L-affarijiet materjali li jkollna f'ħajjitna kollha jisfaxxaw fix-xejn meta niġu wiċċ imb wiċċ mal-mewt. Il-kaptelli huma dawk il-ġebliet twal li jgħattu wiċċ il-qabar.
kategorija
il-mewt
Norqdu laħam u nisbħu faħam.
Immutu bħallikieku xejn qatt ma kien. Faħam f'dan il-każ tfisser katavru.
Nies jew ħut kulħadd imut.
Kulħadd u kollox imut, dak hu ċ-ċiklu tan-natura.
Mulejja, is-sabar sal-qabar.
Nitolbu lil Alla jagħtina l-paċenzja naffrontaw il-ħajja sa mewtna.
Mitt jien, miet kulħadd.
Tinkwetax iżżejjed għax ladarba mmutu, kollox jispiċċa.
Minn hawn u mitt sena oħra lkoll bla mnieħer inkunu.
M'aħniex għal hawn, il-ħajja tasal fi tmiemha għal kulħadd ħin jew ieħor.
Minn ġild il-bagħal mejjet tbiegħed u aktar u aktar jekk hu ħaj.
In-nies pezzakustjoni qis li taħrabhom.
Min ma jġibx rispett lil demmu jiġih hemm akbar minn hemmu.
Jekk ma ġġibx rispett lill-membri ta' familtek, uliedek jieħdu l-eżempju u jagħmlu l-istess miegħek.
Min ma jaħżinx lil demmu jiġih hemm akbar minn hemmu.
Jekk ma ġġibx rispett lill-membri ta' familtek (pereżempju billi tagħmel il-vistu meta jmutu), uliedek jieħdu l-eżempju u jagħmlu l-istess miegħek. Taħżen tfisser tagħmel il-vistu, f'dan il-każ.
Min jitwieled u min imut, min f’karozza u min f’tebut.
Iċ-ċiklu tal-ħajja hekk hu: min għadu tarbija fil-pram (karozza) u min miet u qiegħed f'tebut.
Min jinħabb ma jitgawdiex.
Il-ħajja kiefra u teħodlok lil dawk li l-aktar tħobb.
Min jibla’ wisq imur f’qasir il-għomor.
Min jiekol iżżejjed, jiżdied ħafna fil-piż u minħabba l-ħsara li jagħmel lil ġismu, imut.
Min jaqta’ qalbu jmut.
Dejjem għandek tippersevera u tagħmel kuraġġ, għax inkella tispiċċa ħażin.
Min jaħseb fil-mewt ma jidnibx.
Xi darba kulħadd se jmut, għalhekk kulħadd għandu jgħix ħajja tajba.
Min imut jistrieħ u jserraħ.
Persuna tistrieħ f'mewtha u sserraħ lil dawk ta' madwarha li kellhom iduru biha.
Min iħobb il-bajtar xitli ma jridx jibża’ mix-xewk; min iħobb mara miżżewġa ma jridx jibża’ minnha l-mewt.
Min isir iħobb mara miżżewġa jidħol f'ħafna inkwiet u għandu jkun lest ibati l-konsegwenzi tal-għira ta' żewġha.
Min ħalla l-ulied bħal kieku ma mietx.
Min imut jibqa' jgħix f'uliedu.
Min għandu jmut bil-pesta m’hemmx barrakka għalih.
Id-destin ma taħarbux. Barrakka hija għamla ta' karettun.
Miet in-naħal u spiċċa l-għasel.
Meta s-sors li minnu taqla' l-flus jispiċċa, ma taqlax iżjed flus.
Mewt u xita Alla jaf meta.
Alla biss jiddeċiedi meta niġu fid-dinja u nitilqu minnha.
Mewt ta’ wieħed, ħajja t’ieħor.
Fid-dinja min jitwieled jieħu post min imut, u nibqgħu sejrin hekk.
Meta sewa ltewa.
Miet (= iltewa) fl-aqwa tiegħu jew fl-iżjed mument fejn ta' madwaru kellhom bżonnu.
Meta nibet il-ħaxix miet iż-żiemel.
Il-każijiet il-qorti tant idumu jkaxkru li sakemm jinqatgħu, min kellu raġun ikun laħaq miet.
