il-mara u r-raġel
nota editorjali
Xi qwiel dwar in-nisa u l-irġiel jirriflettu l-mentalità u r-rwoli soċjali taż-żmien li fih inħolqu. Dawn għandhom jinqraw fil-kuntest storiku tagħhom, u mhux bħala riflessjoni tal-valuri tal-lum.
Agħtini r-raġel mingħajr sħabu.
Mara tkun trid lir-raġel tagħha għaliha biss, ma tkunx tridu jkollu l-ħbieb jinfluwenzawh.
Aħjar id-duda f’tamla milli f’qalb ta’ armla.
Mara armla tibqa’ tħoss in-nuqqas ta’ żewġha ħafna wara mewtu.
Aħjar imqattgħa u ħorra milli għanja u żorra.
Aħjar mara fqira u qalbha tajba minn mara tal-flus u lsienha ħażin.
Aħjar mara ratba minn mara qaħba.
Mara għażżiena aħjar minn mara diżonesta.
Aħjar mara ta’ baħri milli ta’ raġel jistad għall-kaħli.
Mara ta’ baħri kien ikollha iżjed xi troxx, peress li s-sajjied tal-kaħli mhux dejjem kien jaqbad ħafna ħut.
Aħjar mart min int milli bint min int.
Aħjar tkun mara miżżewġa milli xebba.
Aħjar tieħu mara armla milli bint il-qamla.
Aħjar tiżżewweġ mara armla milli bint mara bla prinċipji.
Aħjar xiħ u għaref milli żagħżugħ u iblah.
Aħjar tiżżewweġ raġel matur b’esperjenza tal-ħajja minn wieħed għadu żagħżugħ u iblah.
Billejl in-nisa kollha xorta.
Fid-dlam il-pjaċir sesswali kollu l-istess.
Bir-raġel tiġieġa u bil-mara serduq, id-dar tinqaleb ta’ taħt fuq.
Jekk il-mara tmexxi lir-raġel fid-dar, kollox imur ħażin.
Dar bla mara ma fihiex x’tara.
Il-mara żżomm id-dar fuq saqajha.
Dar bla raġel niexfa bħat-taġen.
Dar mingħajr ir-raġel mhix kompluta.
Darba l-għadma ta’ raġel mejjet resqet mal-għadma ta’ mara mejta.
Il-ġibda sesswali hija parti min-natura tal-bniedem.
Debba bla lġiem fis tikser għonqha.
Il-mara għandha toqgħod attenta f’dak li tagħmel biex ma jiddispjaċihiex.
Debba bla lġiem tiġġarraf.
Il-mara għandha toqgħod attenta f’dak li tagħmel biex ma jiddispjaċihiex.
Dik soru msawra u fuq bejt imtajra.
Mara tal-affari tagħha xorta tattira l-attenzjoni bis-sbuħija tagħha.
Għaġin u torti u nbid bil-kwarti, u aħjar żaqqi minn żaqq marti.
Ċerti rġiel moħħhom biex jixxalaw u jiddevertu u lil marthom jinsewha.
Għal ħafna subien lesti l-bsaten u t-tmien, għal ħafna bniet lesti ċ-ċraret u l-biċċiet.
Dari s-subien biss kellhom opportunità għal karriera, il-bniet kienu jagħmlu biss ix-xogħol tad-dar. Tmien huma kpiepel.
Għall-ħwietem u għall-imsielet baqgħet bla ma kielet.
Xi nisa jaslu li jagħmlu minn kollox għall-flus. Il-ħwietem huma ċ-ċrieket.
Għonq bla ras, tina bla toqba u tifla bla mistħija la fihom ħajr u lanqas ħotba.
Mara bla pudur ta’ min jaħrabha.
Ħares lejn il-qamar bil-ħajra għax għalik ikollu l-għira.
Superstizzjoni: dari kienu jemmnu li jekk mara tħares lejn il-qamar issib ir-raġel li tixtieq.
Ħu mara armla u mhux waħda ta’ żmien it-tamla.
Aħjar tieħu mara armla bil-problemi tagħha, minn mara li trid dejjem ir-raġun (tamla hekk tfisser).
Ibża’ minn geddum ta’ ħanżir, sieq ta’ tiġieġa u lsien ta’ mara.
