Jekk se tipprostitwixxi ruħek (= tiżżiegħeb), aqla' flus kemm tiflaħ.
Mara bla żaqq bħal tieġ bla daqq.
Mara bla tfal mhix mara kuntenta.
Xi wħud mill-qwiel b’rabta man-nisa u l-irġiel jagħtuna perspettiva antikwata tar-rwoli tagħhom fis-soċjetà, u ma jirriflettux neċessarjament il-valuri moderni. Ħudhom għaldaqstant minn lenti storika. Apprezza r-rikkezza lingwistika u kulturali waqt li żżomm f’moħħok li ż-żminijiet u l-attitudnijiet inbidlu.
Mara lesta għall-ġlied ma żżarradx żnied.
Mara ġellieda qis li twarrabha.
Mara, meta tkun qed tfittixha, taqrahiex minn wiċċha.
Wiċċ mara huwa importanti daqs il-karattru tagħha.
Mara li tkellmek tidħaq, trid tqarraq bik; dik li tkellmek tibki, tkun qarrqet bik.
Il-mara tkun lesta tqarraq bir-raġel f’kull ħin.
Meta tasallek il-ħasla tħabrek l-għażla.
Darba fix-xahar il-mara tkun taf inqabditx tqila, skont jiġihiex demm (= il-ħasla).
Mara b’tarbija ma tesagħhiex ta’ Brija.
Mara għandha toqgħod id-dar tieħu ħsieb it-tarbija. It-Triq ta’ Brija hija triq is-Siġġiewi.
Il-kliem żejjed ħallih għan-nisa.
Tgħid xejn bla bżonn.
Għonq bla ras, tina bla toqba u tifla bla mistħija la fihom ħajr u lanqas ħotba.
Mara bla pudur ta' min jaħrabha.
Il-mara tgħabbi daqs bagħal, ir-raġel jimla daqs għar.
Sabiex il-mara jkollha x’tonfoq, ir-raġel irid ibati f’xogħlu.
Il-mara ta’ fqajjar qatt ma tmur tittajjar.
Mara li trid tieħu ħsieb familja fqira m’għandhiex ċans għall-frivolitajiet.
Raġel id-dar, ħatba fin-nar.
Raġel li joqgħod id-dar, joqgħod jindaħal lil martu.
Raġel id-dar, xitan fuq xkaffa.
Raġel li joqgħod id-dar, joqgħod jindaħal lil martu.
Lil ibnek kif trabbih u ‘l żewġek kif iddarrih.
Il-mara trid iddarri r-raġel mod ieħor min kif kien jagħmel għand ommu, u t-tfal jikbru skont kif trabbihom.
Raġel jaħlef u mara tibki temminhomx f’li jgħidulek.
M’għandekx temmen raġel li jaħlef u mara li tibki.
Ir-raġel ġiebja u l-mara sieqja.
Ir-raġel jaħdem għall-flus u l-mara tberbaqhom.
Meta x-xebba tmur tiġbor il-kappara, żgur bid-dnewwa toħroġ minn darha.
Dari x-xebbiet tal-affari tagħhom ma kinux joħorġu waħedhom mid-dar, u dawk li kienu jagħmlu hekk (bħal pereżempju biex jiġbru l-kappar), kienu jitqiesu bħala sfrattati.
Agħtini r-raġel mingħajr sħabu.
Mara tkun trid lir-raġel tagħha għaliha biss, ma tkunx tridu jkollu l-ħbieb jinfluwenzawh.
Il-mara mżejna minn butha mdejna.
Mara responsabbli ma tberbaqx flus.
Raġel jaħlef u mara tibki temminhomx f’li jgħidulek.
M’għandekx temmen raġel li jaħlef u mara li tibki.
Id-dmugħ tal-mara bħall-bnazzi fix-xitwa.
Id-dmugħ tal-mara, dmugħ tal-kukkudrilli.
Mara sabiħa, id-dota ġewwa.
Mara sabiħa dejjem issib min iridha.