Kulħadd jiġġudika lil ħaddieħor skont il-fehma tiegħu.
Bogħod mill-għajn, bogħod mill-qalb.
Lil min tkun ilek ma tarah tinsieh.
Kategoriji: ir-relazzjonijiet
Min ġie ferraħni, min ma ġiex serraħni.
Min ġie għandi fraħt bih, u min ma ġiex serraħli rasi għax ifisser li m'għandix inkwiet miegħu.
Aħfer lil kulħadd mhux lilek innifsek.
Ma' ħaddieħor kun qalbek tajba, imma miegħek innifsek kun strett.
Anke fost l-appostli kien hemm Ġuda.
Dejjem ser issib min jittradik.
La ddardarx l-għajn li trid tixrob minnha.
Qis li ma jkollokx xi tgħid - jew tbiegħed minnek - lil min għandek bżonn jew li għad tiġi bżonnu fil-futur.
Il-ħabib ħobbu b’għewiedu.
Jeħtieġ li ħabib taċċettah kif inhu, bil-preġji u d-difetti tiegħu b'kollox. Għewiedu tfisser id-drawwiet tiegħu.
Il-ġara tgħallmek tgħammar.
In-nies ta' madwarek jgħallmuk kif tħares l-interessi tiegħek.
Dak li jkun tagħmillu mitt pjaċir u tonqsu darba kollox jispiċċa.
Għax tiżbalja mqar darba, in-nies jinsew il-pjaċiri kollha li tkun għamiltilhom qabel.
Lil min issemmih lesti x’tagħtih.
Semmi lil xi ħadd u kumbinazzjoni tarah ġej.
Ħabib fil-bżonn, ħabib tal-kunjom.
Il-ħbieb ta' veru huma dawk li ssibhom meta tiġi bżonnhom.
La torbotx rabta ċoff.
Qis li l-ftehim ikun sod.
Għajnejn żoroq jisirqu n-nies mit-toroq.
Min hu għajnejh blu jsaħħrek u jagħmel bik li jrid. Żoroq tfisser blu.
Ladarba tbiegħed, nesa kulma wiegħed.
Il-wegħdiet malajr isiru u malajr jintesew.
Erfa’ salibek u ħallik min-nies.
Ara l-affarijiet tiegħek u ħalli lil ħaddieħor bi kwietu.
Ħares tajjeb lil darek u la tħallilx lil ġarek.
Ħu ħsieb l-affarijiet tiegħek u twaqqax lil ħaddieħor fit-tentazzjoni billi tħalli oġġetti ta' valur fid-deher.
Fid-dinja lkoll niġu bżonn xulxin.
Itlob l-għajnuna meta jkollok bżonnha u għin meta jitolbuk l-għajnuna.
Bħalissa aħjar inti minn dajjaret xbinti.
F'sitwazzjoni ta' urġenza min jinzerta ħdejk jista' jtik l-ewwel għajnuna.
Ħabibek jistrok u jgħattilek.
Il-ħbieb ta' veru jippruvaw jgħattulek l-iżbalji, għax jixtiqulek il-ġid. Jistrok tfisser jgħattik.
L-akbar ġlieda ta’ bejn il-ħbieb.
Il-ħbieb ikunu jafu lil xulxin sew u l-ġlied ikun ikbar.
Aħjar jikluk il-klieb milli tiġi bżonn il-ħbieb.
Kultant il-ħbieb ma ssibhomx fil-mument tal-bżonn.
Il-ġara tgħallmek tgħix.
In-nies ta' madwarek jgħallmuk kif tħares l-interessi tiegħek.