Ilsien in-nisa ma jieqaf qatt, bħal geddum il-ħanżir u sieq it-tiġieġa.
Id-dbielet twal ikarkru t-trab, imma d-dbielet qosra jkarkru l-erwieħ.
In-nisa għandhom jilbsu onest.
Id-debba l-ġerrejja jekk ma tkunx l-ewwel dis-sena tieħu li ġejja.
In-nisa irresponsabbli xi dabra għad jispiċċaw f’inkwiet kbir.
Id-dmugħ f’għajnejn in-nisa sponża.
In-nisa joqogħdu jibku biex jagħmlu bik li jridu.
Id-dmugħ tal-mara bħall-bnazzi fix-xitwa.
Id-dmugħ tal-mara, dmugħ tal-kukkudrilli.
Il-bint għandha tiskot, toqgħod fir-rokon, tilbes il-għoqod u tiekol il-loqom.
Dari n-nisa kienu ddestinati għax-xogħol tad-dar u għal ħajja li ftit li xejn kienet ta’ sodisfazzjon.
Il-frawla saret u x-xebba ħmaret.
Il-ġmiel ta’ frawla li tkun saret jitqabbel mal-ġmiel ta’ tifla li tkun saret xebba.
Il-ġuvni bandiera bajda.
Ġuvni jeħlisha eħfef minn xebba meta jagħmel xi ħaġa ħażina.
Il-ħafa jitfi ż-żina.
In-nisa li dari kienu jimxu ħafjin barra kienu jitilfu mis-sbuħija tagħhom. Żina (bl-aċċent fuq l-i) tfisser ġmiel.
Il-kliem tan-nisa jaħraq bħan-nar.
Ilsien ta’ mara jista’ jweġġa’ ħafna.
Il-kliem żejjed ħallih għan-nisa.
Tgħid xejn bla bżonn.
Il-Malti u l-far iddaħħalhomx id-dar għax iħassrulek il-mara u t-tfal.
Il-Malti jaf jagħmel ħsara daqs il-far.
Il-mara armla tqabbad ʼl uliedha jħufu fir-ramla.
Wara l-mewt tal-missier, il-familji kienu jbatu ħafna. Iħufu fis-sens ta’ jfittxu l-ikel.
Il-mara b’sufha mbiegħed, ir-raġel tbiegħed.
Xagħar il-mara dejjem apprezzat mir-raġel. Sufha jfisser xagħarha.
Il-mara bħal-lumija, tagħsarha u tarmiha.
Il-mara tużaha kif trid u wara tagħtiha l-ġenb.
Il-mara dellha tqil.
Il-mara tinqabad mal-inqas ħaġa li tagħmel.
Il-mara ġabbara hi l-għana ta’ darha.
Bis-saħħa tal-mara bieżla li tieħu ħsieb, il-familja tgħix kuntenta.
Il-mara għad-dnub imdawra, m’għonqha dejjem imġawhra.
Prostituta kemm trid issib klijenti u b’hekk dejjem ikollha l-flus.
Il-mara hi bħal tuffieħa, minn ġewwa mherrija u minn barra sabiħa.
Mara sabiħa mhux bilfors ikollha karattru sabiħ.
Il-mara li ma tifhimx b’daqqa ta’ għajn, ma tifhimx b’daqqa ta’ ponn.
Bil-vjolenza xorta m’intix se ddawwar il-fehma ta’ mara.
Il-mara li tilbes imqaċċat, max-xitan għamlet rabta.
Mara tal-affari tagħha dejjem tilbes deċenti.
Il-mara li turiha, turik.
Il-mara timxi miegħek skont kif timxi magħha.
Il-mara meta tidħaq trid tqarraq bik, u meta tibki tkun qarrqet bik.
Il-mara tkun lesta tqarraq bir-raġel f’kull ħin.
Il-mara mżejna minn butha mdejna.
Mara responsabbli ma tberbaqx flus.
Il-mara sewda r-raġel tagħmlu għuda.
In-nisa samranin dejjem iridu wisq mingħand ir-raġel. Sewda tfisser samranija.
Il-mara sewwa, tidħaq u tgawdi ġewwa.
Ħsieb il-mara għandu jkun f’familtha.
