Kulħadd ifittex li jara u jieħu s-sabiħ.
Kategorija: it-tajjeb
Kulħadd xogħlu jogħġbu.
Kulħadd jara tiegħu tajjeb u ta’ ħaddieħor ħażin, anke fix-xogħol.
Kulħadd tajjeb iżda ibża’ minn kulħadd.
Kulħadd għandu t-tajjeb tiegħu, iżda xorta waħda tafdax.
Kull deni ħudu b’ġid.
Tgħallem mill-affarijiet il-ħżiena li jiġrulek.
Kulħadd kif inhu magħġun.
Kulħadd bil-karattru tiegħu, bit-tajjeb u l-ħażin b’kollox.
Konna aħjar meta konna agħar.
Mingħalina li l-affarijiet kienu se jmorru għall-aħjar, imma minflok marru għall-agħar.
Kelma sewwa ssewwi dinja u kelma belha tgħarraq dinja.
Il-kliem jagħmel ġid daqs kemm jagħmel ħsara.
Jitħaxxen il-ħajt, tidjieq l-għorfa.
Ħaġa tmur tajjeb u l-oħra ħażin.
Jekk xortih ittih jista’ jintefa’ fil-qiegħ.
Tkun xortik tajba, tagħmel x’tagħmel tajba tibqa’.
Jekk mhux b’xi salib, b’domna.
Kulħadd għandu l-problemi tiegħu xi jsolvi.
Jeħtieġ teħodha kif tiġi.
Aċċetta li fil-ħajja mhux kollox imur tajjeb u kif tixtieq.
Jagħmel ħażin min jitlaq ruħu mingħajr biskotti.
Għandek dejjem tfittex li tagħmel il-ġid.
Iżżarma knisja biex tarma oħra.
Biex tirranġa xi ħaġa, kellek tkisser xi ħaġa oħra.
It-twajjeb miskin.
Min ikun twajjeb wisq ibati għax kulħadd jagħmel li jrid bih.
It-triq tan-nofs l-aħjar.
L-estremi dejjem ħżiena – tgħallem immodera.
It-triq tal-ġenna dejqa.
Diffiċli ħafna li tgħix ħajja tajba u tirbaħ il-ġenna.
It-tiġieġa tbid fejn tiekol in-nuħħala.
Kulħadd irid iwieġeb ta’ għemilu, kemm fit-tajjeb kif ukoll fil-ħażin.
It-tiġieġa fejn tiekol in-nuħħala tmur tbidha l-bajda.
Kulħadd irid iwieġeb ta’ għemilu, kemm fit-tajjeb kif ukoll fil-ħażin.
Is-sabiħ kulħadd jaf jarah.
Kulħadd kapaċi jagħraf x’inhu sabiħ.
It-tajjeb kulħadd jaf jarah.
Kulħadd kapaċi jagħraf x’inhu tajjeb.
It-tajjeb jidneb seba’ darbiet.
Kulħadd jiżbalja, anke n-nies twajba.
It-tajjeb ħallas għalih.
Jeħtieġ li tħallas il-flus jekk trid il-kwalità.
Itfagħha għal rasha forsi tiġi għal saqajha.
Fejn ma tafx, ħu sogru u agħmel xi ħaġa kif ġie ġie – jekk tkun xortik tajba, jaf tiġik tajba wkoll.
Is-sewwa ħarbet għax ħadd ma ried jilqagħha f’daru.
Donnu ħadd ma sar jagħżel li jagħmel it-tajjeb illum il-ġurnata.
Is-sabiħ maħbub bla ma jaf, l-ikrah mibgħud bla ma jaħti.
Wiċċ sabiħ jattirak inkonxjament, mentri wiċċ ikrah jimbuttak anke jekk forsi l-persuna jkollha karattru sabiħ.
Ir-riħ imexxi l-bastimenti, imma hu jgħarraqhom.
Oqgħod attent għax ħaġa tista’ daqqa tagħmillek il-ġid, u daqqa tagħmillek il-ħsara.