Meta l-mara tiżżewweġ tidħol f’darha u l-mewt biss taqlagħha minn hemm.
Dari n-nisa li kienu jiżżewġu kienu jibqgħu d-dar u l-mewt biss teħlishom minn dik il-ħajja.
Meta l-fellus jonqob qabel iż-żmien, ħajtu ma fihiex tmiem.
Meta l-fellus ifaqqas (= jonqob) qabel iż-żmien, ħajtu ma tkunx twila. Qawl li jgħodd ukoll għat-trabi ta' dari.
Meta jmut qassis jiġbed sebgħa.
Superstizzjoni Maltija li jekk imut qassis, imutu sebgħa oħra warajh.
“Merħba, ja mewt,” qal il-ġurdien kif ħass in-nassa tingħalaq fuqu.
Ladarba l-affarijiet jibdew ġejjin ħażin, aċċetta u ssaporti.
Mejjet ma jerfax ieħor.
Min ikun f'sitwazzjoni diffiċli ma jkunx jista' jgħin lil ħaddieħor.
Man-nejbiet lesti l-kfejniet.
Dari kienu jmutu ħafna trabi meta jkunu waslu fl-età li jaqsmu n-nejbiet. Kfejniet tfisser twiebet żgħar tat-trabi.
L-imwiet għal kulħadd, għall-foqra u s-sinjuri.
Fqir jew sinjur, xi darba tmut bħal ħaddieħor.
L-imwiet għal kulħadd, għall-foqra u l-imwiel.
Fqir jew sinjur, xi darba tmut bħal ħaddieħor. Imwiel hu l-plural ta' mula, u tfisser rikkezzi.
L-għarusa l-ħaddara u l-mejjet in-newwieħa.
Kull okkażjoni ġġib magħha xi emozzjoni, ta' ferħ jew ta' niket.
L-għada li titwieled biha l-kefen biss ineħħiha.
Id-drawwiet tiegħek - tajbin u ħżiena - sa mewtek tibqa' bihom. Għada tfisser drawwa u l-kefen huwa t-tebut.
La marret l-id ħa jmorru s-swaba’.
Min ikun għadda minn esperjenza kerha ħafna ma jagħtix kas l-affarijiet iż-żgħar.
L-akbar serjetà waqt il-mewt.
Il-mewt hija l-iżjed ħaġa kbira u serja li tista' tiġrilna.
L-aħjar min imut żgħir għax jistrieħ.
Iktar ma tgħix ħajja twila, iktar tbati.
Kull min jagħmel il-qabar għal sieħbu jindifen fih.
Min jagħmel id-deni lil ħaddieħor, ma jsibx ġid mingħand ħaddieħor; anzi, il-ħajja tpattihielu.
Kull min ħa l-ħajja għad jieħu l-mewt.
Jekk titwieled, bilfors trid tmut.
Kulħadd jidfen ’l ommu kif jista’.
Kulħadd jagħmel sa fejn jista' f'sitwazzjonijiet diffiċli, anke finanzjarjament.
Kif tidra tgħix u kif tgħix tmut.
Il-mod ta' kif iġġib ruħek f'ħajtek jiddetermina kemm tmut b'rispett u dinjità.
Kif il-ħajja, il-mewt.
Il-mod ta' kif iġġib ruħek f'ħajtek jiddetermina kemm tmut b'rispett u dinjità.
Kien xħiħ iqis u jkejjel, biex ħaduh il-bhejjem u hemm ħallewh għal dejjem.
Li tkun xħiħ ma jservi għalxejn, għax trid tmut bħal kulħadd u kollox warajk tħalli. Ħaduh il-bhejjem tfisser li ġibduh il-bhejjem fuq il-karru tal-mejtin, kif kienu jagħmlu dari.
Kien ilbieraħ u kien l-ewliemes, iżda llum hu ġewwa d-dwiemes.
Il-ħajja qasira ħafna għax għexnieha lbieraħ u ta' qabel (= l-ewliemes), illum waslet il-mewt u ninsabu fl-oqbra (= id-dwiemes).
Jekk jispiċċa ż-żejt tintefa l-lampa.
