Meta sewa ltewa.
Miet (= iltewa) fl-aqwa tiegħu jew fl-iżjed mument fejn ta' madwaru kellhom bżonnu.
Meta l-fellus jonqob qabel iż-żmien, ħajtu ma fihiex tmiem.
Meta l-fellus ifaqqas (= jonqob) qabel iż-żmien, ħajtu ma tkunx twila. Qawl li jgħodd ukoll għat-trabi ta' dari.
Meta jmut qassis jiġbed sebgħa.
Superstizzjoni Maltija li jekk imut qassis, imutu sebgħa oħra warajh.
“Merħba, ja mewt,” qal il-ġurdien kif ħass in-nassa tingħalaq fuqu.
Ladarba l-affarijiet jibdew ġejjin ħażin, aċċetta u ssaporti.
Mejjet ma jerfax ieħor.
Min ikun f'sitwazzjoni diffiċli ma jkunx jista' jgħin lil ħaddieħor.
Man-nejbiet lesti l-kfejniet.
Dari kienu jmutu ħafna trabi meta jkunu waslu fl-età li jaqsmu n-nejbiet. Kfejniet tfisser twiebet żgħar tat-trabi.
L-istilla ta’ kittieb tkun imniżżla fil-ktieb.
Il-kittieb jagħmel suċċess skont id-destin tiegħu.
L-imwiet għal kulħadd, għall-foqra u s-sinjuri.
Fqir jew sinjur, xi darba tmut bħal ħaddieħor.
L-imwiet għal kulħadd, għall-foqra u l-imwiel.
Fqir jew sinjur, xi darba tmut bħal ħaddieħor. Imwiel hu l-plural ta' mula, u tfisser rikkezzi.
L-għarusa l-ħaddara u l-mejjet in-newwieħa.
Kull okkażjoni ġġib magħha xi emozzjoni, ta' ferħ jew ta' niket.
L-akbar serjetà waqt il-mewt.
Il-mewt hija l-iżjed ħaġa kbira u serja li tista' tiġrilna.
L-aħjar min imut żgħir għax jistrieħ.
Iktar ma tgħix ħajja twila, iktar tbati.
Kull min ħa l-ħajja għad jieħu l-mewt.
Jekk titwieled, bilfors trid tmut.
Kulħadd xortih fid-dinja.
Hemm min xortih tajba u min xortih ħażina fid-dinja.
Kulħadd jidfen ’l ommu kif jista’.
Kulħadd jagħmel sa fejn jista' f'sitwazzjonijiet diffiċli, anke finanzjarjament.
Kif tidra tgħix u kif tgħix tmut.
Il-mod ta' kif iġġib ruħek f'ħajtek jiddetermina kemm tmut b'rispett u dinjità.
Kif il-ħajja, il-mewt.
Il-mod ta' kif iġġib ruħek f'ħajtek jiddetermina kemm tmut b'rispett u dinjità.
Kien ilbieraħ u kien l-ewliemes, iżda llum hu ġewwa d-dwiemes.
Il-ħajja qasira ħafna għax għexnieha lbieraħ u ta' qabel (= l-ewliemes), illum waslet il-mewt u ninsabu fl-oqbra (= id-dwiemes).
Jekk jispiċċa ż-żejt tintefa l-lampa.
Ħajjitna qisha lampa taż-żejt, meta jispiċċa ż-żejt nintfew u mmutu.
Jekk il-mejjet iqum minn qabru jinsab minn jeħodlu postu.
Fid-dinja kollha mmutu wieħed wara l-ieħor, ħadd ma jeħlisha.
Ix-xiħ imut imqabbad u ż-żagħżugħ imut imqarraq.
Ix-xjuħ jixtiequ ma jmutux u ż-żgħażagħ jaħsbu li l-mewt ma tilħaqhomx.
Il-qattus għandu sebat erwieħ.
Il-qattus jgħix ħajja twila għax kapaċi jaħrab il-periklu.
Il-mistrieħ fil-qabar.
L-inkwiet jieqaf għalkollox meta mmutu.
Illum ħaj u għada mejjet.
Il-mewt tasal ħabta u sabta.
Il-kaġun quddiem u l-mewt wara.
Il-mewt dejjem tasal kaġun ta' xi ħaġa.
Il-ħin jgħaddi u l-mewt toqrob.
Aktar ma jgħaddi ż-żmien, aktar toqrob il-mewt.
