L-ulied jirtu ħafna aspetti tal-karattru mill-ġenituri tagħhom.
kategorija
ix-xogħol
Dak li ma qattax bi snienu qattgħu bi lsienu.
Minflok ħadem, qagħad jgħid fuq in-nies minn wara daharhom.
Dak li għandek tagħmel aħseb għalih kmieni.
Jekk għandek xi ħaġa x’tagħmel agħmilha minnufih.
Dak li għandek tirhan bigħu.
Jekk għandek xi ħaġa x’tagħmel agħmilha minnufih.
Aħjar tirfes l-irfis ta’ newlek milli għadbiet il-muliel.
Dejjem aħjar taħdem għal rasek milli jkollok taħdem għan-nies.
Aħjar tishar milli tbakkar.
Dak li għandek tagħmel agħmlu llum, mhux għada.
Aħjar waħda maħruqa minn tnejn nejja.
Aħjar tagħmel biċċa xogħol mhux perfetta milli ma tagħmel xejn.
Il-qtates għomja u l-ġrieden imeximxu.
Hemm min japprofitta ruħu mis-sitwazzjoni meta tiġih l-okkażjoni, bħall-ħaddiema li jillaxkaw malli jwarrab ta’ fuqhom.
Aktar ma ndumu nakkordaw milli ndoqqu.
Qed naħlu iżjed ħin nippreparaw milli naħdmu.
Baħri u burdnar qatt ma ssibu kuntent.
Il-baħrin u l-burdnara kellhom xogħol diffiċli ħafna.
Bastiment b’bosta kaptani jmur travers.
Meta jkun hemm ħafna nies involuti f’biċċa xogħol l-affarijiet ma jimxux sew.
Bewla bla bassa, kastell bla għassa.
Kull aspett minn biċċa xogħol għandu jsir tajjeb.
Bewla bla bassa, torri bla għassa.
Kull aspett minn biċċa xogħol għandu jsir tajjeb.
B’idek il-waħda agħġen u bl-oħra keċċi l-qattusa.
Meta tkun għaddej b’biċċa xogħol, ara li ma jkunx hemm min iħarbatlek kollox.
Bidu bil-għawġ tmiem ħażin.
Meta biċċa xogħol tibda ħażin kollox jibqa’ sejjer ħażin.
Bidu tajjeb nofs ix-xogħol.
Meta x-xogħol jibda bit-tajjeb l-affarijiet imorru sew u tgħaġġel iżjed.
Biex tgawdi jeħtieġ tbati.
Xejn ma tagħmel mingħajr tbatija.
Bil-ftit tal-għira kollox jieħu x-xejra.
Biex tagħmel biċċa xogħol tajba trid tagħmel moħħok hemm.
Bil-prattika biss li wieħed jieħu ħaġa sewwa.
Bil-prattika l-aħjar li titgħallem.
Binhar fuq il-bjut u billejl taħli ż-żjut.
Matul il-ġurnata ma jaħdimx imbagħad ipattilu billi jaħdem billejl.
Bis-swat u biż-żmien jitbiżżel l-għażżien.
Bit-tbatija li jġib fuqu nnifsu, l-għażżien ikollu jitgħallem ikun bieżel ukoll.
Bix-xogħol ħotba tagħmel.
Hemm xi wħud li b’xogħolhom xorta waħda ma jleħħqux mal-ħajja, u jkollhom jaqilgħu l-flus minn xogħlijiet oħrajn.
Ċallas ballas ħażin taħdem u agħar titħallas.
Ix-xogħol li jsir ħażin ma ħaqqux jitħallas.
Ċallas ballas kif taħdem titħallas.
Ix-xogħol li jsir ħażin ma ħaqqux jitħallas.
Dak bħas-siġra tal-luq, la tiekol minnha u lanqas idduq.
Min ma jridx jaħdem xejn ma tieħu mingħandu.
Dejjem tikber is-silla, iżda l-ħmar mhux dejjem jirgħa minnha.
Tagħmel ix-xogħol inti u ġieli tispiċċa ma tgawdi xejn minnu.
Fost l-ixirka min jaħdem u min għażżien.
Hemm min jaħdem u hemm min ma jrid jagħmel xejn.
F’xogħol ta’ ħorrox borrox l-istokk u ż-żebgħa jgħattu kollox.
Ix-xogħol ħażin hemm mezz kif jitranġa.
Għajjur f’iklu, għajjur f’xogħlu.
Biex taqla’ x’tiekol trid taħdem u tistinka.
Għajnejn sidha jimlewlha żaqqha l-baqra.
Kulħadd iqis li xogħlu jiswa ħafna flus.
Għal kull għadma hawn mitt kelb.
Il-kompetizzjoni għax-xogħol hija qalila.
Għal melħa ma jħallix il-borma ħelwa.
Għal naqra, agħmel ix-xogħol sew.
Għal naqra melħ tħassarx il-borma.
Għal naqra, agħmel ix-xogħol sew.
Għal tal-aħħar m’hemmx palju.
Ma tistax tieħu l-mertu tax-xogħol li għamlu ta’ qablek.
Għarbiel irqiq trid għalih il-ħobż u d-dqiq.
Għax-xogħol li jirrikjedi ħafna ħin u logħob hemm bżonn tieħu paċenzja u tieħu ħsieb saħħtek.
Għejien ix-xogħol huwa s-sabar.
Biex ix-xogħol isir sew, irid isir bil-paċenzja. Għejien tfisser assistent.
Għum fejn jilħaqlek.
Tiddeffisx għal biċċa xogħol jekk taf li m’intix kapaċi għaliha.
Ħidma fil-btala tmur fis-siba u l-ħala.
Dari kienu jemmnu li Alla jikkastiga lil min jaħdem il-Ħdud u l-festi. Siba tfisser ħerba.
Ħidma fuq il-qalb qajla fejda fih.
Min imur fuq qalbu għax-xogħol sinjal li ma jħossux sodisfatt.
Ħidma għal Alla ma titħallasx.
Azzjoni tajba kif irid Alla ma tistax titħallas bi flus materjali.
Ħidma ta’ sena marret f’siegħa.
Qawl dwar il-logħob tan-nar iżda li japplika wkoll b’mod ġenerali: tkun ilek sena taħdem qatigħ fuq xi ħaġa biex fl-aħħar mill-aħħar tgawdiha għal ftit ħin biss.
Ħidma u bżulija u tfittixx x’tagħmel in-nies.
Agħmel xogħlok u ħallik min-nies.
Biex taqbad il-ħut trid tqum kmieni.
Hemm bżonn tbakkar biex ittella’ x-xogħol.
Ħidma u sabar sal-qabar.
Irridu naħdmu u nieħdu paċenzja sa mewtna.
Ħiss il-miss ġejt, ħiss il-miss mur.
Agħmel xogħlok bil-galbu u l-affarijiet imorru sew.
Ħmar qammas jikser sinslet id-dahar.
L-injorant ma jagħmilx xogħol tajjeb.
Bl-ulied kollha jaqilgħu xi sold, il-missier jista’ jibni fil-fond.
Il-paga tal-ulied isservi wkoll għall-familji li jbatu finanzjarjament.
Ħobż il-bieżel jieklu l-għażżien.
Min hu għażżien japprofitta minn xogħol il-bieżel.
Kliem wisq, fejda ftit.
Dawk li jiftaħru u jparlaw ħafna jkollhom ftit xogħol x’juru fil-verità.
Ħobż u basal u strieħ xħin tasal.
Qabel kienu jieqfu minn biċċa xogħol meta jlestuha biss, u mhux qabel. Kienet ħajja diffiċli.
Id-denb dejjem iniggeż.
L-aħħar naqra ta’ biċċa xogħol dejjem tidher twila u diffiċli.
Id-driegħ għall-ħidma u r-ras għall-misra.
Il-ġisem qiegħed għax-xogħol fiżiku u l-moħħ qiegħed għax-xogħol mentali. Misra tfisser ippjanar.
Ifrex siegħa u orqod kwarta.
It-tbatija dejjem tkun akbar mit-tgawdija.
Il-bieżel ma jsib l-ebda triq magħluqa.
Min jaħdem u jistinka dejjem jasal fejn irid.
Il-bniedem għax-xogħol maħluq.
Mingħajr xogħol il-bniedem bla direzzjoni.
Il-bniedem ħaddmu għal rasu biex tkun taf x’jiswa.
Tara bniedem kemm hu kapaċi meta tħallih jagħmel biċċa xogħol waħdu.
Il-bokra ssewwi ż-żokra.
Min ibakkar (iqum kmieni) ileħħaq jagħmel ħafna matul il-ġurnata.
Għal ħafna subien lesti l-bsaten u t-tmien, għal ħafna bniet lesti ċ-ċraret u l-biċċiet.
Dari s-subien biss kellhom opportunità għal karriera, il-bniet kienu jagħmlu biss ix-xogħol tad-dar. Tmien huma kpiepel.
Il-ġifa jsib xortih.
Min ma jrid jagħmel xejn imur aħjar minn min hu bieżel.
Il-ħierek u l-bieżel jiftiehmu.
Min juri ħeġġa għax-xogħol nies bħalu jfittex. Ħierek tfisser xi ħadd li jitħarrek, jiġifieri li jmidd idejh għax-xogħol.
Il-ħmar ħaddmu għal rasu biex tkun taf x’jagħmel.
Tara bniedem kemm hu kapaċi meta tħallih jagħmel biċċa xogħol waħdu.
Il-ħmar ħaddmu għal rasu biex tkun taf x’jiswa.
Tara bniedem kemm hu kapaċi meta tħallih jagħmel biċċa xogħol waħdu.
Il-ħobż tih lil min jaf jieklu u x-xogħol lil min jaf jagħmlu.
Biex l-affarijiet isiru sew, agħti biċċa xogħol lil min għandu l-ħila jinqala’ għaliha.
Il-kotra tegħleb il-bokra.
Meta nkunu magħqudin inkunu iżjed b’saħħitna u x-xogħol isir iżjed malajr. Bokra ġejja minn bakkar, tqum kmieni.
Il-kotra tegħleb il-qawwa.
Meta nkunu magħqudin inkunu iżjed b’saħħitna u x-xogħol isir iżjed malajr.
Il-maħbeż meta tmissu jaqbeż.
Qis li tlesti x-xogħol li għandek bħalissa qabel ma tibda xogħol ieħor. Maħbeż huwa forn tal-ħobż.
Il-mostra mhix ġostra.
Tgħallem apprezza x-xogħol ta’ ħaddieħor, minflok tipprova tleħħaq miegħu.
Il-qawmien kmieni jsaħħaħ u jtawwal il-ħajja.
Min ibakkar (iqum kmieni) ileħħaq jagħmel ħafna matul il-ġurnata.
Il-qawwa sa ma tibda.
Qabel tibda biċċa xogħol issibha bi tqila, iżda malli tibda tiġi l-enerġija biex tkompli.
Il-ward ifuħ imma l-ħobż jagħtik ir-ruħ.
Ix-xogħol għandu jiġi qabel id-divertiment.
Imċappas bid-demm u laħam ma jikolx.
Tagħmel ix-xogħol inti u ġieli tispiċċa ma tgawdi xejn minnu.
Imsejken ta’ bennej jibni ġebla u jħott tnejn.
Jekk ma tkunx kapaċi f’xogħlok, rigress tagħmel mhux progress.
Inkella r-roqba, inkella l-ħobża.
Fil-passat ċerti xogħlijiet kienu riskjużi, bħal pereżempju xogħol il-baħħara, imma xorta kellu jsir biex taqla’ x’tiekol u tgħajjex lill-familja. Ir-roqba tfisser l-għonq.
Is-sahra u t-tbakkir, iż-żina tal-Maltin.
Il-Maltin magħrufin għal kemm ibakkru (iqumu kmieni) u jaħdmu bi ħġarhom fit-tul.
