Iż-żgħażagħ jitqarrqu għax jaħsbu li l-anzjani boloh, iżda l-anzjani jafu biċ-ċert li ż-żgħażagħ boloh għax daqshom kienu xi darba.
Iż-żagħżugħ iġennen u x-xiħ idellel.
Iż-żgħażagħ jiġġennu wara xulxin u jiddrammatizzaw, iżda l-anzjani huma iżjed galbati minħabba t-tiġrib tal-ħajja. Il-verb dellel ifisser li tittratta lil xi ħadd tajjeb ħafna.
Frotta misjura ruħha fi snienha.
Bħal frotta misjura li tkun waslet biex titħassar, il-ħajja tax-xiħ tkun waslet fl-aħħar.
L-għaġuża eħżen mix-xitan.
L-anzjani makakki u ma tagħmilx bihom li trid. Għaġuża hija mara xiħa.
Iż-żmien l-aqwa galantom.
Biż-żmien tkun taf aħjar x'deċiżjoni għandek tieħu.
Biġġel għax iż-żmien ibiddel.
Jekk tittratta lil ta' madwarek ħażin, għad jiġi żmien fejn huma jittrattawk ħażin. Biġġel tfisser irrispetta.
Daqqa bajda u daqqa sewda, u ż-żmien għaddej.
L-affarijiet ġieli jiġu tajbin u ġieli jiġu ħżiena, iżda l-ħajja tkompli u ż-żmien jgħaddi.
Iż-żmien kollox itemm.
Biż-żmien kollox jispiċċa.
Meta ħaġa ttul ixxebba’.
L-affarijiet iġġebbidhomx bla bżonn, eħlishom.
Ħares lejn snieni u eħlisni kmieni.
L-anzjani għandhom jinqdew qabel ħaddieħor, ħabba li saħħithom hija iżjed fraġli.
Iż-żmien jiġri fuq id-debba.
Iż-żmien malajr jgħaddi.
Agħar hu minn zokk tal-fiġel li aktar ma jikber aktar jixraf.
Aktar ma jixjieħ, aktar imur għall-agħar.
Li ma jiġrix f’sena jiġri f’siegħa.
Diffiċli tbassar dak li għad jiġri fil-futur.
Għax-xiħa taħdit u l-imgħażel.
Dari n-nisa xjuħ ma kellhomx biex jedhew ħlief fil-paroli u fl-insiġ. L-imgħażel huwa għodda għall-insiġ.
Bis-sabar u biż-żmien kollox jasal fit-tmiem.
Bil-paċenzja u ż-żmien kollox jasal u jispiċċa.
It-tagħlim fil-kbar bħall-qris fil-ħmar.
Meta tkun għadek żgħir, moħħok ikun iżjed frisk u titgħallem malajr. Meta tikber, il-moħħ jitgħallem iżjed bil-mod.
Bikja u maħta u kollox imur fis-saħta.
Ħajjet il-bniedem qasira ħafna u mimlija tbatija. Fl-aħħar mill-aħħar, kulħadd imut u jintesa.
Kull jum jitrod wara l-ieħor u jgħaddu l-ġmiegħ u s-snin.
Iż-żmien malajr jgħaddi. Jitrod, mill-verb tarad, tfisser isegwi. Ġmiegħ tfisser ġimgħat.
Frotta misjura ruħha fi snienha.
Bħal frotta misjura li tkun waslet biex titħassar, il-ħajja tax-xiħ tkun waslet fl-aħħar.
Ixjeħ m’aħna, itqal qantarna.
Fil-ħajja l-ħin kollu ġġarrab, u fi xjuħitna dan it-tiġrib ikompli dejjem jiżdied.
Iż-żmien kollox itemm.
Biż-żmien kollox jispiċċa.
Approfitta ruħek miż-żmien.
Taħlix żmien, użah tajjeb.