il-verità u l-onestà
Il-verità u l-onestà jitilfu llum iżda jirbħu għada.
Min tagħmlu baħar ikun għadira.
Hemm min taħsbu bravu ħafna jew għandu ħafna flus, iżda ma jkun veru xejn.
Min ma jiftaħx għajnejh, jifħuhomlu.
Min ma jarax il-verità minn jeddu, jaraha wara li xi ħadd ikun għaddieh biż-żmien.
Min jisma’ żewġ quddisiet imut ikkalzrat.
Superstizzjoni li min jilgħabha tal-qaddis imbagħad jagħmel il-ħażin, jiġi kkastigat minn Alla u jmur il-ħabs (= ikkalzrat).
Min jidħaq l-aħħar jidħaq l-aħjar.
Il-verità dwar min tassew kellu raġun jew suċċess toħroġ wara li jgħaddi ż-żmien, minkejja d-diffikultajiet tal-bidu.
Min jaħbi hemmu jifga f’demmu.
Min ma jiftaħx qalbu biex jaħbi d-dwejjaq li jkollu (= hemmu), ibati ħafna.
Min jaħbi għommtu jifga fiha.
Min ma jiftaħx qalbu biex jaħbi d-dwejjaq li jkollu (= għommtu), ibati ħafna.
Min irid iqarraq bik ħaġa b’oħra jurik żgur.
In-nies li jridu jqarrqu bik minn kollox jagħmlu biex jaslu fejn iridu.
Min iħobbok ikun irid jisolħok.
Qis li toqgħod attent minn min irid iqarraq bik billi jġiegħlek temmen li jħobbok.
Min iħawwar il-borma jkun jaf x’fiha.
Min ikun direttament involut f’xi ħaġa jkun jaf sew x’ġara u ma ġarax.
Min jgħawwed jgħawweġ.
Bil-gideb u t-tgħawwiġ tal-fatti, il-bniedem ħażin jagħmel il-ħażin u jerġa’ (= jgħawwed).
Min jgħid is-sewwa wisq drabi jidħol ġewwa.
Min jgħid il-verità jispiċċa jiġi kkastigat u saħansitra jmur il-ħabs (= jidħol ġewwa).
Min ifittex ‘il ommu wisq isibha mara ħażina.
Min isaqsi ħafna mistoqsijiet u jsir jaf persuna jew sitwazzjoni aħjar, jinduna li hemm ħafna ikrah mas-sabiħ.
Min għandu sebgħu dritt minn xejn ma jibża’.
Min hu onest u ġust m’għandu għalfejn jibża’ minn ħadd u minn xejn.
Mill-milja tal-qalb jitkellem il-fomm.
Min hu onest ma jibżax jesprimi ruħu, għax ikun qed jgħid il-verità.
Mhux kulma jleqq du deheb.
L-apparenza tqarraq bik.
Mhux kull tbissima tislima.
Mhux kull min jitbissimlek jew jidħaqlek jixtieqlek il-ġid.
Mhux kull min jagħti fuq sidru qaddis.
L-apparenza tqarraq bik; hemm min irid jidher qaddis iżda mhux.
Mhux kull min ikanta hu ferħan.
Hemm min jidher ferħan iżda f’qalbu jkun imdejjaq.
Mhux kull min għandu snienu bojod jiekol il-ġobon.
L-apparenza tqarraq bik.
Mhux dak biss li joħroġ jisraq billejl jissejjaħ ħalliel.
Hemm diversi modi kif tisraq, fosthom billi tbigħ jew tagħti servizz bi prezzijiet qarrieqa.
Mgħallem ħażin igerger mill-għodda.
Min ma jinqalax f’xogħlu jara fiex ser iwaħħal biex ma jidhirx ikrah.
Meta l-volpi ma kienx jilħaq l-għeneb, qal li kien qares.
Min ma jkunx jista’ jikseb xi ħaġa jmaqdarha.
Meta l-qasba tagħmel ċaqq, jew maqsuma jew bix-xaqq.
Xi ftit verità jkun hemm fit-tqasqis tan-nies.
La ħarġet minn qalbi, ħarġet minn fommi.
Kun sinċier, għidha kif tħossha.
Iż-żejt jitla’ f’wiċċ l-ilma.
Il-verità dejjem toħroġ.
Is-sewwa m’hemmx isbaħ minnu.
Dejjem kun onest u għid il-verità.
Is-sewwa agħraġ iżda jimxi ‘l quddiem.
Il-verità ddum ma toħroġ iżda xi darba tasal ukoll, bħaz-zopp (= agħraġ) li jdum ma jasal fejn jixtieq.
Is-sbuħija f’għajnejn min jara.
Is-sbuħija hija suġġettiva ħafna.
Il-qniepen ma jdoqqux xorta.
Kulħadd għandu l-verżjoni tiegħu tal-istorja, jiġifieri tismax persuna waħda biss.
Il-qalb teħber.
Jiġu ċirkostanzi fejn inħossu x’ser jiġri.
