Kun fejn għandek tkun, ħu ħsieb darek, ħu ħsieb saħħtek u agħmel xogħlok (fagħlek).
kategorija
il-prudenza
Oqgħod attent li ma jkollokx tilgħaq dak li tobżoq.
Kulħadd huwa responsabbli ta' dak li jgħid, veru jew mhux.
Nofs għomrok ikun għadda meta tagħraf id-dinja xi ssarraf.
F'nofs ħajjitna nkunu tgħallimna mhux ħażin dwar il-ħajja, bis-saħħa tal-esperjenzi li nkunu għaddejna minnhom.
Min twiegħdu tagħmlu jsilek.
Oqgħod attent għax dak li twiegħed jorbtok. Isilek tfisser ikun il-kreditur tiegħek.
Min ma jkellmekx tkellmux.
Min iħallik xi kwietek, ħallih bi kwietu.
Min ma jaħsibx x’jiġi wara, la hu raġel u lanqas mara.
Min jagħmel xi ħaġa mingħajr ma jqis il-konsegwenzi tagħha juri li mhux responsabbli.
Min ma jagħtikx fastidju la tagħtihx.
Min iħallik xi kwietek, ħallih bi kwietu.
Min joqgħod pass lura qatt ma jagħli.
Min iqis l-affarijiet qabel ma jgħid jew jagħmel xi ħaġa, jew sempliċement iżomm is-skiet, qatt ma jiddispjaċih.
Min jobżoqha jkollu jilgħaqha.
Kulħadd huwa responsabbli ta' dak li jgħid, veru jew mhux.
Min jobżoq għas-sema jiġi f’wiċċu.
Min jipprova jagħmel xi vendikazzjoni jew ipattiha lil xi ħadd, jispiċċa jbati hu stess.
Min jiżloq fin-niexef jikxef għawaru.
Min jieħu żball meta ma jkollux għalfejn, jaqa' għaċ-ċajt. Għawaru tfisser is-sigrieti tiegħu.
Min jixrob l-ilma ma jilgħabx.
Min jevita x-xorb alkoħoliku, wara ma jiddispjaċihx ta' xi azzjoni li jkun għamel jew kelma li jkun qal meta kien fis-sakra.
Min jixrob l-ilma ma jagħlix.
Min jevita x-xorb alkoħoliku, wara ma jiddispjaċihx ta' xi azzjoni li jkun għamel jew kelma li jkun qal meta kien fis-sakra.
Min jittiekel għal ħwejjeġ niesu, b’rasu jdur.
Min jittama f'ħaddieħor u jserraħ fuqu jiżbalja; tiddependi fuq ħadd.
Min jittiekel għal ħwejjeġ il-ħaj, il-ħela għalih ġej.
Min jittama f'ħaddieħor u jserraħ fuqu jiżbalja; tiddependi fuq ħadd.
Min jittama għal ħwejjeġ il-ħaj, il-ħela għalih ikun ġej.
Min jittama f'ħaddieħor u jserraħ fuqu jiżbalja; tiddependi fuq ħadd.
Min jittama fil-ħaj, la jkollu serva u lanqas raj.
Min jittama f'ħaddieħor u jserraħ fuqu jiżbalja; tiddependi fuq ħadd. Serva tfisser sens komun u raj tfisser volontà.
Min jittama fil-ħaj, jew bla sens jew bla raj.
Min jittama f'ħaddieħor u jserraħ fuqu jiżbalja; tiddependi fuq ħadd. Bla raj tfisser bla volontà.
Min jitma fit-tama, it-tama tqarraq bih; jagħmel ir-riħ fil-bomblu u jaħseb li se jsiefer bih.
Min jittama u jgħix fil-fantażija bla ma jieħu azzjoni għad jiddispjaċih maż-żmien.
Min jittarraf jiġġarraf.
Min imur ifittex il-periklu jew l-inkwiet malajr isibu.
Min jislef jitlef.
Meta tislef oġġett jew il-flus lil xi ħadd, tistenniex li se jroddhomlok lura malajr jew fl-istess stat tajjeb li tkun slifthulhom int.
Min jidħol bejn il-basla u qoxritha jibqa’ b’riħitha.
Tindaħalx fejn ma jesgħekx għax inti tmur minn taħt.
Min jerfa’ jsib.
Faddal il-flus u tarmix bl-addoċċ għax ma tafx x'għad tiġi bżonn.
Min jaqta’ qalbu jmut.
Dejjem għandek tippersevera u tagħmel kuraġġ, għax inkella tispiċċa ħażin.
Min jaħseb ħażin fi ħwejġu mhux dnub.
Min jieħu ħsieb l-affarijiet tiegħu ma jkunx qed jagħmel ħażin.
Min jagħmel għal żaqqu jbigħ xaqqu.