Il-mara sieqha wara.
Dari l-mara ma kenitx tingħata l-istess importanza tar-raġel.
Il-mara ta’ fqajjar qatt ma tmur tittajjar.
Mara li trid tieħu ħsieb familja fqira m’għandhiex ċans għall-frivolitajiet.
Il-mara tad-dnub b’ħilitha stess iddub.
Il-prostituta waħedha tinqered.
Il-mara taf tgħollik fis-sema u taf titfgħek l-infern.
Il-mara kapaċi tagħmel il-ħajja tar-raġel sabiħa daqs kemm hi kapaċi tagħmilha kerha.
Il-mara tajba żżomm ir-raġel.
Mara tkun tajba skont kemm ikollha ħila żżomm lir-raġel fidil lejha.
Il-mara tal-kaċċatur hi bħall-mara tal-furnar, bi driegħ wieħed.
Il-mara kemm tal-kaċċatur kif ukoll tal-furnar dejjem nieqsa mill-flus.
Il-mara tas-sajjied tagħġen b’id waħda, tas-suldat ma tagħġen xejn.
Il-mara tas-suldat tbati iżjed fil-flus mill-mara tas-sajjied.
Il-mara tgħabbi daqs bagħal, ir-raġel jimla daqs għar.
Sabiex il-mara jkollha x’tonfoq, ir-raġel irid ibati f’xogħlu.
Il-mara tħammar u r-raġel jgħammar.
Sakemm il-mara jibqa’ jkollha ċ-ċiklu mestruwali, tkun għadha fiċ-ċans li jkollha t-tfal.
Il-mara tilbes minn rasha u r-raġel minn saqajh.
Qawl inkejjuż: ir-raġel aqwa mill-mara!
Il-mara tingħaraf minn għadietha.
Il-mara tkun taf xi ssarraf minn dak li tgħid.
Il-mara tqila ġo did-dinja turi l-ħila.
l-mara li tgħaddi minn tqala turi kemm għandha kuraġġ.
Il-mara tqila tirbaħ il-għażż u titlef il-ħila.
Hemm bżonn li mara tqila tistrieħ u mhux taħdem.
Il-mara turihiex kollox.
M’għandekx tafda lill-mara b’għajnejk magħluqin!
Il-mara u l-pinna ma jissellfux.
Mara waħda u raġel wieħed għandu jkollok.
Il-wiċċ fil-mara jikxef il-ġieħ.
Minn ħarsitha tinduna mara hix tal-affari tagħha.
In-nisa kollha fisa.
In-nisa jgħidu ħafna u ma tistax tafdahom.
In-nisa laħam il-kelb.
In-nisa kattivi.
In-nisa lsienhom għandhom.
In-nisa jgħidu ħafna u ma tistax tafdahom.
In-nisa qrieqeċ u l-irġiel mazzit.
L-irġiel ikollhom joqogħdu għal li jgħidu n-nisa tagħhom.
In-nisa sbieħ biex tħares lejhom.
In-nisa sbieħ mhux dejjem ikollhom karattru sabiħ.
In-nisa xagħarhom twil u sens qasir.
In-nisa bla sens komun.
In-nisa xibka tax-xitan.
In-nisa kapaċi jqarrqu bik daqs ix-xitan.
Ir-raġel dejjem bandiera bajda.
Raġel dejjem jeħlisha eħfef minn mara meta jagħmel xi ħaġa ħażina.
Ir-raġel ġiebja u l-mara sieqja.
Ir-raġel jaħdem għall-flus u l-mara tberbaqhom.
Ir-raġel jiżra’ mtira u l-mara tagħmillu ftira.
Ir-raġel jaħdem fl-għalqa u martu ġġiblu x’jiekol. Mtira hija biċċa art.
Ir-raġel kif iħossu, u l-mara kif turihom.
Tibqa’ żagħżugħ biss jekk iżżomm ruħek u jkollok perspettiva tajba tal-ħajja.
Ir-raġel ma jinsiehx raġel għax miżżewweġ.
Iż-żwieġ ma jibdilx il-karattru tan-nies.
Ir-raġel qalbu qaqoċċa; jagħti werqa lil kulħadd imma l-qalba jagħtiha lill-mara.
