Min jitma f’ħutu la flus fil-kexxun u lanqas f’butu.
Min jafda wisq f'ħutu jispiċċa b'xejn għax kollox jeħdulu.
Min jitlef lil ommu jirbaħ l-għera, min jitlef lil missieru jirbaħ il-ġuħ.
Dari kienu jbatu d-dar u t-tfal meta tmut l-omm, u kienu jbati fil-flus meta jmut il-missier.
Min jiftaħ biebu, jitlef lil uliedu.
Meta wliedek jibdew joħorġu mid-dar titlifhom, għax jibdew jagħmluha ma' kumpanija ħażina.
Min jieħu lil ommna jsir għammna.
Napprezzaw lil dak ir-raġel li jiżżewweġ (= jieħu) lil ommna armla u jsir missierna tar-rispett (= għammna), għax jgħinna fil-flus. Dari n-nisa romol kienu jbatu ħafna meta jormlu.
Min jibża’ mill-kera jmut fl-għera.
Min ma jonfoqx flus fil-kera jew fil-bini ma jkollu mkien sura fejn joqgħod.
Min jagħti ġidu f’ħajtu jaqla’ bil-mazza ta’ Kalabrajtu.
Min f'ħajtu jagħti ġidu kollu lil uliedu għandu jkun lest għal diżappunti kbar, għax uliedu jkunu ħadu li riedu u jinsewh.
Minħabba l-vava tithejjem il-mamma.
Ir-rikonoxximent ta' xi ħaġa ħadu ħaddieħor flok min kien ħaqqu.
Min għandu l-ulied għandu l-hena bil-wied.
Min ikollu t-tfal ikollu ħafna ferħ.
Min għandu l-ulied għandu l-hemm bil-wied.
Min ikollu t-tfal ikollu ħafna inkwiet.
Min għandu lil mart missieru, għandu demla fuq ilsienu.
Meta l-missier jiżżewweġ mara oħra, it-tfal ma jmorrux tajjeb magħha.
Min għandu l-bniet jistħi jkollu l-klieb.
Il-bniet jitilfu rashom wara xi ġuvni u jinsew lil missierhom; wara kollox, il-klieb ikunu iżjed leali lejh minnhom!
Midd friexek u orqom darek, mhux jiġi jżurek minn qatt ma żarek.
Qis li jkollok l-ordni f'darek u żżommha nadifa, biex min jiġi jżurek għal għarrieda ma jitkażax bik.
Mhux fejn kull dwejra ssib siġra tal-ħummejra.
Mhux kull familja għandha l-paċi u l-hena. Ħummejra hija petunja (Petunia axillaris).
Meta t-tarbija tibda tħuf, isserraħ ‘l ommha mill-ġuf.
Meta t-tarbija tibda tiċċaqlaq ħafna, dan ifisser li l-omm ma tkunx 'il bogħod milli tiled.
Meta l-qalziet tal-missier jiġi lill-iben, il-missier jista’ jmur jindifen.
Meta jikbru t-tfal, il-ġenituri ma jibqgħux ikollhom awtorità fuqhom.
Ma’ min qiegħed tgħix, la tgħabbihx.
Tqarraqx b'dawk li tkun tgħix magħhom.
Ma jistrieħx il-bniedem ħlief f’daru.
Kulħadd ifittex il-kumdità ta' daru biex jistrieħ.
M’hemmx għedewwa eqqel minn ta’ ġewwa.
Ikunu n-nies ta' familtek stess li jħassrulek jew jaqtgħulek qalbek milli tilħaq l-għanijiet tiegħek.
Loqma għalenija tiswa mija.
L-għaqda u l-paċi fid-dar huma ta' preġju kbir. Għalenija tfisser flimkien, magħqudin.
Li taqla’ għalik u li tfaddal għat-tfal.
Trid tkun lest biex lil uliedek tagħtihom għajnuna finanzjarja meta jiġu bżonnha. Fuq kollox, huma jirtuk wara mewtek.
Lil uliedek ħobbhom iżda turihomx.
Dari kienu jemmnu li jekk turi lit-tfal li tħobbhom, jagħmlu li jridu bik.
Li l-imdanna tħobb il-kenna, kien l-infern jinbidel f’ġenna.
Il-kunjata (l-imdanna) u l-kenna (mart binha) ma jinħamlux.