Min jipprostitwixxi ruħu jitlef ġieħu (= xaqqu) kollu.
Min iwiegħed fid-dejn jitqiegħed.
Meta twiegħed xi ħaġa lil xi ħadd, ikollok iżżomm dik il-wegħda u tintrabat biha (= tkun fid-dejn).
Mietet b’uliedha u lanqas ma ħalliet ġliedha.
Meta tislef oġġett jew il-flus lil xi ħadd, tistenniex li se jroddhomlok lura malajr jew fl-istess stat tajjeb li tkun slifthulhom int. Ġliedha tfisser il-ġilda tagħha.
Midd riġlejk skont friexek.
Qis li tkun tiflaħ tħallas għal xi ħaġa qabel ma tintriga biha.
Mhux il-libsa li tagħmel ir-raħeb.
L-apparenza tqarraq bik. Raħeb tfisser patri jew eremita.
Meta r-ras iż-żgħira tkun fil-glorja, ir-ras il-kbira titlef il-memorja.
Il-ġibda sesswali fil-bniedem tant hi qawwija li ma jibqax jirraġuna meta tiġi l-okkażjoni li jkollu x'jaqsam. Ir-ras iż-żgħira tirreferi għall-parti sesswali tar-raġel.
Lil min tisilfu titilfu, lil min tagħtih iddarrih.
Meta tislef jew tagħti xi ħaġa lil xi ħadd, tistenniex li se jroddhielek lura.
Lil min iddarrih irabbi l-ġust.
Jekk xi ħadd jidra jagħmel jew jirċievi xi ħaġa, jibda jaħseb li għandu dritt għaliha.
La tixtrix ħut fil-baħar.
Tħallasx flus qabel ma tara l-oġġett f'idejk.
La tħallix il-qattus għassa mal-ħut.
Tafdax lil min taf li ma tistax toqgħod fuqu.
La tidħolx bejn il-basla u qoxritha għax tibqa’ b’riħitha.
Tindaħalx fejn ma jesgħekx għax inti tmur minn taħt.
L-ajru għandu għajnu u l-ħajt għandu widintu u li jisma’ jgħidu ‘l ibnu.
Trid toqgħod attent ħafna minn dak kollu li tgħid u tagħmel, għax malajr jgħidu bik u l-kelma tiġri.
L-aħjar triq tan-nofs.
M'hemmx isbaħ mill-moderazzjoni.
La ħablet jeħtiġilha tiled.
Kulma tagħmel għandu l-konsegwenzi tiegħu.
Kull barrani jibża’ minn ta’ qattagħni.
Meta ma nkunux f'post jew sitwazzjoni li mdorrijin fiha, nibżgħu u noqogħdu iżjed attenti.
Kelb rieqed la tqajmux.
Tagħmilx dak li taf li ser joħloq ħafna problemi.
Jekk tiġbed wisq tinqata’ l-ħajta.
Tesaġerax u tabbużax għax ikollok tbati l-konsegwenzi.
Iżra’ tajjeb u fil-waqt biex ma jibdielek qatt.
Agħmel kollox fil-ħin jew fiż-żmien opportun biex qatt ma jiddispjaċik, bħalma tiżra' skont l-istaġuni.
Iz-zalza ogħla mill-ħut.
Dak li qed tipprova tagħmel fih wisq spejjeż u ma jaqbillekx tagħmlu.
Ixxammarx kmiemek qabel ma jasal żmienek.
Tiftaħarx qabel ma jkollok tassew biex.
It-tiġrija sal-barkun biex tintrebaħ.
M'għandek qatt tagħmilha fatta li rbaħt jew li xi ħaġa saret tiegħek, stenna sal-aħħar biex tevita d-diżappunt.
Is-self wisq drabi jinbidel f’telf.
Meta tislef oġġett jew il-flus lil xi ħadd, tistenniex li se jroddhomlok lura malajr jew fl-istess stat tajjeb li tkun slifthulhom int.
Is-self ħu t-telf.
Meta tislef oġġett jew il-flus lil xi ħadd, tistenniex li se jroddhomlok lura malajr jew fl-istess stat tajjeb li tkun slifthulhom int.
Is-self joħroġ jidħaq u jidħol jibki.
L-affarijiet tiegħek tieħu ħsiebhom, iżda meta tislifhom lil ħaddieħor kun af li mhux ser jieħu ħsiebhom bl-istess mod.
Il-lest lest.
Li tkun lestejt m'għandekx iżjed ħsiebu.
Il-lejl għandu wliedu suwed.
Isiru ħafna affarijiet ħżiena billejl, mela oqgħod attent(a).
Il-lejl għal-lpup.
Toħroġx tiġri barra billejl, evita l-periklu. Lpup huwa l-plural ta' lupu.
Ħażin jagħmel min jimxi ħafi billejl.