Faħħar il-baħar u ibqa’ fuq l-art.
Tagħżilx li tmur fuq il-baħar għax huwa xogħol perikoluż.
Is-sawt u ż-żmien ibiżżlu l-għażżien.
Min hu għażżien jeħtieġ li tiddixxplinah fuq medda ta’ żmien twil biex jitgħallem imidd idejh.
Issensel u trempel fl-aħħar il-qanpiena ċċempel.
Jeħtieġ li biċċa xogħol tibdieha biex ikollok tama li xi darba teħlisha.
Is-sħana tax-xemx ma tgħallix patata.
Il-flus trid tbati u taħdem għalihom, bil-ftit ma jsir xejn.
L-aħjar ħut jgħum f’qiegħ il-baħar.
Min jagħmel xogħlu sew u bil-għaqal ma jkunx iħobb jidher.
Issieħeb mal-bieżel u aħrab ’l-għażżien.
In-nies bieżla moħħhom f’xogħolhom mentri l-għażżenin jaraw kif se japprofittaw ruħhom minnek, mela aħrabhom.
Is-siġra ma tagħmilx in-nwar jekk ma ssaqqihiex.
Trid taħdem qatigħ u tieħu interess biex ix-xogħol jirnexxi.
It-tbakkir jagħti s-saħħa.
Tħoss li jkollok iżjed enerġija meta tbakkar (tqum kmieni) għax-xogħol.
It-tiben tagħna fl-aħħar xriek.
Meta tkun qed toqrob lejn l-aħħar ta’ biċċa xogħol twila u tqila, l-enerġija tkun batuta ferm.
Bil-jekk u bil-jewwilla ma timla ebda bixkilla.
L-affarijiet isiru bil-fatti mhux bil-paroli.
Ix-xemgħa tixgħel u l-purċissjoni wieqfa.
Hemm xi jsir iżda ħadd ma jrid jaħdem.
Bil-kliem biss ma nagħmlu xejn.
Ma jsirx xogħol bil-paroli.
Ix-xogħol jeqred il-fies u l-vizzju jeqred in-nies.
L-għodod tax-xogħol jinqerdu bl-użu, iżda l-vizzji jeqirdu l-bniedem. Fies huwa tip ta’ għodda li taqta’ l-ġebel.
Ix-xogħol salmura tal-ġisem.
Ix-xogħol fiżiku jsaħħaħ il-ġisem u jipprevjeni l-mard, bħas-salmura li tippreżerva l-ikel.
Ix-xogħol tal-għaġla ma tantx joħroġ tajjeb.
Meta tgħaġġel biex tagħmel biċċa xogħol, ma tagħmilhiex sew.
Ix-xogħol tar-ras iebes.
Ix-xogħol mentali huwa itqal mix-xogħol manwali.
Ix-xogħol u s-sabar sa ġewwa l-qabar.
Trid taħdem u tieħu paċenzja sa ma tmut.
Ix-xogħol u s-sahar huma missier u omm il-ġid.
Irridu naħdmu u nishru biex nirnexxu u nkunu kuntenti.
Jekk jgħaddas rasu l-imgħallem, jerfa’ rasu l-lavrant.
Jekk l-imgħallem ma jagħtix kas, ma jkunx hemm dixxiplina fuq ix-xogħol.
Jekk ma taqsamx il-bħajjar ma tkunx tista’ tnajjar.
Kien jeħtieġ li l-baħrin imorru jaħdmu fuq il-baħar ’il bogħod minn familthom biex jaqilgħu x’jieklu. Bħajjar huma oċeani u tnajjar tfisser tkampa.
Jekk min jinseġ iżomm il-miċċa, jitwi l-biċċa.
Meta tishar (= taħdem overtime) taqla’ iżjed flus. Miċċa hija ftila.
Jekk ta’ xejn aħslu u erfgħu.
Ħadd ma jagħmillek biċċa xogħol bla flus.
Jiekol bir-riħa u jħallas biċ-ċekċik.
Min ix-xogħol ma jagħmlux sew, ma jaqlax flus.
Kidd ġild ħaddieħor u la qatt tkidd ġildek.
Agħmel xogħlok u ara kif se tieħu vantaġġ fuq ħaddieħor. Il-ġild tirreferi għas-sandli.
Il-baħar duqu qabel ma titla’ fuqu.
Ara li l-ħajja fuq il-baħar tgħodd għalik qabel ma tiddeċiedi.
Kisra tal-art ħelwa u tal-baħar morra.
Ix-xogħol ta’ fuq il-baħar huwa ferm iżjed diffiċli mix-xogħol fuq l-art. Kisra tirreferi għal kisra ħobż.
Kollox sewwa sakemm il-ħobż ikun id-dar.
Sakemm għandek xogħol li qed iqallgħek x’tiekol, m’hemmx problema.
Kulħadd għal senegħtu.
Kulħadd ikun jifhem l-aktar fix-xogħol li jagħmel.
Kulħadd igerger minn xogħlu.
Kulħadd isib id-difetti fix-xogħol li jagħmel.
Kulħadd irid jgħix fid-dinja.
Kulħadd għandu bżonn jaħdem biex jaqla’ x’jiekol fid-dinja.
Dak li ma sarx f’mitt sena mhux se tagħmlu f’jum.
Biex issir xi ħaġa hemm bżonn taż-żmien u l-paċenzja, ma tistax tagħmilha malajr biex teħles.
Kulħadd irid jiekol fid-dinja.
Kulħadd għandu bżonn jaħdem biex jaqla’ x’jiekol fid-dinja.
Il-qgħad id-dar ma fihx għar.
Mara tad-dar m’għandhiex għalfejn tistħi għax li tagħmel xorta xogħol. Għar tfisser mistħija jew għajb.
Kulħadd jaqra fi ktiebu.
Kulħadd f’xogħlu jifhem.
Kulħadd xogħlu jogħġbu.
Kulħadd jara tiegħu tajjeb u ta’ ħaddieħor ħażin, anke fix-xogħol.
Kull bidu huwa qawwi.
Biċċa xogħol tidher iżjed diffiċli qabel tibdieha.
Min jikriha joqgħod għaliha.
Min jidħol għal xi ħaġa, ikollu ma jilmentax u jagħmilha bit-tajjeb u l-ħażin kollha tagħha.
Kull mibdi mitmum.
Biex tispiċċa biċċa xogħol trid tibdieha.
Il-mogħża li tirgħa mhi qatt bil-ġuħ.
In-nies beżlin dejjem isibu x’jagħmlu u jħossuhom sodisfatti.
Min jimxi bil-mod jasal kmieni.
Min jagħmel xogħlu bil-mod u bir-reqqa, jagħmlu aħjar minn min jipprova jgħaġġel biex jeħles.
La kiel il-laħma jeħtieġ imexmex l-għadma.
La intrigajt b’xi biċċa xogħol, agħmilha sew mill-bidu sal-aħħar.
La tgħidx x’jisimha qabel ma tgħammidha.
Biċċa xogħol qis li tlestiha qabel tmur tiftaħar biha.
Min jimxi bil-qajla jasal kmieni.
Min jagħmel xogħlu bil-mod u bir-reqqa, jagħmlu aħjar minn min jipprova jgħaġġel biex jeħles.
Lenbi mġenġel tagħġinx fih.
Tużax għodda mkissra jew difettuża għax ix-xogħol ma joħroġx tajjeb.
L-ewwel il-pappa, imbagħad l-umpappa.
Ix-xogħol u l-istudju jiġu qabel kull divertiment. Il-pappa tirreferi għall-ikel fuq il-mejda u l-umpappa tirreferi għad-daqqa li niżfnu u niddevertu magħha.
La twaħħalx musmar f’dar is-sultan.
Tagħmilx xogħol f’post li tkun qed tikri, għax xejn ma tgawdi minnu u l-flus li tkun infaqt.
L-ewwel ratal dejjem jinħass tqil.
Meta tibda biċċa xogħol, l-ewwel ftit dejjem jinħass diffiċli sakemm tikkarga.
Min jistedinha joqgħod għaliha.
Min jidħol għal xi ħaġa, ikollu ma jilmentax u jagħmilha bit-tajjeb u l-ħażin kollha tagħha.
L-ewwel terz għali.
Meta tibda biċċa xogħol, l-ewwel ftit dejjem jinħass diffiċli sakemm tikkarga.
L-ewwel terz inbid dejjem qares itiegħem.
Meta tibda biċċa xogħol, l-ewwel ftit dejjem jinħass diffiċli sakemm tikkarga.
L-għażżien xogħlu għali.
Min jevita x-xogħol jispiċċa jgħaddi minn iżjed tbatija għax ix-xogħol ma jkunx għamlu sew mill-ewwel.
L-għażżien xogħlu tqil.
Min jevita x‑xogħol jispiċċa jgħaddi minn iżjed tbatija għax ix‑xogħol ma jkunx għamlu sew mill‑ewwel.
L-għodda iġborha u għoddha.
L-għodda tiegħek ħu ħsiebha sew.
L-idejn imgħaref tal-fidda, xħin taħsilhom jiġu ġodda.
L-idejn huma għodda importanti għax-xogħol tal-idejn, u m’għandekx tiddejjaq tħammiġhom biex taħdem.
L-imgħax itajjar in-ngħas.
Tagħmel iżjed kuraġġ fix-xogħol meta tara l-flus deħlin.
L-għażż missier il-faqar.
Min hu għażżien u bla ħeġġa jbati ħafna u jgħix fil-bżonn u fil-faqar.
L-irqad jagħmel il-ħmira.
Huwa importanti li torqod sabiex iġġib lura saħħtek u tissokta b’xogħlok.
Is-subien jaħsbu fix-xwieni u l-bniet jaħsbu fil-ġejjieni.
Dari s-subien kienu jfittxu xogħol fuq il-baħar, mentri l-bniet kienu jaħsbu biex ikollhom familja.
In-naħal jaħdem u r-reġina tieħu l-ġieħ.
Il-ħaddiema jaħdmu u jbatu u ta’ fuqhom igawdu l-frott ta’ xogħolhom.
L-istokk u ż-żebgħa jgħattu kollox.
Ix-xogħol ħażin hemm mezz kif jitranġa.
Ma jafx isajjar min ma jafx inajjar.
Biex tagħmel biċċa xogħol sew, trid tkun taf l-elementi bażiċi. Inajjar tfisser jieħu ħsieb in-nar.
Ma jafx x’inhu serħan min qatt ma ħadem.
Tkun taf x’inhu serħan meta tbati f’xogħlok.
Ma tismax minni, ma tikolx ħobżi.
Jew tagħmel kif ngħidlek jiena, jew ma nqabbdekx tagħmel xogħol iżjed.
Is-sajjied jgħid li l-art ħabel tajjeb.
In-nies jaħsbu li xogħolhom biss fih impenn. Ħabel tfisser għalqa.
Meta għandek maħbeż la żżidx ieħor, ħallih jaħbeż.
Meta jkollok furnata ħobż (= maħbeż) qiegħda tinħema, stennieha qabel tibda oħra, bl-istess mod li għandek taqbad biċċa xogħol oħra ladarba tlesti dik li għandek f’idejk issa.
Meta jorqod il-qattus, il-ġrieden joħorġu.
Jekk l-imgħallem ma jagħtix kas, ma jkunx hemm dixxiplina fuq ix-xogħol.
Mhux kull min għandu wiċċu mġemmed sar ħaddied.
Mhux imbilli tkun tagħmel ċertu xogħol jew tkun ta’ xi sengħa, trid tkun tassew tinqala’ fih(a).
Mid-dar ma jiġix qamħ.
Min hu għażżien u joqgħod id-dar ma jagħmel xejn minflok jaħdem, ma jaqlax flus.