Il-mara dejjem għandha post speċjali f’qalb żewġha.
Ir-raġel tiegħek sal-kantuniera.
Mara m’għandha qatt taqla’ għajnejha minn fuq żewġha.
Is-simna sabiħa f’debba, aħseb u ara f’xebba.
Tfajla mibruma hija tfajla sabiħa.
Is-subien jaħsbu fix-xwieni u l-bniet jaħsbu fil-ġejjieni.
Dari s-subien kienu jfittxu xogħol fuq il-baħar, mentri l-bniet kienu jaħsbu biex ikollhom familja.
It-twieqi jżejnu l-palazzi.
Minn għajnejn (= it-twieqi) persuna, tara l-ġmiel tagħha.
Ix-xbejba fit-tieqa ma turikx għamieqha.
Dari t-tfajliet li kienu joqogħdu fit-tieqa jsellmu kienu jitqiesu bħala mhux onesti. Għamieq tfisser tul.
Ix-xebba fraxketta, deheb u dubluni mimli kaxxetta.
Il-prostituta (= fraxketta) tmur tajjeb ħafna f’xogħolha. Dubluni huma flus.
Ix-xebba li tiekol fit-triq ma ssibx tiżżewweġ.
Superstizzjoni: dari kienu jemmnu li xebba li tiekol fit-triq hija vulgari u b’hekk ħadd ma jkun irid jaf biha.
Iż-żina tixraq lill-mara.
Ma fiha xejn ħażin billi mara tiżżejjen.
Iż-żina żejda turi ftit għaqal.
Mara jew raġel li jiżżejjen wisq jitqies vanituż.
Jekk ir-raġel jikxef karusu, il-mara tieħdu għal flusu.
Ir-raġel m’għandux juri lill-mara kemm għandu flus qabel jiżżewwiġha.
Jekk tagħmel il-qarn, agħmlu tad-deheb.
Jekk se tipprostitwixxi ruħek, aqla’ flus kemm tiflaħ.
Kerha fin-nieqa, sbejħa fit-tieqa.
Meta tifla timmatura u ssir żagħżugħa, kapaċi tisbieħ.
Kliem il-mara isimgħu u agħmel rajk.
Isma’ x’għandha xi tgħid il-mara, imma wara ddeċiedi inti.
Ladarba tiżżiegħeb il-qarn agħmlu tad-deheb.
Jekk se tipprostitwixxi ruħek (= tiżżiegħeb), aqla’ flus kemm tiflaħ.
L-għaqal sabiħ fuq id-debba, aħseb u ara fuq ix-xebba.
Tfajla għandha ġġib ruħha b’mod onest u tkun bil-għaqal biex tevita l-problemi.
Li s-self kien tajjeb kieku r-raġel jislef il-mara.
Qatt tislef dak li hu tiegħek.
L-iben kif trabbih u l-missier kif iddarrih.
Il-mara trid iddarri r-raġel mod ieħor min kif kien jagħmel għand ommu, u t-tfal jikbru skont kif trabbihom.
Lil ibnek kif trabbih u ’l żewġek kif iddarrih.
Il-mara trid iddarri r-raġel mod ieħor min kif kien jagħmel għand ommu, u t-tfal jikbru skont kif trabbihom.
L-ilsien ta’ mara jxoqq l-għadam.
In-nisa lsienhom ħażin.
Ma jistax ikun il-bettija mimlija u l-mara sakrana.
Ma jistax ikollok il-flus fil-but u tberbaqhom fl-istess ħin.
Mara b’tarbija ma tesagħhiex ta’ Brija.
Mara għandha toqgħod id-dar tieħu ħsieb it-tarbija. It-Triq ta’ Brija hija triq is-Siġġiewi.
Mara bieżla, il-kumdità.
Bis-saħħa tal-mara bieżla li tieħu ħsieb, il-familja tgħix kuntenta.
Mara bil-għonnella qatt ma taf x’għamlet u x’kellha.
Fl-antik l-għonnella kienet tgħatti t-tqala.
Mara bix-xewqa, lewn uliedha jiġu mżewqa.
Superstizzjoni: jekk mara tibqa’ bix-xewqa waqt it-tqala, dan ikun jidher fit-tarbija.