L-għedewwa tal-bniedem niesu.
Ikunu n-nies ta' familtek stess li jħassrulek jew jaqtgħulek qalbek milli tilħaq l-għanijiet tiegħek.
La titlef ir-raġel ikollok tbakkar u tagħġen.
In-nisa romol kienu jbati ħafna fl-antik biex irabbu familja.
La mara u lanqas tfal, u la kera u lanqas dar.
Raġel li ma jiżżewwiġx ma jkollux inkwiet.
Kull razza għandha l-paljazza.
Kull familja għandha xi membru li jwaqqgħalha wiċċha l-art.
Kull min itewwem fil-ħelsien idewwem.
Il-ħlas ta' mara li jkollha tewmin idum. Itewwem tfisser ikollu tewmin.
Kull għasfur għandu l-bejta tiegħu.
Kulħadd ifittex lil daru u jaraha sabiħa.
Kull dar fiha l-imrar.
F'kull familja ssib il-problemi.
Kull andar għandu l-karfa tiegħu.
Kull familja għandha xi membru li jwaqqgħalha wiċċha l-art. L-andar huwa l-qiegħa għad-dris u l-karfa tkun bla valur.
Kulħadd daru jfittex.
Il-paċi u l-kumdità ta' darek ma ssibhom imkien ieħor.
Kelli wieħed, kelli tnejn, bla tbatija ma ġibt xejn.
It-trobbija tat-tfal dejjem diffiċli, ikollok kemm ikollok.
Kafè fin-nar wisa’ lill-far.
Dari kienu jemmnu li l-kafè kien iġib il-fell (ir-risq ħażin) fid-dar, bħall-far.
Jien insib it-toqba u int iġġib il-wited.
Fid-dar dejjem għandu jkun hemm post (= it-toqba) fejn terfa' l-ħwejjeġ. Wited tfisser feles.
Jekk l-omm tkun żimlija, il-bint tkun imdorrija.
L-omm tinfluwenza ħafna lil bintha bl-eżempju li tagħti. Żimlija tfisser li tipprostitwixxi ruħha.
Jekk it-tfal tagħtihom il-lala, jitilgħu fuq rasek.
It-tfal jagħmlu li jridu bik jekk ma żżommilhomx ir-riedni.
Jekk il-qamar tħuf, issaħħan il-ġuf.
Dari kienu jemmnu li jekk mara timxi fid-dawl tal-qamar issir iżjed fertili.
Iż-żgħir kulma jagħmel jintgħoġob.
L-iżgħar membru tal-familja dejjem jiggustawh u jfissduh.
Iż-żgħar ħobż u xuwa, il-kbar ħobż u duwa.
Meta jkollok it-tfal, ikollok isseffaq wiċċek mal-problemi tagħhom ħajtek kollha. Xuwa hija xi ħaġa pjaċevoli u duwa hija mediċina.
Iż-żaqq bil-ħobż timtela.
Il-familja titmagħha bil-ħobż u l-ikel tajjeb, għalhekk jeħtieġ li tkun bil-għaqal u ma tberbaqx flusek.
It-twissija tal-omm tibqa’ tinfirex bil-fomm.
Il-pariri tal-ġenituri jibqgħu jgħoddu bejn il-ġenerazzjonijiet, għax ħadd ma jixtiqilna ġid daqshom.
It-tifel jixbah lil missieru.
L-ulied dejjem joħorġu jixbhu lill-ġenituri tagħhom.
Is-slejjef jisiltu s-swejjef.
Fil-familji jaf jinħoloq ġlied kbir. Slejjef huwa l-plural ta' silf, jiġifieri r-raġel t'oħt il-mara. Swejjef huwa l-plural ta' sejf.
Issemmi kemm issemmi dejjem ismek ittenni.
It-tfal tagħtihom ismijiet differenti iżda kollha kunjomok jieħdu.
Is-sawt ħareġ mill-ġenna u min iduqu jithenna.
Dari s-swat kien jitqies metodu ta' dixxiplina li jsaħħaħ il-karattru tat-tfal. Sawt huwa kastig.
Ir-rokon tad-dar ma jagħmlux għar.
Il-mara tad-dar m'għandhiex għalfejn tħossha inqas minn ħaddieħor, għaliex xorta xogħol tagħmel. Għar tfisser diżunur.