Ix-xemx issaħħan imma l-ebda borma ma tgħalli.
Trid taħdem u tistinka biex taqla’ l-flus.
Min għandu ħalqu jrid jiekol.
Kulħadd għandu bżonn isib xogħol biex jaħdem u jaqla’ l-għajxien tiegħu.
Min hu għajjien jistrieħ.
Min għejjieh ix-xogħol jistrieħ u jiddeverti sabiex ikollu s-saħħa jkompli wara.
Min hu għajjur f’iklu, għajjur f’xogħlu.
Jekk trid tiekol tajjeb jeħtieġ li tmidd idejk u taħdem.
Min ibati jgawdi.
Min jaħdem u jistinka jgawdi.
Min iħobb it-tibkir raġel isir.
Min ibakkar (= iqum kmieni) għax-xogħol isir bniedem iddixxiplinat.
Min iħabrek jaqlagħha.
Min jaħdem u jistinka jitħallas tajjeb ta’ xogħlu.
Min irid igawdi jeħtieġ l-ewwel ibati.
Biex tgawdi trid taħdem u tistinka.
Min irid il-bajd frisk, ikollu jbati t-tlaqliq tat-tiġieġ.
Biex tgawdi trid taħdem, tistinka u tieħu paċenzja.
Min irid il-lillu jishar.
Biex tgawdi trid taħdem, tistinka u tieħu paċenzja. Jishar tfisser jaħdem overtime.
Min irid jirkeb jeħtieġ iniegħel.
Min irid igawdi jeħtieġ li jagħmel ix-xogħol diffiċli jew antipatku wkoll biex jasal. Iniegħel tfisser ilibbes in-nagħla liż-żiemel.
Min isuq wisq ħażin jogħtor il-ħmar.
Min f’xogħlu ma jurix impenn, ibati u ma jagħmlux sew.
Min jaf inajjar jaf isajjar.
Biex tagħmel biċċa xogħol sew, trid tkun taf l-elementi bażiċi. Inajjar tfisser jieħu ħsieb in-nar.
Min jagħmel il-fuħħar iqiegħed widnejn il-borma fejn jidhirlu l-aħjar.
Min hu tas-sengħa jkun jinqala’ f’xogħlu u jkun jaf kif imorru l-affarijiet.
Nagħġa li ma taqtax bi snienha ma tagħtix ħalib.
Min ma jaħdimx u ma jistinkax imkien ma jasal.
Min jaħdem fl-irqiq irid jiekol.
Min jagħmel xogħol tedjanti jew diffiċli fiżikament jeħtieġ jiekol sew.
Min jaħdem jaħġem.
Min jagħmel xogħol diffiċli fiżikament jeħtieġ jiekol sew. Jaħġem tfisser jibla’ (l-ikel).
Il-bniedem l-inkwiet joqtlu mhux ix-xogħol.
Huwa l-inkwiet li jagħmel ħsara lill-bniedem, mhux ix-xogħol.
Min jaħdem jiekol sardina u min ma jaħdimx jiekol gallina.
L-għażżien jew min ma ħaqqux igawdi minn fuq dahar min jagħmel xogħlu sew.
Oqgħod qgħadek, ara darek, ħares saħħtek u agħmel fagħlek.
Kun fejn għandek tkun, ħu ħsieb darek, ħu ħsieb saħħtek u agħmel xogħlok (fagħlek).
Min jaħdem l-iżjed jiekol l-inqas.
L-għażżien jew min ma ħaqqux igawdi minn fuq dahar min jagħmel xogħlu sew.
Min jerfa’ l-qatta qatt ma għandu biex jitgħatta.
Min jagħmel xogħol mhux imħallas tajjeb ma jgħixx komdu.
Min jerfa’ qofftu mhux pastaż.
Min jagħmel xogħlu u jieħu ħsieb l-affarijiet tiegħu m’għandux għalfejn iħossu skomdu jew jistħi. Fl-imgħoddi, il-pastaż kien reffiegħ li jdur mat-toroq jiffitta lin-nies biex għal ftit soldi jġorrilhom sad-dar il-qfief u tagħbijiet oħra. Il-pastaż kien bla manjieri,...
Min jerfa’ sorrtu mhux pastaż.
Min jagħmel xogħlu u jieħu ħsieb l-affarijiet tiegħu m’għandux għalfejn iħossu skomdu jew jistħi. Fl-imgħoddi, il-pastaż kien reffiegħ li jdur mat-toroq jiffitta lin-nies biex għal ftit soldi jġorrilhom sad-dar il-qfief u tagħbijiet oħra. Il-pastaż kien bla manjieri,...
Min jgħid kontra s-sengħa ma jsirx mgħallem.
Min imaqdar xogħlu qatt ma jitgħallmu sew.
Alla jxiegħel lill-battal.
Donnu x-xogħol Alla jagħtih lil min ma jaħdimx.
Min jibda tajjeb għandu nofs it-triq.
Min jibda biċċa xogħol tajjeb, ikompliha tajjeb.
Min jibqa’ wara jsakkar il-bieb.
Min jitlaq tal-aħħar minn xi mkien, jitwikka bil-kompitu li jagħlaq u jsakkar il-post.
Min jibża’ għal dahru, m’għandux xi jridu l-luħ.
L-għażżien għalxejn tafdah b’xi biċċa xogħol għax ma jagħmilhiex. Luħ huwa pala tal-injam.
Min jidra bis-sisija, la jrid xogħol u lanqas tbatija.
Mix kielu l-għażż u dara jgħix minn fuq dahar ħaddieħor, ma jkunx irid jaħdem u jbati. Is-sisija hija l-karità.
Min jidra l-qgħad, jidra l-għażż.
Mix kielu l-għażż u dara jgħix minn fuq dahar ħaddieħor, ma jkunx irid jaħdem u jbati.
Min jiekol il-laħma jeħtieġ imexmex l-għadma.
La intrigajt b’xi biċċa xogħol, agħmilha sew mill-bidu sal-aħħar.
Min jiġri wisq jaqta’ nifsu.
Meta tgħaġġel biex tagħmel biċċa xogħol, ma tagħmilhiex sew.
Qabel ma tidħol aħseb mnejn toħroġ.
Qabel ma tintriga b’xi biċċa xogħol, ara li tkun kapaċi toħroġ minnha jekk jinqala’ xi ħaġa.
Min jimxi bir-riħ isib ruħu f’nofs it-triq.
Min diġà jibda b’vantaġġ fuq ħaddieħor, aktar għandu ċans jirnexxi.
Min jirkeb jeħtieġlu jniegħel.
Min irid igawdi jeħtieġ li jagħmel ix-xogħol diffiċli jew antipatku wkoll biex jasal. Iniegħel tfisser ilibbes in-nagħla liż-żiemel.
Min jitrabba fl-għażż jitbiżżel fil-ħjieġ.
Min hu għażżien xorta waħda jiġi bżonn (= il-ħjieġ) il-flus u jkollu jaħdem (= jitbiżżel) bħal ħaddieħor.
Min ma jaħdimx ma jikolx.
Min ma jaħdimx, ma jaqlax flus u ma jkollux biex jimla żaqqu.
Min ma jbatix ma jgawdix.
Trid taħdem u tbati biex tkun tista’ tgawdi.
Mingħajr armi għaliex toħroġ?
Ma tistax tagħmel xogħol tajjeb mingħajr l-għodda t-tajba, bħall-kaċċatur li bla senter ma jistax jikkaċċja.
Mingħajr għodda ma taħdimx.
Ma tistax tagħmel xogħol tajjeb mingħajr l-għodda t-tajba.
Qatt tħalli f’idejn ħaddieħor dak li tista’ tagħmel int stess.
Jekk trid li biċċa xogħol issir sew, agħmilha int u tħallix f’idejn ħaddieħor.
Qatt tibda xejn qabel ma tara kif tispiċċah.
Biex jirnexxu, jeħtieġ li l-affarijiet tippjanahom sew mill-bidu sal-aħħar qabel tibda.
Mix-xogħol tal-Ħadd jibża’ kulħadd.
Superstizzjoni li jekk bniedem jaħdem il-Ħadd, li suppost huwa jum ta’ mistrieħ iddedikat għal Alla, iġib is-saħta fuqu.
Naħdem u nsir kagħba mqar ġie x’ħadu l-għada.
Dari n-nisa romol kellhom jaħdmu saħansitra fi xjuħithom u sa mewthom biex ikunu jistgħu jgħixu. Kagħba tfisser mara xiħa ħafna.
Orqod mat-tiġieġ u qum mas-serduq.
Mur orqod kmieni u qum kmieni.
Pappi llum u pappi għada, iċċiċċi ħajt u tpappi ġebla.
Min ma jridx jaħdem issa għad jiddispjaċih fil-futur, meta jfittex il-flus u ma jsib xejn.
Pont bis-sahra jitma’ ’l-ħmar.
Dari min kien jaf iħit (= pont tal-ħjata), kien jaqla’ xi ħaġa żejda tal-flus.
Qasba mġelġla tajba biss għaċ-ċekċika biex tnaffar iċ-ċawl.
Biċċa għodda li tkun difettuża eħles minnha għax inkella x-xogħol ma joħroġx tajjeb.
Qatt issiefer b’riħ ħażin.
Tibdiex biċċa xogħol meta diġà tkun taf li bdejt bi żvantaġġ.
Qatt tgħid x’taf tagħmel.
Toqgħodx turi kemm taf tagħmel xi ħaġa, għax iwaħħlulek aktar xogħol.
Qatt tħalli s-sħiħ għar-riħ.
Ix‑xogħol u l‑istudju jiġu qabel kull divertiment.
Qroqqa lieżma tfaqqas qabel l-għoxrin.
Min hu bieżel mhux talli jleħħaq max-xogħol, talli jeħilsu qabel. Lieżma tfisser diliġenti u l-għoxrin tirreferi għall-jum li fih ifaqqas il-bajd wara li l-qroqqa tkun għamlet xogħolha sew.
Ragħaj tajjeb iġiżż u mhux iqaxxar.
Min ikun tas-sengħa jaf kif għandu jmur ix-xogħol.
Imur il-ġid u l-ġidejn u tibqa’ l-ħidma tal-idejn.
Sakemm ikollok saħħtek, ma jkun ġara xejn jekk titlef ġidek kollu. Tista’ terġa’ tibda mill-bidu u taħdem għalih. Ġidejn tfisser ġid kbir.
Sawwar il-borom iqiegħed il-widna fejn irid hu.
Min hu tas-sengħa jaf sew x’għandu jagħmel f’xogħlu.
Min jikser it-tub bin-nisa ma jaħsadx bosta.
Ix-xogħol fiżiku jinqalgħu iżjed għalih l-irġiel milli n-nisa.
Sieħeb senegħtek għaduk imqar kien ħuk.
Tnejn min-nies li jkunu fl-istess xogħol jew negozju jkunu qed jikkompetu ma’ xulxin, u allura huma għedewwa, saħansitra jekk ikunu qraba tiegħek.
Min hu man-nies jew bla saħħa jew bla ġieħ.
Min jaħdem man-nies biex jirnexxi jrid jew jaħdem sakemm jispiċċa bla saħħa, jew inkella jitlef ġieħu għax ibigħ lilu nnifsu.
Sinjur, ipprovdi lill-għażżien għax il-bieżel jiddubbaha minn kullimkien.
Min jaħdem u jistinka jgawdi frott ħidmietu, mentri l-għażżien mix-xejn ma jgawdi xejn.
Sliħ id-denb l-aqwa.
L-aħħar ftit ta’ biċċa xogħol titlob sforz kbir, għax tkun għejejt u l-motivazzjoni tkun baxxa ħafna, bl-istess mod li tal-laħam jisloħ id-denb l-aħħar xogħol.
Ta’ bilfors ixebba’.