Ir-riħ erħilu jonfoħ.
Meta tagħmel it-tajjeb, jiġri x’jiġri jkollok il-kuxjenza nadifa.
Ir-ras meta tifliha tkun taf x’fiha.
Tara tassew sa fejn tkun waslet il-ħsara meta tipprova ssewwiha.
Ir-raġuni ma tridx forza.
Ara li hemm il-bilanċ f’dak li tagħmel u ma ssibx problemi.
Imxi sewwa u ħalli l-baħar iħabbat.
Meta tagħmel it-tajjeb, jiġri x’jiġri jkollok il-kuxjenza nadifa.
Il-wied dejjem għan-niżla.
Meta ma tibqax tidħaqlek ix-xorti, l-affarijiet imorru mill-ħażin għall-agħar.
Il-qattus iħobb bil-għama u l-kelb bix-xaba’.
Il-qtates juru mħabba lejn sidhom b’mod differenti mill-klieb.
Il-qarnita fl-aħħar iddur għal subgħajha.
Meta tkun iddisprat minn kollox tasal tagħmel biex tilħaq l-għanijiet tiegħek.
Il-miżbla qatt ma tkun tfuħ.
Mingħand xi ħadd ta’ intern ħażin tistenniex it-tajjeb.
Illum jien u għada int.
It-tajjeb li mess lili llum imiss lilek għada, u l-istess bil-ħażin.
Il-liġi saret bħall-banavolja.
In-nies ħżiena jmorru aħjar mal-ġustizzja mill-vittmi. Banavolja tfisser brikkun.
Il-ħażin malajr jingħoġob.
Aktar faċli temmen il-ħażin milli t-tajjeb.
Il-ħażin jitwemmen aktar malajr.
Aktar faċli temmen il-ħażin milli t-tajjeb.
L-għada li titrabba fiha l-kefen biss ineħħiha.
Id-drawwiet tiegħek – tajbin u ħżiena – sa mewtek tibqa’ bihom. Għada tfisser drawwa u l-kefen huwa t-tebut.
Il-ġid ma jingħamilx bilfors.
Mhux kulħadd jagħmel it-tajjeb.
Il-ġenna ma jidħlux xjaten.
Ix-xitan jagħmel li jrid bil-bniedem, iżda mhux b’Alla. Dan ifisser li xi darba t-tajjeb għad jirbaħ fuq il-ħażin.
Il-ftit u tajjeb aħjar mill-wisq u ħażin.
Aħjar tagħmel ftit u tajjeb milli tipprova tagħmel ħafna u ħażin.
Il-fortuna mal-ħmir u s-skaren.
Ix-xorti tidħaq lin-nies injoranti u lis-sakranazzi.
Ilbieraħ kilt tiġieġa, illum bajda mgħollija u għada nixrob l-ilma tal-lissija.
Ix-xorti taf tkun kattiva ħafna, għax filli tidħaqlek u filli ttik bis-sieq. L-ilma tal-lissija huwa l-ilma tal-ħasil.
Il-banda ddoqq u l-bajtar dieħel.
Meta ħadd ma jkun jimpurtah kollox imur ħażin.
Il-bajtar tax-xewk ma jagħmilx ħawħ.
Mingħand in-nies ħżiena m’hemmx azzjonijiet tajbin.
Id-dritt m’hemmx isbaħ minnu.
Dejjem kun ġust u agħmel it-tajjeb, biex ħadd ma jkollu xi jgħid fuqek.
Id-dinja tal-brikkun.
Fid-dinja n-nies ħżiena jirnexxu iżjed min-nies twajba.
Id-dinja raddiena, daqqa minn fuq int u daqqa minn fuq jiena.
Mhux dejjem inkunu xortina tajba, iżda mhux dejjem inkunu xortina ħażina.
Id-dinja dejjem miexja, daqqa dritt u daqqa mgħawweġ.
Bit-tajjeb u l-ħażin kollu tagħha, il-ħajja tibqa’ għaddejja.
