Il-kompetizzjoni għax-xogħol hija qalila.
Ħobż u basal u strieħ xħin tasal.
Qabel kienu jieqfu minn biċċa xogħol meta jlestuha biss, u mhux qabel. Kienet ħajja diffiċli.
Kisra tal-art ħelwa u tal-baħar morra.
Ix-xogħol ta' fuq il-baħar huwa ferm iżjed diffiċli mix-xogħol fuq l-art. Kisra tirreferi għal kisra ħobż.
Ħidma fil-btala tmur fis-siba u l-ħala.
Dari kienu jemmnu li Alla jikkastiga lil min jaħdem il-Ħdud u l-festi. Siba tfisser ħerba.
Ħidma u sabar sal-qabar.
Irridu naħdmu u nieħdu paċenzja sa mewtna.
Lenbi mġenġel tagħġinx fih.
Tużax għodda mkissra jew difettuża għax ix-xogħol ma joħroġx tajjeb.
Ix-xogħol jeqred il-fies u l-vizzju jeqred in-nies.
L-għodod tax-xogħol jinqerdu bl-użu, iżda l-vizzji jeqirdu l-bniedem. Fies huwa tip ta' għodda li taqta' l-ġebel.
Għal tal-aħħar m’hemmx palju.
Ma tistax tieħu l-mertu tax-xogħol li għamlu ta' qablek.
Jiekol bir-riħa u jħallas biċ-ċekċik.
Min ix-xogħol ma jagħmlux sew, ma jaqlax flus.
Baħri u burdnar qatt ma ssibu kuntent.
Il-baħrin u l-burdnara kellhom xogħol diffiċli ħafna.
L-għażżien xogħlu tqil.
L-għażżien ma jtajjarx xogħol.
Kulħadd irid jgħix fid-dinja.
Kulħadd għandu bżonn jaħdem biex jaqla' x'jiekol fid-dinja.
Ma tismax minni, ma tikolx ħobżi.
Jew tagħmel kif ngħidlek jiena, jew ma nqabbdekx tagħmel xogħol iżjed.
Ħidma fuq il-qalb qajla fejda fih.
Min imur fuq qalbu għax-xogħol sinjal li ma jħossux sodisfatt.
Il-ward ifuħ imma l-ħobż jagħtik ir-ruħ.
Ix-xogħol għandu jiġi qabel id-divertiment.
Bidu tajjeb nofs ix-xogħol.
Meta x-xogħol jibda bit-tajjeb l-affarijiet imorru sew u tgħaġġel iżjed.
Xogħol ta’ ħorrox borrox, imma l-istokk u ż-żebgħa jgħattu kollox.
Ix-xogħol ħażin hemm mezz kif jitranġa.
Il-ħmar ħaddmu għal rasu biex tkun taf x’jiswa.
Tara bniedem kemm hu kapaċi meta tħallih jagħmel biċċa xogħol waħdu.
Aktar ma ndumu nakkordaw milli ndoqqu.
Qed naħlu iżjed ħin nippreparaw milli naħdmu.
Kulħadd igerger minn xogħlu.
Kulħadd isib id-difetti fix-xogħol li jagħmel.
Ħidma għal Alla ma titħallasx.
Azzjoni tajba kif irid Alla ma tistax titħallas bi flus materjali.
Kulħadd jaqra fi ktiebu.
Kulħadd f'xogħlu jifhem.