Ix-xogħol li jsir ta’ bilfors ixebbgħek għax ma tagħmlux minn qalbek.
Ta’ bla għaraq ma tgawdihx.
Dak li takkwista mingħajr ma tkun ħdimt u stinkajt għalih (wirt, flus, eċċ.) ma tgawdihx għax ma tapprezzahx.
Tagħbija mqassma tajjeb taħfi.
Meta x-xogħol jitqassam bejn kulħadd b’mod ibbilanċjat, il-piż jeħfief u t-tbatija tonqos. Taħfi tfisser tnaqqas it-tagħbija.
Tagħmilx aktar milli tiflaħ.
M’għandek qatt tagħmel aktar xogħol jew taċċetta responsabbiltajiet aktar milli tiflaħ, għax ma tleħħaqx u tagħmel ħsara lil saħħtek.
Tal-ewwel ibewwel u tal-aħħar ibaħħar.
Dak li jkolli jagħmel l-ewwel xogħol, irid isegwi sew l-istruzzjonijiet u jibża’ mill-iżbalji. Dak tal‑aħħar ikollu d‑dmir li jtemm il‑ħimda li tkun qed issir, u b’hekk ilaqqat ix‑xogħol kollu li jkun għad fadal. Barra minn dan, kienet popolari s‑superstizzjoni fejn...
Min jaqla’ u min iħawwel.
Ix-xogħol ta’ kulħadd huwa importanti, bħal fix-xogħol tal-għalqa.
Tajra faqqasija minn waħda toktor mija.
Aktar ma bniedem ikun iħabrek u jaħdem, aktar itella’ xogħol.
Terfax aktar milli tiflaħ.
M’għandek qatt tagħmel aktar xogħol jew taċċetta responsabbiltajiet aktar milli tiflaħ, għax ma tleħħaqx u tagħmel ħsara lil saħħtek.
Tgħallem mitt sengħa u agħmel waħda.
Apparti x-xogħol ewlieni tiegħek, fil-ħajja jeħtieġ li titgħallem naqra minn kollox biex tkun tista’ tkampa meta tiġi bżonn.
L-iskola tiswa.
L-iskola tgħin biex wieħed jiftaħ moħħu, kif ukoll biex isib xogħol tajjeb.
Tibla’ ljunfant u tixraq f’nemusa.
Tagħmel l-iżjed xogħol diffiċli u tedjanti, imbagħad tqajjem plejtu għall-affarijiet iż-żgħar.
Orqod fil-frugħa, oqgħod fid-djieq u min jirtek jistgħall ġidek sieq fuq sieq.
Flusek aħdem għalihom u gawdihom inti waqt li għadek ħaj, għax jekk le tkun qed tpaxxihom lill-werrieta. Fil-frugħa tfisser fit-tbatija, fid-djieq tfisser fin-nieqes u jistgħall tfisser igawdi.
Tifħir bla qligħ ma jimliex il-but.
Min joqgħod ifaħħrek ta’ xogħlok mhux biżżejjed, jeħtieġ ukoll titħallas tiegħu.
Tiġieġa ħawtiela bajjada.
Tiġieġa bieżla tagħmel bajd sabiħ, bħal min jistinka biex jagħti prodott sabiħ. Ħawtiela tfisser ħabrieka u bajjada tfisser li tbid.
Tiġieġa li tfelles tajjeb għożżha.
Ibża’ għat-tiġieġa li tfaqqas il-bajd, bl-istess mod li għandek tibża’ għal min jaħdem u jistinka fin-negozju tiegħek.
Tnejn ta’ sengħa waħda għedewwa ta’ xulxin.
Tnejn min‑nies li jkunu fl‑istess xogħol jew negozju jkunu qed jikkompetu ma’ xulxin, u allura huma għedewwa, saħansitra jekk ikunu qraba tiegħek.
Tqabbilx il-ġnien lill-għażżien.
Tafdax affarijiet jew proġetti għal qalbek f’idejn min ma jrid jagħmel xejn.
Trabba fil-għażż u tbiżżel fil-ħjieġ.
Huwa persuna li trabba f’ħafna fsied iżda meta fil-futur ġie fil-bżonn, xammar il-kmiem u ħadem. Ħjieġ tfisser bżonn.
Wara l-mejkla hemm min jerġa’ għax-xogħol, u hemm min jiġri għall-miġles.
Wara l-ikla, hemm min jerġa’ jmur lura għax-xogħol mill-ewwel biex ma jitlifx ħin u hemm min imur jistrieħ qabel ikompli fuq xogħlu. Mejkla tfisser ikla żgħira u miġles huwa bank tal-ġebel mingħajr dahar, li kienu joqogħdu bilqiegħda fuqu fl-imgħoddi f’xi kappelli jew...
Xejn ma jagħti xejn iżda x-xogħol iħalli xi fejda.
Ix-xogħol jagħtik il-flus u s-sodisfazzjon, iżda l-għażż ma jtik xejn.
Xidd il-qorq u xammar kmiemek imbagħad ħajjitek.
Jeħtieġ li dak li jkun jitħallas b’mod xieraq tax-xogħol li jkun għamel, ir-rikonoxximent u l-gratitudni mhumiex biżżejjed.
Sajjied bla lixka ma jaqbadx vopi.
Biex ix-xogħol jirnexxi, jeħtieġ li jkollok il-mezzi u l-għodda t-tajba.
Xkora mimlija timtedd trid.
Wara li tiekol ikollok bżonn tmur tistrieħ għax tħossok tqil u għajjien.
Min jiftaħ għajnejh irewwaħ ġismu.
Min jitgħallem isib xogħol komdu, mingħajr tbatija fiżika.
Ta’ li taħdem titħallas.
Titħallas skont kif u kemm tagħmel xogħol.
Xkora vojta ma tiqafx.
Meta bniedem ikun bil-ġuħ ma jagħmilx xogħol tajjeb, jeħtieġ li żaqqu tkun mimlija.
Timxi qajla u tasal kmieni.
Min jagħmel xogħlu bil‑mod u bir‑reqqa, jagħmlu aħjar minn min jipprova jgħaġġel biex jeħles.
Xogħol bla ħlas qisu raġel bla ras.
Ix-xogħol biex isir tajjeb irid jitħallas.
Min iħażżaq wisq ma jaqbad xejn.
Min irid wisq (flus, fama, eċċ.) jispiċċa ma jkollu xejn, bl-istess mod li min jidħol għal wisq xogħol jispiċċa ma jleħħaqx miegħu.
Xogħol il-aġir nofs serħ u nofs tmattir.
Meta tħaddem in-nies bil-ġurnata (= il-aġir) iktar jgħaddu l-ħin ma jagħmlu xejn milli jaħdmu.
Taħdem u tistinka u d-dublett dejjem bla ċinta.
Minkejja x‑xogħol kollu tagħmel, xorta waħda ma taqlax biżżejjed biex tgħix komdu.
Xogħol il‑bieżel jieklu l‑għażżien.
Min hu għażżien japprofitta minn xogħol il‑bieżel.
Taħdem u tistinka u l-qalziet dejjem bla ċinta.
Minkejja x-xogħol kollu tagħmel, xorta waħda ma taqlax biżżejjed biex tgħix komdu.
Xogħol il-bieżel jiswa tnejn, xogħol l-għażżien jisfa fix-xejn.
Ix-xogħol ta’ min hu bieżel isir tajjeb ħafna u jpatti għax-xogħol traskurat ta’ min hu għażżien, jew in-nuqqas tiegħu.
Xogħol il-għakrieki jiswa n-nofs tal-ħabrieki.
Ix‑xogħol ta’ min hu bieżel (il-ħabrieki) isir tajjeb ħafna u jpatti għax‑xogħol traskurat ta’ min hu għażżien (l-għakrieki), jew in‑nuqqas tiegħu.
Tajba n-nagħġa l-ħallibija.
Bħall-bidwi li jieħu pjaċir bin-nagħġa li tagħti ħafna ħalib, il-manager ta’ xi kumpanija jieħu gost bil-ħaddiema li jaħdmulu u jistinkaw.
Xogħol it-tfal arah fid-dlam.
Wieħed għandu jagħlaq għajn waħda u anke tnejn għax-xogħol li jsir mit-tfal, peress li jkunu għadhom qed jitgħallmu.
Xogħol ta’ bla fejda aħjar il-qgħad minnu.
Xogħol li ma jrendix flus aħjar ma tagħmlu xejn. Fejda tfisser qligħ.
Xogħol ta’ ħorrox borrox, imma l-istokk u ż-żebgħa jgħattu kollox.
Ix-xogħol ħażin hemm mezz kif jitranġa.
Tabib tridu xiħ u barbier żagħżugħ.
Fittex tabib li jkun tal-esperjenza biex ifejqek malajr u barbier li għadu żgħir li jħaffef fix-xogħol.
Min iħallas qabel ħut jinten jiekol.
Tħallasx wisq flus minn qabel għal dak li tkun ordnajt għax ix-xogħol ma jagħmluhulekx sew.
Xogħol ta’ bla għiel aħjar il‑qgħad minnu.
Xogħol li ma jrendix flus aħjar ma tagħmlu xejn. Għiel tfisser qligħ.
Twaħħalx l-imsiemer f’dar is-sultan.
Tagħmilx xogħol f’post li tkun qed tikri, għax xejn ma tgawdi minnu u l‑flus li tkun infaqt.
Min iħallas qabel xogħol ħażin jieħu.
Tħallasx wisq flus minn qabel għal dak li tkun ordnajt għax ix-xogħol ma jagħmluhulekx sew.
Xogħol tal-għaġla ma jiswiex flus.
Bl-għaġla x-xogħol isir ta’ kafkaf u ma jkun jiswa xejn.
Uliedek żoqqhom u ħaddimhom.
Il-ġenituri għandhom jieħdu ħsieb ta’ wliedhom, iżda għandhom ukoll id-dmir li ma jħalluhomx jitgħażżnu.
Żaqq mimlija trid it-tmiddija.
Wara li tiekol ikollok bżonn tmur tistrieħ għax tħossok tqil u għajjien.
Żaqq mimlija, sodda tajba.
Wara li tiekol ikollok bżonn tmur tistrieħ għax tħossok tqil u għajjien.
Żewġ tgħanijiet ma joqogħdux f’għant wieħed.
Meta jkun hemm ħafna nies involuti f’biċċa xogħol l‑affarijiet ma jimxux sew. Tgħan huwa sejf twil.
Wieħed jaqla’ u l-ieħor jaħli.
Wieħed jaħdem u jistinka għall-flus, biex dak kollu li jkun qala’ jgawdih ħaddieħor.
Żewġt isjuf ma joqogħdux f’għant wieħed.
Meta jkun hemm ħafna nies involuti f’biċċa xogħol l‑affarijiet ma jimxux sew.
Siġra tal-luq la tiekol minnha u lanqas idduq.
Qatt ma tara ġid mingħand min hu xħiħ, bl-istess mod li ma tarax xogħol minn min hu għażżien.
Xogħol in-nutar fil-festi sħab mad-diżonesti.
Dari fil-Ħdud u l-festi kkmandati n-nutara kienu jaħdmu minkejja li suppost huwa jum ta’ mistrieħ mix-xogħol, u dan kien jitqies bħala aġir diżonest.
Xogħol qatigħ bażwa kbira trabbi bih.
Ix-xogħol ta’ strapazz huwa ta’ ħsara għas-saħħa.
Xogħol u sabar sa ġol-qabar.
Il-bniedem magħmul biex iqatta’ ħajtu kollha jaħdem u jieħu paċenzja bil-problemi li jħabbat wiċċu magħhom.
Zokk bla friegħi ma jgħallilx.
Min ma jaħdimx ma jaqlax flus. Ma jgħallilx tfisser ma jagħmilx frott.
kategorija
ix-xogħol
Bin is-sengħa għandu nofsha.