Il-qasba ma ċċaqċaqx għalxejn.
Xi ftit verità jkun hemm fit-tqasqis tan-nies.
Illum min iqarraq u min jitqarraq.
M’għadx hawn onestà fid-dinja, kulħadd jara kif se jqarraq.
Il-kuruna fl-idejn tgħodd u mhux fil-but.
In-nies wiċċ b’ieħor li jilagħbuha tal-qaddisin warrbilhom. Kuruna tfisser kuruna tar-rużarju.
L-għadu biex fietek biesek, u int biex tfutu aqleb fuqu.
Min taf li jurik wiċċ b’ieħor, ilgħab il-logħba tiegħu u kompli miegħu. Il-verb fiet ifisser li tqarraq b’xi ħadd.
L-għadma tiddendel għall-għajn.
Hemm min jikkumplimentak f’wiċċek imbagħad imur jgħid kontrik ma’ ħaddieħor. L-għajn tirreferi għall-għajn ħażina.
Daqqa fuq għonq b’żewġt uċuħ tarmi żewġt irjus.
Min hu wiċċ b’ieħor xi darba jew oħra tasal tiegħu wkoll.
Aħjar ikollok mitt għadu li taf bih minn ħabib falz.
Mal-għadu tiegħek taf fejn inti imma mal-ħbieb ipokriti le.
Aħjar taf b’mitt għadu minn b’ħabib qarrieq.
L-għedewwa tiegħek taf min huma, iżda qatt ma tista’ tkun taf meta l-ħbieb għad jittraduk.
Ibża’ minn min iżomm il-kuruna twila.
In-nies ipokriti warrbilhom. Kuruna tfisser kuruna tar-rużarju, li żżommha twila biex kulħadd jaraha.
Il-giddieb u ż-żibel kullimkien issibhom.
In-nies giddibin huma komuni u moqżieża daqs iż-żibel.
Il-giddieb mhux emmnut.
Jekk tinqabad tigdeb, ħadd ma jibqa’ jemmnek.
Il-giddieb malajr jinqabad.
Min jigdeb ma jdumx ma jinqabad.
Il-giddieb jeħles mill-qattara u jeħel fil-miżieb.
Jekk ma tinqabadx f’gidba żgħira, żgur li tinqabad f’gidba kbira.
Il-giddieb irid ikun egħref mill-kittieb.
Min jigdeb bil-fomm irid jagħmel skorz ikbar minn min ikun gideb bil-miktub biex jiftakar xi jkun qal u ma jinqabadx.
Il-giddieb irid ikollu rasu tajba.
Min jigdeb irid jiftakar dak li jkun qal biex ma jinqabadx.
Il-giddieb ħalliel.
Min jasal biex jigdeb, jasal biex jisraq ukoll.
Il-giddieb għomru qasir.
Min jigdeb ma jdumx ma jinqabad.
Il-bniedem isqih u staqsih.
Il-verità toħroġ mingħand min ikun xorob u siker.
Id-duħħan sinjal li hemm in-nar.
Xi ftit verità jkun hemm fit-tqasqis tan-nies.
Ħadd m’għandu suf f’qiegħ idu.
L-integrità u l-onestà saru tassew rari llum il-ġurnata.
Għid dejjem is-sewwa.
Sabiħ li tgħid il-verità.
Dak li jkun fil-qalb ikun fil-wiċċ.
Dak li jkun hemm f’qalb il-bniedem ikun rifless f’wiċċu.
Bniedem tal-ġieħ miġjub minn kulħadd.
Bniedem onest ikollu r-rispett ta’ kulħadd.
Bniedem mingħajr onestà mżeblaħ.
Dak li ma jkunx onest ma jkollu r-rispett ta’ ħadd.
Biex tixrob l-ilma safi mur f’ras il-għajn.
Saqsi direttament lil min kien involut f’xi ħaġa biex tkun taf il-verità.
Biex taqta’ sewwa trid tisma’ ż-żewġ naħiet.
Trid tisma’ lil kull min kien involut f’xi ħaġa biex tasal għall-konklużjoni t-tajba.
Biex taqta’ l-għatx trid tmur f’ras il-għajn.
Saqsi direttament lil min kien involut f’xi ħaġa biex tkun taf il-verità.
Bassa daħqa u fiswa lewma.
Ħadd ma jkun irid jammetti meta l-ħati ma jkunx ovvju.
Bassa daħqa u fiswa ġlieda.
Ħadd ma jkun irid jammetti meta l-ħati ma jkunx ovvju.
Aħjar li ra b’għajnejh minn għaxra li semgħu bih.
Aħjar toqgħod fuq dak li tara b’għajnejk milli temmen dak li jgħidulek.
Ara b’għajnejk u tmissx b’idejk.
Titlobx iżjed provi meta diġà rajt b’għejnejk stess.
Aħrab il-gideb jekk trid tkun miġjub sew.
Tigdibx għax ma jirrispettawkx.
Il-qwiel kollha, f’post wieħed.