Kulħadd huwa responsabbli ta' dak li jgħid, veru jew mhux.
kategorija
il-kliem
Mnejn toħroġ il-kelma toħroġ ir-ruħ.
Il-kliem li joħroġ mill-fomm għandu jkun veritier u onest.
Mis-sliem jiġi l-kliem u mill-kliem jiġu l-ħbieb.
Bil-kliem tagħmel ħbieb man-nies, iżda l-kliem iwassal għall-kunfidenzi żejda.
Minn ħalqek għal ħobbok u minn ħobbok għall-art.
Superstizzjoni: jalla s-saħta li ħierġa minn ħalqek tinżel f'sidrek u fl-art, mhux tiġi fuqi.
Min mit-tiben jagħmel in-nar ma jiħux ħlief duħħan.
Il-paroli fil-vojt u l-ftaħir m'għandhomx valur.
Min ma jkellmekx tkellmux.
Min iħallik xi kwietek, ħallih bi kwietu.
Min ma jismax milli wieħed jgħidlu għall-ġid tiegħu b’rasu jdur.
Min jgħidlek xi ħaġa għall-ġid tiegħek agħti kasu għax jiddispjaċik.
Min ma jismax bil-kelma ma jismax bid-daqqiet.
Għalxejn tuża l-vjolenza biex tikkonvinċi lil xi ħadd.
Min ma jgħid xejn jgħid kollox.
Dak li jkun xorta jkun qed jagħtik risposta bis-skiet tiegħu.
Min jorbot bi lsienu ma jsibx xi jħoll bi snienu.
Meta tagħti kelma lil xi ħadd, jeħtieġ iżżommha.
Min jobżoqha jkollu jilgħaqha.
Kulħadd huwa responsabbli ta' dak li jgħid, veru jew mhux.
Min jimxi bil-brejku ma jasal imkien.
Min ma jesprimix ruħu ċar u tond, ma jwassalx il-messaġġ u ma jirnexxix. Il-brejku huwa lingwa sigrieta li ma jifhimha ħadd.
Min jgħid wisq jagħlet.
Min jitkellem ħafna u bl-addoċċ jiżbalja (= jagħlet).
Min jgħid wisq ftit fih risq.
Min jitkellem ħafna u bl-addoċċ iġib l-inkwiet.
Min jgħid li jrid ikollu jisma’ milli ma jridx.
Min jitkellem mingħajr ma jiżen kliemu, ikollu jisma' kliem xejn sabiħ mingħand ħaddieħor.
Min jgħawwed jgħawweġ.
Bil-gideb u t-tgħawwiġ tal-fatti, il-bniedem ħażin jagħmel il-ħażin u jerġa' (= jgħawwed).
Min għandu lsienu f’ħalqu jgħid li jrid.
Kulħadd jgħid ħafna xorti, allaħares toqgħod tagħti kas.
Min għandu lsienu jgħid li jrid.
Kulħadd jgħid ħafna xorti, allaħares toqgħod tagħti kas.
Min għandu ħalqu jgħid li jrid.
Kulħadd jgħid ħafna xorti, allaħares toqgħod tagħti kas.
Mill-milja tal-qalb jitkellem il-fomm.
Min hu onest ma jibżax jesprimi ruħu, għax ikun qed jgħid il-verità.
Mill-kliem għall-fatti hemm raġel b’xiber mustaċċi.
Dak li tagħmel jgħodd, mhux dak li tgħid.
Mill-kelma t-tajba għall-ħażina m’hemm xejn.
Bil-herra qatt ma tieħu xejn, mela jaqbillek dejjem tieħu lil dak li jkun bil-ħlewwa.
Meta m’intix mistoqsi titkellimx.
Tgħid xejn jekk ħadd ma saqsiek xejn.
Meta l-kliem jitwal isir serp.
Il-ħafna paroli żejjed iwassal għal ħafna ġlied u mibegħda.
Ma nsilekx biex ma ssilnix.
Ma nagħmilx ftehimiet legali bil-miktub miegħek biex ma jkollix obbligi lejk. Ma nsilekx tfisser ma ndejnekx, u ma ssilnix tfisser ma nkux obbligat.
M’għandekx tisma’ qanpiena waħda.
Isma' x'għandu xi jgħid kulħadd u wara asal għall-konklużjoni tiegħek.
Li tagħmel daqqa ta’ pinna ma tħassrux daqqa ta’ fies.
Kuntratt jorbtok u ma tħassrux malajr.
L-ilsien fuq id-darsa li tuġa’ jmur.
Kulħadd il-problemi u l-uġigħ tiegħu jara u jsemmi.
