Min hu finanzjarjament batut għandu bżonn l-għajnuna, imqar biex jixtri x'jiekol u jixrob.
L-ikel ma jiġix mix-xejn.
L-ikel bil-flus jinxtara, u trid taħdem għalihom.
Bil-flus ħadd ma jixtri l-ġenna.
Il-flus importanti biss f'din il-ħajja, la tmut m'intix ser teħodhom miegħek.
Aħżen ix-xemx mis-sajf għax-xitwa.
Faddal il-flus għax ma tafx x'għad tiġi bżonn.
Il-fqir kollox jara kbir.
Għall-fqir kollox jiswa wisq flus.
Il-flus ma ssibhomx fit-triq.
Il-flus trid taħdem għalihom.
Il-knisja qattara tieħu kemm tieħu qatt ma tara.
Il-knisja dejjem bżonn il-flus għall-manutenzjoni.
Il-flus u l-qdusija t-tnejn moħbija.
Qatt ma tista’ tkun taf dak li jkun kemm għandu flus, jew kemm hu bniedem twajjeb.
Is-siegħ imlieh u li jibqa’ aħlih.
Trid l-ewwel tara kif ser tagħmel il-flus biex ikollok il-lussu tberbaqhom. Siegħ huwa unità ta' kejl tal-art (~187.4 m2).
Aħjar ġerrejja tiġbor ġieħha milli fqir isir sinjur.
Aħjar il-ħażin li jsir tajjeb, milli l-fqir isir sinjur - il-flus jitilgħulu għal rasu.
Aħjar għerfek minn mielek.
Aħjar tkun bniedem intelliġenti minn bniedem tal-flus. Mielek tfisser ġidek.
Il-ġuħ itejjeb il-ħobż.
Meta tkun nieqes minn xi ħaġa, tapprezza ħafna iktar meta tasal.
Min għandu l-flus għandu kollox.
Bil-flus tagħmel il-kapriċċi kollha li trid.
Fil-għaks u d-diqa tinġibed il-biqa.
Min m'għandux flus ma jaħlix. Il-biqa hija l-ħasil tal-ħaxix.
Bil-pont tas-sahra żżomm il-ħmara.
Jekk il-mara tkun taf tħit, il-familja tiffranka l-flus.
L-irħis għali.
Ixtri oġġett ta' kwalità tajba u li jservi, għax tispiċċa tonfoq iżjed flus biex tibdel oġġett ta' kwalità inferjuri li jinkiser mill-ewwel.
L-għaks jiżrob il-qalb.
Il-faqar iġib id-dwejjaq. Jiżrob ġejja minn żarab, li tfisser opprima.
Il-flus għandhom iċ-ċirku u malajr jaqbdu n-niżla.
Il-flus malajr jisparixxu malli tibda tonfoqhom.
Għal min hu baħħ, aħjar iff inkella aħħ.
Min m'għandux jew ma jridx jonfoq flus (= baħħ), aħjar jeqred bis-sħana (= iff) milli bil-bard (= aħħ), għax il-ħwejjeġ jiswew il-flus.
Dak li jħarbat u jqatta’ ma jibqagħlux biex jitgħatta.
Min iħarbat il-flus ma jifdallu xejn.
Iż-żaqq tal-bniedem hija ħela.
Tonfoqx iżżejjed fl-ikel.
Is-siba kien u jkun, imma l-ħlas fl-aħħar irid ikun.
Għalxejn tippostponi d-djun li għandek, xi darba jew oħra jridu jitħallsu. Siba (bl-aċċent fuq it-tieni sillaba) tfisser ħlas li jasal aktar tard.