Ix-xogħol ħażin hemm mezz kif jitranġa.
Il-bieżel ma jsib l-ebda triq magħluqa.
Min jaħdem u jistinka dejjem jasal fejn irid.
Kategoriji: il-bżulija | ix-xogħol
Bidu bil-għawġ tmiem ħażin.
Meta biċċa xogħol tibda ħażin kollox jibqa' sejjer ħażin.
Biex tgawdi jeħtieġ tbati.
Xejn ma tagħmel mingħajr tbatija.
Ħidma fil-btala tmur fis-siba u l-ħala.
Dari kienu jemmnu li Alla jikkastiga lil min jaħdem il-Ħdud u l-festi. Siba tfisser ħerba.
Ħobż il-bieżel jieklu l-għażżien.
Min hu għażżien japprofitta minn xogħol il-bieżel.
L-għażżien xogħlu għali.
Jekk tħaddem għażżien, tħallsu wisq għall-ftit xogħol li jagħmel.
Il-ħierek u l-bieżel jiftiehmu.
Min juri ħeġġa għax-xogħol nies bħalu jfittex. Ħierek tfisser xi ħadd li jitħarrek, jiġifieri li jmidd idejh għax-xogħol.
Ħidma għal Alla ma titħallasx.
Azzjoni tajba kif irid Alla ma tistax titħallas bi flus materjali.
Tiġieġa li tfelles tajjeb għożżha.
Ibża' għat-tiġieġa li tfaqqas il-bajd, bl-istess mod li għandek tibża' għal min jaħdem u jistinka fin-negozju tiegħek.
Issensel u trempel fl-aħħar il-qanpiena ċċempel.
Jeħtieġ li biċċa xogħol tibdieha biex ikollok tama li xi darba teħlisha.
Il-ħalliel ma jneżżax għarwien.
Min m'għandux flus ma jistax jgħin lil min għandu.
Imċappas bid-demm u laħam ma jikolx.
Tagħmel ix-xogħol inti u ġieli tispiċċa ma tgawdi xejn minnu.
Ħidma ta’ sena marret f’siegħa.
Qawl dwar il-logħob tan-nar iżda li japplika wkoll b'mod ġenerali: tkun ilek sena taħdem qatigħ fuq xi ħaġa biex fl-aħħar mill-aħħar tgawdiha għal ftit ħin biss.
Fost l-ixirka min jaħdem u min għażżien.
Hemm min jaħdem u hemm min ma jrid jagħmel xejn.
Is-sahra u t-tbakkir, iż-żina tal-Maltin.
Il-Maltin magħrufin għal kemm ibakkru (iqumu kmieni) u jaħdmu bi ħġarhom fit-tul.
Tiġieġa ħawtiela bajjada.
Tiġieġa bieżla tagħmel bajd sabiħ, bħal min jistinka biex jagħti prodott sabiħ. Ħawtiela tfisser ħabrieka u bajjada tfisser li tbid.
Għal naqra melħ tħassarx il-borma.
Għal naqra, agħmel ix-xogħol sew.
Għajnejn sidha jimlewlha żaqqha l-baqra.
Kulħadd iqis li xogħlu jiswa ħafna flus.
Baħri u burdnar qatt ma ssibu kuntent.
Il-baħrin u l-burdnara kellhom xogħol diffiċli ħafna.
Tiġieġa li tfelles tajjeb għożżha.
Ibża' għat-tiġieġa li tfaqqas il-bajd, bl-istess mod li għandek tibża' għal min jaħdem u jistinka fin-negozju tiegħek.
Aħjar waħda maħruqa minn tnejn nejja.
Aħjar tagħmel biċċa xogħol mhux perfetta milli ma tagħmel xejn.