Diċembru
Bejn il-Qala u l-Milied erfa’ l-moħriet minn ħalq il-wied.
Bejn il-festa tal-Kunċizzjoni tal-Qala u jum il-Milied, m’għandhiex titħalla għodda fir-raba’.
F’Diċembru fis-sala jidħol membru.
Diċembru l-aħħar membru li jingħaqad mal-membri (ix-xhur) l-oħra biex b’hekk tingħalaq is-sena.
F’Diċembru jkissru u jxellfu qabel iċemplu.
Il-bdiewa jieħdu ħsieb iż-żebbuġ f’Diċembru.
F’San Martin inkissru l-lewż, fil-Milied naqsmuh.
F’San Martin nieklu l-lewż, u fil-Milied naqsmuh mal-oħrajn bi mħabba.
Fil-Milied il-lewż naqsmuh mal-bews.
F’San Martin nieklu l-lewż, u fil-Milied naqsmuh mal-oħrajn bi mħabba.
Fil-Milied nieklu tliet darbiet.
Dari kienu jsumu lejliet il-Milied, u b’hekk l-għada kulħadd kien ipattilu bil-kbir.
Fil-Milied, iż-żiemel ħdejn il-ġamra jsaħħan wirkih.
Dari ż-żwiemel kien ikollhom l-istalla msaħħna. Wirkih tfisser koxxtu.
Il-Milied iġib il-ħelu.
Fil-Milied ikollna diversi tipi ta’ ħelu, bħall-kejk tal-Milied, il-pudina, eċċ.
Il-Milied nofs il-ħobż, l-Għid nofs l-inbid.
Għall-ħabta ta’ Diċembru, xi prodotti tar-raba’ jkunu fl-aqwa tagħhom u għall-ħabta tal-Għid id-dwieli.
Il-qastanija tajba u x-xemx dejjem mgħajba.
F’Diċembru x-xemx titgħatta bis-sħab (= mgħajba) u ma ssaħħanx daqstant.
Konz ta’ Settembru jgħabbi bil-gziez, konz ta’ Diċembru hu wisq bil-qies.
Jinqabdu ħafna iżjed lampuki f’Settembru milli f’Diċembru.
La jasal il-Milied erfa’ xkubbettietek fuq il-farxa tal-bieb.
Il-kaċċa tkun spiċċat sa żmien il-Milied.
La jasal il-Milied erfa’ xkubettietek fuq l-ixkaffa tal-bieb.
Il-kaċċa tkun spiċċat sa żmien il-Milied.
L-aħħar tas-sena lil kulħadd jalla ġid u hena.
Fl-aħħar tas-sena nawguraw lil kulħadd ġid u hena għas-sena li jmiss.
Meta jasal il-Milied l-omm timla l-platt bil-ftiet u l-missier iqabbad iż-żnied.
Dari l-omm kienet tieħu ħsieb issajjar ikla tajba f’jum il-Milied u l-missier kien jieħu pjaċir jirrilassa bil-pipa (= iż-żnied).
Meta l-Milied taħt il-bejt, l-Għid fuq il-bejt.
Meta jagħmel temp ikrah fil-Milied, fl-Għid ipattilu u jagħmel bnazzi.
Mill-Milied ’il fuq, iż-żmien jibda jagħti fil-buq.
Wara l-Milied, dari min ma kellux flus kien ibati ħafna minħabba t-temp xitwi. Buq huwa trumbetta.
Min joħroġ fil-lejl tal-Milied, irid jiekol tliet darbiet.
Meta dari kienu jsumu lejliet il-Milied, kienu jieklu wara l-quddiesa ta’ nofsillejl, f’nofsinhar u filgħaxija f’jum il-Milied.
Qabel il-Milied la bard u lanqas ksieħ.
Il-bard u l-ksieħ jibdew tassew wara li jgħaddi l-Milied.
Xħin jasal il-Milied il-ħeġġa tax-xitwa tkun diġà bdiet.
Fi żmien il-Milied kulħadd ikun ħerqan għat-temp iżjed kiesaħ tax-xitwa.
Il-qwiel kollha, f’post wieħed.