L-ilsien fih il-melliesa u n-niggieża.
L-ilsien kapaċi juri l-ħlewwa (= il-melliesa) kif ukoll il-kattiverja (= in-niggieża).
L-ilsien bla għadam iżda jxoqq l-għadam.
L-ilsien iweġġa' ħafna.
Li kien il-kliem ġawhar, is-skiet isbaħ minnu.
Is-skiet fih iżjed preġju mill-kliem.
Liġġem żiemlek għax jarmik, liġġem ilsienek għax jgħallik.
Għandek dejjem toqgħod attent minn dak li tgħid għax jiddispjaċik (= tagħli), bħaż-żiemel li tliġġmu (= tlibbislu lġiem) biex ma jisfrattax u jarmik minn fuq dahru.
L-ewwel isma’, imbagħad tkellem.
Isma' x'għandhom xi jgħidu l-oħrajn u wara asal għall-konklużjoni tiegħek.
La tinbagħadx għal ilsienek.
Oqgħod attent xi tgħid għax tispiċċa mibgħud minn kulħadd.
La tħallix ilsienek jaqtagħlek grieżmek.
Oqgħod attent xi tgħid għax tiġi fl-inkwiet.
La tgħidx kulma taħseb u la turix kulma taf.
Tippruvax turi kemm inti għaref għax malajr toħroġ ta' prużuntuż jew iqabbduk tagħmel xi biċċa xogħol li ma kontx qed tistenna.
L-arloġġ tiegħi darba jdoqq.
M'iniex ser nirrepeti dak li diġà għedt.
Kliemek tiegħmu sew qabel tlissnu.
Jekk toqgħod attent xi tgħid, ma ddejjaq lil ħadd bi kliemek.
Kliem sigriet la għali u lanqas inkwiet.
Jekk għandek sigriet żommu, sabiex tevita l-inkwiet u ma jiddispjaċikx.
Kliem ma tridux jixxerred, tgħidux.
Jekk ma tridx li dak li tgħid jinxtered, tgħid xejn.
Kliem ix-xiħ meħud mill-qiegħ.
Agħti widen lill-anzjani, il-pariri tagħhom imsejsa fuq l-esperjenza tal-ħajja.
Kliem ftit għal min jifhem.
Min irid jifhem m'hemmx għalfejn ħafna paroli miegħu.
Kliem fieragħ ma jimliex imtieraħ.
Il-paroli fil-vojt ma jiswa xejn. Imtieraħ huma saqqijiet.
Kieku l-kliem kien ġawhar, is-skiet aħjar minnu.
Is-skiet fih iżjed preġju mill-kliem.
Kieku, jew u jewwilla ma jimlew ebda bixkilla.
B'ħafna paroli fil-vojt u indeċiżjoni ma tasal imkien.
Kelma żejda fuq ġieħ issir mitħna tar-riħ.
Ladarba tgħid kelma ma tistax tiblagħha lura.
Kelma sewwa ssewwi dinja u kelma belha tgħarraq dinja.
Il-kliem jagħmel ġid daqs kemm jagħmel ħsara.
Kelma mal-ħbieb xorrox fil-qlieb.
Ladarba tgħid kelma ma tistax tiblagħha lura. Qlieb huwa l-plural ta' qaleb.
Kelma li toħroġ mill-fomm ma terġax tinġabar.
Ladarba tgħid kelma ma tistax tiblagħha lura.
Kelma li toħroġ mis-sinna timla dinja.
Ladarba tgħid kelma ma tistax tiblagħha lura.
Kelma ġġib lill-oħra, kelmtejn iġibu l-kliem, il-kliem iqanqal ġlieda u dlok jikser is-sliem.
Il-kliem żejjed joħloq l-inkwiet.
Kelma f’waqtha tiswa mija.
Jiswa ħafna meta tgħid il-ħaġa t-tajba fil-mument it-tajjeb.
Kelma drabi ġġib il-kliem u tkeċċi s-sliem.
Il-kliem żejjed jaf joħloq l-inkwiet.
Kelma bejn tnejn; bejn tlieta, mnejn sa fejn.
Tnejn min-nies kapaċi jżommu sigriet, minn tlieta 'l hemm kulħadd isir jaf.
Jien bin ommi, ta’ żaqqi f’fommi.
Hemm nies li ma jomogħduhiex, li jħossu jgħidu.
Jekk u kieku xejn ma fihom x’nixtiequ.
B'ħafna paroli fil-vojt u indeċiżjoni ma tasal imkien.
Jekk tgħid tarra u jekk ma tgħidx tiżgarra.