Iċ-ċomb jgħum u r-rix jegħreq.
Kollox ta’ taħt fuq: min kapaċi jasal qed jibqa’ lura u min mhu kapaċi għal xejn qed isib min jaqilgħu.
Iċ-ċomb jgħum u t-tiben jegħreq.
Kollox ta’ taħt fuq: min kapaċi jasal qed jibqa’ lura u min mhu kapaċi għal xejn qed isib min jaqilgħu.
Ibża’ minn kulħadd u tibża’ minn ħadd.
Dejjem kun ġust u agħmel it-tajjeb, biex ħadd ma jkollu xi jgħid fuqek.
Ħudha la ġietek għax jekk tħalliha jibdielek.
Meta tkun xortik tajba, kun kuntent u gawdiha għax ma tafx meta ser terġa’ tiġi.
Ħobż ix-xitan ma jxabbax.
Dak kollu li tkun akkwistajt bid-diżonestà ma tgawdihx.
Ħidma għal Alla ma titħallasx.
Azzjoni tajba kif irid Alla ma tistax titħallas bi flus materjali.
Ħares warajk u tħarisx quddiemek.
Oqgħod attent, huwa aktar faċli li ħaddieħor jagħmillek il-ħażin minn wara dahrek milli f’wiċċek.
Ħaġa li ma tixraqx tagħmilhiex u kelma li tisma’ d-dar la ttennihiex.
Ġib ruħek tajjeb u qis kliemek, tikxifx dak li jingħad id-dar.
Ħadd mhu kuntent b’xortih.
Qatt m’aħna kuntenti b’dak li għandna, dejjem irridu iżjed.
Ħa l-qamħ u ħalla l-ħliefa.
Żamm l-aħjar għalih u ħalla l-laqx lil ħaddieħor.
Għar-raġuni m’hemmx forza.
L-affarijiet għandhom isiru sew mingħajr aspettattivi kbar.
Għan-niżla kull qaddis jgħin.
Meta ma jkunx hemm problemi kollox jimxi sew.
Għam il-baħar kollu u għereq fir-ramla.
Kien sejjer tajjeb, sakemm żgarra fl-aħħar naqra.
Għal kull niżla hawn telgħa.
Għal kull ħaġa ħażina hemm oħra tajba.
Għal kull lagħqa għasel hemm bettija morr.
L-affarijiet sbieħ li jiġru fil-ħajja huma ftit meta tqabbel mal-affarijiet koroh kollha.
Ġorġ u Ġanni, tul iż-żmien id-dinja għat-tnejn tgħanni.
Xi darba lil kulħadd tidħaq ix-xorti.
Ġaħan beda minn qrabatu.
L-ewwel tagħlim dwar x’inhu tajjeb u ħażin mid-dar tieħdu.
Fuq tlieta toqgħod il-borma.
Ma’ kull ħaġa tajba jew ħażina li tiġri, stenna tnejn oħra!
Ftit u tajjeb aħjar minn ħafna u ħażin.
Aħjar dak li għandu jsir, isir bil-mod u tajjeb.
Ftira mimlija bl-għaġla iġri kulha, inkella tiqras.
Jekk għamilt xi żball għax ma qgħadtx attent, sewwih mill-ewwel qabel ikun tard wisq.
Ftakar dejjem f’min jagħmillek il-ġid.
Ftakar f’min xtaqlek u għamillek il-ġid, meta jkun fil-bżonn.
Fil-ħajja gwerra l-ħin kollu.
Fil-ħajja dejjem hemm xi diffikultà x’tegħleb.
Fil-bżonn jitħarrku r-riġlejn.
Meta jkollok bżonn xi ħaġa tieħu azzjoni.
Fid-dinja tħobb ħaġa u tobgħod oħra.
Ma tistax tistenna li kollox imur kif tixtieq fil-ħajja.
Fid-dinja tajjeb tkun f’saħħtek, iżda mitt darba aħjar tkun rasek tilħaqlek.
