Kulħadd jista' jieħu żball.
L-ewwel ma tiekol l-għajn.
L-ewwel ma ninnutaw hija d-dehra esterna tal-affarijiet, mela agħti kasha wkoll.
Illum jien u għada int.
It-tajjeb li mess lili llum imiss lilek għada, u l-istess bil-ħażin.
F’waqtha raqqagħha jekk ma tridx terġa’ taqtagħha.
Jekk saret xi ħsara pprova sewwiha mill-ewwel biex ma tkomplix tikber.
Israq ftit tirrokka żgur, israq ħafna u ssir sinjur.
Jekk tisraq ftit jaqbduk żgur, mentri jekk tisraq ħafna tieħu l-qagħda u tgawdi għax ma jaqbdukx.
Ġonġol imġenġel qatt ma jiġġenġel.
Il-ħażin, ħażin jibqa’.
Kulħadd jieħu li ħaqqu.
Meta tagħmel xi ħaġa ħażina, trid tkun lest tbati l-konsegwenzi.
Li kieku x-xuxa kienet żina ma tinbitx f’xaqqet it-tina.
Min huwa fartas m'għandux għalfejn iħossu ħażin ħdejn min għad għandu xagħru (= ix-xuxa), wara kollox is-suf kullimkien jikber, anke fix-xaqq tal-warrani (= it-tina).
Is-sewwa ħarbet għax ħadd ma ried jilqagħha f’daru.
Donnu ħadd ma sar jagħżel li jagħmel it-tajjeb illum il-ġurnata.
Id-dinja gaġġa tal-imġienen.
Fid-dinja l-loġika mhix ħaġa ovvja.
Il-ħadid ħażin dejjem mal-mola jmur.
In-nies ħżiena ma' xulxin jagħmluha. Mola hija dik li bl-Ingliż tissejjaħ grindstone.
Kelb għalkemm jixjieħ jibqa’ jigdem.
Bniedem ħażin ma jinbidilx, mhux imbilli jixjieħ.
La l-qalb mimlija, il-fomm jitbewwaq.
Kulħadd għandu raġuni għaliex jiftaħ qalbu.
Ebda warda bla xewk.
Is-sabiħ jiġi mal-ikrah fil-ħajja.
It-tiġieġa tbid fejn tiekol in-nuħħala.
Kulħadd irid iwieġeb ta' għemilu, kemm fit-tajjeb kif ukoll fil-ħażin.
Il-ħaxixa ħażina l-aktar li żżerragħ.
Il-ħażin malajr jinxtered. Iżżerragħ tfisser tagħmel iż-żerriegħa.
Fid-dinja mhux dejjem ir-rebbiegħa.
Ma tistax tistenna li kollox imur tajjeb fil-ħajja.
Agħmel is-sewwa u tibża’ minn ħadd.
Min jagħmel it-tajjeb jgħix trankwill.
Fid-dinja kollox frugħa; is-sabiħ filgħodu, filgħaxija tarah kruha.
Fid-dinja trid toqgħod attent għax id-dehra tqarraq bik.
Kull qalb trid oħra.
Meta tagħmel it-tajjeb ma' persuna, tistenna l-istess ħaġa mingħandha meta tiġi bżonn.
Kull min il-ħobż itellef, għalih ma jsibx jissellef.
Min jagħmel id-deni lil ħaddieħor, ma jsibx ġid mingħand ħaddieħor.
L-ilma jsaqqi l-ħatab u l-ħatab jgħalli l-ilma.
Tagħmel il-ġid mal-proxxmu, iżda dan ma jkunx rikonoxxenti.