In-nemla mara bieżla u n-naħla raġel għaqli.
Jekk il-mara tkun bieżla daqs nemla u r-raġel ikun għaqli daqs naħla, il-familja tkampa sew.
Imsejkna dik it-tajra li tfaqqas f’bejta ħażina.
Min jitwieled f'ambjent familjari ħażin ikollu xortih ħażina.
Il-qroqqa tiġborhom il-flieles.
L-omm responsabbli minn uliedha, bħall-qroqqa li tieħu ħsieb il-flieles.
Il-qurdien fi xfar għajnejn ommu jidher għażżiel.
Il-ġenituri dejjem jaraw lil uliedhom bħala aħjar u isbaħ minn ulied ħaddieħor.
Il-qmis eqreb miċ-ċeppun.
Għandek tgħin lil qrabatek qabel ma tgħin lill-barranin. Ċeppun tip ta' sidrija, li tintlibes fuq il-qmis.
Il-qgħad id-dar ma fihx għar.
Mara tad-dar m'għandhiex għalfejn tistħi għax li tagħmel xorta xogħol. Għar tfisser mistħija jew għajb.
Il-qamar mimli imma le jsellimli.
Meta l-mara ma tarax demm mestruwali, dan huwa sinjal li rnexxielha tinqabad tqila. Il-qamar mimli jirreferi għall-fatt li jkun għadda xahar.
Il-qabla tgħajjat u l-muluda siekta.
Kollox ta' taħt fuq, bħall-omm li qed tiled (= il-muluda) li minflok tgħajjat bl-uġigħ tibqa' siekta u l-qabla (= il-majjistra) li minflok iżżomm il-kalma taqbad tgħajjat.
Il-musrana barranija fiż-żaqq tidħol milwija.
Ta' ġewwa juruk iżjed rispett mill-barranin.
Il-muluda stabret u l-qabla ħterqet.
Kollox ta' taħt fuq, bħall-omm li qed tiled (= il-muluda) li minflok tgħajjat bl-uġigħ tikkalma u l-qabla (= il-majjistra) li minflok iżżomm il-kalma taqbad tistressja (= ħterqet).
Il-logħob tal-idejn u t-teptip tal-għajnejn jinsabu f’ulied il-fsied u l-hejm.
Il-fsied ma jagħmilx ġid għall-iżvilupp tal-karattru tat-tfal.
Il-labra fiha l-ġabra.
Dari min kien jaf iħit kellu xorti, għax kien ilibbes il-familja mingħajr ma jonfoq ħafna flus.
Il-kokka lil uliedha tara l-isbaħ.
Il-ġenituri dejjem jaraw lil uliedhom bħala aħjar u isbaħ minn ulied ħaddieħor.
Il-kbar mit-tfal jitgħallmu.
It-tfal kapaċi jgħallmu lill-kbar ukoll.
Il-karità l-ewwel id-dar.
Għandek l-ewwel turi mħabba u rispett lil tal-familja, qabel turihom lill-barranin.
Il-karba tal-ħlas iġġiblek in-ngħas.
L-uġigħ tal-ħlas tant huwa kbir, li l-karba tal-omm tħossha ġo qalbek.
Il-ħwejjeġ maħmuġin jinħaslu d-dar.
Il-ħażin li jiġri d-dar tmurx tgħidu lil ħaddieħor.
Il-ħela u x-xorb ifaqqru d-dar.
Min jaħli u jonfoq il-flus fix-xorb ikun qiegħed ipoġġi l-familja f'qagħda skomda.
Il-ħajja tal-bnejta bħal mindil fil-bejta.
Dari t-tfajliet kienu ddestinati li jbatu bix-xogħol tad-dar. Bnejta tfisser tfajla u mindil tfisser sarvetta.
Il-ġewwieni jaħlik u l-barrani jisbik.
Il-barranin jeħdulek saħħtek imma tal-familja jeħduhielek ħafna iżjed għax tħossok obbligat. Jisbik tfisser iġibek skjav.
Il-fula bint il-miżwed u r-razza tiġbed.
L-ulied dejjem joħorġu jixbhu lill-ġenituri tagħhom, kemm mid-dehra kif ukoll mill-karattru.
Il-fsied iħassar l-ulied.
Il-fsied ma jagħmilx ġid għall-iżvilupp tal-karattru tat-tfal.
