Ċerti nies ma tikkontrollahom b'xejn.
Il-fula bnina tagħmel il-fatra tqila.
Il-ful huwa ikel li jxebbgħek u jżommok.
Meta titla’ l-berwieqa, l-annata tkun sabiħa.
Meta tara li l-berwieq (Asphodelus) kiber u għola, sinjal li l-uċuħ tar-raba' ser jirnexxu.
Il-ħarifa tbiddel l-arja u l-ħalib jitla’ fl-ajru.
Dari kien ikun hawn inqas ħalib fil-ħarifa u b'hekk il-prezz kien jogħla (= jitla' fl-ajru).
Ittendi għall-bikri u għall-bikrija għax bħalhom tkun il-bqija.
Meta tiżra' bikri u fil-waqt jirnexxi x-xogħol.
Il-bagħal issemmnu jagħtik bis-sieq.
Tagħmel il-ġid ma' xi ħadd u minflok jibqa' jafhulek, jagħmillek il-ħsara.
Fart li jiekol il-widna jagħmel il-laħam bil-wiżna.
Il-bhejjem tal-ifrat li jieklu l-widna (tip ta' ħaxixa selvaġġa) jagħmlu ħafna laħam għax malajr jismnu.
Kulma tara b’għajnejk kollu ġej mill-art; min lilha jħaddem tajjeb la jbati ġuħ u lanqas bard.
Dari, min jaħdem ir-raba' kien jgħix ħajja tajba ħafna.
Fenka mgħammra tagħtik għal fuq il-ġamra.
Il-fniek ikollhom boton żrameġ kbir u għalhekk ikollok x'tiekol.
Bajda tas-sultan titħallas b’dundjan.
Akbar ma jkun l-obbligu li jkollok lejn xi ħadd, aktar se jkollok xi trodd lura.
B’li fiha u b’li timla jinbiegħ bil-bixkilla.
Il-patata dari kienu jixtruha bil-ħamrija u l-bixkilla b'kollox.
Mill-Fiddien il-qamħ joħroġ bil-kejjiel u l-qoton joħroġ bil-wiżżien.
L-art tal-Fiddien hija għammiela ħafna. Bil-kejjiel u bil-wiżżien tfisser fi kwantitajiet kbar.
Meta jispiċċa l-bettieħ, is-senduq jimla li fih għax il-bajd bil-għali jinbiegħ.
Lejn l-aħħar tas-sajf (= meta jibda jispiċċa l-bettieħ), dari kien jogħla l-prezz tal-bajd għax it-tiġieġa tkun diġà bdiet terfa', jiġifieri tieqaf tbid il-bajd.
Baqra tidres fuq l-andar, ġid fuq ġid.
Il-baqra li tintuża għad-dris f'għalqa tagħmel ħafna ġid.
Il-ħmar jinġabar meta ġej it-temp.
Il-ħmar jinduna li jkun ġej il-maltemp u jidħol jistkenn.
Iżra’ tajjeb u fil-waqt biex ma jibdielek qatt.
Agħmel kollox fil-ħin jew fiż-żmien opportun biex qatt ma jiddispjaċik, bħalma tiżra' skont l-istaġuni.
Meta ż-żara’ jorqod, is-sid iqum.
Meta l-bidwi jkun żara' l-għalqa, jeħtieġ joqgħod magħha ma jmurx jisirqulu xogħlu.
Iderri d-dqiq u jiġbor in-nuħħala.
Jagħti aktar kas ta’ xi ħaġa li mhix importanti u jinsa ħaġa oħra iżjed importanti. Iderri tfisser ixerred.
L-użu tal-fies jiswa biex titma’ u tlibbes in-nies.
Jeħtieġ taħdem u tistinka għall-ġid tal-familja.
Fix-xagħra xejn ma jeħxien u kollox xagħar joħroġ.
Fir-raba' xagħri ma tista' tkabbar xejn.
Ilwi d-dielja meta għadha żarġuna.
Il-karattru jissawwar fit-tfulija, bħal meta fergħa żgħira (żarġuna) tad-dielja tkun għadha tista’ tiltewa.
Aħjar kromba bagħlija minn mija saqwija.
Il-kaboċċa li tikber f'ħamrija bagħlija aħjar minn ħafna li jikbru f'ħamrija saqwija.