Bniedem ħażin jipprova jagħtik x’tifhem li nbidel, iżda fil-fond ta’ qalbu ħażin jibqa’.
Kategorija: l-ipokrezija
Il-kuruna fl-idejn tgħodd u mhux fil-but.
In-nies wiċċ b’ieħor li jilagħbuha tal-qaddisin warrbilhom. Kuruna tfisser kuruna tar-rużarju.
Il-kelb il-mutu ibża’ minnu.
Oqgħod attent minn min jidher kwiet, iżda jkollu intenzjonijiet ħżiena.
L-għadu biex fietek biesek, u int biex tfutu aqleb fuqu.
Min taf li jurik wiċċ b’ieħor, ilgħab il-logħba tiegħu u kompli miegħu. Il-verb fiet ifisser li tqarraq b’xi ħadd.
L-għadma tiddendel għall-għajn.
Hemm min jikkumplimentak f’wiċċek imbagħad imur jgħid kontrik ma’ ħaddieħor. L-għajn tirreferi għall-għajn ħażina.
Daqqa fuq għonq b’żewġt uċuħ tarmi żewġt irjus.
Min hu wiċċ b’ieħor xi darba jew oħra tasal tiegħu wkoll.
Aħjar ikollok mitt għadu li taf bih minn ħabib falz.
Mal-għadu tiegħek taf fejn inti imma mal-ħbieb ipokriti le.
Aħjar taf b’mitt għadu minn b’ħabib qarrieq.
L-għedewwa tiegħek taf min huma, iżda qatt ma tista’ tkun taf meta l-ħbieb għad jittraduk.
Ibża’ minn min iżomm il-kuruna twila.
In-nies ipokriti warrbilhom. Kuruna tfisser kuruna tar-rużarju, li żżommha twila biex kulħadd jaraha.
Iddoqq lill-għarusa biex tiżfen il-qattusa.
In-nies jippruvaw iġegħluk temmen li qed jagħmlu xi ħaġa għal skop, mentri fil-verità jkollhom skop ieħor f’moħħhom.
Doqq lill-qattusa biex tiżfen l-għarusa.
Għamel xi ħaġa biex tidher mod, meta l-intenzjonijiet tiegħu kienu mod ieħor.
Il-mara meta tidħaq trid tqarraq bik, u meta tibki tkun qarrqet bik.
Il-mara tkun lesta tqarraq bir-raġel f’kull ħin.
Id-dmugħ tal-mara bħall-bnazzi fix-xitwa.
Id-dmugħ tal-mara, dmugħ tal-kukkudrilli.
Ix-xitan l-ewwel jagħmillek maskra, imbagħad ineħħihielek.
Wara li jkun waqqgħek fit-tentazzjoni, ix-xitan iħallek tbati l-konsegwenzi ta’ għemilek waħdek.
Alla biss jaf x’għandna ġewwa qalbna.
Il-bnedmin jistgħu jaħbu minn xulxin, iżda mhux minn Alla.
Alla biss jaf il-bniedem xi jkollu f’qalbu.
Il-bnedmin jistgħu jaħbu minn xulxin, iżda mhux minn Alla.