Ma jimpurtax jekk spiċċajt bla flus, erġa' ibda aħdem għalihom. Il-ħwietem huma ċ-ċrieket.
Fejn m’hemmx bini u ħamrija m’hemmx sinjurija.
Min għandu l-artijiet u l-proprjetà għandu l-flus.
Kategoriji: il-flus
Id fl-ilma ma tagħdirx id fin-nar.
Min huwa komdu fil-flus ma jagħdirx lil min forsi iżjed batut.
Fil-qorti r-rebbieħ tellief.
Tiftaħ kawża l-qorti tant fiha spejjeż li jekk tirbaħha xorta tkun tlift ħafna flus.
Ħlas bil-meher u t-tiġbid jieħu qligħ l-imgħax.
Jekk sellift il-flus qis li jħallsuk l-imgħax (= l-interessi) ukoll, u taċċettax l-iskużi ta' min joqgħod iġebbed u jgħidlek li se jħallsek wara (=bil-meher).
Il-flus u t-tjieba t-tnejn giddieba.
Qatt ma tista’ tkun taf dak li jkun kemm għandu flus, jew kemm hu bniedem twajjeb.
Il-flus huma mitraħ tax-xewk.
Il-flus iġibuk f’inkwiet kbir. Mitraħ huwa saqqu.
Il-ħela jfaqqar.
Min jaħli l-flus ikun qed jiftaqar.
Aħjar disa’ rbajja’ u rieqed minn skud u mqajjem.
Min hu għażżien jippreferi jaħdem inqas għal ftit flus, milli jaħdem iżjed għal aktar flus.
Ħmar taqilgħu tikxiflux snienu biex tara kemm snin għandu.
Jekk xi ħadd għoġbu jagħtik xi ħaġa bla ħlas, irringrazzjah u toqgħodx tistaqsih ħafna mistoqsijiet dwarha.
Ġimgħa bla ħlas, ġisem bla ras.
Kulħadd jistenna li jitħallas ta' xogħlu, bla paga ma tgħixx.
Il-ħobż artab biex tieklu, iżda iebes biex taqilgħu.
Biex taqla' l-flus diffiċli, iżda biex tonfoqhom faċli ħafna.
Id-dejn tħallsu darbtejn.
Id-dejn jiġi jiswiek ħafna fuq żmien twil.
Il-midneb wara li jiekol jibred.
Min jibda mix-xejn u jagħmel suċċess, hemm ċans li jitlagħlu għal rasu u jitkabbar. Jibred hawn tfisser li ma jibqa' jimpurtah minn xejn.
Bil-ġmiel biss ma nimlewx żaqqna.
Fl-antik il-flus tad-dota kienu importanti ħafna fiż-żwieġ; is-sbuħija tal-mara ma kenitx biżżejjed.
Dak li jibża’ mill-kera għandu jmut fl-għera.
Min m'għandux biex iħallas il-kera m'għandux fejn joqgħod.
Geddumu fix-xgħir, ma jiftakarx f’meta kien fqir.
Issa li stagħna, nesieh iż-żmien fejn kien fqir u m'għandux simpatija għal ħaddieħor. Jekk ix-xgħir jikber u jasal sa geddumek, mela għandek il-ġid.
Il-ħobż tal-fqir iebes.
Min m'għandux flus jgħix ħajja ta' tbatija.
B’xejn ma jsir xejn.
Bla flus ma tagħmel xejn.
Il-fqir kollox jara kbir.
Għall-fqir kollox jiswa wisq flus.
Aħżen la ssib għax jiġi żmien li ssum bla ma trid.
Faddal il-flus għax ma tafx x'għad tiġi bżonn.
Fejn iżżarrad iċċarrat.
Min m'għandux flus kull ftit li jkollu jonfoq joħroġ minn qalbu.