Il-familja dejjem trid.
Biex trabbi familja spejjeż kbar.
Il-bosk ħatbu jaħarqu.
Dawk l-aktar qrib tiegħek (qraba u ħbieb) jistgħu jagħmlulek l-iżjed ħsara.
Il-borma taqlibha għal fommha, il-bint tixbah lil ommha.
L-omm għandha influwenza kbira fuq il-iżvilupp tal-karattru ta' bintha.
Il-beċċun qatt ma żaqq lil ommu.
Ir-rwol tal-ġenituri huwa li jieħdu ħsieb it-tfal.
Il-barrani jixwik u jieklok, ta’ ġewwa jixwik u ma jiklokx.
Tal-familja ma jaslux jagħmlulek il-ħsara li jaslu jagħmlulek il-barranin.
Il-barrani jaħlik imma l-ġewwieni jisbik.
Il-barranin jeħdulek saħħtek imma tal-familja jeħduhielek ħafna iżjed għax tħossok obbligat. Jisbik tfisser iġibek skjav.
Ifrex soddtok u orqom darek, għax jiġi jżurek min qatt ma żarek.
Tajjeb li dejjem ikollok l-indafa fid-dar, forsi jiġi xi ħadd mhux mistenni li jkollok tilqgħu.
Id-dar żgħira u l-qalb kbira.
Min m'għandux ħafna flus ikun umli u jkollu qalbu tajba.
Id-dar taħbi l-għawar.
Il-ħażin li jiġri d-dar tmurx tgħidu lil ħaddieħor. Għawar tfisser difetti.
Id-dar il-kbira aħjar mill-għalqa kbira.
Il-valur ta' dar ogħla mill-valur ta' għalqa.
Ibża’ min-naħal u mit-tfal tar-raħal.
It-tfal ma jafux x'inhu periklu u malajr jinkwetawk għax iweġġgħu.
Id-demm qatt ma jsir semm.
Minkejja li ma' tal-familja mhux dejjem immorru tajjeb, xorta naqbżu għalihom ma' ħaddieħor. Semm huwa velenu.
Ħwejjeġ maħmuġin taħsilhomx barra.
Il-ħażin li jiġri d-dar tmurx tgħidu lil ħaddieħor.
Ħu xi ħaġa fl-ewwel żjara li ġejt, biex ma jidħollix il-far.
Superstizzjoni: dari kienu jemmnu li meta tistieden lil xi ħadd għall-ewwel darba f'darek, jeħtieġ toffrilu l-ikel u dan għandu jaċċettah għax jekk le, jidħol spirtu ħażin f'għamla ta' far fid-dar u jġib il-fell (risq ħażin).
Ħadd ma joqgħod ma’ ħadd.
Kulħadd daru jfittex.
Ħadd ma jara isbaħ minn uliedu.
Il-ġenituri dejjem jaħsbu li wliedhom huma aħjar minn ta' ħaddieħor.
Ġaħan beda minn qrabatu.
L-ewwel tagħlim dwar x'inhu tajjeb u ħażin mid-dar tieħdu.
Fuq il-binnija tidden is-sriedeq; kull ma tagħmel turix lil uliedek.
L-affarijiet u l-kwistjonijiet ta' bejn il-ġenituri m'għandhomx isiru jafu bihom it-tfal. Il-binnija hija bejta tat-tiġieġa.
Fuq il-binnija jidden is-serduq.
Il-kumdità u s-serħan ta' darek ma ssibhom imkien iżjed. Il-binnija hija bejta tat-tiġieġa.
Fost l-aħwa min bil-palju u min ikarkar ix-xatba.
L-aħwa kollha għandhom karattru differenti u kollha jsibu triq differenti.
Fortuna fit-treġija tad-dar, l-aħjar fortuna.
Min isib lil xi ħadd li kapaċi jmexxi d-dar, ikun xortih tajba ħafna.
Fil-ħarifa l-mara timla l-qaleb bil-ġbejna u tħawwad il-brejma bin-nejna.
Il-mara tad-dar għandha ħafna xogħol kemm fid-dar kif ukoll fit-trobbija tat-tfal. Il-brejma tirreferi għal skutella u n-nejna hija kelma tat-tfal għal ikel.
Id-dar kollox jixtamba, sal-irmied tal-kenur.