Mara bla żaqq bħal tieġ bla daqq.
Mara bla tfal mhix mara kuntenta.
Mara għajnejha żoroq issaħħar it-toroq.
L-irġiel jiġġennu wara n-nisa b’għajnejhom blu.
Mara ħobbha u turihiex, u milli jkollok tagħtihiex.
r-raġel għandu joqgħod lura milli jikkuntenta wisq lill-mara.
Mara lesta għall-ġlied ma żżarradx żnied.
Mara ġellieda qis li twarrabha.
Mara li tkellmek tidħaq, trid tqarraq bik; dik li tkellmek tibki, tkun qarrqet bik.
Il-mara tkun lesta tqarraq bir-raġel f’kull ħin.
Mara li trabbi t-tjur, għall-kexxun iddur.
Mara li trabbi t-tjur, ftit li xejn kienet taqla’ flus.
Mara ma taħmilx oħra.
In-nisa jgħiru għal xulxin.
Mara mfettħa, boxxla mbettħa.
Mara għandha tpoġġi bilqiegħda b’saqajha miġburin. Boxxla mbettħa tirreferi għall-bieb tal-antiporta, li jkun miftuħ.
Mara mill-Imsida, il-gidba f’idha.
In-nisa Misidjani giddibin.
Mara sabiħa tal-għoxrin ġmielha jibqa’, u għal raġel issir seħer tal-ħamsin.
Mara tkompli tikber u tisbieħ bl-esperjenza tal-ħajja.
Mara sabiħa, ġmielha jibqa’ sakemm titlef ġieħha.
Mara tibqa’ sabiħa jekk tagħraf tkun onesta.
Mara sabiħa, id-dota ġewwa.
Mara sabiħa dejjem issib min iridha.
Mara sabiħa, tikber kemm tikber, dejjem tajba għat-tieqa.
Mara sabiħa dejjem sabiħa tibqa’.
Mara ssaffar u tiġieġa tidden la żżommhomx id-dar.
Superstizzjoni: mara li ssaffar u tiġieġa li tidden iġibulek il-fell.
Mara ta’ sultan dejjem tispiċċa fi ħdan.
In-nisa ta’ min hu sinjur dejjem jaqgħu fit-tentazzjoni.
Mara tagħmillek sold dejn, u oħra tagħmillek sold tnejn.
Hemm nisa li jberbqu flus kemm jifilħu, u oħrajn li jibżgħu għalihom.
Mara taħdem il-bizzilla, għal qrun ir-raġel ma tistax tiddwella.
Mara li tkun id-dar ma tkunx taf x’qed jagħmel ir-raġel meta jkun barra.
Mara tal-għaqal iżżomm id-dar, tiġbor ʼl uliedha u xedda fin-nar.
Bis-saħħa tal-mara bieżla li tieħu ħsieb id-dar u t-tfal, il-familja tgħix kuntenta. Xedda tfisser ħatab.
Mara tibki temminhiex.
Il-mara tkun lesta tqarraq bir-raġel f’kull ħin.
Mara, meta tkun qed tfittixha, taqrahiex minn wiċċha.
Wiċċ mara huwa importanti daqs il-karattru tagħha.
Meta bewsa tagħtik mara, imbagħad trid tara xi jkun ġara.
In-nisa manipulattivi u jiġu jinħabbu miegħek għax ikollhom bżonn xi ħaġa.
Meta l-bajd isir imsielet, rasu għan-namur tkun mielet.
Meta s-subien jibdew jiżviluppaw fi żmien il-pubertà, jibdew jieħdu interess fis-sess. Il-bajd tfisser it-testikoli, li fi żmien il-pubertà jikbru.
Meta l-mara tiddebbel xagħarha jiżżebbel.
Mara li tintelaq (= tiddebbel) għax ma tiħux ħsieb l-apparenza tagħha tkun tidher. Jiżżebbel jiġifieri jitħammeġ.
Meta l-mara tiżżewweġ tidħol f’darha u l-mewt biss taqlagħha minn hemm.
Dari n-nisa li kienu jiżżewġu kienu jibqgħu d-dar u l-mewt biss teħlishom minn dik il-ħajja.
Meta l-mara tkun se tobloq, bi ħsiebha, terġa’ tixtieq toħloq.