L-ulied jirtu ħafna aspetti tal-karattru mill-ġenituri tagħhom.
Dak li ma qattax bi snienu qattgħu bi lsienu.
Minflok ħadem, qagħad jgħid fuq in-nies minn wara daharhom.
Dak li għandek tagħmel aħseb għalih kmieni.
Jekk għandek xi ħaġa x’tagħmel agħmilha minnufih.
Dak li għandek tirhan bigħu.
Jekk għandek xi ħaġa x’tagħmel agħmilha minnufih.
Aħjar tirfes l-irfis ta’ newlek milli għadbiet il-muliel.
Dejjem aħjar taħdem għal rasek milli jkollok taħdem għan-nies.
Aħjar tishar milli tbakkar.
Dak li għandek tagħmel agħmlu llum, mhux għada.
Aħjar waħda maħruqa minn tnejn nejja.
Aħjar tagħmel biċċa xogħol mhux perfetta milli ma tagħmel xejn.
Il-qtates għomja u l-ġrieden imeximxu.
Hemm min japprofitta ruħu mis-sitwazzjoni meta tiġih l-okkażjoni, bħall-ħaddiema li jillaxkaw malli jwarrab ta’ fuqhom.
Aktar ma ndumu nakkordaw milli ndoqqu.
Qed naħlu iżjed ħin nippreparaw milli naħdmu.
Baħri u burdnar qatt ma ssibu kuntent.
Il-baħrin u l-burdnara kellhom xogħol diffiċli ħafna.
Bastiment b’bosta kaptani jmur travers.
Meta jkun hemm ħafna nies involuti f’biċċa xogħol l-affarijiet ma jimxux sew.
Bewla bla bassa, kastell bla għassa.
Kull aspett minn biċċa xogħol għandu jsir tajjeb.
Bewla bla bassa, torri bla għassa.
Kull aspett minn biċċa xogħol għandu jsir tajjeb.
B’idek il-waħda agħġen u bl-oħra keċċi l-qattusa.
Meta tkun għaddej b’biċċa xogħol, ara li ma jkunx hemm min iħarbatlek kollox.
Bidu bil-għawġ tmiem ħażin.
Meta biċċa xogħol tibda ħażin kollox jibqa’ sejjer ħażin.
Bidu tajjeb nofs ix-xogħol.
Meta x-xogħol jibda bit-tajjeb l-affarijiet imorru sew u tgħaġġel iżjed.
Biex tgawdi jeħtieġ tbati.
Xejn ma tagħmel mingħajr tbatija.
Bil-ftit tal-għira kollox jieħu x-xejra.
Biex tagħmel biċċa xogħol tajba trid tagħmel moħħok hemm.
Bil-prattika biss li wieħed jieħu ħaġa sewwa.
Bil-prattika l-aħjar li titgħallem.
Binhar fuq il-bjut u billejl taħli ż-żjut.
Matul il-ġurnata ma jaħdimx imbagħad ipattilu billi jaħdem billejl.
Bis-swat u biż-żmien jitbiżżel l-għażżien.
Bit-tbatija li jġib fuqu nnifsu, l-għażżien ikollu jitgħallem ikun bieżel ukoll.
Bix-xogħol ħotba tagħmel.
Hemm xi wħud li b’xogħolhom xorta waħda ma jleħħqux mal-ħajja, u jkollhom jaqilgħu l-flus minn xogħlijiet oħrajn.
Ċallas ballas ħażin taħdem u agħar titħallas.
Ix-xogħol li jsir ħażin ma ħaqqux jitħallas.
Ċallas ballas kif taħdem titħallas.
Ix-xogħol li jsir ħażin ma ħaqqux jitħallas.
Dak bħas-siġra tal-luq, la tiekol minnha u lanqas idduq.
Min ma jridx jaħdem xejn ma tieħu mingħandu.
Dejjem tikber is-silla, iżda l-ħmar mhux dejjem jirgħa minnha.
Tagħmel ix-xogħol inti u ġieli tispiċċa ma tgawdi xejn minnu.
Fost l-ixirka min jaħdem u min għażżien.
Hemm min jaħdem u hemm min ma jrid jagħmel xejn.
F’xogħol ta’ ħorrox borrox l-istokk u ż-żebgħa jgħattu kollox.
Ix-xogħol ħażin hemm mezz kif jitranġa.
Għajjur f’iklu, għajjur f’xogħlu.
Biex taqla’ x’tiekol trid taħdem u tistinka.
Għajnejn sidha jimlewlha żaqqha l-baqra.
Kulħadd iqis li xogħlu jiswa ħafna flus.
Għal kull għadma hawn mitt kelb.
Il-kompetizzjoni għax-xogħol hija qalila.
Għal melħa ma jħallix il-borma ħelwa.
Għal naqra, agħmel ix-xogħol sew.
Għal naqra melħ tħassarx il-borma.
Għal naqra, agħmel ix-xogħol sew.
Għal tal-aħħar m’hemmx palju.
Ma tistax tieħu l-mertu tax-xogħol li għamlu ta’ qablek.
Għarbiel irqiq trid għalih il-ħobż u d-dqiq.
Għax-xogħol li jirrikjedi ħafna ħin u logħob hemm bżonn tieħu paċenzja u tieħu ħsieb saħħtek.
Għejien ix-xogħol huwa s-sabar.
Biex ix-xogħol isir sew, irid isir bil-paċenzja. Għejien tfisser assistent.
Għum fejn jilħaqlek.
Tiddeffisx għal biċċa xogħol jekk taf li m’intix kapaċi għaliha.
Ħidma fil-btala tmur fis-siba u l-ħala.
Dari kienu jemmnu li Alla jikkastiga lil min jaħdem il-Ħdud u l-festi. Siba tfisser ħerba.
Ħidma fuq il-qalb qajla fejda fih.
Min imur fuq qalbu għax-xogħol sinjal li ma jħossux sodisfatt.
Ħidma għal Alla ma titħallasx.
Azzjoni tajba kif irid Alla ma tistax titħallas bi flus materjali.
Ħidma ta’ sena marret f’siegħa.
Qawl dwar il-logħob tan-nar iżda li japplika wkoll b’mod ġenerali: tkun ilek sena taħdem qatigħ fuq xi ħaġa biex fl-aħħar mill-aħħar tgawdiha għal ftit ħin biss.
Ħidma u bżulija u tfittixx x’tagħmel in-nies.
Agħmel xogħlok u ħallik min-nies.
Biex taqbad il-ħut trid tqum kmieni.
Hemm bżonn tbakkar biex ittella’ x-xogħol.
Ħidma u sabar sal-qabar.
Irridu naħdmu u nieħdu paċenzja sa mewtna.
Ħiss il-miss ġejt, ħiss il-miss mur.
Agħmel xogħlok bil-galbu u l-affarijiet imorru sew.
Ħmar qammas jikser sinslet id-dahar.
L-injorant ma jagħmilx xogħol tajjeb.
Bl-ulied kollha jaqilgħu xi sold, il-missier jista’ jibni fil-fond.
Il-paga tal-ulied isservi wkoll għall-familji li jbatu finanzjarjament.
Ħobż il-bieżel jieklu l-għażżien.
Min hu għażżien japprofitta minn xogħol il-bieżel.
Kliem wisq, fejda ftit.
Dawk li jiftaħru u jparlaw ħafna jkollhom ftit xogħol x’juru fil-verità.
Ħobż u basal u strieħ xħin tasal.
Qabel kienu jieqfu minn biċċa xogħol meta jlestuha biss, u mhux qabel. Kienet ħajja diffiċli.
Id-denb dejjem iniggeż.
L-aħħar naqra ta’ biċċa xogħol dejjem tidher twila u diffiċli.
Id-driegħ għall-ħidma u r-ras għall-misra.
Il-ġisem qiegħed għax-xogħol fiżiku u l-moħħ qiegħed għax-xogħol mentali. Misra tfisser ippjanar.
Ifrex siegħa u orqod kwarta.
It-tbatija dejjem tkun akbar mit-tgawdija.
Il-bieżel ma jsib l-ebda triq magħluqa.
Min jaħdem u jistinka dejjem jasal fejn irid.
Il-bniedem għax-xogħol maħluq.
Mingħajr xogħol il-bniedem bla direzzjoni.
Il-bniedem ħaddmu għal rasu biex tkun taf x’jiswa.
Tara bniedem kemm hu kapaċi meta tħallih jagħmel biċċa xogħol waħdu.
Il-bokra ssewwi ż-żokra.
Min ibakkar (iqum kmieni) ileħħaq jagħmel ħafna matul il-ġurnata.
Għal ħafna subien lesti l-bsaten u t-tmien, għal ħafna bniet lesti ċ-ċraret u l-biċċiet.
Dari s-subien biss kellhom opportunità għal karriera, il-bniet kienu jagħmlu biss ix-xogħol tad-dar. Tmien huma kpiepel.
Il-ġifa jsib xortih.
Min ma jrid jagħmel xejn imur aħjar minn min hu bieżel.
Il-ħierek u l-bieżel jiftiehmu.
Min juri ħeġġa għax-xogħol nies bħalu jfittex. Ħierek tfisser xi ħadd li jitħarrek, jiġifieri li jmidd idejh għax-xogħol.
Il-ħmar ħaddmu għal rasu biex tkun taf x’jagħmel.
Tara bniedem kemm hu kapaċi meta tħallih jagħmel biċċa xogħol waħdu.
Il-ħmar ħaddmu għal rasu biex tkun taf x’jiswa.
Tara bniedem kemm hu kapaċi meta tħallih jagħmel biċċa xogħol waħdu.
Il-ħobż tih lil min jaf jieklu u x-xogħol lil min jaf jagħmlu.
Biex l-affarijiet isiru sew, agħti biċċa xogħol lil min għandu l-ħila jinqala’ għaliha.
Il-kotra tegħleb il-bokra.
Meta nkunu magħqudin inkunu iżjed b’saħħitna u x-xogħol isir iżjed malajr. Bokra ġejja minn bakkar, tqum kmieni.
Il-kotra tegħleb il-qawwa.
Meta nkunu magħqudin inkunu iżjed b’saħħitna u x-xogħol isir iżjed malajr.
Il-maħbeż meta tmissu jaqbeż.
Qis li tlesti x-xogħol li għandek bħalissa qabel ma tibda xogħol ieħor. Maħbeż huwa forn tal-ħobż.
Il-mostra mhix ġostra.
Tgħallem apprezza x-xogħol ta’ ħaddieħor, minflok tipprova tleħħaq miegħu.
Il-qawmien kmieni jsaħħaħ u jtawwal il-ħajja.
Min ibakkar (iqum kmieni) ileħħaq jagħmel ħafna matul il-ġurnata.
Il-qawwa sa ma tibda.
Qabel tibda biċċa xogħol issibha bi tqila, iżda malli tibda tiġi l-enerġija biex tkompli.
Il-ward ifuħ imma l-ħobż jagħtik ir-ruħ.
Ix-xogħol għandu jiġi qabel id-divertiment.
Imċappas bid-demm u laħam ma jikolx.
Tagħmel ix-xogħol inti u ġieli tispiċċa ma tgawdi xejn minnu.
Imsejken ta’ bennej jibni ġebla u jħott tnejn.
Jekk ma tkunx kapaċi f’xogħlok, rigress tagħmel mhux progress.
Inkella r-roqba, inkella l-ħobża.
Fil-passat ċerti xogħlijiet kienu riskjużi, bħal pereżempju xogħol il-baħħara, imma xorta kellu jsir biex taqla’ x’tiekol u tgħajjex lill-familja. Ir-roqba tfisser l-għonq.
Is-sahra u t-tbakkir, iż-żina tal-Maltin.
Il-Maltin magħrufin għal kemm ibakkru (iqumu kmieni) u jaħdmu bi ħġarhom fit-tul.
