Irridu naħdmu u nishru biex nirnexxu u nkunu kuntenti.
Kulħadd għal senegħtu.
Kulħadd ikun jifhem l-aktar fix-xogħol li jagħmel.
L-irqad jagħmel il-ħmira.
Huwa importanti li torqod sabiex iġġib lura saħħtek u tissokta b'xogħlok.
Xogħol ta’ ħorrox borrox, imma l-istokk u ż-żebgħa jgħattu kollox.
Ix-xogħol ħażin hemm mezz kif jitranġa.
Ħajja ta’ kul u ixrob, orqod u ttieraħ.
Min hu għażżien ma jagħmel xejn ħlief jiekol, jixrob u jorqod. Ittieraħ tfisser imtedd fuq is-sodda.
L-imgħax itajjar in-ngħas.
Tagħmel iżjed kuraġġ fix-xogħol meta tara l-flus deħlin.
Id-driegħ għall-ħidma u r-ras għall-misra.
Il-ġisem qiegħed għax-xogħol fiżiku u l-moħħ qiegħed għax-xogħol mentali. Misra tfisser ippjanar.
Il-mostra mhix ġostra.
Tgħallem apprezza x-xogħol ta' ħaddieħor, minflok tipprova tleħħaq miegħu.
Ħmar qammas jikser sinslet id-dahar.
L-injorant ma jagħmilx xogħol tajjeb.
B’idek il-waħda agħġen u bl-oħra keċċi l-qattusa.
Meta tkun għaddej b'biċċa xogħol, ara li ma jkunx hemm min iħarbatlek kollox.
L-għażżien xogħlu għali.
Jekk tħaddem għażżien, tħallsu wisq għall-ftit xogħol li jagħmel.
Għal kull għadma hawn mitt kelb.
Il-kompetizzjoni għax-xogħol hija qalila.
Il-ħmar ħaddmu għal rasu biex tkun taf x’jiswa.
Tara bniedem kemm hu kapaċi meta tħallih jagħmel biċċa xogħol waħdu.
Kulħadd jaqra fi ktiebu.
Kulħadd f'xogħlu jifhem.
Ħobż il-bieżel jieklu l-għażżien.
Min hu għażżien japprofitta minn xogħol il-bieżel.
Imċappas bid-demm u laħam ma jikolx.
Tagħmel ix-xogħol inti u ġieli tispiċċa ma tgawdi xejn minnu.
Tiġieġa ħawtiela bajjada.
Tiġieġa bieżla tagħmel bajd sabiħ, bħal min jistinka biex jagħti prodott sabiħ. Ħawtiela tfisser ħabrieka u bajjada tfisser li tbid.
Bil-prattika biss li wieħed jieħu ħaġa sewwa.
Bil-prattika l-aħjar li titgħallem.
Ix-xemgħa tixgħel u l-purċissjoni wieqfa.
Hemm xi jsir iżda ħadd ma jrid jaħdem.
Ħidma fil-btala tmur fis-siba u l-ħala.
Dari kienu jemmnu li Alla jikkastiga lil min jaħdem il-Ħdud u l-festi. Siba tfisser ħerba.
Ix-xogħol tar-ras iebes.
Ix-xogħol mentali huwa itqal mix-xogħol manwali.