l-inkwiet
Il-paċi tal-moħħ mhix dejjem faċli.
Aħjar tħawwad moħħok minn soddtok.
Solvi l-problemi qabel ma tmur torqod.
Biex bniedem ma jkollux inkwiet f’ħajtu hemm bżonn li ma jitwelidx.
L-inkwiet parti mill-ħajja.
Blata mxebbgħa tnixxi.
Min ikun qed jinkwieta jasal punt fejn jiftaħ qalbu ma’ xi ħadd.
B’mitt elf sena ħsieb ma tixtrix galletta.
L-inkwiet ma jwasslek imkien.
B’mitt sena ħsieb ma tiftaħ ebda bieb.
Għalxejn taħseb u tinkwieta għax imkien ma tasal.
B’mitt sena ħsieb ma traqqax geżwira.
Wettaq dak li tkun ippjanajt.
Fejn tara l-għajn ħażina terġax tmur.
Evita li tmur fejn diġà taf li ser issib l-inkwiet.
Fejn tidħol il-għajn bil-għawġ sigħajn.
Superstizzjoni: min jgħajjen joħloq l-inkwiet.
Fl-aħħar tal-mazzita ssib il-qanċlita.
Wara li kollox ikun mar sew, fl-aħħar naqra jinqala’ l-inkwiet.
Fl-aħħar tal-mazzita ssib iż-żbiba.
Wara li kollox ikun mar sew, fl-aħħar naqra jinqala’ l-inkwiet.
Għaddi ’l bogħod minn min ikisser il-ħatab, miż-żebbiegħ u mill-bajjad.
Jekk tmiss ma’ ċertu tip ta’ nies tispiċċa fl-inkwiet.
Għasfur ġerrej fix-xibka jeħel qisu mhu xejn.
L-inkwiet iġġibux b’idejk.
Għasfur li jħobb jiġġerra, dur dur jinqabad.
L-inkwiet iġġibux b’idejk.
Għasfur li jħobb jiġġerra, jew għad jagħli jew jisferra.
L-inkwiet iġġibux b’idejk.
Ħadd ma jixħet in-nar ġo ħobbu.
Ħadd ma jġib l-inkwiet b’idejh stess.
Ħeles mill-miżieb u weħel fil-qattara.
Ma ħelishiex: irnexxielu jegħleb biċċa inkwiet, biex issa reġa’ sab inkwiet ieħor ma’ wiċċu.
Ibża’ minn min hu battal.
Xi ħadd li ma jkollux x’jagħmel warrablu, għax malajr iġibek fl-inkwiet.
Id-demla tfaqqas id-dmiemel.
Ftit inkwiet isir ħafna inkwiet jekk ma tiħux ħsieb. Demla (pl. dmiemel) tfisser ulċera.
Id-dinja hekk imqassma: lil dan is-sliem, lil dak il-ħrieb u lilna l-hemm.
Trid taċċetta li l-inkwiet parti mill-ħajja. Ħrieb tfisser inkwiet u hemm tfisser għawġ.
Id-dinja kollha kuntrarju.
L-inkwiet parti mill-ħajja.
Id-dinja kollha slaleb.
L-inkwiet parti mill-ħajja.
Id-dinja ta’ min jaf jeħodha.
Min jaf jieħu l-ħajja kif tiġi jkollu inqas inkwiet.
Id-dinja tilgħab magħha u tirbaħlek.
Id-dinja fiha ħafna inkwiet u problemi li għalkemm nagħmlu li nistgħu niex niqfulhom, fl-aħħar mill-aħħar xorta nispiċċaw telliefa.
Il-bniedem l-inkwiet joqtlu mhux ix-xogħol.
Huwa l-inkwiet li jagħmel ħsara lill-bniedem, mhux ix-xogħol.
Il-bniedem qatta xewk.
Il-bniedem l-inkwiet jivvintah.
Il-forsi raġel ħażin.