Is-saħħa importanti iżda iktar importanti li tuża moħħok u tkun makakk.
Fid-dinja tagħmel il-ġid u jisfalek deni.
Mhux kulħadd japprezza l-ġid li tagħmel.
Fid-dinja mhux dejjem ir-rebbiegħa.
Ma tistax tistenna li kollox imur tajjeb fil-ħajja.
Fid-dinja kollox frugħa; is-sabiħ filgħodu, filgħaxija tarah kruha.
Fid-dinja trid toqgħod attent għax id-dehra tqarraq bik.
Fid-dinja ħadd mhu tassew kuntent.
Ma ssibx kuntentizza fid-dinja, kulħadd isib fuq xiex jilmenta.
Fejn hemm il-ħdura ssib l-ilma.
Kull azzjoni, tajba jew ħażina, għandha l-konsegwenzi tagħha.
F’kollox issib it-tajjeb u l-ħażin.
Kull ħaġa għandha s-sabiħ u l-ikrah tagħha.
F’kollox issib il-karfa.
F’kull ħaġa ssib difett, xejn mhu perfett. Il-karfa tfisser il-frak tat-tiben.
F’għalqa waħda jikbru l-qamħ u s-sikrana.
Għal kull ħaġa tajba ssib waħda ħażina, u bil-kontra.
Erba’ bajtriet qatt ma wiżnu qantarejn.
L-isforzi biex wieħed jirranġa sitwazzjoni ħażina ma jkunux biżżejjed biex tinqaleb il-folja.
Ebda warda bla xewk.
Is-sabiħ jiġi mal-ikrah fil-ħajja.
Dik iċ-ċajta kultant kulħadd iridha.
Li niċċajtaw huwa importanti sabiex fil-ħajja ma niffukawx fuq id-dwejjaq biss.
Dejjem ħares lejn min hu agħar minnek.
Ikkonsla, żgur hemm xi ħadd li f’ħajtu l-affarijiet sejrin agħar.
Darba fit-tant tmiss lill-Papa.
It-tajjeb u l-ħażin xi darba lil kulħadd jiġru, anke lin-nies importanti.
Daqqa jmissek l-għadma u oħra l-laħma.
Fil-ħajja daqqa tiġik tajba u daqqa tiġik ħażina.
Daqqa fuq iċ-ċirku u oħra fuq il-bettija.
Bniedem li jġib ruħu ħażin u bis-salvaġiżmu wara jpattilu bil-ħlewwa u l-ġentilezza.
Dak li jidħol mill-gerżuma ‘l ġewwa kollu sewwa.
Bħalma l-bniedem jiekol biss ikel tajjeb, hekk ukoll jaf jagħżel it-tajjeb mill-ħażin.
Dak li jeħel fid-dras ma jxebbax.
L-isforzi biex wieħed jirranġa sitwazzjoni ħażina ma jkunux biżżejjed biex tinqaleb il-folja.
Ċappa tin u tamal ma fihomx x’titqażżeż.
Twarrabx xi ħaġa tajba sempliċement għax tidher kerha.
Biġġel għax iż-żmien ibiddel.
Jekk tittratta lil ta’ madwarek ħażin, għad jiġi żmien fejn huma jittrattawk ħażin. Biġġel tfisser irrispetta.
Beritta ġġib lil oħra, kappell jgħodd ukoll.
Jekk joffrulek xi ħaġa tajba, ħudha.
Aħjar tidħaq milli tibki.
Aħjar tieħu l-affarijiet biċ-ċajt meta jibdew sejrin ħażin.
Aħjar hekk inkella agħar.
Aħjar nieħdu paċenzja bil-ħażin li ġara, dejjem setgħet ġiet agħar.
Agħtini xortija u itfagħni l-baħar.
Meta xi ħadd ikun xortih tajba, anke fil-ħażin ma jbatix daqshekk.
Aħjar inkemmex wiċċi nkella nsewwed qalbi.