Il-ħajja ta’ min jaf jgħixha.
Il-ħajja qiegħda hemm għan-nies li jafu jgawduha.
Il-ħajja qabel il-mewt.
Sakemm inkunu għadna ħajjin, jeħtieġ li qabelxejn naħsbu kif se ngħixu.
Il-ħajja nżul u tlajja’.
Il-ħajja fiha s-sabiħ u l-ikrah tagħha.
Il-ħajja ħolma.
Il-ħajja qasira ħafna u tgħaddi bħal ħolma.
Il-ħaj mal-ħaj jiltaqa’.
Sakemm għadna ħajjin, nistgħu ngawdu lil xulxin.
L-għada li titrabba fiha l-kefen biss ineħħiha.
Id-drawwiet tiegħek - tajbin u ħżiena - sa mewtek tibqa' bihom. Għada tfisser drawwa u l-kefen huwa t-tebut.
Il-far il-mintuf issibu mixgħuf.
Min ikun għadda minn esperjenza ħażina joqgħod iżjed attent li ma jerġax jgħaddi minnha. Mixgħuf tfisser għandu xogħfa.
Il-bniedem twieled għarwien u jindifen liebes jekk ikeffnuh.
Nitwieldu mingħajr ġid materjali u bl-istess mod immutu u ma nieħdu xejn magħna.
Il-bniedem sa ma toħroġ ruħu qalbu ma jaqtagħhiex.
Jeħtieġ li tqawwi qalbek tul il-ħajja kollha.
Il-bniedem ruħ waħda għandu.
Jeħtieġ li l-bniedem jieħu ħsieb ta' ruħu wkoll, m'aħniex għal dejjem.
Jgħix tajjeb min irid imut tajjeb.
Min jgħix ħajja tajba jmut fil-paċi.
Id-dinja turik id-debba u tqabbiżlek il-ħmara.
Fil-ħajja nitqarrqu: inkunu qed nistennew ċerti affarijiet u minflok nieħdu sorpriżi oħra mhux mistennija.
Id-destin ma tixtrihx b’karlin.
Id-destin tiegħek ma taħarbu b'xejn. Karlin huwa munita li kienet tintuża fi żmien l-Ingliżi.
Id-destin jitwieled miegħek.
Id-destin tiegħek ma taħarbu b'xejn.
Ibża’ mill-ħajjin mhux mill-mejtin.
Il-mejtin ma jistgħux jagħmlulek ħsara, imma l-ħajjin iva.
Ħadd wara Ħadd, fl-aħħar tasal ta’ kulħadd.
Il-mewt lil ħadd ma taħfirha, xi darba tasal.
Ħadd mhu għal hawn.
Ħadd ma jgħix għal dejjem.
Ħadd ma miet u ġie.
Ħadd ma miet u reġa' lura.
Ħadd ma mar u ġie.
Ħadd ma miet u reġa' lura.
Għasfur li daħal f’xibka qawwi li joħroġ minnha.
Fejn hemm il-ħajja għad hemm it-tama li l-affarijiet jitranġaw.
Għasfur li daħal fix-xibka għadu qawwi sa ma jibqa’.
Fejn hemm il-ħajja għad hemm it-tama li l-affarijiet jitranġaw.
Għal min għandu jmut bil-forka m’hemmx barrakka għalih.
Id-destin ma tistax taħrab minnu.
Għal min għandu jmut bil-pesta m’hemmx barrakka għalih.
Id-destin ma tistax taħrab minnu.
Għada ħadd ma rah.
Gawdi l-ħajja llum għax fil-futur ma tafx x'hemm jistenniek.
Għabra u riħ li għandek hawn tħallih.
Wara mewtek kollox warajk tħalli, xejn ma tieħu miegħek.
Gawdi għax mid-dinja m’għandna xejn.
Ħu pjaċir bil-ħajja u għix kuntent, għax il-ħajja qasira u magħna m'aħna ser nieħdu xejn.
Ftakar x’kont u x’sejjer tkun u malajr tneħħi l-geddum.
Apprezza l-fatt li għadek ħaj u ħallik milli tagħmel id-dwejjaq.
Fittxu ħuduh ‘il barra ħalli naqsmu dak li ħalla.
Il-werrieta ta' min għandu l-flus, minflok jibkuh, jifirħu għaliex ser jirtuh.
F’mewt ix-xiħ flok biki jkun hemm żfin.