Madwar l-età ta’ ħamsin sena, in-nisa terġa’ tiġihom ix-xewqa jsiru ommijiet.
Meta s-sider ma jinfirixx, il-ħannieqa ma tissensilx.
Il-ġiżirana (= ħannieqa) toqgħod aħjar fuq mara li tkun sidirha mimli.
Meta tasallek il-ħasla tħabrek l-għażla.
Darba fix-xahar il-mara tkun taf inqabditx tqila, skont jiġihiex demm (= il-ħasla).
Meta titwieled tifla, l-ixkupa tieħu qatgħa.
Fl-antik it-tfajliet u n-nisa kienu ddestinati għal ħajja ta’ xogħol tad-dar.
Meta xebba xawwatha tgħatti, ħajjitha opra bi tliet atti.
Meta xebba tieħu ħsieb li ġġib ruħha b’mod deċenti (= tgħatti xawwatha), ma tiżbaljax u tgħix kuntenta bla dispjaċiri.
Meta x-xebba tmur tiġbor il-kappara, żgur bid-dnewwa toħroġ minn darha.
Dari x-xebbiet tal-affari tagħhom ma kinux joħorġu waħedhom mid-dar, u dawk li kienu jagħmlu hekk (bħal pereżempju biex jiġbru l-kappar), kienu jitqiesu bħala sfrattati.
Min iħammar jgħammar.
Mara li jkun għad għandha ċ-ċiklu mestruwali (= tħammar) tkun għadha fiċ-ċans li jkollha t-tfal.
Min jikser it-tub bin-nisa ma jaħsadx bosta.
Ix-xogħol fiżiku jinqalgħu iżjed għalih l-irġiel milli n-nisa.
Min jitbellah għal mara jkun wasal għall-ħala.
Raġel li jiblieh għal mara jagħmel affarijiet tal-ġenn.
Min jobgħod in-nisa ma jħobbx lil ommu.
Jekk tobgħod lin-nisa, tkun qed tobgħod waħda mill-egħżeż persuni f’ħajtek: ommok.
Pappa u nejna għat-trabi mhux għall-irġiel kbar.
Il-kbar għandhom jaġixxu ta’ kbar, mhux ta’ tfal żgħar.
Qalziet ibża’ minnu mqar jekk imdendel.
Raġel m’għandek qatt tafdah.
Qatta żara’ araha filgħodu u xebba araha filgħaxija.
In-nisa jidhru sbieħ meta jkunu mbiddlin għall-ħarġa filgħaxija, hekk kif iż-żara’ tidher isbaħ filgħodu.
Quddiemek mara, warajk imqass.
Quddiemek taparsi għandha pjaċir bik u minn warajk tqasqas fuqek kemm tiflaħ.
Raġel bil-għaqal ma jdurx ma’ kull riħ.
Raġel għandu jkollu prinċipji.
Raġel bla ħila, aħjar xejn minnu.
Raġel li ma jkun kapaċi għal xejn, aħjar ma juri wiċċu mkien.
Raġel bla ħila, ma jiswiex tebaq fwiedu.
Raġel li ma jkun kapaċi għal xejn, aħjar ma juri wiċċu mkien.
Raġel bla mistħija la żżommx miegħu.
Raġel diżonest warrbu.
Raġel ħaddiem jiswa għal tnejn.
Raġel li kapaċi f’xogħlu jtella’ ħafna xogħol.
Raġel ħalliel, mhux tifel sinċier.
Il-mewt tar-raġel, f’ħajjet martu tħalli vojt li l-imħabba u s-sinċerità ta’ wliedha ma jkunux kapaċi jimlew.
Raġel ħażin ibiddel qoxortu u aktar ħażin.
Raġel ħażin qatt ma jsir tajjeb, anzi jsir dejjem agħar.
Raġel ħażin, u int eħżen minnu, tixtri ħobż u taħbilu minnu.
Trid tkun iżjed makakk mill-makkak biex tirbaħlu.
Raġel id-dar, ħatba fin-nar.
Raġel li joqgħod id-dar, joqgħod jindaħal lil martu.
Raġel id-dar, xitan fuq xkaffa.
Raġel li joqgħod id-dar, joqgħod jindaħal lil martu.