Jagħmillek iżjed ġid turi d-dwejjaq milli taħbihom.
B’ħobża tagħmel mitt mil u b’mitt ħobża ma tagħmilx mil.
Meta kollox ikun miexi sew teħles malajr, iżda meta kollox jibda ġej bil-kontra, iddum ħafna iżjed.
B’ħabel jitgħallaq bniedem, b’ħabel isalva ieħor.
Dak li jagħmel il-ħsara lil persuna jista’ jagħmel il-ġid lil persuna oħra.
Armi l-ħażin u żomm it-tajjeb.
Qis li dejjem tagħżel l-aħjar.
Aktar tmut in-nies bix-xaba’ milli bil-ġuħ.
Iż-żejjed jagħmel ħsara daqs in-nieqes.
Aħseb il-ħażin biex it-tajjeb ma jonqosx.
Tafdax iżżejjed u ma titqarraqx.
Aħseb dejjem li l-hemm li temm lil ġarek jista’ jidħol f’darek.
M’intix speċjali, dak li jiġri lil ħaddieħor jista’ faċilment jiġri lilek.
Agħder għax ma tafx fiex tiġi.
Kun qalbek tajba għax ma tafx min tiġi bżonn.
Agħlaq il-bieb qabel ma taħrab id-debba.
Ilqa’ għall-ħsara li tista’ ssir; wara jkun tard wisq.
Aħjar waħdek minn wensek.
Għalkemm mhux dejjem faċli, għandek tagħżel li tagħmel it-tajjeb.
Aħjar torqod fix-xemx taħraq inkella toqgħod fid-dell tal-ħażin.
Għalkemm mhux dejjem faċli, għandek tagħżel li tagħmel it-tajjeb.
Agħmel il-ġid u nsieh; agħmel id-deni u ftakar fih.
Ftakar fid-deni li tkun għamilt biex tpatti għal għemilek.
Agħmel is-sewwa u ħalli l-baħar iħabbat.
Min jagħmel it-tajjeb jgħix trankwill.
Agħmel is-sewwa u tibża’ minn ħadd.
Min jagħmel it-tajjeb jgħix trankwill.
Aħjar it-triq għax la fiha xewk u lanqas għollieq.
Jekk tkun ġust f’li tagħmel ma tidħolx f’inkwiet.
Il-flus u l-qdusija t-tnejn moħbija.
Qatt ma tista’ tkun taf dak li jkun kemm għandu flus, jew kemm hu bniedem twajjeb.
Ix-xitan jibża’ mill-ilma mbierek.
Il-ħażin trid tiġġilidlu bit-tajjeb.
Alla jżomm il-ħaqq u jeħlisna minnu.
Alla f’li jagħmel huwa ġust, bit-tama li jeħlisna mill-ġustizzja.
Alla jagħmel il-ħaqq u jeħlisna minnu.
Alla f’li jagħmel huwa ġust, bit-tama li jeħlisna mill-ġustizzja.
Is-sewwa bin Alla.
Min jagħmel dak li hu sewwa jkun qed jagħmel ir-rieda t’Alla.
Alla biss jaf x’inhu s-sewwa.
Alla biss jiġġudika x’inhu sewwa u l-aħjar.
Alla jibgħatha tajba għax ħażina ilha.
Meta jkunu ilhom sejrin ħażin l-affarijiet, wieħed jitlob lil Alla biex imorru għall-aħjar.
Alla jibni knisja, ix-xitan itella’ kappella.
Il-ħażin dejjem lest biex jirbaħ fuq it-tajjeb.
Alla lill-bniedem iħallsu skont qalbu.
Alla jippremja jew jikkastiga skont l-imġiba tal-bniedem.
Is-sewwa ħabib Alla.
Min jagħmel dak li hu sewwa jkun qed jagħmel ir-rieda t’Alla.
Alla jagħlaq bieb u jiftaħ mija.
Meta xi ħaġa tmur ħażin, Alla jibgħat ħafna oħrajn tajbin.