Il-bniedem twieled għarwien u jindifen liebes jekk ikeffnuh.Nitwieldu mingħajr ġid materjali u bl-istess mod immutu u ma nieħdu xejn magħna.
Jekk il-mejjet iqum minn qabru jinsab minn jeħodlu postu.Fid-dinja kollha mmutu wieħed wara l-ieħor, ħadd ma jeħlisha.
Min jibla’ wisq imur f’qasir il-għomor.Min jiekol iżżejjed, jiżdied ħafna fil-piż u minħabba l-ħsara li jagħmel lil ġismu, imut.
Il-mewt isserraħ u l-qawwa tferraħ.La mmutu neħilsu mit-tbatija, imma sakemm jasal dak il-mument jeħtieġ ingawdu l-ħajja.