Id-dubji dejjem sors ta’ inkwiet.
Il-ħabs mimli bl-innoċenti u l-kannierja bil-kaġuni.
Hemm min l-ewwel jaqla’ l-inkwiet imbagħad jgħid li ma kienx tort tiegħu, bħal xi ħadd li jgħid li spiċċa l-ħabs bla ħtija imma li l-vittma tiegħu tkun spiċċat fil-kannierja (post fejn kien jintefa’ l-għadam tal-mejtin).
Ilma qiegħed la tqanqlux għax jinten.
L-inkwiet evitah, mhux tmur tfittxu.
Il-mistrieħ jitbiegħed u l-għali joqrob.
Kulħadd ifittex li jgħix kuntent, iżda l-inkwiet ma jħalliniex bi kwietna.
Il-qaħba ruħha dejjem imsaħħba.
Il-prostituti jagħmlu xogħol li jwassal għall-inkwiet.
Imxi għal atar il-fenek u ssiblu l-bejta.
Biex issolvi problema darba għal dejjem, ara minn fejn hi ġejja. Atar huma t-traċċi.
In-nar minn xrara jieħu.
L-inkwiet minn affarijiet żgħar jibda.
Is-swied il-qalb qatel bosta nies.
L-inkwiet u d-dwejjaq kapaċi jkollhom effett ikrah ħafna fuq il-bniedem, li jista’ saħansitra jwassal għall-mewt.
Jekk il-pest irid fils minnek, tnejn agħtih inkella jieħdok.
Żomm ’il bogħod minn min iħobb jaqla’ l-inkwiet. Pest hija l-marda tal-pesta u fils huwa tip ta’ munita antika.
Jekk jista’ jkun eqred sal-irmied tal-kenur.
Biex tneħħi biċċa inkwiet minn fuq moħħok, ara li ssolvi l-problema mill-qiegħ.
Jekk tara, u fejn tara, għajn ħażina tersaqx.
Warrab meta tara li ġej l-inkwiet.
Karta bil-ġmied iġġib il-ġlied.
It-testment (= karta bil-ġmied) dejjem joħloq ħafna problemi bejn il-werrieta.
Kulħadd iħoss tiegħu.
Kulħadd l-inkwiet tiegħu jara, mhux tal-oħrajn.
Kulħadd salibu.
Kulħadd għandu l-inkwiet tiegħu ma’ xiex iseffaq wiċċu.
Kulma jkollok għall-inkwiet.
Kollox fil-ħajja joħloqlok l-inkwiet, tista’ ma tara xejn.
La kull hemm jhemm u la kull semm isemm.
Il-problemi fil-ħajja huma sors ta’ tagħlim. Hemm tfisser ħsara u jhemm huwa verb li jfisser tagħmel ħsara. Semm tfisser velenu u jsemm huwa verb li jfisser tivvelena. Mela mhux kull ħsara tagħmel ħsara u mhux kull velenu jivvelena.
La l-għoqda tasal fil-moxt, jew tinqata’ l-ħajta jew tinkiser is-sinna.
Kull biċċa inkwiet teskala sat-tali punt li l-affarijiet ikollhom jew imorru f’ċerta direzzjoni jew f’oħra.
L-għali bigħu mhix tixtrih.
L-inkwiet żomm ’il bogħod minnu u mhux tistiednu b’idejk.
L-għali bigħu mhux ixtrih.
L-inkwiet teħles minnu trid, mhux tistiednu.
L-għali jiġi waħdu.
Qatt ma tobsor meta l-inkwiet jiġi fuqek.
L-għali jkun imsiefer u jiġi fuqek bla waqt.
L-inkwiet jiġi fuqek mingħajr ma tkun qed tistennieh.
L-għali jkun imsiefer.
Qatt ma tobsor meta l-inkwiet jiġi fuqek.
L-għali ma jħallasx dejn.
L-inkwiet ma jsolvix problemi, eħles minnu.
