Jekk tittratta lil ta' madwarek ħażin, għad jiġi żmien fejn huma jittrattawk ħażin. Biġġel tfisser irrispetta.
Iġġorr, iġġorr, iġġorr sakemm il-bajda ttorr.
Xejn ma jsir f'daqqa, kollox irid iż-żmien tiegħu. Ittorr tfisser tbid.
Kategoriji: iż-żmien | l-annimali
Akbar sena, aktar mitt sena.
Min għandu iżjed żmien minnek dejjem ser ikollu iżjed esperjenza tal-ħajja.
L-għaġuża eħżen mix-xitan.
L-anzjani makakki u ma tagħmilx bihom li trid. Għaġuża hija mara xiħa.
Għaddew is-snin minn fuqek, issa fik jirgħa l-bebbux.
Is-sbuħija ta' meta tkun għadek żagħżugħ(a) mhix eterna, irridu nixjieħu u nikriehu.
Tikber u titgħallem.
Nitgħallmu ħafna affarijiet biż-żmien.
Iż-żmien jgħaddi u l-għomor jonqos.
Aktar ma jgħaddi ż-żmien, aktar tiqsar ħajjitna.
Iż-żmien itul u l-qrun idur.
Ċerti fehmiet u drawwiet jinbidlu maż-żmien.
Agħar hu minn zokk tal-fiġel li aktar ma jikber aktar jixraf.
Aktar ma jixjieħ, aktar imur għall-agħar.
Ħadt il-ġmiel, il-flus u ż-żgħożija u ma baqagħlix ħlief l-inxiefa u l-kruhija.
Iż-żmien kollox jeħdilna bil-mod il-mod.
Iż-żmien jgħaddi u jnessi.
Iż-żmien itaffi l-weġgħat tal-passat.
Biż-żmien kollox jintesa.
L-affarijiet jintesew biż-żmien.
Dan mhu xejn, il-kbir għadu ġej.
Dak li għaddejjin minnu issa mhux gravi daqs dak li hemm jistenniena fil-futur.
Il-ħmar ix-xiħ issa jorqos u issa jistrieħ.
Meta nixjieħu nibdew nimirdu iżjed u nitilfu saħħitna. Jorqos tfisser izappap.
Iż-żmien itul u l-ħsieb idur.
Ċerti fehmiet u drawwiet jinbidlu maż-żmien.
Alwett bil-gziez, xita bil-qliel.
Kollox għandu żmienu. L-alwett huwa tip ta' għasfur u joħroġ fit-temp milwiem.
La għandek iż-żmien taħlihx.
Qis li ż-żmien tużah tajjeb.
Iż-żmien għama minn għajnu u trux minn widintu; daqqa hekk u oħra hekk.
Il-bidliet li ż-żmien iġibilna f'ħajjitna mhumiex dejjem faċli.
Iż-żagħżugħ iferrħek u x-xiħ idejqek.
Iż-żgħażagħ iġibu magħhom il-ferħ għax għadhom fil-bidu ta' ħajjithom, filwaqt li x-xjuħ iġibu d-dwejjaq għax ikunu waslu fl-aħħar ta' ħajjithom. Sens ieħor huwa li l-ġdid dejjem jogħġobna iżjed mill-qadim.
Il-bniedem jikber u l-qalb tiċkien.
Aktar kemm nixjieħu, aktar inħossuhom l-emozzjonijiet.
Iż-żmien li titlef ma terġax iġġibu.
Jeħtieġ li ż-żmien tużah tajjeb, għax ma jerġax jiġi lura.
Li għadda nafuh, li ġej nobsruh.
Ma tkunx taf eżatt x'ser jiġri fil-futur.