Il-werrieta tax-xiħ, minflok jibkuh, jifirħu għaliex ser jirtuh.
F’mewt ix-xiħ bħal fi dbiħ il-ħanżir; il-werrieta ferħana se jtiru.
Il-werrieta tax-xiħ, minflok jibkuh, jifirħu għaliex ser jirtuh. Dbiħ tfisser qtil.
Dejjem inaża u qatt ma jmut.
Xiħ u marid, safrattant għadu ħaj. Inaża tfisser muġugħ.
Darba mmutu.
Agħmel dak li tista' għax ħajja waħda għandek.
Bena u għalla, mar u ħalla.
Wara l-mewt, ikollok kemm ikollok trid tħallih warajk.
B’għalja ġġedded ħajtek u b’għalja tmut.
Id-dispjaċir jew itawwallek ħajtek jew joqtlok.
Aktar ma nikbru, aktar noqorbu.
Aktar ma jgħaddi ż-żmien, aktar noqorbu lejn il-mewt.
Aħna lkoll għal ġol-ħofra.
Il-mewt ma jaħrabha ħadd.
Tiknisx billejl biex ma teqridx l-ewwieħ it-tajba.
Superstizzjoni ta' dari fejn kienu jemmnu li jekk tiknes billejl iġġib il-mewt fil-familja.
Aħjar is-safar mill-qabar.
Aħjar tkun taf li persuna ma tistax taraha għax siefret milli għax mietet.
Il-mewt mixtieqa taqbeż mit-tieqa.
Aktar kemm tkun tixtieq lil xi ħadd mejjet, aktar idum ma jmut.
Il-mejjet joħroġ u s-sabar jidħol.
Wara mewtek, ħaddieħor jibda jinsiek bil-mod il-mod.
Il-mejjet jitherra u l-ħsara tidderra.
Wara mewtek, ħaddieħor jibda jinsiek bil-mod il-mod.
Il-mewt ma tarax, għalhekk ma tinsatarx.
Kulħadd indaqs f’għajnejn il-mewt.
Il-mewt ma taħfirha lil ħadd.
Il-mewt ma jiskansaha ħadd, u turina li m’aħniex għal dejjem.
Il-mewt ma ġġib rispett lil ħadd.
Il-mewt ma jiskansaha ħadd, u turina li m’aħniex għal dejjem.
Il-mewt lil kulħadd tqiegħdu f’postu.
Il-mewt ma jiskansaha ħadd, u turina li m’aħniex għal dejjem.
Il-mewt ħadd ma jsib tarfha.
Il-mewt ma jiskansaha ħadd, u turina li m’aħniex għal dejjem.
Il-mewt dejjem b’xi għilla.
Il-mewt tiġi wkoll minħabba l-mard. Għilla tfisser marda.
Il-mewt beża’ minnha Alla, aħseb u ara aħna.
Anke Ġesù beża’ mill-mewt.
Il-mejtin m’għandekx xi tridhom.
Tgħidx affarijiet ħżiena fuq il-mejtin.
Il-mewt ma tinxtarax.
Kulħadd irid imut, sinjur u fqir.
Il-mejjet ras ma’ ras u l-ħaj irid l-għarras.
Sakemm għadek ħaj, aħseb fil-ħajja.
Il-mejjet mal-mejjet u l-ħaj mal-ħaj.
Sakemm għadek ħaj, aħseb fil-ħajja.
Il-mejjet mal-mejjet u l-ħaj madwar l-imwejjed.
Sakemm għadek ħaj, aħseb fil-ħajja.
U la l-mewt li sserraħ u la l-qawwa li tferraħ.
Jasal punt fejn il-marid ikun ta’ piż mhux biss fuqu nnifsu, iżda fuq ta’ madwaru wkoll.
Il-mewt isserraħ u l-qawwa tferraħ.
La mmutu neħilsu mit-tbatija, imma sakemm jasal dak il-mument jeħtieġ ingawdu l-ħajja.
B’riħ jew riefnu minn hawn għandna nsiefru.
Xi darba jew oħra rridu mmutu.
B’riħ jew riefnu minn hawn irridu nsiefru.
Xi darba jew oħra rridu mmutu.
Tiġieġa tal-furmarija jekk ma jmisshiex filgħodu, jmissha filgħaxija.
Kulħadd irid imut xi darba jew oħra. Il-furmarija tfisser l-isptar.