L-għali u l-maltemp jiġu bla ma tibgħat għalihom.
L-inkwiet jiġi fuqek mingħajr ma tkun qed tistennieh.
L-għorab bi ħsieb oħrajn swied.
Ħu ħsieb l-inkwiet tiegħek u ħallik mill-inkwiet ta’ ħaddieħor.
L-hemm jiġi bil-ħemel u jmur bl-uqija.
L-inkwiet jitqabbel mal-mard, jiġi meta ma tkunx qed tistennieh u jdum biex jgħaddi. Ħemel tfisser tagħbija kbira. Uqija hija kejl tal-użin (ounce).
Ma ma jridx joqgħod tajjeb, il-ħażin ma jonqsux.
Tmurx tfittex l-inkwiet għax malajr issibu.
Meta jinxfu l-għejun, ikunu nixfu.
Ladarba jibda l-inkwiet ma jkun irid jieqaf b’xejn.
Meta niftakar fiex jien, ninsa kif kont.
Dak li qed jinkwetani bħalissa nessieni l-inkwiet kollu ta’ qabel.
Meta tiġi iftħilha l-bieb.
Ladarba jibda l-inkwiet, tistħajlu mhu ser jieqaf qatt.
Meta t-tiġieġ imorru fuq in-nuħħala jgerfxuha.
Xi nies jaqilgħu l-inkwiet kull fejn imorru.
Meta t-titwib hu għali għali, jew il-ħall ħażin jew il-botra għali.
Superstizzjoni li meta tittewweb b’ħalqek miftuħ, sinjal li tkun ser tiġri xi ħaġa kerha jew ikun ġej xi korriment (= botra) fit-tqala.
Min għandu l-għali jiekol ir-ross bil-labra.
Min ikun inkwetat jaqta’ l-aptit u bilkemm jiekol.
Min idaħħal il-lifgħa f’kommtu ttemmu.
Min imur ifittex l-inkwiet, isibu u jbati ħafna.
Min ifittex ksur il-għonq isibu dlonk.
Min imur ifittex l-inkwiet, isibu u jbati ħafna.
Min iħares bgħid jaqa’ qrib.
Min jinkwieta fuq dak li għad jiġri fil-futur jispiċċa ma jsolvix il-problemi li għandu issa. Bgħid tfisser ’il bogħod.
Min iħobb il-bajtar xitli ma jridx jibża’ mix-xewk; min iħobb mara miżżewġa ma jridx jibża’ minnha l-mewt.
Min isir iħobb mara miżżewġa jidħol f’ħafna inkwiet u għandu jkun lest ibati l-konsegwenzi tal-għira ta’ żewġha.
Min irabbi l-klieb ma jkunx raġel tal-ħsieb.
Min irabbi l-klieb ma jkollux inkwiet, mhux bħal min irabbi t-tfal.
Min jibża’ li jismar ma jmurx fix-xemx.
L-inkwiet m’għandekx xi tridu.
Min jibża’ li jismar ma joqgħodx fix-xemx.
L-inkwiet m’għandekx xi tridu.
Min jibża’ mill-weraq m’għandux imur fil-bosk.
L-inkwiet m’għandekx xi tridu.
Min jittarraf jiġġarraf.
Min imur ifittex il-periklu jew l-inkwiet malajr isibu.
Min ma jridx jibtell ma joħroġx fix-xita.
Min ma jridx inkwiet m’għandux iġibu b’idejh. Jibtell tfisser jixxarrab.
Min ma jridx l-inkwiet, jieħu d-dinja kif tiġih.
Biex tevita l-inkwiet, ħu l-ħajja kif tiġik u toqgħodx tissielet kontra l-kurrent.
Mir-raġġ jiġi l-ġlied.
Miċ-ċajt goff (= ir-raġġ) jinqala’ l-ġlied.
Mitt sena ħsieb ma jħallasx sena kera.
