffiċli ħafna u aktar jitlef milli jaqla'. Tlief huwa l-plural ta' telf.
Min jaħdem jiekol sardina u min ma jaħdimx jiekol gallina.
L-għażżien jew min ma ħaqqux igawdi minn fuq dahar min jagħmel xogħlu sew.
Min ixarrab il-bakkaljaw jieklu.
Min jagħmel il-ħażin lil ħaddieħor, dak l-istess ħażin jiġi fuqu.
Min għall-mulett ixammar jifdallu xi jqammar.
Il-mulett iżjed faċli jinqabad meta jkun jidher il-qamar. Ixammar tfisser jistad.
Meta tqattar ix-xita, is-sajda tkun f’waqtitha.
Meta terġa' tibda x-xita, jerġa' jibda s-sajd.
La tixtrix ħut fil-baħar.
Tħallasx flus qabel ma tara l-oġġett f'idejk.
Lampuka mixwija tfakkrek fl-ikla xitwija.
Ottubru huwa l-istaġun tal-lampuki, u r-riħa tfuħ tal-lampuki mixwija tfakkarna li deħlin fil-ħarifa u x-xitwa.
Jekk ma tagħtix l-art, lanqas ma jagħti l-baħar.
Meta l-biedja tbati, ibati s-sajd ukoll.
Iz-zalza ogħla mill-ħut.
Dak li qed tipprova tagħmel fih wisq spejjeż u ma jaqbillekx tagħmlu.
Is-sajjied jgħid li l-art ħabel tajjeb.
In-nies jaħsbu li xogħolhom biss fih impenn. Ħabel tfisser għalqa.
Il-kaħli, jekk tisma’ kliemek, ma tmigħekx ma’ xliefek.
Meta ma tgħid xejn jirnexxilek iżjed tasal fejn trid. Il-kaħli tip ta' ħuta li titgerrex ħafna.
Ħalli l-ħuta tinqela b’żejtha.
In-nies ħżiena malajr isibu lil xi ħadd bħalhom li jagħmlilhom il-ħsara.
Ħuta f’waqtha, u mhux fil-borma mlaqqta.
Il-ħut kulu eżatt kif issajru għax wara ma jibqax tajjeb.
Ħut ta’ bla rjus fis-suq iġib il-flus.
Fl-istaġun tal-lampuki (jiġifieri f'Settembru u Ottubru) il-ħut iż-żgħir ikun imfittex u jġib il-flus.
Għal kull ħuta hawn il-lixka tagħha.
Toqgħodx taħseb li inti aħjar minn ħaddieħor, għax malajr issib lil xi ħadd eżatt bħalek.
Fis-sajd lil min għarusa u lil min għaġuża.
Is-sajjied daqqa xortih tajba u daqqa xortih ħażina. Għarusa tirreferi għal tfajla mentri għaġuża tirreferi għal mara xiħa.
Biex taqbad il-ħut trid tqum kmieni.
Hemm bżonn tbakkar biex ittella' x-xogħol.
Aktar alka milli ħut.
Ħaġa jaf tkun ta' inqas sustanza milli ħsibt.
Aħjar mara ta’ baħri milli ta’ raġel jistad għall-kaħli.
Mara ta’ baħri kien ikollha iżjed xi troxx, peress li s-sajjied tal-kaħli mhux dejjem kien jaqbad ħafna ħut.
Konz ta’ Settembru jgħabbi bil-gziez, konz ta’ Diċembru hu wisq bil-qies.
Jinqabdu ħafna iżjed lampuki f’Settembru milli f’Diċembru.
Konz ta’ Settembru jgħabbi bil-gziez, konz ta’ Diċembru hu wisq bil-qies.
Jinqabdu ħafna iżjed lampuki f’Settembru milli f’Diċembru.
F’Ġunju s-suq mimli ħut u s-sajjied bil-flus fil-but.
F’Ġunju l-bdiewa u s-sajjieda jibdew jaqilgħu l-flus mill-prodott tagħhom.
F’Ġunju jsib il-ftiet, il-bidwi u s-sajjied.
F’Ġunju l-bdiewa u s-sajjieda jibdew jaqilgħu l-flus mill-prodott tagħhom.
Il-qwiel kollha, f’post wieħed.