M'għandekx tarmi bl-addoċċ għax forsi tiġi bżonnu fil-futur. Jixtamba tfisser li huwa bżonjuż.
Fiċ-ċokon ajma rasi u fil-kobor ajma qalbi.
It-tfal iweġġgħulek rasek meta jkunu żgħar u jweġġgħulek qalbek meta jkunu kbar.
Ferħan jew għajjien, tmur id-dar biex tħossok hieni.
L-ebda post mhu sabiħ daqs il-ġabra ta' darek.
Fejn jieklu erbgħa jieklu ħamsa.
Meta tkun familja kbira, l-ikel ikun ħafna u jista' jiekol anke wieħed ieħor.
F’daru kulħadd sultan.
F'darek għandek id-dritt tkun komdu bla ndħil.
F’daru kulħadd jagħmel li jrid.
F'darek għandek id-dritt tkun komdu bla ndħil.
F’dar in-nies la tiftaħ bieb u la taqra ktieb.
F'dar ħaddieħor ma tistax taqbad u tagħmel li trid.
F’dar il-għażżien kollox jibki.
Min hu għażżien ikollu l-ħmieġ u d-diżorganizzazzjoni f'daru.
Dari dari u darek darek; mieli mieli u mielek mielek.
Kulħadd jieħu ħsieb dak li hu tiegħu u għandu jagħmel l-istess b'ta' ħaddieħor.
Dar żgħira, qalb kbira.
Kemm hi kbira qalbek iżjed importanti minn hi kbira darek.
Dar il-għażżien tistgħalla l-brimba.
Min hu għażżien u ma jnaddafx ikollu l-ħmieġ fid-dar. Tistgħalla jiġifieri tgawdi.
Dar ħdejn il-baħar trid għaxra r-raħal.
Dar ħdejn il-baħar fiha iżda preġju minn dar li ma tkunx.
Dar ġdida ikriha lill-għadu tiegħek.
Trid ħafna flus biex timla dar ġdida.
Dar b’żewġ nisa maħmuġa.
Id-dar titmexxa minn mara waħda.
Borom żgħar għandhom widnejn kbar.
Dak kollu li t-tfal jisimgħu jmorru jgħiduh.
Bl-ulied kollha jaqilgħu xi sold, il-missier jista’ jibni fil-fond.
Il-paga tal-ulied isservi wkoll għall-familji li jbatu finanzjarjament.
Bin it-tifla tilqgħu f’ħiġrek u bin it-tifel tagħtih b’riġlek.
Xi nanniet juru preferenzi bejn in-neputijiet.
Biex trabbi tajjeb ibża’ dejjem.
Fit-trobbija tat-tfal trid tkun moħħok hemm sabiex jitilgħu sew.
Biex l-imdanna toqgħod mal-kenna d-dar trid tkun ġenna.
Il-kunjata (l-imdanna) u l-kenna (mart binha) ma jinħamlux.
Bħal min tisilfu, min iżżiegħel bih titilfu.
Meta żżiegħel wisq bit-tfal titlifhom, bħal meta tislef oġġett.
Bewsa tan-nanna ħelwa manna, bewsa ta’ missier iżżommok ilsir.
Il-missier dejjem iġib sudizzjoni mill-membri l-oħrajn tal-familja.
Bejta li tgħajjex fiha dellilha u sewwiha.
Dejjem għandek tieħu ħsieb darek.
Barrani jgħallik, ġewwieni jixwik.
Aktar faċli taħfer lil xi ħadd tal-familja minn xi ħadd barrani.
Li kont ħabbejtni, kieku mill-bajda raddajtni.
Jeħtieġ li t-tfal tikkoreġihom minn ċkunithom. F’dan il-qawl, il-ħalliel adult qed iċanfar lil wieħed mill-ġenituri tiegħu talli m’għamilx dan. Raddajtni tfisser begħidtni.
Ara bint min hi u ngħidlek min hi.
It-tfal jitilgħu skont it-trobbija tagħhom.
Aħjar imreddgħa Qormija minn waħda Żebbuġija.
Storikament il-kolera kienet laqtet lil Ħaż-Żebbuġ agħar minn Ħal Qormi, u allura l-imreddgħa (mara li kienet tredda' lit-tarbija minflok l-omm) minn Ħal Qormi kienu iżjed mixtieqa.