Għalxejn taħseb u tinkwieta għax imkien ma tasal.
Neħtieġu s-sabar sal-qabar.
Nitolbu lil Alla jagħtina l‑paċenzja naffrontaw il‑ħajja sa mewtna.
Nistenna l-wens iwennisni, iberraq għajnejh u jkexkixni.
Il-ħajja mimlija problemi u l-wens ma jasal qatt għax ikollna wisq inkwiet.
Nistennew dejjem il-faraġ u salibna tiela’ t-taraġ.
Naħsbu li se neħilsu mill-problemi imma le; anzi, ikomplu jiżdiedu.
Nistennew il-faraġ joqrob u aktar jitbiegħed.
Naħsbu li se neħilsu mill‑problemi imma le; anzi, ikomplu jiżdiedu.
Omm il-ġifa qatt ma tagħli.
Min jilgħabha tal-baħnan jaħrab minn ħafna inkwiet. Ġifa tfisser iblah jew baħnan, li ommu ma tkun tista’ tgħidlu jew tqabbdu xejn.
Omm il-maqtul sogħbiena iżda omm l-imhedded ħosbiena.
Min isib ruħu fl-inkwiet, ikun qiegħed jaqla’ l-inkwiet ukoll għal dawk ta’ madwaru li jħobbuh.
Oqgħod kwiet għax tiġi x-xita u jagħmel il-wied.
Rażżan ilsienek biex ma toħloqx inkwiet.
Qatt tagħti lok għall-ħsieb ħażin.
Keċċi l-ħsibijiet ħżiena li jiġuk f’moħħok għax jagħmlulek ħajtek miżerja.
Qatt tinfaxxa rasek qabel ma taqsamha.
Toqgħodx tinkwieta fuq xi ħaġa qabel ma sseħħ verament.
Qrunu kulħadd urah u tiegħu ħadd ma jarah.
Kulħadd jindaħal fl-inkwiet u l-problemi ta’ ħaddieħor, u tiegħu ħadd ma jarah.
Ras bla ħsieb torqod mat-tiġieġ u tqum mal-klieb.
Min m’għandux inkwiet fuq moħħu jorqod kmieni u jqum tard.
Ras bla ħsieb, sorm frisk.
Min ma jinkwieta fuq xejn jgħix kuntent, bħal warrani li qatt ma jaqbdu l-ħakk.
Ras bla ħsieb, tina bla ġarab.
Min ma jinkwieta fuq xejn jgħix kuntent, bħal warrani (tina) li qatt ma jaqbdu l-ħakk (ġarab).
Sa għonqu fl-ilma u jrid jidden.
Għandu ħafna problemi u xorta waħda jrid jagħmel l-arja.
Sabbar lill-imjassrin.
Lil min tarah inkwetat jew għandu l-problemi, għinu.
Tagħmilha tal-ħmar biex ma tħallasx dwana.
Min jilgħabha tal‑baħnan jaħrab minn ħafna inkwiet jew responsabbiltajiet.
Taħsibx fil-bogħod għax taqa’ fil-qrib.
Min jinkwieta fuq dak li għad jiġri fil‑futur jispiċċa ma jsolvix il‑problemi li għandu issa.
Tersaqx fejn hemm l-ilma mdardar.
Aħrab ’il bogħod fejn tara li hemm l-inkwiet.
Tixtrix l-għali b’idejk.
Iġġibx inkwiet b’idejk stess.
Tneħħi l-inkwiet mid-dinja ma jibqa’ xejn.
Tant hawn inkwiet u problemi fid-dinja li t-tajjeb u s-sabiħ kultant diffiċli tarahom.
Tressaqx in-nar lejn il-polvri.
Iġġibx inkwiet b’idejk stess.
Xejn ma jiswa li tħobbni jekk tgħallini.
Lil min tħobbu tassew ma tinkwetahx.
Il-qwiel kollha, f’post wieħed.