Aħjar ma jkollok xejn u wara tagħmel suċċess, milli bil-kontra.
Aħdem għal ħabba u għodd ruħek mal-battal.
Aħjar taħdem għal ftit flus milli toqgħod ma tagħmel xejn.
Kategoriji: il-flus
Fejn tqarrem il-mogħża jinsteħet.
Min m'għandux flus jaħtaf kulma jsib quddiemu. Tqarrem tfisser tgerrem.
Il-qies aqwa mill-qligħ.
Għalxejn taqla' ħafna flus biex imbagħad tberbaqhom kollha.
Għal min tagħmel tajjeb ħallas.
Ladarba tkun ħadt deċiżjoni, jeħtieġ li tkun responsabbli u żżomm magħha.
Ħobż tax-xgħir, għasel f’dar il-fqir.
Min m'għandux flus ikollu jikkuntenta bi ftit.
Bla flus la tgħannaq u lanqas tbus.
Bla flus imkien ma tasal.
B’daqshekk il-bastiment mhux ser jagħmel l-ilma.
Billi tonfoq naqra iżjed flus f'xi ħaġa, m'intix ser tiżbanka.
Diqa u faqar agħar mill-mewt.
Aħjar tmut milli tgħix imdejjaq u bla flus.
Il-ġuħ qabel ir-ruħ.
Ir-reliġjon mhix biżżejjed meta tkun f'sitwazzjoni finanzjarja miżerabbli.
Il-flus isiru jew b’rebħa, jew b’xi wirta, jew b’xi sejba.
Issir sinjur huwa diffiċli ħafna sakemm ma tirbaħx xi lotterija, tiritx lil xi ħadd jew issibx il-flus xi mkien.
Aktar ma niekol, inqas nara.
Jekk tiekol l-ikel kollu li jkollok fil-platt ma tibqax tarah, bl-istess mod li jekk tonfoq ġidek kollu ma jifdallek xejn.
Aħżen il-muna u mur ċeppuna.
Qabel ma tagħmel xi bluha li ħabba fiha tmur il-ħabs, qis li familtek ikollha l-mezzi biex tgħix.
Bil-ġmiel biss ma nimlewx żaqqna.
Fl-antik il-flus tad-dota kienu importanti ħafna fiż-żwieġ; is-sbuħija tal-mara ma kenitx biżżejjed.
Il-flus mhumiex ta’ min jagħmilhom, iżda ta’ min igawdihom.
Avolja jkollok il-flus, trid tkun taf tgawdihom.
Dak minn xelin jonqsu ħdax-il sold, dejjem minn irbiegħi jonqsu dsatax-il ħabba.
Min m'għandux flus ma jistax jiddeverti. Xelin kien fih tnax-il sold u l-irbiegħi kien fih għoxrin ħabba - kienu l-flus Ingliżi li kienu jintużaw Malta fil-Perjodu Kolonjali.
Bil-pont tas-sahra żżomm il-ħmara.
Jekk il-mara tkun taf tħit, il-familja tiffranka l-flus.
Għal min hu baħħ, aħjar iff inkella aħħ.
Min m'għandux jew ma jridx jonfoq flus (= baħħ), aħjar jeqred bis-sħana (= iff) milli bil-bard (= aħħ), għax il-ħwejjeġ jiswew il-flus.
Bil-flus ħadd ma jixtri l-ġenna.
Il-flus importanti biss f'din il-ħajja, la tmut m'intix ser teħodhom miegħek.
Aqla’ sold u onfoq sitta.
Tonfoqx iżjed flus milli taqla'.
Aħjar titwieled fqir u tmut sinjur.
Aħjar ma jkollok xejn u wara tagħmel suċċess, milli bil-kontra.
Għall-fqir il-qamar musbieħ u l-basal tuffieħ.
Hemm min tant m'għandux biex li lanqas il-bażiku bħad-dawl (il-musbieħ) u l-ikel (it-tuffieħ) ma jaffordja.