Ħajjitna qisha lampa taż-żejt, meta jispiċċa ż-żejt nintfew u mmutu.
Jekk il-mejjet iqum minn qabru jinsab minn jeħodlu postu.
Fid-dinja kollha mmutu wieħed wara l-ieħor, ħadd ma jeħlisha.
Iż-żwieġ jintrabat bil-kelma u jinħall bil-mewt.
Ir-rabta taż-żwieġ tinħall biss bil-mewt.
Iż-żwieġ għoqda bi lsienek li ma tħollhiex bi snienek.
Ir-rabta taż-żwieġ tinħall biss bil-mewt.
Ix-xogħol u s-sabar sa ġewwa l-qabar.
Trid taħdem u tieħu paċenzja sa ma tmut.
Ix-xiħ imut imqabbad u ż-żagħżugħ imut imqarraq.
Ix-xjuħ jixtiequ ma jmutux u ż-żgħażagħ jaħsbu li l-mewt ma tilħaqhomx.
Ix-xemgħa torbot u l-qniepen tħoll.
Iż-żwieġ isir bix-xemgħat fil-knisja u jinħall biss malli tasal il-mewt.
Imut il-għani, imut il-fqir u t-tnejn għal ġewwa l-bir.
Ikollok kemm ikollok flus, kulħadd iddestinat li jmut. Il-bir jirreferi għall-qabar.
Il-mistrieħ fil-qabar.
L-inkwiet jieqaf għalkollox meta mmutu.
Illum ħaj u għada mejjet.
Il-mewt tasal ħabta u sabta.
Il-kaġun quddiem u l-mewt wara.
Il-mewt dejjem tasal kaġun ta' xi ħaġa.
Il-ħrief imutu qabel in-nagħaġ.
Il-ħajja ġieli tkun kattiva, bħal meta t-tfal imutu qabel il-ġenituri.
Il-ħin jgħaddi u l-mewt toqrob.
Aktar ma jgħaddi ż-żmien, aktar toqrob il-mewt.
Il-ħajja qabel il-mewt.
Sakemm inkunu għadna ħajjin, jeħtieġ li qabelxejn naħsbu kif se ngħixu.
Il-ħabs mimli bl-innoċenti u l-kannierja bil-kaġuni.
Hemm min l-ewwel jaqla' l-inkwiet imbagħad jgħid li ma kienx tort tiegħu, bħal xi ħadd li jgħid li spiċċa l-ħabs bla ħtija imma li l-vittma tiegħu tkun spiċċat fil-kannierja (post fejn kien jintefa' l-għadam tal-mejtin).
L-għada li titrabba fiha l-kefen biss ineħħiha.
Id-drawwiet tiegħek - tajbin u ħżiena - sa mewtek tibqa' bihom. Għada tfisser drawwa u l-kefen huwa t-tebut.
Il-forka għall-iżvinturat.
Minn tant nies li jagħmlu l-ħażin u qatt ma jinqabdu, ix-xorti ħażina tkun messet lil min jingħata l-forka. Id-dinja inġusta.
Il-bniedem twieled għarwien u jindifen liebes jekk ikeffnuh.
Nitwieldu mingħajr ġid materjali u bl-istess mod immutu u ma nieħdu xejn magħna.
Il-bniedem sa ma toħroġ ruħu qalbu ma jaqtagħhiex.
Jeħtieġ li tqawwi qalbek tul il-ħajja kollha.
Jgħix tajjeb min irid imut tajjeb.
Min jgħix ħajja tajba jmut fil-paċi.
Ibża’ mill-ħajjin mhux mill-mejtin.
Il-mejtin ma jistgħux jagħmlulek ħsara, imma l-ħajjin iva.
Ħidma u sabar sal-qabar.
Irridu naħdmu u nieħdu paċenzja sa mewtna.
Ħajja dejjem imxuma aħjar il-mewt minnha.
Aħjar tmut milli tgħix fil-miżerja. Imxuma tfisser miżerabbli.
Ħadd wara Ħadd, fl-aħħar tasal ta’ kulħadd.
Il-mewt lil ħadd ma taħfirha, xi darba tasal.