Raġel jaħlef u mara tibki temminhomx f’li jgħidulek.
M’għandekx temmen raġel li jaħlef u mara li tibki.
Raġel kif iddarrih, u t-tifel kif trabbih.
Il-mara trid iddarri r-raġel mod ieħor min kif kien jagħmel għand ommu, u t-tfal jikbru skont kif trabbihom.
Raġel ma jitqiesx bix-xiber.
Il-kumplessità tal-karattru ta’ dak li jkun hija kbira ħafna.
Raġel miġnun, jgħammar sħun.
Raġel rasu sħuna jkollu tfal jixbhuh.
Sakemm raġel għadu jiflaħ qatta tiben, ikun għadu kapaċi jagħmel tifel.
Sakemm raġel ikun għadu f’saħħtu, anke ta’ ċerta età, dan ikun kapaċi jnissel tarbija.
Seba’ nisa f’sensihom, miġnun jgħaddihom.
Il-ġenn li jaslu jagħmlu n-nisa huwa bil-wisq ikbar minn dak li jaslu jagħmlu l-irġiel.
Selma b’rasek ’l isfel u mhix tinża’ u tiżfen.
Mara onesta u tal-affari tagħha għandha ġġib ruħha b’mod diskret u mhux titbaħrad. Selma tfisser tislima.
Sider il-mara bil-ħalib u sider ir-raġel bil-lanżit.
In-nisa, b’mod speċjali dawk li jkollhom it-tfal, juru aktar ħniena mill-irġiel. Lanżit ifisser suf.
Sider iswed ma jkabbarx il-miżwed.
Sider il-mara għandu jikber u jimtela, biex tkun tista’ tredda’ t-tarbija u tikber. Il-miżwed huwa referenza għat-tarbija.
Tgħoddx il-ġranet tal-qamar għax ma jħallikx tistabar.
Superstizzjoni li l-qamar jirregola waħdu ċ-ċiklu mestruwali u li allura l-mara għalxejn toqgħod taħseb fuq meta se jiġiha.
Tifel, żagħżugħ jew xiħ, id-dinja xorta ddur għalih.
L-irġiel ħajjithom kollha iżjed liberi min-nisa.
Tifla sabiħa tagħtihiex imħabbtek mal-mument għax issir iebsa daqs is-siment.
Lin-nisa turihomx imħabbtek mill-ewwel għax jagħtuk bis-sieq.
Tifla sabiħa tinqala’ b’ġieħha, tifla kerha tinqala’ bil-mera.
Mara naturalment sabiħa m’għandhiex għalfejn tagħmel l-isforz li tagħmel mara kerha biex tidher sabiħa.
Tittantak tħallix mara liebsa tlellix.
Tħallix mara sabiħa twaqqgħek fit-tentazzjoni.
Wara bewsa ta’ filgħodu saqajk m’hemmx fejn joqogħdu; wara bewsa ta’ billejl tinkileb wara xi dejl.
Il-bewsa tan-nisa hija seduċenti ħafna, u l-irġiel iġennuhom matul il-ġurnata, aħseb u ara billejl.
Wara l-ħamsin il-mara tibda tidbiel.
Iż-żmien jidher iżjed fin-nisa wara li jagħlqu l-ħamsin sena.
Wiċċ il-mara jixhdilha ġieħha.
F’wiċċ il-mara wieħed jara x’tip ta’ karattru għandha.
Wiċċha ma jidher, ma’ deheb jinbidel.
Mara modesta (li ma tħobbx turi wiċċha) tiswa mitqlu deheb u ta’ min jgħożżha.
Xebba bla mistħija la fiha ħajr u lanqas ħtib.
Tfajla li ma tafx tkun modesta ħadd ma jġibilha rispett u wisq inqas tħajjar lil minn jiżżewwiġha.
Xebba bla xagħar u bla ħobb la fiha x’jiġbdek u lanqas xi tħobb.
Xagħar u sider il-mara jixhdu s-sbuħija tagħha.
Żaqq ta’ mara tesa’ ħobża u kelma ma tesagħhiex.
Tafdax lin-nisa għax mhumiex kapaċi jżommu sigriet.
Il-qwiel kollha, f’post wieħed.