Dejjem ħu l-prekawzjonijiet kollha, bl-istess mod li ma timxix ħafi fid-dlam.
Ħajt imżaqqaq għaddi bgħid minnu.
In-nies ta' reputazzjoni ħażina m'għandekx xi tridhom, għax huma perikolużi daqs ħajt li ser jaqa'.
Għajnejk u widnejk misshom b’minkbejk.
Toqgħodx tmiss għajnejk u widnejk għax tlaqqat infezzjoni.
Għasfur f’idejk aħjar minn mija fl-ajru.
Aħjar ikollok xi ħaġa fiċ-ċert minn ħafna affarijiet bla garanzija li xi darba se jkunu tiegħek.
Għal musmar titlef in-nagħla.
Għal ħaġa mhi xejn tispiċċa titlef kollox.
Għal min mhux mistieden m’hemmx siġġu għalih.
Min ma jridekx mhux se jilqgħek.
Għajnejn morda ma jridux dawl.
Xi ħadd konxju mid-difetti tiegħu toqgħodx issemmihomlu.
Ftakar fl-imgħoddi u aħseb f’li ġej.
Tgħallem mill-iżbalji li għamilt fil-passat biex ma terġax tagħmilhom fil-futur.
Friex, żibel u ġieħ fittex wittih.
Tħallix lil min jipprova jħammiġlek ismek.
Fittex li tboss mingħajr ma tagħmel ħoss.
Dak li għandek tagħmel agħmlu b'mod diskret.
Fid-dinja ma trid taħlef għal ħadd.
M'għandekx tafda għax kulħadd kapaċi jiżbalja.
Fejn ma tafx tindaħalx.
Jekk ma tafx biżżejjed dwar is-suġġett jew is-sitwazzjoni mela tgħid xejn u tagħmel xejn.
F’kull għemilek aħseb dejjem x’jiġri wara.
Żomm f’moħħok il-konsegwenzi ta’ azzjonitek qabel tagħmel xi ħaġa.
Darba jingidem il-bniedem.
Tħalli lil ħadd iqarraq bik aktar minn darba. Tafdax.
Dak li jagħmilhielek darba jagħmilhielek mitt darba.
Min diġà tak prova li ma tistax tafdah tkunx iblah u terġa' tafdah.
Bniedem mhux mistieden m’hemmx siġġu għalih.
Min ma jridekx mhux se jilqgħek.
Bniedem imġarrab jibża’ minn dellu.
Bniedem li jkun għadda minn esperjenza kerha joqgħod iżjed attent fil-futur.
Bniedem avżat nofsu armat.
La tkun taf b'xi ħaġa minn qabel, għandek kull opportunità biex tlesti ruħek.
Bnazzi fix-xitwa, trott ta’ bagħla u kappell ta’ miġnun, qatt iżżomm magħhom.
Il-bnazzi fix-xitwa, it-trott ta' bagħla u n-nies imġienen qatt m'għandek tafdahom.
Bin-nies ma tistax tboss.
Ma tistax tagħmel li trid għax in-nies jgħidu bik.
Bin in-nies trabbihx, xbinek bi żbirr teħdux u l-mara turihiex kollox.
Trabbix tfal ta' nies oħra, tiżżewwiġx pulizija u lill-mara tgħidilhiex kollox għax tużah kontrik.
Bejlek għajnek għax b’rasek idur.
Trid toqgħod attent biex ħadd ma jgħaddi ż-żmien bik.
Ara u erġa’ ara qabel ma taqbeż.
Aħsibha sew qabel tieħu deċiżjoni.
Aktar ma tqalleb, aktar titqalleb.
Aktar ma tbiddel, aktar toħloq konfużjoni.
Aktar hu ħafif biex taqa’ milli biex tqum.
Faċli iżjed tiżbalja milli ġġibha tajba.
Aħxen il-komma mid-driegħ, jekklile huwa u dieħel jaqsamha.
Jekk il-komma tkun iżgħar mid-driegħ, id-driegħ ma jidħolx. Bl-istess mod, għandek tadatta skont is-sitwazzjoni.
Aħsibha qabel ma tagħmilha.
Żomm f'moħħok il-konsegwenzi ta' azzjonitek qabel tagħmel xi ħaġa.
Aħseb ħafna, tkellem ftit, ikteb inqas.
Inqas ma taħseb, titkellem u tikteb, inqas hemm ċans li tagħmel żball.
Aħseb dejjem x’jiġri wara għax ta’ wara ma ġġibux ‘il quddiem.
Żomm f'moħħok il-konsegwenzi ta' azzjonitek qabel tagħmel xi ħaġa.
Aħseb dejjem x’jiġi wara.
Żomm f'moħħok il-konsegwenzi ta' azzjonitek qabel tagħmel xi ħaġa.
Il-qwiel kollha, f’post wieħed.