Għal naqra, agħmel ix-xogħol sew.
Kategorija: ix-xogħol
Għal kull għadma hawn mitt kelb.
Il-kompetizzjoni għax-xogħol hija qalila.
Għal ħafna subien lesti l-bsaten u t-tmien, għal ħafna bniet lesti ċ-ċraret u l-biċċiet.
Dari s-subien biss kellhom opportunità għal karriera, il-bniet kienu jagħmlu biss ix-xogħol tad-dar. Tmien huma kpiepel.
Għajnejn sidha jimlewlha żaqqha l-baqra.
Kulħadd iqis li xogħlu jiswa ħafna flus.
Għajjur f’iklu, għajjur f’xogħlu.
Biex taqla’ x’tiekol trid taħdem u tistinka.
Fost l-ixirka min jaħdem u min għażżien.
Hemm min jaħdem u hemm min ma jrid jagħmel xejn.
Faħħar il-baħar u ibqa’ fuq l-art.
Tagħżilx li tmur fuq il-baħar għax huwa xogħol perikoluż.
F’xogħol ta’ ħorrox borrox l-istokk u ż-żebgħa jgħattu kollox.
Ix-xogħol ħażin hemm mezz kif jitranġa.
Dejjem tikber is-silla, iżda l-ħmar mhux dejjem jirgħa minnha.
Tagħmel ix-xogħol inti u ġieli tispiċċa ma tgawdi xejn minnu.
Xogħol ta’ ħorrox borrox, imma l-istokk u ż-żebgħa jgħattu kollox.
Ix-xogħol ħażin hemm mezz kif jitranġa.
Dak li ma sarx f’mitt sena mhux se tagħmlu f’jum.
Biex issir xi ħaġa hemm bżonn taż-żmien u l-paċenzja, ma tistax tagħmilha malajr biex teħles.
Dak li ma qattax bi snienu qattgħu bi lsienu.
Minflok ħadem, qagħad jgħid fuq in-nies minn wara daharhom.
Dak li għandek tirhan bigħu.
Jekk għandek xi ħaġa x’tagħmel agħmilha minnufih.
Dak li għandek tagħmel aħseb għalih kmieni.
Jekk għandek xi ħaġa x’tagħmel agħmilha minnufih.
Dak bħas-siġra tal-luq, la tiekol minnha u lanqas idduq.
Min ma jridx jaħdem xejn ma tieħu mingħandu.
Ċallas ballas kif taħdem titħallas.
Ix-xogħol li jsir ħażin ma ħaqqux jitħallas.
Ċallas ballas ħażin taħdem u agħar titħallas.
Ix-xogħol li jsir ħażin ma ħaqqux jitħallas.
Bl-ulied kollha jaqilgħu xi sold, il-missier jista’ jibni fil-fond.
Il-paga tal-ulied isservi wkoll għall-familji li jbatu finanzjarjament.
Bix-xogħol ħotba tagħmel.
Hemm xi wħud li b’xogħolhom xorta waħda ma jleħħqux mal-ħajja, u jkollhom jaqilgħu l-flus minn xogħlijiet oħrajn.
Bis-swat u biż-żmien jitbiżżel l-għażżien.
Bit-tbatija li jġib fuqu nnifsu, l-għażżien ikollu jitgħallem ikun bieżel ukoll.
Bin is-sengħa għandu nofsha.
L-ulied jirtu ħafna aspetti tal-karattru mill-ġenituri tagħhom.
Bil-prattika biss li wieħed jieħu ħaġa sewwa.
Bil-prattika l-aħjar li titgħallem.
Bil-kliem biss ma nagħmlu xejn.
Ma jsirx xogħol bil-paroli.
Bil-jekk u bil-jewwilla ma timla ebda bixkilla.
L-affarijiet isiru bil-fatti mhux bil-paroli.
Bil-ftit tal-għira kollox jieħu x-xejra.
Biex tagħmel biċċa xogħol tajba trid tagħmel moħħok hemm.
Biex tgawdi jeħtieġ tbati.
Xejn ma tagħmel mingħajr tbatija.
Biex taqbad il-ħut trid tqum kmieni.
Hemm bżonn tbakkar biex ittella’ x-xogħol.
Bidu tajjeb nofs ix-xogħol.
Meta x-xogħol jibda bit-tajjeb l-affarijiet imorru sew u tgħaġġel iżjed.
Bidu bil-għawġ tmiem ħażin.
Meta biċċa xogħol tibda ħażin kollox jibqa’ sejjer ħażin.
Binhar fuq il-bjut u billejl taħli ż-żjut.
Matul il-ġurnata ma jaħdimx imbagħad ipattilu billi jaħdem billejl.
Bewla bla bassa, kastell bla għassa.
Kull aspett minn biċċa xogħol għandu jsir tajjeb.
Bewla bla bassa, torri bla għassa.
Kull aspett minn biċċa xogħol għandu jsir tajjeb.
Bastiment b’bosta kaptani jmur travers.
Meta jkun hemm ħafna nies involuti f’biċċa xogħol l-affarijiet ma jimxux sew.
Baħri u burdnar qatt ma ssibu kuntent.
Il-baħrin u l-burdnara kellhom xogħol diffiċli ħafna.
B’idek il-waħda agħġen u bl-oħra keċċi l-qattusa.
Meta tkun għaddej b’biċċa xogħol, ara li ma jkunx hemm min iħarbatlek kollox.
Aktar ma ndumu nakkordaw milli ndoqqu.
Qed naħlu iżjed ħin nippreparaw milli naħdmu.
Tiġieġa li tfelles tajjeb għożżha.
Ibża’ għat-tiġieġa li tfaqqas il-bajd, bl-istess mod li għandek tibża’ għal min jaħdem u jistinka fin-negozju tiegħek.
Tiġieġa ħawtiela bajjada.
Tiġieġa bieżla tagħmel bajd sabiħ, bħal min jistinka biex jagħti prodott sabiħ.
Aħjar waħda maħruqa minn tnejn nejja.
Aħjar tagħmel biċċa xogħol mhux perfetta milli ma tagħmel xejn.
Aħjar tishar milli tbakkar.
Dak li għandek tagħmel agħmlu llum, mhux għada.
Aħjar tirfes l-irfis ta’ newlek milli għadbiet il-muliel.
Dejjem aħjar taħdem għal rasek milli jkollok taħdem għan-nies.
Alla jxiegħel lill-battal.
Donnu x-xogħol Alla jagħtih lil min ma jaħdimx.