Tifel li jħobb jittarraf stennieh jiġġarraf.
It-tfal li ma jibżgħux mill-periklu xi darba jweġġgħu.
Tifel imhejjem ftit tieħu minnu.
It-tfal imfissdin jaħsbu fihom infushom biss.
Il-fsied iħassar l-ulied.
It-tfal imfissdin jaħsbu fihom infushom biss.
In-nuqqasijiet tal-missier jibqa’ jxandarhom it-trumbettier.
L-omm mhix kapaċi taħfer in-nuqqasijiet tal-missier, tibqa' ssemmihomlu.
It-tfal xogħol tal-ħmar.
Kulħadd jaf jagħmel it-tfal, iżda mhux kulħadd jaf irabbihom sew.
It-tfal tħalltek ma’ min ma tixtieqx.
M'għandekx kontroll fuq min jiżżewġu wliedek - jaf ikollok titħallat ma' familja li ma ddoqqlokx.
It-tfal, tfal ifittxu.
It-tfal ma' tfal oħra jridu jilagħbu, ma jimpurtahomx mill-ħajja tal-adulti.
It-tfal tfal.
M'għandekx tistenna żżejjed mit-tfal.
It-tfal jikxfu l-għawar.
It-tfal wisq innoċenti u jikxfu ħafna sigrieti.
It-tfal iż-żgħar uġigħ ta’ ras; it-tfal il-kbar uġigħ il-qalb.
Meta t-tfal ikunu żgħar iweġġgħulek rasek bl-għajat, iżda meta jikbru jweġġgħulek qalbek b'azzjonithom.
It-tfal iqegħduk wiċċek ‘l isfel.
It-trobbija tat-tfal tbatija.
It-tfal ikilhom ġbara u lbieshom ħsara.
Biex titma' u tlibbes lit-tfal trid ħafna flus.
It-tfal ħobbhom u turihomx.
Id-dixxiplina turi mħabba għat-tfal.
It-tfal bħall-ħabaq, jimirdu u jfiqu malajr.
It-tfal jimirdu spiss imma malajr jgħaddilhom.
It-tfal bħall-flieles, inaqqru dejjem.
Tfal f'saħħithom jiftħu l-aptit u jieklu l-ħin kollu.
L-ulied jekk ma jinħabbux ma jitrabbux.
L-imħabba fit-trobbija hija essenzjali għat-tfal.
L-ulied huma biċċa mill-qalb.
L-ulied dejjem jibqgħu f'qalb il-ġenituri tagħhom, anke meta joħorġu mid-dar.
L-omm mhux talli twieled imma għal kull ħolqien tiġġieled.
L-omm tbati mhux biss biex iġġib it-tfal fid-dinja, iżda wkoll biex trabbihom u saħansitra meta jsiru adulti.
L-omm il-madmad tal-ulied.
Hija l-omm li tidderieġi lil uliedha.
L-omm basla, il-missier tewma, it-tifla kif tkun tfuħ?
L-ulied jitilgħu skont kif irabbuhom il-ġenituri.
Aħjar tiġġieled m’ommok milli mal-ġar.
Ma' tal-familja l-affarijiet jitranġaw malajr, mal-ġirien mhux daqshekk, anzi jkollok tibqa' sseffaq wiċċek magħhom.
Aħjar tifel il-ħabs minn tifla soru.
Dari ma kinux jistgħu joħorġu minn soru. Tifel li jmur il-ħabs xi darba joħroġ, iżda tifla qatt ma terġa' lura.
It-tfal jiġbru d-dar.
It-tfal jimlew id-dar.
Aħjar ġara fil-qrib minn ommok bgħid.
Meta tiġi bżonn, il-ġirien ġieli ssibhom iżjed minn ommok.
Aħjar fwiedi minn uliedi.
Bniedem li jaħseb fih innifsu biss, anke lil uliedu jinsa.
Tfal u bhejjem għali dejjem.
Dari l-familji kienu jbatu mhux biss biex irabbu l-bhejjem, iżda wkoll it-tfal.
L-omm għal uliedha giddieba u ħalliela.
L-omm minn kollox lesta tagħmel għal uliedha.
Tiġieġa miblula mhix tajba għal qroqqa.
Min hu għażżien aħjar ma jiżżewweġ xejn, għax tbati l-familja kollha.