Faħħar il-baħar u ibqa’ fuq l-art.
Tagħżilx li tmur fuq il-baħar għax huwa xogħol perikoluż.
Is-sawt u ż-żmien ibiżżlu l-għażżien.
Min hu għażżien jeħtieġ li tiddixxplinah fuq medda ta’ żmien twil biex jitgħallem imidd idejh.
Issensel u trempel fl-aħħar il-qanpiena ċċempel.
Jeħtieġ li biċċa xogħol tibdieha biex ikollok tama li xi darba teħlisha.
Is-sħana tax-xemx ma tgħallix patata.
Il-flus trid tbati u taħdem għalihom, bil-ftit ma jsir xejn.
L-aħjar ħut jgħum f’qiegħ il-baħar.
Min jagħmel xogħlu sew u bil-għaqal ma jkunx iħobb jidher.
Issieħeb mal-bieżel u aħrab ’l-għażżien.
In-nies bieżla moħħhom f’xogħolhom mentri l-għażżenin jaraw kif se japprofittaw ruħhom minnek, mela aħrabhom.
Is-siġra ma tagħmilx in-nwar jekk ma ssaqqihiex.
Trid taħdem qatigħ u tieħu interess biex ix-xogħol jirnexxi.
It-tbakkir jagħti s-saħħa.
Tħoss li jkollok iżjed enerġija meta tbakkar (tqum kmieni) għax-xogħol.
It-tiben tagħna fl-aħħar xriek.
Meta tkun qed toqrob lejn l-aħħar ta’ biċċa xogħol twila u tqila, l-enerġija tkun batuta ferm.
Bil-jekk u bil-jewwilla ma timla ebda bixkilla.
L-affarijiet isiru bil-fatti mhux bil-paroli.
Ix-xemgħa tixgħel u l-purċissjoni wieqfa.
Hemm xi jsir iżda ħadd ma jrid jaħdem.
Bil-kliem biss ma nagħmlu xejn.
Ma jsirx xogħol bil-paroli.
Ix-xogħol jeqred il-fies u l-vizzju jeqred in-nies.
L-għodod tax-xogħol jinqerdu bl-użu, iżda l-vizzji jeqirdu l-bniedem. Fies huwa tip ta’ għodda li taqta’ l-ġebel.
Ix-xogħol salmura tal-ġisem.
Ix-xogħol fiżiku jsaħħaħ il-ġisem u jipprevjeni l-mard, bħas-salmura li tippreżerva l-ikel.
Ix-xogħol tal-għaġla ma tantx joħroġ tajjeb.
Meta tgħaġġel biex tagħmel biċċa xogħol, ma tagħmilhiex sew.
Ix-xogħol tar-ras iebes.
Ix-xogħol mentali huwa itqal mix-xogħol manwali.
Ix-xogħol u s-sabar sa ġewwa l-qabar.
Trid taħdem u tieħu paċenzja sa ma tmut.
Ix-xogħol u s-sahar huma missier u omm il-ġid.
Irridu naħdmu u nishru biex nirnexxu u nkunu kuntenti.
Jekk jgħaddas rasu l-imgħallem, jerfa’ rasu l-lavrant.
Jekk l-imgħallem ma jagħtix kas, ma jkunx hemm dixxiplina fuq ix-xogħol.
Jekk ma taqsamx il-bħajjar ma tkunx tista’ tnajjar.
Kien jeħtieġ li l-baħrin imorru jaħdmu fuq il-baħar ’il bogħod minn familthom biex jaqilgħu x’jieklu. Bħajjar huma oċeani u tnajjar tfisser tkampa.
Jekk min jinseġ iżomm il-miċċa, jitwi l-biċċa.
Meta tishar (= taħdem overtime) taqla’ iżjed flus. Miċċa hija ftila.
Jekk ta’ xejn aħslu u erfgħu.
Ħadd ma jagħmillek biċċa xogħol bla flus.
Jiekol bir-riħa u jħallas biċ-ċekċik.
Min ix-xogħol ma jagħmlux sew, ma jaqlax flus.
Kidd ġild ħaddieħor u la qatt tkidd ġildek.
Agħmel xogħlok u ara kif se tieħu vantaġġ fuq ħaddieħor. Il-ġild tirreferi għas-sandli.
Il-baħar duqu qabel ma titla’ fuqu.
Ara li l-ħajja fuq il-baħar tgħodd għalik qabel ma tiddeċiedi.
Kisra tal-art ħelwa u tal-baħar morra.
Ix-xogħol ta’ fuq il-baħar huwa ferm iżjed diffiċli mix-xogħol fuq l-art. Kisra tirreferi għal kisra ħobż.
Kollox sewwa sakemm il-ħobż ikun id-dar.
Sakemm għandek xogħol li qed iqallgħek x’tiekol, m’hemmx problema.
Kulħadd għal senegħtu.
Kulħadd ikun jifhem l-aktar fix-xogħol li jagħmel.
Kulħadd igerger minn xogħlu.
Kulħadd isib id-difetti fix-xogħol li jagħmel.
Kulħadd irid jgħix fid-dinja.
Kulħadd għandu bżonn jaħdem biex jaqla’ x’jiekol fid-dinja.
Dak li ma sarx f’mitt sena mhux se tagħmlu f’jum.
Biex issir xi ħaġa hemm bżonn taż-żmien u l-paċenzja, ma tistax tagħmilha malajr biex teħles.
Kulħadd irid jiekol fid-dinja.
Kulħadd għandu bżonn jaħdem biex jaqla’ x’jiekol fid-dinja.
Il-qgħad id-dar ma fihx għar.
Mara tad-dar m’għandhiex għalfejn tistħi għax li tagħmel xorta xogħol. Għar tfisser mistħija jew għajb.
Kulħadd jaqra fi ktiebu.
Kulħadd f’xogħlu jifhem.
Kulħadd xogħlu jogħġbu.
Kulħadd jara tiegħu tajjeb u ta’ ħaddieħor ħażin, anke fix-xogħol.
Kull bidu huwa qawwi.
Biċċa xogħol tidher iżjed diffiċli qabel tibdieha.
Min jikriha joqgħod għaliha.
Min jidħol għal xi ħaġa, ikollu ma jilmentax u jagħmilha bit-tajjeb u l-ħażin kollha tagħha.
Kull mibdi mitmum.
Biex tispiċċa biċċa xogħol trid tibdieha.
Il-mogħża li tirgħa mhi qatt bil-ġuħ.
In-nies beżlin dejjem isibu x’jagħmlu u jħossuhom sodisfatti.
Min jimxi bil-mod jasal kmieni.
Min jagħmel xogħlu bil-mod u bir-reqqa, jagħmlu aħjar minn min jipprova jgħaġġel biex jeħles.
La kiel il-laħma jeħtieġ imexmex l-għadma.
La intrigajt b’xi biċċa xogħol, agħmilha sew mill-bidu sal-aħħar.
La tgħidx x’jisimha qabel ma tgħammidha.
Biċċa xogħol qis li tlestiha qabel tmur tiftaħar biha.
Min jimxi bil-qajla jasal kmieni.
Min jagħmel xogħlu bil-mod u bir-reqqa, jagħmlu aħjar minn min jipprova jgħaġġel biex jeħles.
Lenbi mġenġel tagħġinx fih.
Tużax għodda mkissra jew difettuża għax ix-xogħol ma joħroġx tajjeb.
L-ewwel il-pappa, imbagħad l-umpappa.
Ix-xogħol u l-istudju jiġu qabel kull divertiment. Il-pappa tirreferi għall-ikel fuq il-mejda u l-umpappa tirreferi għad-daqqa li niżfnu u niddevertu magħha.
La twaħħalx musmar f’dar is-sultan.
Tagħmilx xogħol f’post li tkun qed tikri, għax xejn ma tgawdi minnu u l-flus li tkun infaqt.
L-ewwel ratal dejjem jinħass tqil.
Meta tibda biċċa xogħol, l-ewwel ftit dejjem jinħass diffiċli sakemm tikkarga.
Min jistedinha joqgħod għaliha.
Min jidħol għal xi ħaġa, ikollu ma jilmentax u jagħmilha bit-tajjeb u l-ħażin kollha tagħha.
L-ewwel terz għali.
Meta tibda biċċa xogħol, l-ewwel ftit dejjem jinħass diffiċli sakemm tikkarga.
L-ewwel terz inbid dejjem qares itiegħem.
Meta tibda biċċa xogħol, l-ewwel ftit dejjem jinħass diffiċli sakemm tikkarga.
L-għażżien xogħlu għali.
Min jevita x-xogħol jispiċċa jgħaddi minn iżjed tbatija għax ix-xogħol ma jkunx għamlu sew mill-ewwel.
L-għażżien xogħlu tqil.
Min jevita x‑xogħol jispiċċa jgħaddi minn iżjed tbatija għax ix‑xogħol ma jkunx għamlu sew mill‑ewwel.
L-għodda iġborha u għoddha.
L-għodda tiegħek ħu ħsiebha sew.
L-idejn imgħaref tal-fidda, xħin taħsilhom jiġu ġodda.
L-idejn huma għodda importanti għax-xogħol tal-idejn, u m’għandekx tiddejjaq tħammiġhom biex taħdem.
L-imgħax itajjar in-ngħas.
Tagħmel iżjed kuraġġ fix-xogħol meta tara l-flus deħlin.
L-għażż missier il-faqar.
Min hu għażżien u bla ħeġġa jbati ħafna u jgħix fil-bżonn u fil-faqar.
L-irqad jagħmel il-ħmira.
Huwa importanti li torqod sabiex iġġib lura saħħtek u tissokta b’xogħlok.
Is-subien jaħsbu fix-xwieni u l-bniet jaħsbu fil-ġejjieni.
Dari s-subien kienu jfittxu xogħol fuq il-baħar, mentri l-bniet kienu jaħsbu biex ikollhom familja.
In-naħal jaħdem u r-reġina tieħu l-ġieħ.
Il-ħaddiema jaħdmu u jbatu u ta’ fuqhom igawdu l-frott ta’ xogħolhom.
L-istokk u ż-żebgħa jgħattu kollox.
Ix-xogħol ħażin hemm mezz kif jitranġa.
Ma jafx isajjar min ma jafx inajjar.
Biex tagħmel biċċa xogħol sew, trid tkun taf l-elementi bażiċi. Inajjar tfisser jieħu ħsieb in-nar.
Ma jafx x’inhu serħan min qatt ma ħadem.
Tkun taf x’inhu serħan meta tbati f’xogħlok.
Ma tismax minni, ma tikolx ħobżi.
Jew tagħmel kif ngħidlek jiena, jew ma nqabbdekx tagħmel xogħol iżjed.
Is-sajjied jgħid li l-art ħabel tajjeb.
In-nies jaħsbu li xogħolhom biss fih impenn. Ħabel tfisser għalqa.
Meta għandek maħbeż la żżidx ieħor, ħallih jaħbeż.
Meta jkollok furnata ħobż (= maħbeż) qiegħda tinħema, stennieha qabel tibda oħra, bl-istess mod li għandek taqbad biċċa xogħol oħra ladarba tlesti dik li għandek f’idejk issa.
Meta jorqod il-qattus, il-ġrieden joħorġu.
Jekk l-imgħallem ma jagħtix kas, ma jkunx hemm dixxiplina fuq ix-xogħol.
Mhux kull min għandu wiċċu mġemmed sar ħaddied.
Mhux imbilli tkun tagħmel ċertu xogħol jew tkun ta’ xi sengħa, trid tkun tassew tinqala’ fih(a).
Mid-dar ma jiġix qamħ.
Min hu għażżien u joqgħod id-dar ma jagħmel xejn minflok jaħdem, ma jaqlax flus.