Taqlagħha jekk tgħid, u taqlagħha wkoll jekk ma tgħid xejn.
Jekk tgħid li trid, ikollok tisma’ milli ma tridx.
Jekk bi toqgħodx attent bi kliemek, ikollok tbati r-reazzjoni ta' ħaddieħor.
Jekk ma tikolx it-tewm, ma ġġibx riħet it-tewm.
Jekk toqgħod attent xi tgħid, ma ddejjaq lil ħadd bi kliemek.
It-tiġieġa li tqaqi hi dik li tbid.
L-affarijiet mhux bil-kliem biss, iżda bil-fatti wkoll.
Is-sultan ilsir ta’ kelmtu.
In-nies tal-affari tagħhom jagħtuk kelma u jżommuha.
Isma’ ż-żewġ qniepen qabel taqtagħha.
Isma' x'għandhom xi jgħidu ż-żewġ naħat u wara asal għall-konklużjoni tiegħek.
Isma’ kollox u agħmel li trid.
Isma' x'għandu xi jgħid kulħadd u wara asal għall-konklużjoni tiegħek.
Isma’ kliem in-nies u agħmel rajk.
Isma' x'għandu xi jgħid kulħadd u wara asal għall-konklużjoni tiegħek.
Isma’ ħafna u agħmel l-aħjar.
Isma' x'għandu xi jgħid kulħadd u wara asal għall-aħjar konklużjoni possibbli.
Isma’ bilfors u emmen jekk trid.
Ikollok tisma' bilfors, iżda f'idejk temminx dak li tisma'.
In-nies ilsienhom tal-labar.
Ilsien in-nies iniggeż.
Ilsien herrież isħqu bil-mehrież.
Tweġġa' lil ħadd bi lsienek, u bl-istess mod evita lil min iweġġgħek bi lsienu. Herrież tfisser niggieżi.
Il-patt jegħleb l-att.
Dak li jitniżżel bil-kitba huwa dejjiemi, mhux bħall-kliem.
Kliem ix-xiħ żomm fih.
Agħti widen lill-anzjani, il-pariri tagħhom imsejsa fuq l-esperjenza tal-ħajja.
Il-miktub magħruf.
Il-kitba mhix astratta bħall-kliem, mela oqgħod attent x’tikteb u x’tiffirma f’ismek għax ‘il quddiem jaf jiddispjaċik.
Il-miktub fis-sema ma jħassru ħadd.
Il-kitba mhix astratta bħall-kliem, mela oqgħod attent x’tikteb u x’tiffirma f’ismek għax ‘il quddiem jaf jiddispjaċik.
Il-kliem żejjed qatt ma sewa flus.
Il-paroli fil-vojt ma jiswa xejn u ħsara biss jagħmel.
Il-kliem żejjed ħallih għan-nisa.
Tgħid xejn bla bżonn.
Il-kliem tan-nisa jaħraq bħan-nar.
Ilsien ta' mara jista' jweġġa' ħafna.
Il-kliem qabel tgħidu qisu u iżnu.
Aħsibha sew qabel tgħid xi ħaġa.
Il-kliem minn widna jidħol u mill-oħra joħroġ.
Tista' mhux tgħid, għax min ma jridx jagħti kasek mhux ser jisma' minnek.
Il-kliem la ġġerrih ħalli n-nies ma tgħidx bih.
Tkunx dik il-persuna li taqla' l-qlajjiet fuq in-nies.
Il-kliem jintrebaħ bil-għana ta’ kull min ikun bih, bħad-duħħan jintrebaħ mar-riħ.
Hemm ħafna modi u metodi biex tmur fuq xi ħadd li jkun jogħġbok u tibda konverżazzjoni!
Il-kliem itir u l-kitba tibqa’.
Il-kitba mhix astratta bħall-kliem, mela oqgħod attent x'tikteb u x'tiffirma f'ismek għax 'il quddiem jaf jiddispjaċik.
Il-kliem il-mistur nofsu maħfur.
Meta tgħid jew tagħmel xi ħaġa ħażina, ara li ma terġax biex dak li tkun għamilt jew għedt jintesa bil-mod il-mod.
Il-kliem ikarkar u l-eżempju jkaxkar.
Dak li tagħmel jinfluwenza iżjed lil ħaddieħor mill-kliem.
Il-kliem fieragħ ma jimliex l-imtieraħ.
Dak li tagħmel jgħodd, mhux dak li tgħid. Imtieraħ huwa l-plural ta' mitraħ (= saqqu).
Il-kliem faħxi f’kull widnejn waħxi.
Il-kliem ħażin minnu ikrah, u ma jagħmilx ġieħ lil min jgħidu.
