Daż-żmien in-nies saru jafu minn fejn għandhom jgħaddu biex jiksbu li jridu.
Ħadd ma jara ħotobtu għax jaqa’ u jmut zoptu.
Tidħaqx bid-difetti ta' ħaddieħor għax id-difetti tiegħek huma ferm akbar.
Hemm min jitkellem u hemm min iqarar.
Kulħadd għandu karattru differenti.
Il-qassis temmnux ħlief fil-quddiesa.
Bħalma qassis jista' jġib ruħu mod ieħor minn dak li jippritkalek waqt il-quddiesa, hekk ukoll in-nies l-oħra.
In-nies ma tixxibahx u kulħadd fehmtu.
Kulħadd bil-fehmiet u l-gosti tiegħu.
“Jaħraq dinha l-għaġla,” qalet il-fekruna xħin telgħet tarġa u waqgħet tnejn.
Il-fekruna tagħmel li għandha tagħmel minkejja kollox, u bl-istess mod il-bniedem għandu jaħdem u ma jitgħażżinx.
Fil-logħob min jitlef jitlef, iżda min jirbaħ jitlef ukoll.
Fil-logħob tal-azzard qatt ma tirbaħ tassew għax il-vizzju tal-logħob huwa ikrah u jwassal għal ħafna inkwiet.
Il-kelb il-mutu ibża’ minnu.
Oqgħod attent minn min jidher kwiet, iżda jkollu intenzjonijiet ħżiena.
Kulħadd jara bin-nuċċali tiegħu.
Kulħadd jara l-affarijiet mill-perspettiva tiegħu.
Id-dawran ta’ billejl qatt ma jġib ġid.
Min joħroġ jiġġerra billejl mhux tal-affari tiegħu.
Għal kull ħatba hawn mannara.
Toqgħodx taħseb li inti aħjar minn ħaddieħor, għax malajr issib lil xi ħadd eżatt bħalek.
Min iħalli leħitu f’idejn it-tfal inittfuhielu.
Min ikun wisq twajjeb ma' wliedu, jagħmlu li jridu bih.
Min idarri jħarri.
Jekk ma tgħinx lil ħaddieħor jegħleb il-vizzji tiegħu, tkun qed tkun kompliċi mad-deni li jagħmel lilu nnifsu. Iħarri tfisser iħassar.
Anġlu man-nies, xitan id-dar.
Quddiem in-nies iġib ruħu sew imma d-dar iġib ruħu ħażin.
Is-supperv qatt ma rrenja.
Min hu supperv ma jkampax, għax x'aktarx ma jkollux raġun.
Il-logħob jilagħbek hu.
Min ikollu l-vizzju tal-logħob jispiċċa jitqarraq u jitlef ħafna flus.
Mhux dik li tikxef id-dublett biss tissejjaħ qaħba.
In-nies diżonesti kullimkien issibhom, anke min mingħalik mhux t'hekk.
Kull għuda għandha susitha.
Kulħadd għandu xi difett. Għuda tfisser injama, u susitha tfisser is-susa tagħha.
Il-kelb in-nebbieħ ma jigdimx.
Jitlagħlu malajr u jagħmel ħafna storbju, iżda ma jagħmillekx ħsara.
Jew jilgħab jew ikeskes.
Bniedem manipulattiv, jew jimmanipula hu jew jipprova jdawwar lil ħaddieħor għall-iskopijiet ta' moħħu.
Kulħadd ikollu xi imma.
Kulħadd lejn l-interessi tiegħu jħares.
Kulħadd kif inhu magħġun.
Kulħadd bil-karattru tiegħu, bit-tajjeb u l-ħażin b'kollox.