Ix-xemx issaħħan imma l-ebda borma ma tgħalli.
Trid taħdem u tistinka biex taqla’ l-flus.
Min għandu ħalqu jrid jiekol.
Kulħadd għandu bżonn isib xogħol biex jaħdem u jaqla’ l-għajxien tiegħu.
Min hu għajjien jistrieħ.
Min għejjieh ix-xogħol jistrieħ u jiddeverti sabiex ikollu s-saħħa jkompli wara.
Min hu għajjur f’iklu, għajjur f’xogħlu.
Jekk trid tiekol tajjeb jeħtieġ li tmidd idejk u taħdem.
Min ibati jgawdi.
Min jaħdem u jistinka jgawdi.
Min iħobb it-tibkir raġel isir.
Min ibakkar (= iqum kmieni) għax-xogħol isir bniedem iddixxiplinat.
Min iħabrek jaqlagħha.
Min jaħdem u jistinka jitħallas tajjeb ta’ xogħlu.
Min irid igawdi jeħtieġ l-ewwel ibati.
Biex tgawdi trid taħdem u tistinka.
Min irid il-bajd frisk, ikollu jbati t-tlaqliq tat-tiġieġ.
Biex tgawdi trid taħdem, tistinka u tieħu paċenzja.
Min irid il-lillu jishar.
Biex tgawdi trid taħdem, tistinka u tieħu paċenzja. Jishar tfisser jaħdem overtime.
Min irid jirkeb jeħtieġ iniegħel.
Min irid igawdi jeħtieġ li jagħmel ix-xogħol diffiċli jew antipatku wkoll biex jasal. Iniegħel tfisser ilibbes in-nagħla liż-żiemel.
Min isuq wisq ħażin jogħtor il-ħmar.
Min f’xogħlu ma jurix impenn, ibati u ma jagħmlux sew.
Min jaf inajjar jaf isajjar.
Biex tagħmel biċċa xogħol sew, trid tkun taf l-elementi bażiċi. Inajjar tfisser jieħu ħsieb in-nar.
Min jagħmel il-fuħħar iqiegħed widnejn il-borma fejn jidhirlu l-aħjar.
Min hu tas-sengħa jkun jinqala’ f’xogħlu u jkun jaf kif imorru l-affarijiet.
Nagħġa li ma taqtax bi snienha ma tagħtix ħalib.
Min ma jaħdimx u ma jistinkax imkien ma jasal.
Min jaħdem fl-irqiq irid jiekol.
Min jagħmel xogħol tedjanti jew diffiċli fiżikament jeħtieġ jiekol sew.
Min jaħdem jaħġem.
Min jagħmel xogħol diffiċli fiżikament jeħtieġ jiekol sew. Jaħġem tfisser jibla’ (l-ikel).
Il-bniedem l-inkwiet joqtlu mhux ix-xogħol.
Huwa l-inkwiet li jagħmel ħsara lill-bniedem, mhux ix-xogħol.
Min jaħdem jiekol sardina u min ma jaħdimx jiekol gallina.
L-għażżien jew min ma ħaqqux igawdi minn fuq dahar min jagħmel xogħlu sew.
Oqgħod qgħadek, ara darek, ħares saħħtek u agħmel fagħlek.
Kun fejn għandek tkun, ħu ħsieb darek, ħu ħsieb saħħtek u agħmel xogħlok (fagħlek).
Min jaħdem l-iżjed jiekol l-inqas.
L-għażżien jew min ma ħaqqux igawdi minn fuq dahar min jagħmel xogħlu sew.
Min jerfa’ l-qatta qatt ma għandu biex jitgħatta.
Min jagħmel xogħol mhux imħallas tajjeb ma jgħixx komdu.
Min jerfa’ qofftu mhux pastaż.
Min jagħmel xogħlu u jieħu ħsieb l-affarijiet tiegħu m’għandux għalfejn iħossu skomdu jew jistħi. Fl-imgħoddi, il-pastaż kien reffiegħ li jdur mat-toroq jiffitta lin-nies biex għal ftit soldi jġorrilhom sad-dar il-qfief u tagħbijiet oħra. Il-pastaż kien bla manjieri,...
Min jerfa’ sorrtu mhux pastaż.
Min jagħmel xogħlu u jieħu ħsieb l-affarijiet tiegħu m’għandux għalfejn iħossu skomdu jew jistħi. Fl-imgħoddi, il-pastaż kien reffiegħ li jdur mat-toroq jiffitta lin-nies biex għal ftit soldi jġorrilhom sad-dar il-qfief u tagħbijiet oħra. Il-pastaż kien bla manjieri,...
Min jgħid kontra s-sengħa ma jsirx mgħallem.
Min imaqdar xogħlu qatt ma jitgħallmu sew.
Alla jxiegħel lill-battal.
Donnu x-xogħol Alla jagħtih lil min ma jaħdimx.
Min jibda tajjeb għandu nofs it-triq.
Min jibda biċċa xogħol tajjeb, ikompliha tajjeb.
Min jibqa’ wara jsakkar il-bieb.
Min jitlaq tal-aħħar minn xi mkien, jitwikka bil-kompitu li jagħlaq u jsakkar il-post.
Min jibża’ għal dahru, m’għandux xi jridu l-luħ.
L-għażżien għalxejn tafdah b’xi biċċa xogħol għax ma jagħmilhiex. Luħ huwa pala tal-injam.
Min jidra bis-sisija, la jrid xogħol u lanqas tbatija.
Mix kielu l-għażż u dara jgħix minn fuq dahar ħaddieħor, ma jkunx irid jaħdem u jbati. Is-sisija hija l-karità.
Min jidra l-qgħad, jidra l-għażż.
Mix kielu l-għażż u dara jgħix minn fuq dahar ħaddieħor, ma jkunx irid jaħdem u jbati.
Min jiekol il-laħma jeħtieġ imexmex l-għadma.
La intrigajt b’xi biċċa xogħol, agħmilha sew mill-bidu sal-aħħar.
Min jiġri wisq jaqta’ nifsu.
Meta tgħaġġel biex tagħmel biċċa xogħol, ma tagħmilhiex sew.
Qabel ma tidħol aħseb mnejn toħroġ.
Qabel ma tintriga b’xi biċċa xogħol, ara li tkun kapaċi toħroġ minnha jekk jinqala’ xi ħaġa.
Min jimxi bir-riħ isib ruħu f’nofs it-triq.
Min diġà jibda b’vantaġġ fuq ħaddieħor, aktar għandu ċans jirnexxi.
Min jirkeb jeħtieġlu jniegħel.
Min irid igawdi jeħtieġ li jagħmel ix-xogħol diffiċli jew antipatku wkoll biex jasal. Iniegħel tfisser ilibbes in-nagħla liż-żiemel.
Min jitrabba fl-għażż jitbiżżel fil-ħjieġ.
Min hu għażżien xorta waħda jiġi bżonn (= il-ħjieġ) il-flus u jkollu jaħdem (= jitbiżżel) bħal ħaddieħor.
Min ma jaħdimx ma jikolx.
Min ma jaħdimx, ma jaqlax flus u ma jkollux biex jimla żaqqu.
Min ma jbatix ma jgawdix.
Trid taħdem u tbati biex tkun tista’ tgawdi.
Mingħajr armi għaliex toħroġ?
Ma tistax tagħmel xogħol tajjeb mingħajr l-għodda t-tajba, bħall-kaċċatur li bla senter ma jistax jikkaċċja.
Mingħajr għodda ma taħdimx.
Ma tistax tagħmel xogħol tajjeb mingħajr l-għodda t-tajba.
Qatt tħalli f’idejn ħaddieħor dak li tista’ tagħmel int stess.
Jekk trid li biċċa xogħol issir sew, agħmilha int u tħallix f’idejn ħaddieħor.
Qatt tibda xejn qabel ma tara kif tispiċċah.
Biex jirnexxu, jeħtieġ li l-affarijiet tippjanahom sew mill-bidu sal-aħħar qabel tibda.
Mix-xogħol tal-Ħadd jibża’ kulħadd.
Superstizzjoni li jekk bniedem jaħdem il-Ħadd, li suppost huwa jum ta’ mistrieħ iddedikat għal Alla, iġib is-saħta fuqu.
Naħdem u nsir kagħba mqar ġie x’ħadu l-għada.
Dari n-nisa romol kellhom jaħdmu saħansitra fi xjuħithom u sa mewthom biex ikunu jistgħu jgħixu. Kagħba tfisser mara xiħa ħafna.
Orqod mat-tiġieġ u qum mas-serduq.
Mur orqod kmieni u qum kmieni.
Pappi llum u pappi għada, iċċiċċi ħajt u tpappi ġebla.
Min ma jridx jaħdem issa għad jiddispjaċih fil-futur, meta jfittex il-flus u ma jsib xejn.
Pont bis-sahra jitma’ ’l-ħmar.
Dari min kien jaf iħit (= pont tal-ħjata), kien jaqla’ xi ħaġa żejda tal-flus.
Qasba mġelġla tajba biss għaċ-ċekċika biex tnaffar iċ-ċawl.
Biċċa għodda li tkun difettuża eħles minnha għax inkella x-xogħol ma joħroġx tajjeb.
Qatt issiefer b’riħ ħażin.
Tibdiex biċċa xogħol meta diġà tkun taf li bdejt bi żvantaġġ.
Qatt tgħid x’taf tagħmel.
Toqgħodx turi kemm taf tagħmel xi ħaġa, għax iwaħħlulek aktar xogħol.
Qatt tħalli s-sħiħ għar-riħ.
Ix‑xogħol u l‑istudju jiġu qabel kull divertiment.
Qroqqa lieżma tfaqqas qabel l-għoxrin.
Min hu bieżel mhux talli jleħħaq max-xogħol, talli jeħilsu qabel. Lieżma tfisser diliġenti u l-għoxrin tirreferi għall-jum li fih ifaqqas il-bajd wara li l-qroqqa tkun għamlet xogħolha sew.
Ragħaj tajjeb iġiżż u mhux iqaxxar.
Min ikun tas-sengħa jaf kif għandu jmur ix-xogħol.
Imur il-ġid u l-ġidejn u tibqa’ l-ħidma tal-idejn.
Sakemm ikollok saħħtek, ma jkun ġara xejn jekk titlef ġidek kollu. Tista’ terġa’ tibda mill-bidu u taħdem għalih. Ġidejn tfisser ġid kbir.
Sawwar il-borom iqiegħed il-widna fejn irid hu.
Min hu tas-sengħa jaf sew x’għandu jagħmel f’xogħlu.
Min jikser it-tub bin-nisa ma jaħsadx bosta.
Ix-xogħol fiżiku jinqalgħu iżjed għalih l-irġiel milli n-nisa.
Sieħeb senegħtek għaduk imqar kien ħuk.
Tnejn min-nies li jkunu fl-istess xogħol jew negozju jkunu qed jikkompetu ma’ xulxin, u allura huma għedewwa, saħansitra jekk ikunu qraba tiegħek.
Min hu man-nies jew bla saħħa jew bla ġieħ.
Min jaħdem man-nies biex jirnexxi jrid jew jaħdem sakemm jispiċċa bla saħħa, jew inkella jitlef ġieħu għax ibigħ lilu nnifsu.
Sinjur, ipprovdi lill-għażżien għax il-bieżel jiddubbaha minn kullimkien.
Min jaħdem u jistinka jgawdi frott ħidmietu, mentri l-għażżien mix-xejn ma jgawdi xejn.
Sliħ id-denb l-aqwa.
L-aħħar ftit ta’ biċċa xogħol titlob sforz kbir, għax tkun għejejt u l-motivazzjoni tkun baxxa ħafna, bl-istess mod li tal-laħam jisloħ id-denb l-aħħar xogħol.
Ta’ bilfors ixebba’.
