Il-ħbieb ta' veru tagħrafhom meta tkun fil-bżonn. Ħmum tfisser għawġ u l-għemum huma l-ħbieb.
Aħjar taqta’ int jew jaqtgħulek.
Aħjar issolvi kwistjoni barra mill-qorti biex ma teħilx flus żejda jekk ikollok tort.
Kategoriji: il-flus | ir-relazzjonijiet
Il-ħbieb u l-qraba jidhru fil-waqt.
Il-ħbieb ta' veru u l-qraba li jimpurtahom minnek issibhom meta jkollok bżonnhom.
L-għawi ħu l-ġenn.
Ma tibqax tirraġuna jekk temmen dak kollu li tisma' fuq in-nies.
Tikxifx għajnek man-nies.
Tmurx tikxef il-ħajja privata tiegħek man-nies.
Aħjar nuħħalti minn smid ġarti.
Aħjar dak li hu tiegħi, minkejja li tal-ġara forsi aħjar.
Aħjar jikluk il-klieb milli tiġi bżonn il-ħbieb.
Kultant il-ħbieb ma ssibhomx fil-mument tal-bżonn.
Erfa’ salibek u ħallik min-nies.
Ara l-affarijiet tiegħek u ħalli lil ħaddieħor bi kwietu.
Dak li ma tridx lilek lanqas tridu ‘l għajrek.
Ġib ruħek ma' ħaddieħor bl-istess mod li tixtieq li ħaddieħor iġib ruħu miegħek.
Agħtini bil-ħarta u la turinix iċ-ċiera.
Aqbad iġġieled miegħi minflok toqgħod bil-geddum.
Bil-kelma t-tajba sal-far joħroġ mit-tqajba.
Bil-ġentilezza jirnexxilek tieħu li trid mingħand xi ħadd.
Agħti kemm tiflaħ qabel ma jagħtuk.
Ara li tkun bdejt tiġġieled qabel ma jiġġilidlek ħaddieħor.
Aħjar paċi milli tagħmel paċi.
Aħjar ma jkollokx xi tgħid mill-ewwel ma' persuna, milli tagħmel paċi wara.
Bla qaddisin ma tmurx il-ġenna.
Fid-dinja għandek bżonn il-ħbieb biex tirnexxi.
Il-ħniena kienet u tkun, inkella m’hemmx iżjed dinja.
Għandek tħenn għalik innifsek u għall-oħrajn fid-dinja.
Ħabibek jistrok u jgħattilek.
Il-ħbieb ta' veru jippruvaw jgħattulek l-iżbalji, għax jixtiqulek il-ġid. Jistrok tfisser jgħattik.
Ħobb lil ġarek iżda ddaħħlux f’darek.
M’hemmx kunfidenzi żejda mal-ġirien.
Aħjar issuq erba’ żwiemel minn ħmar.
Aktar faċli tagħmilha ma' nies intelliġenti milli mal-injoranti.
Bla xaħam ma tvarax.
Fid-dinja għandek bżonn il-ħbieb u l-kuntatti biex tirnexxi.
Ħadd ma jaħraq il-kamra li joqgħod fiha.
Meta xi ħadd ikun kompliċi f'xi ħaġa ħażina, mhux ser jikxef lill-kompliċi l-oħrajn għax ibati hu.
Billi tagħti tieħu.
In-nies jimxu miegħek skont kif timxi magħhom.
Dak li ma jgħinekx fil-waqt la titmax fih u lanqas qatt m’għandek taqa’ għalih.
Meta jkollok bżonn l-għajnuna ta' ħabib u ma ssibux, tibqax tisforza biex iżżomm ħbiberija falza. Titmax ifisser li ma turix tama.