Ħadd mhu għal hawn.
Ħadd ma jgħix għal dejjem.
Ħadd ma miet u ġie.
Ħadd ma miet u reġa' lura.
Ħadd ma mar u ġie.
Ħadd ma miet u reġa' lura.
Għabra u riħ li għandek hawn tħallih.
Wara mewtek kollox warajk tħalli, xejn ma tieħu miegħek.
Gawdi għax mid-dinja m’għandna xejn.
Ħu pjaċir bil-ħajja u għix kuntent, għax il-ħajja qasira u magħna m'aħna ser nieħdu xejn.
Ftakar x’kont u x’sejjer tkun u malajr tneħħi l-geddum.
Apprezza l-fatt li għadek ħaj u ħallik milli tagħmel id-dwejjaq.
Fittxu ħuduh ‘il barra ħalli naqsmu dak li ħalla.
Il-werrieta ta' min għandu l-flus, minflok jibkuh, jifirħu għaliex ser jirtuh.
F’mewt ix-xiħ flok biki jkun hemm żfin.
Il-werrieta tax-xiħ, minflok jibkuh, jifirħu għaliex ser jirtuh.
F’mewt ix-xiħ bħal fi dbiħ il-ħanżir; il-werrieta ferħana se jtiru.
Il-werrieta tax-xiħ, minflok jibkuh, jifirħu għaliex ser jirtuh. Dbiħ tfisser qtil.
Diqa u faqar agħar mill-mewt.
Aħjar tmut milli tgħix imdejjaq u bla flus.
Dejjem inaża u qatt ma jmut.
Xiħ u marid, safrattant għadu ħaj. Inaża tfisser muġugħ.
Darba mmutu.
Agħmel dak li tista' għax ħajja waħda għandek.
Bil-flus ħadd ma jixtri l-ġenna.
Il-flus importanti biss f'din il-ħajja, la tmut m'intix ser teħodhom miegħek.
Bikja u maħta u kollox imur fis-saħta.
Ħajjet il-bniedem qasira ħafna u mimlija tbatija. Fl-aħħar mill-aħħar, kulħadd imut u jintesa.
Bena u għalla, mar u ħalla.
Wara l-mewt, ikollok kemm ikollok trid tħallih warajk.
B’għalja ġġedded ħajtek u b’għalja tmut.
Id-dispjaċir jew itawwallek ħajtek jew joqtlok.
Aktar tmut in-nies bix-xaba’ milli bil-ġuħ.
Iż-żejjed jagħmel ħsara daqs in-nieqes.
Aktar ma nikbru, aktar noqorbu.
Aktar ma jgħaddi ż-żmien, aktar noqorbu lejn il-mewt.
Aħna lkoll għal ġol-ħofra.
Il-mewt ma jaħrabha ħadd.
Tiknisx billejl biex ma teqridx l-ewwieħ it-tajba.
Superstizzjoni ta' dari fejn kienu jemmnu li jekk tiknes billejl iġġib il-mewt fil-familja.
Aħjar is-safar mill-qabar.
Aħjar tkun taf li persuna ma tistax taraha għax siefret milli għax mietet.
Il-mewt mixtieqa taqbeż mit-tieqa.
Aktar kemm tkun tixtieq lil xi ħadd mejjet, aktar idum ma jmut.
Il-mejjet joħroġ u s-sabar jidħol.
Wara mewtek, ħaddieħor jibda jinsiek bil-mod il-mod.
Il-mejjet jitherra u l-ħsara tidderra.
Wara mewtek, ħaddieħor jibda jinsiek bil-mod il-mod.
Il-mewt ma tarax, għalhekk ma tinsatarx.
Kulħadd indaqs f’għajnejn il-mewt.
Il-mewt ma taħfirha lil ħadd.
Il-mewt ma jiskansaha ħadd, u turina li m’aħniex għal dejjem.
Il-mewt ma ġġib rispett lil ħadd.
Il-mewt ma jiskansaha ħadd, u turina li m’aħniex għal dejjem.
Il-mewt lil kulħadd tqiegħdu f’postu.
Il-mewt ma jiskansaha ħadd, u turina li m’aħniex għal dejjem.