Il-kliem bħaċ-ċirasa, waħda ġġib l-oħra.
Kelma ġġib oħra, u minn ftit kliem tispiċċa tagħmel diskursata sħiħa.
Il-kliem bħaċ-ċirasa, terfa’ waħda, ittella’ qoffa.
Kelma ġġib oħra, u minn ftit kliem tispiċċa tagħmel diskursata sħiħa.
Il-kelma toħroġ mis-sinna u timla dinja.
Il-kliem li tgħid ma tkunx tista' terġa' lura minnu.
Il-kelma t-tajba tmiss il-qalb.
Bil-ġentilezza jirnexxilek tieħu li trid mingħand xi ħadd.
Il-kelma faħxija bħal triq waħxija.
Il-kliem ħażin minnu ikrah, u ma jagħmilx ġieħ lil min jgħidu.
Il-kelma agħlaq f’qalbek u tħallihiex toħroġ.
Kelma li tista' ġġib lilek jew lil ħaddieħor fl-inkwiet, żommha għalik.
Il-kaħli, jekk tisma’ kliemek, ma tmigħekx ma’ xliefek.
Meta ma tgħid xejn jirnexxilek iżjed tasal fejn trid. Il-kaħli tip ta' ħuta li titgerrex ħafna.
Il-hejm u l-ħlewwa jegħlbu d-dnewwa.
Tikkonvinċi lin-nies iżjed malajr bil-ħlewwa milli bl-aggressività. Hejm tfisser persważjoni u dnewwa tfisser vjolenza.
Il-gendus jintrabat minn qrunu u r-raġel minn kelmtu.
Bniedem rispettabbli ma jerġax lura minn kelmtu, għax li jkun qal ikun qalu b'intenzjoni.
Il-fomm jiftar il-qalb.
Minn kliemu l-bniedem tinduna x'hemm f'qalbu. Jiftar hawn tfisser jikxef.
Il-fart jintrabat minn qrunu u r-raġel minn kelmtu.
Bniedem rispettabbli ma jerġax lura minn kelmtu, għax li jkun qal ikun qalu b’intenzjoni.
Il-bniedem tikxfu minn għewiedu.
Bniedem tkun taf x'inhu minn azzjonitu, mhux kliemu. Għewiedu tfisser l-għewied tiegħu - għewied huwa l-plural ta' għada, kelma oħra flok drawwa.
Il-bniedem temminx diskorsu imma għemilu, għax għemilu huwa żgur.
Dak li tagħmel jgħodd, mhux dak li tgħid.
Il-bniedem tagħrfu minn wegħditu.
Bniedem afdah skont kemm iżomm kelmtu.
Il-bniedem jinkixef minn kliemu.
Bil-kliem jinkixfu l-intenzjonijiet ta' dak li jkun.
Il-barri jintrabat minn qrunu u l-bniedem minn kelmtu.
Bniedem rispettabbli ma jerġax lura minn kelmtu, għax li jkun qal ikun qalu b'intenzjoni.
Ħelu tittiekel, morr tinbeżaq.
Mingħand in-nies taqlagħha dejjem fuq rasek, tagħmel x'tagħmel.
Ħelu fil-fomm u qares fis-sorm.
Hemm min għandu ħafna kliem sabiħ, iżda minn ġewwa jkun ikrah ħafna.
Ħaġa li ma tixraqx tagħmilhiex u kelma li tisma’ d-dar la ttennihiex.
Ġib ruħek tajjeb u qis kliemek, tikxifx dak li jingħad id-dar.
Hemm min jitkellem u hemm min iqarar.
Kulħadd għandu karattru differenti.
Għedt kelma u swietli mija, li m’għedt xejn swietli mitejn.
Qis kliemek u tgħidx iżjed minn kemm imissek.
Għedt kelma u swietli mija, li m’għedt xejn aħjar għalija.
Qis kliemek u tgħidx iżjed minn kemm imissek.
Ġie waqt aqwa l-baqgħa mil-laqgħa.
Ftehim bil-fomm (= il-baqgħa) għandu jinżamm daqs ftehim bil-miktub.
Forn li biebu ma jingħalaqx, ħobżu ma jissajjarx.
Min hu ħalqu kbir jaqbad ipatpat mingħajr ma jaħseb fil-konsegwenzi.
F’ħalq magħluq ma jidħolx nemus.
Min ma jgħid xejn jevita l-inkwiet.
Daqqa ta’ frosta tagħmel tbenġila u daqqa ta’ lsien tagħmel tifrika.