Ix-xogħol li jsir ta’ bilfors ixebbgħek għax ma tagħmlux minn qalbek.
Ta’ bla għaraq ma tgawdihx.
Dak li takkwista mingħajr ma tkun ħdimt u stinkajt għalih (wirt, flus, eċċ.) ma tgawdihx għax ma tapprezzahx.
Tagħbija mqassma tajjeb taħfi.
Meta x-xogħol jitqassam bejn kulħadd b’mod ibbilanċjat, il-piż jeħfief u t-tbatija tonqos. Taħfi tfisser tnaqqas it-tagħbija.
Tagħmilx aktar milli tiflaħ.
M’għandek qatt tagħmel aktar xogħol jew taċċetta responsabbiltajiet aktar milli tiflaħ, għax ma tleħħaqx u tagħmel ħsara lil saħħtek.
Tal-ewwel ibewwel u tal-aħħar ibaħħar.
Dak li jkolli jagħmel l-ewwel xogħol, irid isegwi sew l-istruzzjonijiet u jibża’ mill-iżbalji. Dak tal‑aħħar ikollu d‑dmir li jtemm il‑ħimda li tkun qed issir, u b’hekk ilaqqat ix‑xogħol kollu li jkun għad fadal. Barra minn dan, kienet popolari s‑superstizzjoni fejn...
Min jaqla’ u min iħawwel.
Ix-xogħol ta’ kulħadd huwa importanti, bħal fix-xogħol tal-għalqa.
Tajra faqqasija minn waħda toktor mija.
Aktar ma bniedem ikun iħabrek u jaħdem, aktar itella’ xogħol.
Terfax aktar milli tiflaħ.
M’għandek qatt tagħmel aktar xogħol jew taċċetta responsabbiltajiet aktar milli tiflaħ, għax ma tleħħaqx u tagħmel ħsara lil saħħtek.
Tgħallem mitt sengħa u agħmel waħda.
Apparti x-xogħol ewlieni tiegħek, fil-ħajja jeħtieġ li titgħallem naqra minn kollox biex tkun tista’ tkampa meta tiġi bżonn.
L-iskola tiswa.
L-iskola tgħin biex wieħed jiftaħ moħħu, kif ukoll biex isib xogħol tajjeb.
Tibla’ ljunfant u tixraq f’nemusa.
Tagħmel l-iżjed xogħol diffiċli u tedjanti, imbagħad tqajjem plejtu għall-affarijiet iż-żgħar.
Orqod fil-frugħa, oqgħod fid-djieq u min jirtek jistgħall ġidek sieq fuq sieq.
Flusek aħdem għalihom u gawdihom inti waqt li għadek ħaj, għax jekk le tkun qed tpaxxihom lill-werrieta. Fil-frugħa tfisser fit-tbatija, fid-djieq tfisser fin-nieqes u jistgħall tfisser igawdi.
Tifħir bla qligħ ma jimliex il-but.
Min joqgħod ifaħħrek ta’ xogħlok mhux biżżejjed, jeħtieġ ukoll titħallas tiegħu.
Tiġieġa ħawtiela bajjada.
Tiġieġa bieżla tagħmel bajd sabiħ, bħal min jistinka biex jagħti prodott sabiħ. Ħawtiela tfisser ħabrieka u bajjada tfisser li tbid.
Tiġieġa li tfelles tajjeb għożżha.
Ibża’ għat-tiġieġa li tfaqqas il-bajd, bl-istess mod li għandek tibża’ għal min jaħdem u jistinka fin-negozju tiegħek.
Tnejn ta’ sengħa waħda għedewwa ta’ xulxin.
Tnejn min‑nies li jkunu fl‑istess xogħol jew negozju jkunu qed jikkompetu ma’ xulxin, u allura huma għedewwa, saħansitra jekk ikunu qraba tiegħek.
Tqabbilx il-ġnien lill-għażżien.
Tafdax affarijiet jew proġetti għal qalbek f’idejn min ma jrid jagħmel xejn.
Trabba fil-għażż u tbiżżel fil-ħjieġ.
Huwa persuna li trabba f’ħafna fsied iżda meta fil-futur ġie fil-bżonn, xammar il-kmiem u ħadem. Ħjieġ tfisser bżonn.
Wara l-mejkla hemm min jerġa’ għax-xogħol, u hemm min jiġri għall-miġles.
Wara l-ikla, hemm min jerġa’ jmur lura għax-xogħol mill-ewwel biex ma jitlifx ħin u hemm min imur jistrieħ qabel ikompli fuq xogħlu. Mejkla tfisser ikla żgħira u miġles huwa bank tal-ġebel mingħajr dahar, li kienu joqogħdu bilqiegħda fuqu fl-imgħoddi f’xi kappelli jew...
Xejn ma jagħti xejn iżda x-xogħol iħalli xi fejda.
Ix-xogħol jagħtik il-flus u s-sodisfazzjon, iżda l-għażż ma jtik xejn.
Xidd il-qorq u xammar kmiemek imbagħad ħajjitek.
Jeħtieġ li dak li jkun jitħallas b’mod xieraq tax-xogħol li jkun għamel, ir-rikonoxximent u l-gratitudni mhumiex biżżejjed.
Sajjied bla lixka ma jaqbadx vopi.
Biex ix-xogħol jirnexxi, jeħtieġ li jkollok il-mezzi u l-għodda t-tajba.
Xkora mimlija timtedd trid.
Wara li tiekol ikollok bżonn tmur tistrieħ għax tħossok tqil u għajjien.
Min jiftaħ għajnejh irewwaħ ġismu.
Min jitgħallem isib xogħol komdu, mingħajr tbatija fiżika.
Ta’ li taħdem titħallas.
Titħallas skont kif u kemm tagħmel xogħol.
Xkora vojta ma tiqafx.
Meta bniedem ikun bil-ġuħ ma jagħmilx xogħol tajjeb, jeħtieġ li żaqqu tkun mimlija.
Timxi qajla u tasal kmieni.
Min jagħmel xogħlu bil‑mod u bir‑reqqa, jagħmlu aħjar minn min jipprova jgħaġġel biex jeħles.
Xogħol bla ħlas qisu raġel bla ras.
Ix-xogħol biex isir tajjeb irid jitħallas.
Min iħażżaq wisq ma jaqbad xejn.
Min irid wisq (flus, fama, eċċ.) jispiċċa ma jkollu xejn, bl-istess mod li min jidħol għal wisq xogħol jispiċċa ma jleħħaqx miegħu.
Xogħol il-aġir nofs serħ u nofs tmattir.
Meta tħaddem in-nies bil-ġurnata (= il-aġir) iktar jgħaddu l-ħin ma jagħmlu xejn milli jaħdmu.
Taħdem u tistinka u d-dublett dejjem bla ċinta.
Minkejja x‑xogħol kollu tagħmel, xorta waħda ma taqlax biżżejjed biex tgħix komdu.
Xogħol il‑bieżel jieklu l‑għażżien.
Min hu għażżien japprofitta minn xogħol il‑bieżel.
Taħdem u tistinka u l-qalziet dejjem bla ċinta.
Minkejja x-xogħol kollu tagħmel, xorta waħda ma taqlax biżżejjed biex tgħix komdu.
Xogħol il-bieżel jiswa tnejn, xogħol l-għażżien jisfa fix-xejn.
Ix-xogħol ta’ min hu bieżel isir tajjeb ħafna u jpatti għax-xogħol traskurat ta’ min hu għażżien, jew in-nuqqas tiegħu.
Xogħol il-għakrieki jiswa n-nofs tal-ħabrieki.
Ix‑xogħol ta’ min hu bieżel (il-ħabrieki) isir tajjeb ħafna u jpatti għax‑xogħol traskurat ta’ min hu għażżien (l-għakrieki), jew in‑nuqqas tiegħu.
Tajba n-nagħġa l-ħallibija.
Bħall-bidwi li jieħu pjaċir bin-nagħġa li tagħti ħafna ħalib, il-manager ta’ xi kumpanija jieħu gost bil-ħaddiema li jaħdmulu u jistinkaw.
Xogħol it-tfal arah fid-dlam.
Wieħed għandu jagħlaq għajn waħda u anke tnejn għax-xogħol li jsir mit-tfal, peress li jkunu għadhom qed jitgħallmu.
Xogħol ta’ bla fejda aħjar il-qgħad minnu.
Xogħol li ma jrendix flus aħjar ma tagħmlu xejn. Fejda tfisser qligħ.
Xogħol ta’ ħorrox borrox, imma l-istokk u ż-żebgħa jgħattu kollox.
Ix-xogħol ħażin hemm mezz kif jitranġa.
Tabib tridu xiħ u barbier żagħżugħ.
Fittex tabib li jkun tal-esperjenza biex ifejqek malajr u barbier li għadu żgħir li jħaffef fix-xogħol.
Min iħallas qabel ħut jinten jiekol.
Tħallasx wisq flus minn qabel għal dak li tkun ordnajt għax ix-xogħol ma jagħmluhulekx sew.
Xogħol ta’ bla għiel aħjar il‑qgħad minnu.
Xogħol li ma jrendix flus aħjar ma tagħmlu xejn. Għiel tfisser qligħ.
Twaħħalx l-imsiemer f’dar is-sultan.
Tagħmilx xogħol f’post li tkun qed tikri, għax xejn ma tgawdi minnu u l‑flus li tkun infaqt.
Min iħallas qabel xogħol ħażin jieħu.
Tħallasx wisq flus minn qabel għal dak li tkun ordnajt għax ix-xogħol ma jagħmluhulekx sew.
Xogħol tal-għaġla ma jiswiex flus.
Bl-għaġla x-xogħol isir ta’ kafkaf u ma jkun jiswa xejn.
Uliedek żoqqhom u ħaddimhom.
Il-ġenituri għandhom jieħdu ħsieb ta’ wliedhom, iżda għandhom ukoll id-dmir li ma jħalluhomx jitgħażżnu.
Żaqq mimlija trid it-tmiddija.
Wara li tiekol ikollok bżonn tmur tistrieħ għax tħossok tqil u għajjien.
Żaqq mimlija, sodda tajba.
Wara li tiekol ikollok bżonn tmur tistrieħ għax tħossok tqil u għajjien.
Żewġ tgħanijiet ma joqogħdux f’għant wieħed.
Meta jkun hemm ħafna nies involuti f’biċċa xogħol l‑affarijiet ma jimxux sew. Tgħan huwa sejf twil.
Wieħed jaqla’ u l-ieħor jaħli.
Wieħed jaħdem u jistinka għall-flus, biex dak kollu li jkun qala’ jgawdih ħaddieħor.
Żewġt isjuf ma joqogħdux f’għant wieħed.
Meta jkun hemm ħafna nies involuti f’biċċa xogħol l‑affarijiet ma jimxux sew.
Siġra tal-luq la tiekol minnha u lanqas idduq.
Qatt ma tara ġid mingħand min hu xħiħ, bl-istess mod li ma tarax xogħol minn min hu għażżien.
Xogħol in-nutar fil-festi sħab mad-diżonesti.
Dari fil-Ħdud u l-festi kkmandati n-nutara kienu jaħdmu minkejja li suppost huwa jum ta’ mistrieħ mix-xogħol, u dan kien jitqies bħala aġir diżonest.
Xogħol qatigħ bażwa kbira trabbi bih.
Ix-xogħol ta’ strapazz huwa ta’ ħsara għas-saħħa.
Xogħol u sabar sa ġol-qabar.
Il-bniedem magħmul biex iqatta’ ħajtu kollha jaħdem u jieħu paċenzja bil-problemi li jħabbat wiċċu magħhom.
Zokk bla friegħi ma jgħallilx.
Min ma jaħdimx ma jaqlax flus. Ma jgħallilx tfisser ma jagħmilx frott.
Il-qwiel kollha, f’post wieħed.