Il-mewt ħadd ma jsib tarfha.
Il-mewt ma jiskansaha ħadd, u turina li m’aħniex għal dejjem.
Il-mewt dejjem b’xi għilla.
Il-mewt tiġi wkoll minħabba l-mard. Għilla tfisser marda.
Il-mewt beża’ minnha Alla, aħseb u ara aħna.
Anke Ġesù beża’ mill-mewt.
Il-mejtin m’għandekx xi tridhom.
Tgħidx affarijiet ħżiena fuq il-mejtin.
Il-mewt ma tinxtarax.
Kulħadd irid imut, sinjur u fqir.
Il-mejjet ras ma’ ras u l-ħaj irid l-għarras.
Sakemm għadek ħaj, aħseb fil-ħajja.
Il-mejjet mal-mejjet u l-ħaj mal-ħaj.
Sakemm għadek ħaj, aħseb fil-ħajja.
Il-mejjet mal-mejjet u l-ħaj madwar l-imwejjed.
Sakemm għadek ħaj, aħseb fil-ħajja.
U la l-mewt li sserraħ u la l-qawwa li tferraħ.
Jasal punt fejn il-marid ikun ta’ piż mhux biss fuqu nnifsu, iżda fuq ta’ madwaru wkoll.
Il-mewt isserraħ u l-qawwa tferraħ.
La mmutu neħilsu mit-tbatija, imma sakemm jasal dak il-mument jeħtieġ ingawdu l-ħajja.
B’riħ jew riefnu minn hawn għandna nsiefru.
Xi darba jew oħra rridu mmutu.
B’riħ jew riefnu minn hawn irridu nsiefru.
Xi darba jew oħra rridu mmutu.
Tiġieġa tal-furmarija jekk ma jmisshiex filgħodu, jmissha filgħaxija.
Kulħadd irid imut xi darba jew oħra. Il-furmarija tfisser l-isptar.
Iż-żmien isejjel il-ħajja.
Ħajjitna mislufa, mhix għal dejjem. Isejjel tfisser idejjen.
Iż-żmien jgħaddi u l-għomor jonqos.
Aktar ma jgħaddi ż-żmien, aktar tiqsar ħajjitna.
Aħjar katavru d-dar milli bil-bwiet vojta.
Aħjar tmut milli tkun bla flus.
Raġel ħalliel, mhux tifel sinċier.
Il-mewt tar-raġel, f’ħajjet martu tħalli vojt li l-imħabba u s-sinċerità ta’ wliedha ma jkunux kapaċi jimlew.
Aħjar id-duda f’tamla milli f’qalb ta’ armla.
Mara armla tibqa' tħoss in-nuqqas ta' żewġha ħafna wara mewtu.
Aħjar tieħu mara armla milli bint il-qamla.
Aħjar tiżżewweġ mara armla milli bint mara bla prinċipji.
Ħu mara armla u mhux waħda ta’ żmien it-tamla.
Aħjar tieħu mara armla bil-problemi tagħha, minn mara li trid dejjem ir-raġun (tamla hekk tfisser).
Il-mara armla tqabbad ʼl uliedha jħufu fir-ramla.
Wara l-mewt tal-missier, il-familji kienu jbatu ħafna. Iħufu fis-sens ta’ jfittxu l-ikel.
Ottubru jidħol u joħroġ fit-tubru.
F’Ottubru jidlam kmieni mill-bidu sal-aħħar tiegħu. It-tubru jirreferi għat-tebut.
Il-mewt u l-ħajja f’idejn Alla.
Alla biss jiddeċiedi meta niġu fid-dinja u nitilqu minnha.
Il-mewt u xita Alla jaf meta.
Alla biss jiddeċiedi meta niġu fid-dinja u nitilqu minnha.
Alla fejn iridek isibek.
Tagħmel x’tagħmel, il-mewt ma taħrabhiex.
Alla jħallas lill-ħażin minn din id-dinja.
Alla jikkastiga lil min ma jindimx minn dnubietu qabel mewtu.
Alla jaħfer u t-trab jgħatti.
Alla jaħfirlek dnubietek u la tmut jintesew ukoll.
Il-qwiel kollha, f’post wieħed.