Kull ħaġa għandha s-sabiħ u l-ikrah tagħha.
Kelb għalkemm jixjieħ jibqa’ jigdem.
Bniedem ħażin ma jinbidilx, mhux imbilli jixjieħ.
Kategoriji: il-ħażin | l-annimali
Il-ħsieb ħażin iqarraq u jfalli f’ħin.
Toqgħodx taħseb ħażin għax spiss titqarraq.
Agħmel is-sewwa u tibża’ minn ħadd.
Min jagħmel it-tajjeb jgħix trankwill.
Aħjar hekk inkella agħar.
Aħjar nieħdu paċenzja bil-ħażin li ġara, dejjem setgħet ġiet agħar.
Il-ħaxixa ħażina malajr tikber.
Il-ħażin malajr jinxtered.
Ftit u tajjeb aħjar minn ħafna u ħażin.
Aħjar dak li għandu jsir, isir bil-mod u tajjeb.
Fuq tlieta toqgħod il-borma.
Ma' kull ħaġa tajba jew ħażina li tiġri, stenna tnejn oħra!
Kulħadd bniedem.
Kulħadd tad-demm u l-laħam u kapaċi jagħmel żball.
Dak li jidħol mill-gerżuma ‘l ġewwa kollu sewwa.
Bħalma l-bniedem jiekol biss ikel tajjeb, hekk ukoll jaf jagħżel it-tajjeb mill-ħażin.
La tiġi iftħilha l-bieb.
Ladarba jibda l-inkwiet ma jkun irid jieqaf b’xejn.
Armi l-ħażin u żomm it-tajjeb.
Qis li dejjem tagħżel l-aħjar.
Il-ftit u tajjeb aħjar mill-wisq u ħażin.
Aħjar tagħmel ftit u tajjeb milli tipprova tagħmel ħafna u ħażin.
It-triq tan-nofs l-aħjar.
L-estremi dejjem ħżiena - tgħallem immodera.
Kulħadd jieħu li ħaqqu.
Meta tagħmel xi ħaġa ħażina, trid tkun lest tbati l-konsegwenzi.
Il-kelb in-nagħaj idejjaq in-nies tad-dar u tal-ġar.
Superstizzjoni Maltija tgħid li l-klieb li jingħu jbassru xorti ħażina.
Il-fortuna mal-ħmir u s-skaren.
Ix-xorti tidħaq lin-nies injoranti u lis-sakranazzi.
Għal kull lagħqa għasel hemm bettija morr.
L-affarijiet sbieħ li jiġru fil-ħajja huma ftit meta tqabbel mal-affarijiet koroh kollha.
It-twajjeb miskin.
Min ikun twajjeb wisq ibati għax kulħadd jagħmel li jrid bih.
La l-qalb mimlija, il-fomm jitbewwaq.
Kulħadd għandu raġuni għaliex jiftaħ qalbu.
Il-logħob tal-idejn iweġġa’ l-għajnejn.
Il-logħob tal-idejn m'għandux ikun.
It-triq tal-ġenna dejqa.
Diffiċli ħafna li tgħix ħajja tajba u tirbaħ il-ġenna.