Qwiel Maltin | Maltese Proverbs | Il-bieżel ma jsib l-ebda triq magħluqa.

L-għażżien xogħlu għali.

Jekk tħaddem għażżien, tħallsu wisq għall-ftit xogħol li jagħmel.

Kisra tal-art ħelwa u tal-baħar morra.

Ix-xogħol ta' fuq il-baħar huwa ferm iżjed diffiċli mix-xogħol fuq l-art. Kisra tirreferi għal kisra ħobż.

Jekk ma taqsamx il-bħajjar ma tkunx tista’ tnajjar.

Kien jeħtieġ li l-baħrin imorru jaħdmu fuq il-baħar 'il bogħod minn familthom biex jaqilgħu x'jieklu. Bħajjar huma oċeani u tnajjar tfisser tkampa.

Il-mostra mhix ġostra.

Tgħallem apprezza x-xogħol ta' ħaddieħor, minflok tipprova tleħħaq miegħu.

Ix-xogħol jeqred il-fies u l-vizzju jeqred in-nies.

L-għodod tax-xogħol jinqerdu bl-użu, iżda l-vizzji jeqirdu l-bniedem. Fies huwa tip ta' għodda li taqta' l-ġebel.

Id-denb dejjem iniggeż.

L-aħħar naqra ta' biċċa xogħol dejjem tidher twila u diffiċli.

Ħidma ta’ sena marret f’siegħa.

Qawl dwar il-logħob tan-nar iżda li japplika wkoll b'mod ġenerali: tkun ilek sena taħdem qatigħ fuq xi ħaġa biex fl-aħħar mill-aħħar tgawdiha għal ftit ħin biss.

Ċallas ballas ħażin taħdem u agħar titħallas.

Ix-xogħol li jsir ħażin ma ħaqqux jitħallas.

Aktar ma ndumu nakkordaw milli ndoqqu.

Qed naħlu iżjed ħin nippreparaw milli naħdmu.

Fost l-ixirka min jaħdem u min għażżien.

Hemm min jaħdem u hemm min ma jrid jagħmel xejn.

Inkella r-roqba, inkella l-ħobża.

Fil-passat ċerti xogħlijiet kienu riskjużi, bħal pereżempju xogħol il-baħħara, imma xorta kellu jsir biex taqla' x'tiekol u tgħajjex lill-familja. Ir-roqba tfisser l-għonq.