Il-kliem kapaċi jweġġa' ħafna iktar mid-daqqiet.
Daqqa b’qasba tagħmel ħoss imma le tweġġa’.
Il-paroli fil-vojt u l-ftaħir m'għandhomx valur.
Dak li jħobb jixrob l-ilma ma jagħletx fil-kelma.
Min joqgħod attent xi jgħid jagħmel sew, bħal meta xi ħadd ma jitkellimx għax ikollu l-ilma f'ħalqu. "Ma jagħletx" tfisser "ma jiżbaljax", minn għelt (żball).
Bil-kliem żejjed tiżbalja tista’.
Aħsibha sew qabel tgħid xi ħaġa.
Bil-kliem biss ma nagħmlu xejn.
Ma jsirx xogħol bil-paroli.
Bil-jekk u bil-jewwilla ma timla ebda bixkilla.
L-affarijiet isiru bil-fatti mhux bil-paroli.
Biex tolqot ħu l-mira tajjeb.
Trid taħsibha sew qabel ma tgħid jew tagħmel xi ħaġa.
Beżqa mibżuqa milgħuqa ma tkun qatt.
Il-kliem li tgħid ma tkunx tista' terġa' lura minnu.
Bejżu bejżu titħan modd, ħarra ħarra ma titħanx kejla.
Aħjar tieħu lil dak li jkun bil-kelma t-tajba.
Bejn il-kliem u l-fatti hemm il-baħar jikkumbatti.
Dak li tagħmel jgħodd, mhux dak li tgħid.
Bejn il-kliem u l-fatti hemm raġel b’xiber mustaċċi.
Dak li tagħmel jgħodd, mhux dak li tgħid.
Aħjar mitt għama minn wieħed zopp.
Aħjar bniedem għami għax ma jistax jara biex jikkummenta.
B’qatra għasel taqbad iżjed dubbien milli b’mitt barmil ħall.
Bil-kelma t-tajba jirnexxilek iżjed tikkonvinċi lil dak li jkun.
B’kelma ġġib il-kliem u tkeċċi s-sliem.
Kelma żejda jaf toħloq il-problemi.
Asaħħ kelmet il-Malti minn ħalfet is-sultan.
Il-Maltin iżommu kelmthom.
Argument bla pedament jaqa’ dikment.
Biex argument irieġi jrid ikun sod.
Aqwa l-baqgħa mil-laqgħa.
Ftehim bil-fomm għandu jinżamm daqs ftehim bil-miktub.
Anqas ma tgħid, aħjar.
Dak li ma tgħidx ma jistax jintuża kontrik.
Aktar ibaqbaq inkella jinżel.
Aktar għandu paroli milli fatti.
Il-mejtin m’għandekx xi tridhom.
Tgħidx affarijiet ħżiena fuq il-mejtin.
Aħjar tiżloq b’riġlejk milli bi lsienek.
Kelma żejda agħar milli tweġġa' fiżikament.
Aħjar l-ewwel tisma’ mbagħad tgħid.
Isma' dak li għandu xi jgħid ħaddieħor qabel tgħid tiegħek.
Aħjar kelma nieqsa minn kelma żejda.
Aħjar tieħu paċenzja u tigdem ilsienek.
Aħjar karba minn kelma.
Aħjar tieħu paċenzja u tigdem ilsienek.
Aħjar id-dliel mill-herra.
Bil-kelma t-tajba tasal iżjed milli bis-suppervja.
Aħjar bid-dliel milli bil-herra.
Bil-kelma t-tajba tasal iżjed milli bis-suppervja.
Aħjar tagħti milli twiegħed.
Dak li tagħmel jgħodd, mhux dak li tgħid.
In-nisa lsienhom għandhom.
In-nisa jgħidu ħafna u ma tistax tafdahom.
In-nisa kollha fisa.
In-nisa jgħidu ħafna u ma tistax tafdahom.
Aħjar imqattgħa u ħorra milli għanja u żorra.
Aħjar mara fqira u qalbha tajba minn mara tal-flus u lsienha ħażin.
L-ilsien ta’ mara jxoqq l-għadam.
In-nisa lsienhom ħażin.
Kliem il-mara isimgħu u agħmel rajk.
Isma’ x’għandha xi tgħid il-mara, imma wara ddeċiedi inti.
Alla fi lsienu u x-xitan f’qalbu.
In-nies wiċċ b’ieħor isemmu lil Alla, imma f’qalbhom ikun hemm il-ħażen.
Alla jħarsek minn min jgħid Armajn.
Alla jħarsek minn min ma jżommx kelmtu miegħek.
Il-qwiel kollha, f’post wieħed.